2 Chronicles 36

Yoahasda, Raja Yehuda kepka tep, seki upu

1Yehuda mutu nesaladi, Yosia er pununa tep nengeda, er mi Yoahaspu, ‘Nun deiyo ngebo kepseredi, Yerusalem mutu ila ati arum talepkamser’ tenen, Yoahaspu wepra deipi. 2Yoahas er keteng tamun dua puluh tiga (23) tahun konum kepu taruda, gonga keap Raja Yehuda kepu. Ukupu dingeda, war weneri deiki di, Yerusalem mutu ila ati arum talepra, nimi deiyo ngebo kuramu. 3Dinino, ware weneri konum kupupa, Mesir mutu taleamu deiyo ngebo, Raja Nekhodi, ‘Angeboda, ne amutara deipkamne’ tenen, Yoahas Raja Yerusalem mutu talepra pel doramunge dokoteprapudi, er amutara kepudi, Yehuda tara mutu neitamai kurami nesala tep, ikin keca, sun nong deiki deipudi, sundi er tep pajak co bo karenange tep, erdi, “Kunumna weik keca er si perak, er ikinda tiga ribu, empat ratus kilo (3,400 kg) cap, kunumna weik gat keca, er si emas, er ikinda tiga puluh empat (34) kilo cap yuma, bulupra karepkamnerume,” pepra moropu.

4Upepu dingeda, Mesir mutu deiyo ngebodi, Yoahas er weit Elyakim, erpu erepra, Raja kepra deipu. Ukupu dingeda, er si Elyakim peiamu ngeda tapra, Yoyakim pepu. Ukupu dinin, Raja Yoahas doupra, er amu tara kepudi, Mesir mutu tamupra dubeu.

Yoyakimda, Yehuda mutu nesala sun deiyo ngebo kepu upu

5Yoyakimda, er keteng tamun dua puluh lima (25) tahun konum kepu taruda, Yehuda mutu nesala, sun deiyo ngebo kepu. Ukupudi, Yerusalem mutu ila ati arum neitamai talepra kuramu taruda, keteng tamun sebelas (11) tahun deiki mapu. Ukuamudi, er nai bo Allah tep, tek sisi er si men eremamudi, er damai pio mali kuramu. 6Ukuramnga cadi, Allahdi go karepupa, Babel mutu deiyo ngebo, er si Nebukadnezar, Babel tara Rajadi, Yehuda mutu neitamai kurami nesala yana, arapra dopropu dingeda, Yoyakim damai yana tomopra, ateng koupudi, Babel mutu doupra beu. 7Tonda, Allah Yahweh er si eremna ati derirami keca, ila mambul kunumna weik keca ton, Nebukadnezardi akeca weika di upula doprapudi, Babel mutu neng, sun nimi deiyo ngebo kunai bena deipu.

8Raja Yoyakimdi, pel dopyakaramunge yuma cap, Allah damai pio mali kun keca kuramunge cap, tonda Allahdi, ‘Angeda kuna gume,’ peramu dinin, angebodi ‘Allah damai ne dabale’ tenena di, mali keca weik kuramunge cap yumada, Yehuda tara neitamai kurami nesala cap, Israel tara kurami nesala cap, yuk-yuk dinin, sun deiyo neng, Raja-Raja nengdi kuraminge tep, lap pepra nungna buku deiki sengami. Abuku neitamai dipu nukmepedi kael keptepe. Amenda taruda, Raja Yoyakim depupa, er mi Yoyakindi, Yehuda tara talepra, Raja kemna tep punupu.

Yoyakhindi, Yehuda tara kurami nesala tep, nimi deiyo ngebo, Raja kepu upu

9Yoyakhin er keteng tamun delapan belas (18) tahun konum kepu taruda, Yehuda mutu nesala tep, sun deiyo ngebo Raja kepudi, atara di gonga keap, amutu yuma talepu. Ukupudi, ila ati arum Yerusalem mutu neitamai kuramudi, amutu talepu taruda, metekanunpu, weneri war deiki dipapu (3 bulan) cap, tonda sepuluh (10) hari cap taleamu. Er peda, Allah Yahwehdi, ‘Angeda ne songe,’ teneamu kecapu, Allah er damai mali pio weik kuramu. 10Keteng tamun neitamai dinin, nimidi kourami keca, ukupunge gonga keap, paramu taru konum kepu pangeda, Babel mutu nimi deiyo ngebo, Raja Nebukadnezardi peipupa, er amutara melimna nengdi, Yoyakhin damai bena, Yoyakhin tomopra, Babel mutu tamupra duyai. Tonda, ataru dipapu, Allah Yahweh er si eremna ati pumbon deiami mambul kunumna weik keca doupra, Babel mutu dubei. Tonda, Raja Nebukadnezardi, Yoyakhin er kabo Zedekiada, ereipudi, Yehuda nesala kurami tara cap, Yerusalem mutu ila ati arum cap tep, Raja kepra deipupa, amutu-amutu yuma taleamu.

Yehuda mutu nimi deiyo ngebo kemna tep, Zedekia wepra deipi upu

11Zedekia, er keteng tamun 21 tahun konum kepu taruda, Raja Nebukadnezardi ereipra deipupa, Zedekiada Yehuda mutu nimi deiyo ngebo Raja kepu. Ukupudi, amutu yuma taleamudi, Yerusalem mutu ila ati arum neitamai kuramudi, amutu talepra kuramu keteng tamun yumada, sebelas (11) tahun keamu. 12Er peda, er nai bo Allah damai pio mali weik kuramu. Kange boun deiki Allah Yahwehdi, “Ukunkamrume-ukunkamrume,” peipupa, er upu lap pena deiyo ngebo, nabi Yesaya gekepudi, erdi Zedekia damai bena lap peramu dinin, angebo Raja Zedekiadi, kange boun deiki di men gekeramnga cadi, ange men kuramudi, mali kecapu kuramu.

13Angepu gum dinin, Raja Nebukadnezardi peiamu upu peda yanipu. Ada, Raja Nebukadnezardi Zedekia tep, “Allah damai, ‘Ne ukupra kunkamne,’ pepmemdi, kanda ne peipkene upupu gekepra kunkamreme,” pepu. Upepupane, Zedekiadi, “Dyo, ukupkamne ja,” peptapudi, apedina upu deiki di peipu dinin, tek sisi ange yuma men kuramu. Erdi, ‘Ange yumada, ne men kupkamne,’ teneramudi tapu. Tonda, Israel nengdi, si eremami Allah, er si Yahweh tep, Zedekiadi, ‘Gume, Allah Yahwehdi perur upu yumada, ne men gekepra kunkamne’ tenen, dipru kange gat kepra, balila weik kuramudi, aupu yanitamnapu kuramu. Zedekia er mali kuramu keca tep nengeda, ‘Tapnedi, Allah damai tamupra benkune,’ pio men teneramu.

14Angepu gum dinin, Allah Yahwehdi, “Akatida, ne Allah, ne si eremne ati kurure. Yerusalem mutu neitamai pio akunkamra cadi, akatida ila mambule. Nengepu kurure,” peiamudi, telep upu peipka deiki di, akati telep kupra deipu. Upeiamupane, sun Yehuda tara kurami nesala, sun imam-imam neng, sun deiyo-deiyo neng cap, amutu neitamai tali dakurami Yehuda yala nesala yuma cap, sun yuma dipu, Allahdi, ‘Ukunkamrume, angeda men kunkamrume,’ peiamu upu yanitamnapu kuramidi, Allah tep men talepra dombarami. Tonda, sun Israel nesala kurami mutu dana-dana tara kuramidi, Allah men kael keami nesaladi, pio mali weik kurami kecada, Israel nesaladi, ‘Nun peda, ange talepra kunkamepe,’ teneramidi, mali keca pio weik kurami. Ada, sun imam-imam nengdi mali kurami utopu, amutu kurami nesala yuma peda, sun deiyo nengdi kurami utopu kupra, tali isok sipu erepra kurami. Ange yuma ukuramya deiki di, Allah Yahweh, er si eremna ati mali kupra deiami.

15Sun Israel yala nesala, sun co puna nengdi si eremami ngebo, Allah er si Yahweh, er si eremne ati cap, menop taru erdi wepra deiamu nesala cap tep, ila di bicau teneramnga tep nengeda, ‘Anesala cap, akati cap, adipapu poptapkamne,’ men teneramu. Ange gum dinin, er upu lap pena deiyo neng cap tep, upu peiamudi, doproipnepa, anengdi ataru ton, ataru ton, sun Israel yala nesala tep, lap peryakarami dinin, yuma taru yuma, sun anengdi men gekerami. Sundi, ‘Aupuda men gekepra kunkamepe,’ tenerami. 16Ukuramipane, sun Israel yala nesaladi, ‘Gume tek sisi pesenunge,’ men tenerami. Ange gum dinin, sundi, ‘Tali upu peryakasenunga,’ tenerami. Uteneramya cadi, sundi, sun nabi-nabi neng tep, naleamidi, auturami. Tonda, ‘Allahdi peramseu upu yumada, nun men gekenkamepe,’ tenerami. Ukupra ukuramipanen, sirik taruda, Allahdi sun aneng tep, tulum kupupa, sun damai pio ikin keca deipu. Ukupupa, sun anengdi ton, ‘Uo, ukupmasera tep, Allahdi ton lyepkamser ja’ tenen, benmanto bisi peda, ton men kael kepi. Allahdi, ila kange mun keca karepu.

17Ada Allahdi, Raja Babel er dipru neitamai pel dopka cadi, angebodi, ‘Israel nesalada, poptene,’ teneramupa, Allahdi angebo tep, go karepupa, Raja Babeldi Yehuda yala kaber neng yumada, Allah er si eremna ati damai di, aneng yuma popra gawal daku. Ada, kaber gamto nimi cap, nerapu cap, wisi neng cap yumada, Allahdi dopra Raja Babel tep, go karepupa, angebodi anesala weika di, parang ya di poptapu. Ada, Allahdi anesala yuma dopra, Babel mutu taleamu deiyo ngebo, Raja Nebudkadnezer tep karepu. 18Ukupu pangeda, Raja Nebudkadnezerdi, Allah Yahweh er si eremna ati bo derirami kunumna weik mambul keca yuma cap, tonda yuk ila mambul keca deriraminge cap, amutu nesala sun deiyo neng cap, sun pel don neng cap, sun bung keca cap, ayuma arapra, Raja Babeldi doupra, Babel mutu tamupra dubeu.

19Angepu gum dinin, sun Babel mutu jen talena neng, ukupi dingeda, Yerusalem ila ati arum gel beilya wipra ongopdongopi ngeda, uruptaproi. Tonda, Allah Yahweh, er si eremne tep domi ati cap, tonda, amutu nimi deiyo-deiyo neng, sun kun ati yuma cap, tonda ila mambul keca, nimi deiyo neng, sun kurami ati-ati yuma cap, tonda amutu neitamai tupa akuamu kunumna telep keca yuma capda, urupra tapi.

20Raja Babel Nebukadnezardi, Yehuda tara kurami nesala popudi, ton tapupa, tupa akunmai nesalada, ateng koupra douprapudi, Babel mutu tamupra beu. Adubeu nengda, Babel mutu nimi deiyo ngebo cap, erdi deiamupa, deipdanen, yakaramnganen, deiamu nesala, sun pel melipra dona cap, sundi deipipa, dadeipdanen barami neng yuma tep, sun pel melipra tali dona cap tep, keamupa dakurami. Ukupra dakuramipanen, amenda tarupu, orkaren mutu Raja Persia welepudi, Babel mutu popra bisbisa kapudi, erdi taleamu.

21Angeda, Allahdi nabi Yeremia damai, “Amutuda amenda taru ukupkamre. Tali gopu kunkamre ja,” pemupa, gekepra lap peramungepu, tek sisi nong kupudi, dukdongopu. Ukupu pangeda, keteng tamun dengeda, tujuh puluh (70) tahun neitamai yumada, Yehuda mutu nimi ton pio men kuramipa, amutuda, tali gopu kwamu. Ada, Sabat tumi yuma tep, Israel nesaladi, ‘Atumida, ila mambul tumi cadi, pel men dopkamepe,’ tenerami utopu, amutu-amutu yumada, Allahdi, “Angeda, ukupkamre,” tenemutopu kupu.

Raja Koreshdi, Yehuda yala nesala tep, ‘Sun pe mutu tamupra beso,’ pepu upu

22Uda, Persia mutu deiyo ngebo, Raja Koresdi amutu talepra, menmena kuramu keteng tamunda, er dipapu amutu yuma taleamu. Ukupu taruda, Allahdi, ‘Ne upu lap pena deiyo ngebo, nabi Yeremia damai tep, “Ukupkamne,” peramsinge yumada, nong kupkamre,’ tenen, kupu. Ada, Allahdi Koresh tep, ‘Ukuptue,’ tenepupa, Koreshdi er taleamu mutu ban-ban yuma neitamai di, “Ukupkurume,” pepra nuku. Ila ban pala mutu akurami nesala damai tep, ‘Ukupkurume,” pepra nuku. Aupuda ake.

23Neda Raja Koresh, Persia mutu nimi deiyo ngebodi, “Ukupkamrume,” pepsene. Ada, akeca-keca cap, im neitamai cap, im alau deiki tara cap, akeca yuma deiyo ngebo, im deiki kurur ngebo Allah Yahwehdi, ne tep, amutu tuai nesala, sun deiyo ngebo kemna tep, wepra deipneudi, neda Allah er pel dona tep, “Yerusalem mutu dinin, Yehuda tara talenkamrume,” pepneu. Upepneudi, “Ange tep nengeda, Yehuda tara neitamai dinin, ila ati arum, er si Yerusalem mutu neitamai di, neda Allah, ne si eremna atida, acapu dopkamnerume,” pepra deipne. Tonda, Allahdi ne tep, “Ange tep nengeda, Allah Yahwehdi, ‘Anesalada ne mawange,’ tenemupa, kan mutu neitamai konum kunge nesalada, adipapu Yerusalem mutupu tamupra benkamenge. Ukupmengepa, sun nai bo Allah, ne Yahwehdi, Yerusalem mutu tamupra benkameng nesala yuma tep, pio tupa kalengkamsene. Ne cap, sun cap kikiman benkamepe,” pepra deipneua cadi, sun adipapu dabenkamrume.

Raja Koreshdi upepra deipudi, surat sekra deipu.