2Ch 35 | XteSC | STEP | Allah telepe pena tep, Raja Yosiadi Yerusalem mutu ila ati arum neitamai, Kaplemna Kailya kalepu. Akailya kalemna tep, pon domba bisamda, war tenpunge deiki, tanggal empat belas (14) tumi di, poprapidi kalepi.

2 Chronicles 35

Yosiadi Allah tep, “Telepe,” pepudi, Kaplemne Kalya kalepu upu

1 Allah telepe pena tep, Raja Yosiadi Yerusalem mutu ila ati arum neitamai, Kaplemna Kailya ^{▼▼Kaplemna Kailya – Aupu deiyoda ake. Pumun taruda, Allahdi sun Israel nesala doupra, Mesir mutu neitamai di lyepra duyanamu taruda, Mesir mutu nesala yuma, sun weni nyapu poptapu dinin, Israel yala nesala, sun weni nyapu men popu. Allahdi peiamutopu, sun Israel nesaladi domba bisam mi popinge, er yapi doupra, sun ati bublan dana-dana tara cap, deiki tara cap, gege peprapidi, likra deipi. Ukupya tep, alukunda neitamai Allah er nimi pon malaikatdi, ayapi epi dingeda, akati pumbon kunmai weni nyapu men poptapi. Tali kaplepra akati tapra, kirikra ortara atipu bena, yapi men kapu ati pumbon kunmai weni nyapu tep porami. Nyapu pon malaikatda, ayapi epidi, akati tep tali kaplepra ortara benmaiya tep, akailyada, Kaplemne Kailya perami.} kalepu. Akailya kalemna tep, pon domba bisamda, war tenpunge deiki, tanggal empat belas (14) tumi di, poprapidi kalepi. 2 Ukupi dingeda, Yosiadi, Allah Yahweh er si eremna ati pumbon pel dona tep, imam-imam neng, sun pel donkami ngeda, yuk-yuk bokra karepu. Ukupu dingeda, aneng tep pepu, “Sun pel dorumada, mambul weik pel cadi, sundi dumsisi telep pelpu pel donkamrume,” peprapudi, sun dipru kwadipu. 3 Tonda, Yosiadi Lewi yala neng tep, upu ton peipu.

Sun Lewi yala nengda, menop taru Allah Yahwehdi, ‘Ayala nengdi, ne si eremna ati pumbon pel dona deiyo neng, imam nengda, melimna neng kunkamenge’ tenen, wepra deiamu. Tonda, ‘Anengdi ne upu dopra, sun Israel yala nesala yuma tep, ‘Angeda, ukupkamrume, ange pio men kupkamrume,’ Allahdi peipupa, Musa gekepudi sekseu upu deiki di, upepseua tep, ‘Ukupra kunkamrume,’ pepra, ‘Peteremna deiyo neng ton kunkameng’ tenen, sun Lewi yala neng wepra deiamu.

Tonda Yosiadi, sun Lewi neng tep upepu. “Nun apu bo Raja Dauddi, Israel tara yuma taleamu ngebo, erdi deiamu ngebo Salomodi, Allah si eremna tep domu atida, Allahdi peipu upu dopra, mambul co bekin pumbon dongoprapidi, deiami keca, er si Peti Perjanjian, pio telep lengna ngeda, Allah er si eremna ati pumbonpu deipkamrume.

Ukupmum dingeda, akeca dopra, sun morokyo deiki di dopra, amutu deipmana, gopra ormutu deipmana kemnada, pio meme. Ataru di dipra, dorkunkamre taru yumada, sun nai bo Allah Yahweh tep, kange telep deiki dipapu, pel donkamrume. Tonda, Allah er mawa nesala, er nyapu Israel nesala yala-yala yuma melimna tep, dipru amu kepra, tupa telep kupra pel donkamrume. 4 Sun yumada, Lewi yala neng kurum dinino, sun nai yapu yuk-yuk akuramitopu, bokrapmumdi, gung yuk-yuk ketenepra deipdamumdi, pel yuk-yuk, Raja Daud cap, er mi Raja Salomo capdi, ‘Ukunkamrume,’ pepra, aupu sekra kareamserei utopu, gung yuk-yuk ketenepra pel donkamrume.

5 Sun gung yuk-yuk ketenepra deipmum dingeda, Allah er si eremna ati damai bena keteneiprumupa, sundi tali Israel nesala yumada, sun yala-yala akuramengtopu, gung yuk-yuk kepra yangedi, ‘Allah tep, telep karen keca karepkupe’ tenen, yakankameng taruda, sun Lewi yala deiyo neng bokdamumdi, Israel nesala gung yuk-yuk tep melimkamrume. 6 Kaplemna Kailya tumi konum kupre pangeda, ‘Allah damai yapepa, kange deipsetue’ tenen, erdi ‘Ukupkamrume,’ pepra deipseutopu, sun adipapu ketenemdidankamrume. Apel konum dopra seng pepmumnyopda, sun Israel nesaladi, Allah er karena tep, adipapu domba bisam yana karepsengopda, adomba bisam popra kalemkamrume. Apel yuma doramumnya deiki di, nun nai Allah Yahwehdi, Musa tep, ‘Ukupra gam keca popmumdi, ne gispal dona tep karenkamnerume,’ pepra deiamupa, Musadi peiamseutopu, kunkamrume.” Raja Yosiadi, sun Lewi yala neng tep pepu.

7 Uda, Kaplemne Kalya damai konum kupu taruda, Yosiadi, ‘Gume, deiyo neng gum dinin, tali dayakankameng neng yumada, sun pe ton Kaplemna Kalya kalemna tep karen keca kareptenge’ tenen, Raja Yosia er pe domba bisam cap, domba bisam mi nge cap, karepmanto ngeda, tonda kambing bisam karepmantonge cap, yuma dengeda, pio weik, tiga puluh ribu (30.000) ekor bisam karepu. Tonda, er pe peiramu sapi bisam jemnge peda, dengeda tiga ribu (3.000) ekor karepu. 8 Raja Yosia er amutara pel dona deiyo-deiyo neng yumadi, sun tali Israel nesala cap, sun imam-imam neng cap, tonda, Lewi yala neng cap tep, sun pe kange dipapu, gam keca weika di ketenepra tali karerami. Ange lap penada ake. Imam neng sun deiki tara deiyo ngebo Hilkia cap, Zakaria cap, Yehiel cap, sun aweneri nengdi, Allah er si eremna ati pel dona tep kalengna neng kurami. Aneng weneridi, yuk neng tep, denge weik dua ribu enam ratus ribu (2.600) ekor domba bisam jemnge cap, tonda sapi bisam tiga ratus (300) ekor cap, karepi. Ange yumada, Kaplemne Kalya tumi kalemna tep dopra yana kareryai.

9 Ange konum kupi dingeda, Lewi yala neng, sun gonga kemna deiyo neng, tenpu ngebo er si Konanya, er cap, er kayapu neng Semaya cap, Hasabya cap, tonda Netanel cap, Hasabya cap, Yeiel cap, Yosabat cap, sundi yuk Lewi yala neng tep, domba bisam jemnge metek weiknge, lima ribu (5.000) ekor cap, tonda sapi bisam lima ratus (500) ekor cap yumada, Kaplemne Kalya tumi kalemna tep yana karepi.

10 Kaplemne kalya tumi pel donkami keca cap, kupkami keca yuma cap, konum ketenepra deipyopda, imam neng cap, Lewi yala neng cap, gung yuk-yuk kepra, sun deiyo ngebo Rajadi wepra deiamudi, “Ukunkamrume,” peiamutopu, yuk-yuk ketenepra derirami. 11 Ukupya tep nengeda, sun Lewi yala nengdi, Kaplemne Kalya tumi pona tep karepi domba bisamda, popra bol korami. Tonda, imam-imam nengdi, apopmai bisam sun yapida, Lewi yala nengdi karepipa, doprapidi, Allah karenai, er si mesba, agel deiki cap, pirman tara cap, yapi dopra, gege pepra, likra derirami. 12 Dinino, imam-imam neng cap, Lewi yala neng cap, sundi sapi bisam cap, domba bisam cap, popman ngeda, galemna bokrapnedi, Yehuda mutu tali kan-kan kurami nesala tep, sun nyapsilip yuk-yuk akuramitopu karerami. Ada, ‘Anengdi, amenda taru Allahdi sun mali kun keca daepkamre’ tenen, sun imam-imam nengdi ange kupna deiki di, sun pe nyapsilip dipapu, akeca dopra Allah tep karerbarami. Ada, Allahdi peipupa, Musadi sekamu buku neitamai akwamunge utopu dukdongopra kurami.

13 Ukupne dingeda, sun imam neng cap, Lewi yala neng capdi, Kaplemne Kalya, tonda er si Paskah tumi jena tep, bisam tu dopra, uku bu deiki di darami. Dinino, Allah er si eremna tep, pio telep lek ngeda, yuk ketenepra darami. Ada, yangadin keca er si kuali deiki cap, bukmau belanga deiki capdi gamami. Ukupne dingeda, abisam tu gapman nge cap, dapman nge capda, menmena amutu bulupra wekmai nesala tep bongdirami.

14 Ukupra atu keca konum bokra deipne dingeda, sun Lewi yala nengdi, sun pe cap, tonda sun imam-imam neng cap tep, Kaplemne Kalya jenkami keca, yuknge ton ketenemdirami. Deiyoda, menop taru kuramu ngebo imam Harundi deiamu nengda, sun ataru pel donmai imam-imam nengda, Israel nesala yumadi, Kaplemne Kalya tumi karen keca, bisam tu cap, meta cap, ketenepra derinmandi, pel donmanpane lukunda kemamu. Angeda, ‘Allahdi kange deipkamser’ tenen, kareraminge, uku dongoramidi, pel weik doramya tep, sun pedi, sun pe jenkaminge tep, ketenepmanto men kupi.

15 Lewi yala neng dinin, nimi si Asafdi deipupa, dadeipdanen yanami neng, sunda mut pena tep, alat musik, bung-bung yala-yala yuma pena ngeda, ila kael neng kurami. Anengda, menop taru kuramu ngebo, Raja Dauddi wepra deipudi, pepu. “Sunda aca tekra kumumdi, pel donkamrume,” peiamnyaipu kuramidi, pel dorami. Anengda ake. Ada, Asaf cap, Heman cap, tonda Yedutun, erda nabi kepra, Raja damai kuramudi, Allahdi peiamu upu lap peramupa Raja gekeramu. Tonda, Allah er si eremna ati, buplan-buplan dam pio kalengna neng kurami. Sunda, Kaplemne Kalya tumi tep, ‘Acapu kunmamumdi, buplan kalekra pel donkamrume,’ peiamu mutu dipapu kuramidi, pel dorami. Dinino, sun Lewi yala nengpu dinin, ton tara neng melipnepa, sun jenkaminge tep ketenemdirami.

16 Ataru kepne pangeda, Raja Yosiadi, “Akeca yuma ukupra pel donkamrume,” pemutopu kupra, Allah Yahweh er gispal dona cap, telepe pena cap tep, Kaplemne Kalya pel yuma dorami. Tonda, ‘Allahdi, nun mali kun keca daepseredi, gum kupra deipkamser’ tenen, imam nengdi gam keca popra, Allah Yahweh, er karena tep, keteneiami mesba deiki uku dongorami. 17 Israel nesala yala-yala yumada, amutu bulupra yakanmai nesala yuma, ataru dipapu Paskah tumi deiki di, Kaplemne Kalya kalepra jepi. Ange konum kupne dingeda, sun yumadi, ataru di dukdongopra, Nena Gum Roti Kwaneng dana taru tep, komuni yoneitam bari tumi neitamaida, amutupu kuramidi, Allah si eremamidi, Nena Gum Roti Kwaneng jerami.

18 Uda, menop taru, nabi Samuel gam tupa kuramu taru di dipra, aneitam taru yumada, Yehuda mutu nesala cap, Israel mutu nesala cap, Kaplemne Kalya ton pio men kaleami. Tonda, Israel mutu neitamai talerami nimi deiyo Raja kemami neng peda, sun ton akailya men kaleami. Ada, Raja Yosia cap, ataru kurami imam-imam neng cap, Lewi yala neng cap, sun Yerusalem mutu kurami nesala cap, sun yuma kikiman di Kaplemne Kalya, Paskah tumi deiki di kalepra, Allah er si eremamitopu, pio men kaleami.

Raja Yosiadi, amutu kapul men taleramu taruda, sun Yehuda mutu kurami nesala cap, Israel mutu kurami nesala cap, tonda Yerusalem ila ati arum neitamai kurami nesala cap yumada, pumun taruda, Kaplemne Kalya kwalepra, Allah tep bulupra er si eremna kecada, ange utopu men bulupra Allah er si eremna tep karepi kecada, Raja Yosiadi, ataru kareputopu, pumun taru ton pio men karerami. Ataruda, Allah tep karepi kecada, pio weik kupu. 19 Raja Yosiadi, Yehuda tara mutu taleamu taru dinin, keteng tamun delapan belas (18) konum kepu tahun deiki dipu, aKaplemna Kalya, pio telep kupra kalepi.

Mesir mutu nimi deiyo ngebo Raja Nekhodi, Raja Yosia popka tep, seki upu

20 Yosiadi gonga keamupa, Allah er si eremna ati dona tep kuramyanen, pel konum seng pepi pangeda, Mesir mutu nesala, sun deiyo ngebo Nekhodi ^{▼▼Nekho – Raja Nekhoda, Mesir mutu deiyo ngebo kuramudi, amutu taleamu. Er cap, Asyer tara neng cap, ‘Kikiman melimdankamepe,’ tenerami. Pumun taruda, sun Asyer tara nengdi, amutu-amutu dana-dana tara yumada, popra bisbisa kamamidi, puto weik kurami dinin, amenda taruda, ortara mutu, keteng dangban tara, sun Babel tara nengdi, puto ton cap kepbaramidi, sun Asyer tara neng tep, ‘Popkamep’ tenen, ketenepi. Ukupi taruda, Mesir mutu nengdi, ‘Asyer tara neng melipmepedi, sundi Babel tara neng popkameng ja,’ teneramya tep, Raja Nekhodi, Babel tara mutu neitamai dinin, Efrat me damai porbeu.} gonga kepupa, ‘Babel mutu nesala cap, nun cap popdatepedi, popra gawal daktene’ tenen, karen mutu orketeng dangban tara, Efrat me damai dinin, mutu si Karkemis mutu bei. Ukupupane, Raja Yosia gekepudi, ‘Angeda men kupkamre. Atep, aneng cap antapmepedi, podankamepe,’ tenepudi, er cap, er jen talena neng capdi, kikiman amutupu welerbei.

21 Dinino, Raja Mesir ngebo Nekhodi, Yosia damai upu doproipudi upepu. “Gume, nundi, ‘Babel neng popdatepe,’ tenepmap ngeda, Yehuda tara nesala, sun deiyo ngebo, kan tepa guma. Ne amutu yanmanada, kan tenepmarem ngeda, kika deipra, yu kupnerepa, kan pona tep, men yanmane. Dinin, ne yanmanada, ‘Ne kayapu neng, mar podana neng cap, ne mar podana neng cap, melipra popdatepe’ tenen, yanmane. Kan tara neng tep gume. Tonda, sundi si eremrum Allahdi ne tep, ‘Anenga menmena popkamarume. Babel tara nesala porberume,’ pepmanera tep menmena di yanmane. Atep nengeda, Allahda, ne tamna kepudi, melipkamnere. Ange tep nengeda, Allahdi ne tep tenepmardi pepmanere ngeda, kanda ware keca deiyo tep, er yanipra mali kupmarem do? Kan tenepmarem ngeda, adipapu tapkurume. Kandi tenepmaremtopu kupmemnyopda, Allahdi kan peda ikin keca deipkamakerur cadi, pepkene.” Raja Nekhodi, Raja Yosia tep pepu.

22 Upepu dinino, Yosiadi, ‘Gume, Raja Nekho poptene’ tenen, kika deipu. Ukupka tep, Yosiadi, ‘Angeboda ne urasin men kael kepkamner’ tenen, yuk neng kenengami opkal utopunge kenekudi, er urasin yambul yuk kepdapudi, Raja Nekho, nimi podanaida, Megido mutu ban tara podanmaiyai wekda pepu. Tonda, menop taru Allahdi Raja Nekho, er dipru neitamai di, ‘Ukupkamrume,’ peipu ngeda, Raja Nekho lap pepmau dinin, Yosia men gekepudi, teka men tenepu. Teka men tenepka tep, ‘Raja Nekho popkun’ tenen, Megido mutu porbeu.

23 Ukupupa, apodanmaiyai di, Raja Yosia marapi. Ukupipa, Yosiadi er melimna neng tep, “Uo, konum marapmanenga cadi, aca di doupra, yuk karenai dubenkunerume. Angeda, pio ila kange mun kupnere,” pepu. 24 Upepu pangeda, er cap kikiman porbenmai nengdi, er nong doupra, tu deiki ban keca, er sida kereta perang, ange deiki di embanmaunge pumbon di doupra, ange tapra yuk kereta perang perameng keca deiki di doupra, akereta deiki deipra banmaianen, Yerusalem mutu tamupra dubei. Ukupipa, Yerusalem mutu di Yosia depu. Ukupupa, er apu yapu, sun nimi deiyo-deiyo neng peiramyaipu peipi. Ukupipa, Yosia depmaunge tep, Yehuda tara mutu neitamai kurami nesala cap, Yerusalem ila ati arum neitamai kurami nesala cap yumada, bulupra mali pepra ngolongmai. 25 Nabi Yeremiadi, Yosia depmaunge tep, ‘Angebo telepe cadi, gispal dopkun’ tenen, mut tenpu lipra penmau. Apenmau mutda, ukutaru peda, Israel mutu nesalada, Yosia er tenena tep taruda, tupa amut penunge. Ada, mut telep kupra perameng neng cap, nerapu cap, sundi deiyo koupropmengepa, penunge. Amut penung ngeda, mut sengameng buku deiki konum seki. Abuku si tep nengeda, Ratapan buku penunge. Abuku neitamai di sekra deipka cadi, aca di penunge.

26 Yosia pel dopyakaramu nge tep, ton ngeda ake, ada Allah tep, ila di kange deipra kuramu, tonda Allah Yahwehdi, “Ukunkamrume,” peiamutopu, sekra deiamipa, ange gekepra dukdongopra, bouna di kuramu. 27 Yosiadi gonga kepra, pel dopyakaramngai di dipdongopra, ‘Allah tep, er si erepra er gispal dona tep, pel donkamne,’ tenepudi, gawal daku taru tep nungnada, yambul ton ake. “Ange yumada, Raja Israel neng cap, Raja Yehuda neng cap tep, nukne buku er sida, Buku Sejarah Raja-Raja Israel, adeiki di konum seki.