2Ch 5 | XteSC | STEP | Apel-apel yuma, Salomodi, ‘Ukupkurume,’ peipupa, Harum-Abidi konum pel dopbaramudi, gawal daku pangeda, nimi deiyo ngebo Raja Salomodi, ‘Ukupkamne,’ teneramudi, Allah Yahweh er si eremna ati yuma konum dopra seng pepu. Ukupu dingeda, er adipapu akati neitamai bung keca derina tep, keteneiamu ati neitamai moupra deipu. Ada kunumna weik keca emas cap, perak cap tonda er nai bo Raja Dauddi, ‘Ange yumada, Allah tepapu karepne,’ teneamudi, konum dopra, Allah Yahweh tep kareamu bung keca yumada, Raja Salomodi doprapudi, Allah er ati pumbon neitamai dongopu.

2 Chronicles 5

Raja Salomodi, Allah er si eremna ati neitamai bung keca derina tep, pepu upu

1 Apel-apel yuma, Salomodi, ‘Ukupkurume,’ peipupa, Harum-Abidi konum pel dopbaramudi, gawal daku pangeda, nimi deiyo ngebo Raja Salomodi, ‘Ukupkamne,’ teneramudi, Allah Yahweh er si eremna ati yuma konum dopra seng pepu. Ukupu dingeda, er adipapu akati neitamai bung keca derina tep, keteneiamu ati neitamai moupra deipu. Ada kunumna weik keca emas cap, perak cap tonda er nai bo Raja Dauddi, ‘Ange yumada, Allah tepapu karepne,’ teneamudi, konum dopra, Allah Yahweh tep kareamu bung keca yumada, Raja Salomodi doprapudi, Allah er ati pumbon neitamai dongopu.

Allahdi peramudi, sekra karepupa, deiami upuda, co pum, er si Peti Perjanjian dongopi ngeda, ange dopra, Allah er si eremna ati pumbon dubena dongopi upu

2 Raja Salomodi, Allah er si eremna ati konum dopra seng pepkopda, upu doproipupa, Israel nesala, sun deiyo-deiyo neng damai cap, Israel yala-yala nesala, yuk-yuk akuramitopu dinin, sun deiyo neng yuma cap tep perbei. Ada, Israel nesala yala-yala yuma, sun apu yapu neng cap, sun nai yapu neng cap tep, “Yerusalem mutu apu bulupra yankurume. Yamumdi, pumun taru Raja Daud kuramngai, amutu sida Sion mutu, aca neitamai di, ila mambul keca dopropmepedi, Yerusalem mutu duyana deipkamepe. Ada, Allah er si Yahwehdi, ‘Angeda kunkamrume, angeda pio men kunkamrume. Ukupmumpa, nedi sun tep ukupra-ukupra makunkamsene,” pepra, pedina upu deiki di deiamudi, pala gel deiki sekra kareamupa, nimidi akeca dopra, co bekin pumbon dongopra deipi. Aco bekin er sida, Peti Perjanjian ^{▼▼Peti Perjanjian – Akeca gambar dina tep, 1 Tawarik 13:3 dinkurume.} dopra, yana Yerusalem mutu deipkamepe. Aco lase di dopi bekin Peti Perjanjianda, Daud kuramngai Sion mutu di doprapmepedi, Yerusalem mutu Allah Yahweh er si eremna ati duyana deipkamepe,” Raja Salomodi, Israel yala nesala sun wisi neng cap, deiyo-deiyo neng cap tep pepu.

3 Aupu doupra lap perbeipa, gekepi dingeda, yoneitam war (7) ^{▼▼yoneitam war - Yoneitam (7) war konum kupyopda, sun Israel yala nesala yuma buluprapidi, Allah gispal dona tep, kailya kaleamidi, keana dodin tenda ati ton dopra, acapu marami. Ada, ‘Nun apu yapu, menop taru nimi gumai, ila katuai mutu neitamai embarami ngeda, tupa tenenkamep’ tenen, ukurami. Akailya sida, ‘Dodin ati Kailya’ perami. Akurami ngeda, Imamat 23:34-43. Tonda, Ulangan 16:16 neitamai di epra baca kepkamrume.} deiki di, ‘Kalya kalepkamep’ tenen, bulupra yakarami taru dipapu, yai. Sun Israel yala-yala neng yuma yakanmaidi, Raja Salomo damai bulupra weki. 4 Ataruda, sun Israel yala-yala deiyo neng yuma konum yai dingeda, Allah er ati pumbon pel talepra dona deiyo neng, sun imamdi, Allah Yahwehdi, ‘Ukupkamrume,’ pepra deiamudi, sekeiamupa, apala gel dopra, dongorami co lase dongomi. Ada, Musadi agel pala dongomu co bekin, Peti Perjanjian erepra dubei.

5 Peti Perjanjian ereprapidi doupra, Allah Yahweh er si eremna tep ati, konum dopinge damai welepra dubei. Tonda, menop taru Musadi keana taru tep, Allah cap, nimi cap, antamna tep ati, lyom opkal bol di dodin tenda ati ^{▼▼dodin tenda ati -Raja Salomodi, ila gel di, pio telep ati kapul men doamu taruda, Israel nesaladi, keana tep, lyom opkal bol di dodin tenda ati pumbonpu, Allah tep kareramidi, er si eremami. Angeda 2 Tawarikh 1:3 epra baca kepkamrume.} keteneiamunge, dadeiamyai di, uruptaprapidi, sun Lewi nengdi ange dopra, ange peda, welepra dubei. Tonda, akati pumbon pel dona tep keca yala-yala yuma peda, dadeiamyai di doprapidi, sun Lewi yala neng cap, sun imam-iman neng capdi, akeca yuma dopra, Raja Salomodi doamu ati, Allah er si eremna tep ati damai dubei.

6 Akeca doupra banmaidi, deipmai taruda, nimi deiyo ngebo Raja Salomo akati damai tekmaupa, sun Israel nesala yuma, er urasin tara damai bulupra acapu weki. Allah Yahwehdi peipu upu, gel pala deiki sekeipupa, Musadi co bekin, er sida Peti Perjanjian neitamai dongomu ngeda, sun imam nengdi, akeca erepra banmaiyanen, konum bena deipi pangeda, er Raja Salomo cap, er nyapu Israel nesala yuma capdi, gam keca domba bisam cap, sapi bisam cap, pio men nukmanto poprapidi, Allah er gispal dona tep gudinmaidi si eremai. Apopmai keca yumada, imam-imam neng tep karepipa, sun imam nengdi, ^{▼▼imam nengdi - Tali Israel nesaladi, akeca-keca yuma adipapu Allah tep men karepmanto kurami. Angeda mem keca cadi, sun imam-imam neng dipapu, Allah tep akeca karerami. Tonda, Allah er si eremna ati pumbon, Pio Telep Lengna Atida, tali neng cap, tali keca capda, pio men wekmanto kurami. Imam-imam neng, sun deiyo ngebo dipapu, keteng tamun deiki, ue tenpu tarupu, akati wengamu.} Allah tep karepi. 7 Ukupra kunmaiya deiki di, Allah er si Yahwehdi, “Angeda ukunkamrume. Ukupmumyopda, nedi sun tep, ukupra makunkamsene,” pepra, pedina upu deiki sekeiamu upu, co lasi di domi bekin pumbon dongomi ngeda, sun imam nengdi akeca er sida, Peti Perjanjian doprapidi, Raja Salomodi Allah er si eremna tep ati pumbon dinin, Pio Telep Lengna Ati pumbon bena deipi. Ada, im deiki pel don neng malaikat urasin utopu keca, er si kerub petupra butene deiamyai amutarada, abekin bena deipi.

8 Abekin, Peti Perjanjian deipyaida, amalaikat urasin utopu keca, kerub butene dana-dana tara ngedi, daneitamai deipipa, aKerub sun pol butene di, abekin aco deiki tara talepreidi, singipdongoprei. Tonda, abekin talepra bana tep nengeda, lyom co dana-dana tara abekin pirmanai bon potokra dongopinge ton, adeiki tara sun Kerub butene tekreidi, sun polda akeca deiki tara kuprei. 9 Peti Perjanjian dopi bekin doupra bana tep, lyom co buteneda, kupu. Aco bekin deipi ati er sida, Pio Telep Lengna Ati perami. Akati damai dinin, yambulanun ortara atida, er sida, Telep Lengna Ati perami.

Uda, abekin dubana tep, lyom co dana-dana tara abekin pirmanai bon potokra dongopi lyom coda, pio lyom weik kupka cadi, Telep Lengna Ati pumbon tekmemnyopda, aco er urup tara eptum dinin, Telep Lengna Ati bura tara di dipeteptum dinin, alyom co urupaida men eptume. Abuku sekmepu taruda, alyom co buteneda, akati neitamai ukutaru peda, tupa akapmare. 10 Aco lase dopi bekin pumbonda, tenpu keca dongomu ada ake. Allahdi, “Angeda kunkamrume, angeda pio men kunkamrume,” pepra, deiamupa sekamu gel butene deiki sekrapudi, Musa tep karepupa, Musadi agel dopra aco bekin, er si Peti Perjanjian ^{▼▼Peti Perjanjian - Peti Perjanjian pumbon dongopi ngeda ake. Menmena taruda, weneri keca dongomi. Ada Allahdi, “Ukupkamrume, angeda pio men kupkamrume,” peipu upu, gel butene deiki sekeipunge cap, Allahdi kareamupa, nimi gumai katawai mutu jerami keca er si mana cap, tonda Harundi dopra embaramu maca cap dongomi. Dinin, amenda taruda, abekin pumbon tupa kwamu kecada, Allah upu seku gel buteneda, angepu. Yuk keca ton gume. Akeca kael kemna tep, Keluaran 40:20; Bilangan 10:5 dinkamrume.} dongopu. Yuk keca ton aco bekin neitamai men dongopi, agel butenepua.

Tonda, Musadi agel dopra dongopu mutu sida, Horeb mutu kurami taru di deipu. Ataruda, Allahdi sun Israel nesala yumada, Mesir mutu neitamai kurami taru, ikin kange doupra kuramipa, Allahdi sun tep lyepra dubeu. Ada, ‘Kanaan tara mutu karenkamne,’ teneramudi dubenamu. Horeb mutu kunmai taruda, Allah er si Yahwehdi, ‘Angeda kunkamrume. Angeda pio men kunkamrume,’ pepsenetopu kumunyopda, nedi kaleka disenedi, pio telep kupra melimkamsene,” pepu.

11 Uda, sun imam neng, Telep Lengna Ati ^{▼▼Telep Lengna Ati – Pumun taru, Allah er si eremna cap, karena cap tep domi ati neitamaida, ati weneri ton wilipra domi. Menmena ati cap, butene ati capda, imam-imam neng yumadi, akati wekra pel dorami. Ati butenenge, er sida Telep Lengna Ati perami. Allah er si eremna ati neitamai dinin, pio pumbon wilipra domi ati weneri ngeda, er si Pio Telep Lengna Ati perami. Akatida, imam neng, sun ila deiyo ngebo, er tenpupu akati wengamu. Keteng tamun tenpu deiki, tenpu tarupu akati wekrapudi, Allah tep yapi karepu.} pumbon kunmai neng yumada, sun pel konum dopi dingeda, atenpu gung yumadi, Allah Telep Lengna Ati neitamai di gupra, bura tara yai. Tonda, sun kayapu neng yuma, sun imam-imam neng yala-yala yuma di, ‘Allah damai yana kutepe’ tenen, Allahdi peramutopu pel konum kupya tep, Allahdi, ‘Sunda, mali kunange pio ton gum di, konum pio telep neng kepmange,’ tenepu. Atep, sun peda akati damai kunmai. 12 Ataruda, sun Lewi yala nengdi, gerekdanen deiami neng, sun mut pena kael keami neng yumada, akati damai kunmai. Sun yala sida ake. Ada, Asaf cap, Heman cap Yedutun cap, tonda sundi deiamipa, dadeipdanen yakarami neng cap, sunda akati damai dinin, keteng yakan tara tengmaidi dinmai. Sun tekmaiyaida, yapi keca popnedi, uku dongoramyai, er si mesba damai tekra dinmai. Sun ayala nesala yumada, apel don nengda, sun opkal pio telep boun nge, er si kain lenan kemami. Tonda imam-imam neng yumada, lelim pena keca, gitar cap, simbal cap, kecapi cap, dopmaidi ponmaipa, lelim weika di penmai. Tonda, imam-imam neng yuk gung, sun dengeda, 120 nengdi, lelim pena keca, er sida terompet doupmaidi, pong penmai.

13 Sun yumada, Lewi yala nengdi, amesba damai tekmaidi, lelim pena keca simbal cap, kecapi cap, terompet cap, doupmaidi pona cap, pena cap kemaidi, sun kayapu nengdi, ‘Aca damai kunmange nesala yuma, telep kupra gekepkung’ tenen, ila upu deiki di, nimi tenpu ngebo erdi peramretopu penmaidi, mut pepra Allah Yahweh tep, er si eremaidi, penmai. Sun cap kikiman tekmai nengdi penmai mutda ake. ‘Nun nai Allah Yahwehda, weika di melimserure, erda pio teleppu kuredi, nun tep ila di bicau teneserure,’ pepra, penmaidi, amutda kikimanpu penmai. Upepra penmai taruda, Allah Yahweh er si eremna tep ati neitamaida, dua kwerepudi akati neitamai yumada dekpepu. 14 Ila dua di, akati pumbon yuma dekpepu pangeda, ataruda sun imam-imam neng acapu tekmai neng yumada, ‘Allah gispal dona pel dopkup’ tenen, keteneipmai dinin, ange yumada, men kupmanto kupi. Ada, akati neitamai yumada, dua di lelipupa, men pel dopmanto kupu. Akupi ngeda, akati yumada, Allah Yahweh er pio telep-telep kurura cadi, er ila dirinepu akati dekpepka tepa.