2Ch 6 | XteSC | STEP | Nimi deiyo ngebo Raja Salomodi, Allah tep moropudi aupu pepu. “Teka, Allah Yahweh menop taru di kanda konum peiamsemume. Ada, ‘Neda, pio mirin dua kankan kunungrura neitamaipu kunkamne,’ peiamsemume.

2 Chronicles 6

Nimi deiyo ngebo Raja Salomodi, er taleamu mutu neng tep, pepu upu

1 Nimi deiyo ngebo Raja Salomodi, Allah tep moropudi aupu pepu.

“Teka, Allah Yahweh menop taru di kanda konum peiamsemume. Ada, ‘Neda, pio mirin dua kankan kunungrura neitamaipu kunkamne,’ peiamsemume. 2 Dinino, ne nai bo Allah, ukutaruda, ‘Allahda akati neitamai kunkamre’ tenen, nedi kan tep, pio telep ati konum ketenepra dopmakene. Akati dopsa deiyoda, ‘Kandi akati wekmemdi, aceipu pio kunkamrem’ tenen, dopkesi,” Raja Salomodi pepu. 3 Ataru dipapu, sun Israel nesala yuma, akati damai atekmaiya cadi, ataru dipapu, nimi deiyo ngebo Raja Salomodi, ‘Sun Israel neng pio telep kunkameng’ tenen, sun tekmaiyai dinmaudi, sun deiki telep upu pepra deipu. Nimi deiyo ngebo Raja Salomodi pepu upuda ake.

4 “Nun nai bo Allah Yahweh, kan dipapu nun Israel nesala tep, pio kalekra meliamsemumtopu, tupa melimkamserume. ‘Kan si tep pio telepe,’ pepkepe. Kanda nun nai bo Allah tenpu kurume. Ne nai bo kandi, ne nai bo sisa Raja Daud tep peipmum upuda, apeiamumtopu, ukutaru kan pe buru dipapu konum kupmasereme. Ada, nong konum kupmasere. Nun nai Allah kandi peiamsemum upuda ake.” Allahdi upeiamu.

5 – 6 “Ne mawa nesala, ne nyapu sun Israel nesalada, Mesir mutu neitamai ikin kange doupra kuramipanen, nedi lyepra aneng dubesi. Anesala dubaramsi taru di dipra, aneitamai taru yumada, ‘Neda amutu neitamai kunkamne’ tenen, yuk mutu si ton men wepsi. Tonda, ‘Ne si eremna tep ati dopkamnengaida, ton acei-acei,’ men peramsi. Israel yala nesala, sun yala-yala yuma cap, sun ati arum si Yerusalem capda, nedi konum wepra deipsi. Amutu neitamaida, yuk ati arum ton pio weik akapmar dinin, ange yumada, ne ton men wepsi. Deiyoda, ne nyapu Israel nesala tep, konum wepsidi, ‘Sun ila deiyo ngebo kupredi, ne mawa teneramsi nesala talenkamre,’ teneamsi ngebo Raja Daud pua. ^{▼▼Daud - Tek sisi pumun taruda, ‘Daud’ seki dinin, ada Daud er cap, erdi deiprepa, dadeipdanen deipkameng neng yuma, ada Daud yala neng yuma tep peipu.} Atep nengeda, yuk mutu neitamai ton, ne si eremna atida, men dopkamnetenge, angeda gume. ‘Yerusalem mutu neitamaipu dopmengepa, akati pumbon neitamaipu, ne si dongopkamne’ tenen, konum wepra deipsi.”

Allahdi pepu. “Atep er si eremna atida, amutupu kunkamre,” Salomodi pepu.

7 Raja Salomodi upepu dingeda, aupu ton dukdongopra pepu, “Uda, ne nai bo Raja Daudda, er dipru neitamai di uteneramu. ‘Uo, nun nai bo Allah, nun Israel nesala tep, pio kalekra melimserura cadi, er sipu eremnupe. Atep, Allah Yahweh er si eremna tep ati ton doptene’ tenen, pio putaramupa teneramu.

8 Uteneramu dinin, Allah Yahwehdi ne nai bo Daud tep upepu. “Kan dipru neitamaida, ‘Uo, ne nai bo Allah Yahweh, er si eremna tep ati doptene,’ teneramum ngeda, pio telep kuramume. 9 Dinino, ne si eremna ati dopkamner ngeboda, kan gume. Kandi akatida, men dopkamnerum dinin, kandi deipkamrem ngebo nepyopda, erdi dopkamnere. Ada, kan pedi deipkamrem mi, kan nong cap, kan yapi cap, utopu mi er dipapu, ne si eremna tep ati dopkamnere. Akati dopyopda, nimi weika di, ne si eremkamenge.” Allahdi ne nai bo Daud tep peiamu.

10 “Atep nengeda, nedi pepsene, nun nai bo Allah Yahwehdi, ne nai bo Daud tep, ‘Ukupkamne,’ peramu upuda, nong konum kupre. Allah er si Yahwehdi, ‘Ukupkamne,’ pepra, pedina upu deiki di pediramu utopu, ne nai bo Daud, er yo konum punupsidi, Israel nesala yuma talena tep, sun ila deiyo ngebo Raja konum kunune. Tonda, Allahdi peramutopu, nedi Allah Yahweh er si eremna ati konum dopsi. Akati damai cap, neitamai capda, nesala pio weika di, Allah er si eremkamenge. Nun nai Allah er dipapu er nyapu, nun Israel nesala tep, tupa kalekra meliamseutopu, tupa melimserure.

11 Allah Yahwehdi nun apu yapu, sun Israel yala nesala tep, lyeprapudi Mesir mutu neitamai di dubeu taruda, nun apu yapu tep upepu. ‘Angeda kunkamrume, angeda pio men kunkamrume,’ pepra, pedina upu deiki di pepra, deipsene upu tek sisi kupmumnyopda, nedi kalekra melimsenedi, telep kweipkamsene,’ pepra deiamu. Aupuda, Allahdi Musa tep pepra deipudi, gel pala deiki sekra karepupa, Musadi doprapudi, co lase bekin pumbon domyai dongopu. Aco bekinda, er si Peti Perjanjian dopra, akati pumbon konum deipmane,” Raja Salomodi pepu.

Salomodi Allah moropu upu

12 – 13 Nimi deiyo ngebo Raja Salomodi, Allah Yahweh er si eremna ati damaipu teknedi, ‘Upu pepnepa, nimi yuma epnetenge,’ tenena tep, nimi tekmantoai ketenepra deipu ngeda, er si panggung, ange deiki welepra teku. Akeca panggungda, telep gat keca, er si perunggu deiki di, palepra taplakra dopra deipu. Apanggung atara di ortara er lyomda, 2.25 meter kupu. Apanggung er palada utotopu, 2.25 meter kupu. Akeca er tikilin lyom ara, tuai di deiki tara kunupu ngeda, 1.35 meter kupu. Raja Salomo erdi akeca keteneipudi, Allah er si eremna ati bura tara dinin, akati damai deipudi, akeca deiki welepra teku. Raja Salomo aco lana, er si panggung deiki welepra tekudi, er urasin tarada, Allah karena tep keteneiami keca, er si mesba dam tara teku. Awekmai Israel nesala yumadi, sun deiyo ngebopu dinmai. Dinmaipa, Salomo er gutam tu apanggung deiki dipdongoprapudi, er buri tang buteneda erepra, im deiki tara deipudi, Allah moropu.

14 Raja Salomodi moropu ngeda, ake. “Ne nai Allah Yahweh, kan si erepkene. Naio kanda nun Israel yala nesala yuma tep, kalekra meliamsemumtopu, tupa melimserume. Nun deiyo ngebo, kan tenpu kurume. Im deiki cap, tuai mutu neitamai capda, kan utopu ngebo ton pio men kurure. Kan Allah tenpu kumempa nimi yumadi kan tepapu teka tenekenunge. Yuk tali keca ton putana gum dipapu, kan pesemem upupu moupra talepmengedi, sun kange dipru yuma deiki di, tenimtona gum di, kan upu dombanung neng tep nengeda, kandi pio bicau teneserume. Kan amutara kunung neng tep, ‘Ila di bicau tenesenuna cadi, ukunkamrume, angeda pio men kunkamrume. Ukupmumnyopda, nedi kalekra melimsenedi, pio telep kweipkamsene,’ pepra, pedina upu deiki di peiamsemum upuda, tek sisi tupa kuserure. Kanda, ange pio men tamna gum dipapu, tupa kalekra melimserume.

15 Ange utopu, kan dipapu ne nai bo Daud tep, ‘Ukunkamkene,’ pepra, pedina upu deiki peiamum upuda, konum kupmaserempa, nong kepmare. Kan pe sipyal di peiamum upuda, kan pe buru dipapu konum kupmasereme. Atep, atumi di nong konum kupmaserpa, konum epmape. 16 Ange tep nengeda, ne nai bo kanda Allah Yahweh, kan si erepkene. Naio kanda, nun Israel yala nesala yuma tep, kalekra meliamsemumtopu, tupa melimserume. Ne nai bo Daudda, kan amutarapu kuramudi, kan pelpu doramu. Atep, kandi er tep pedina upu deiki di peiamum ngeda, ‘Tek sisi pio kunkamserum’ tenen, moropkene. Daud tep pedina upu deiki di peramum upuda ake. ‘Daud nedi, ange kunkamrume, angeda pio men kunkamrume,’ pepra, peramsi upu yuma, moupra taleamumdi, dombaramumtopu, kandi deipmempa, dadeipdanen bankameng neng yuma peda, ne upu moupra gekepmengedi, angepu kupmengopda, ne damai kunkamenge. Ada, kandi Israel nesala, sun ila deiyo ngebo Raja kuramumtopu, amenda yankamre taru neitamai peda, kan nyapu peda, sun kan-kan di, Raja neng wepra deipnyopda, sundi nimi deiyo talepra, Raja neng pio kunkamenge. Ne damai ton pio men gum kunkamenge,’ peiamume.

17 Atep nengeda, ne nai bo Allah Yahweh kurema cadi, nun Israel nesala yuma tep, kalekra disememdi, melimserume. Ne nai bo Daudda, kan amutara kuramudi, kan pel doramu. Atep kandi er tep, pedina upu pepra deiamum ngeda, tek sisi tupa kunkamserume’ tenen, moropkene,” pepra, Raja Salomodi Allah tep, upepra moropu. 18 Moropudi aupu ton dukdongopra pepu. “Dinino, Allah kanda atuai mutu neitamaipu, nimi cap kikiman kutum do? Gume, im cap, im deiki dinin, pio itara im alau tara dinin, itamna deiki tara peda, ila pala weik mutu kurur dinin, ange neitamai peda, men kutume. Kanda pio ila manbul ngebo kurema tep, itara pe, tuai tara peda, tek sisi suktaleptue. Ange tep nengeda, utopu nedi dopkesi ati peda, pio yambul atipu dopsa tep, akati neitamai peda, tek sisi suktaleptupa, aca pio men kutume. Ada kan tenpuaipu men kuruma tep pepkene.

19 Ange yumada, tek sisi ngepu pepman dinino, neda kan amutara pio kununa cadi, nedi, ‘Uo ukupnetue’ tenen, moropkuken upuda, ‘Gekepnetum’ tenen, moropkene. Ada, ne pio amutarato ngebopu kununa cadi, adipapu wenepnetum dinin, ‘Kan kange dipapu bicau tenenememdi, makunkamnerum’ tenen, moropkene. Naio, kanda nedi si eremkenun Allahda, kanpu kurume. Atep, atumi di, ‘Ne moropmaken upuda, gekepkunerem’ tenen, moropkene.

20 Moropken ngeda ake. Ada, Allah kandi, “Akatida aca dopmempa, ne sida acei deipkamne,’ pepra, pedina upu deiki di peiamnemuma cadi, ‘Keteng komuni pape, lukunda pape, kan asuru lapra akati pio dimempa, nedi akati tara epnedi moronkamken keca yuma gekenkamnerum’ tenen, kan melimna ngebo ereipna tep moropkene. 21 Tonda, ange utopu, ne cap, kan nyapu Israel nesala yuma cap, akati damai men yanmanto kunkamep dinin, kan si eremna ati tara epmepedi, kan si tupa tenepmepedi, kan tep tenepra moropkepe pangeda, ‘Gekenkamserum’ tenen, moropkene. Ada, kan kunai im deiki di gekepsemem taru dipapu, ‘Nun mali kupe keca yuma tep, kau kemsememdi, lyemdonkamserum’ tenen, moropkene.

22 Ukupmantoda, ware kuprap nengdi, yuk ngebo tep, “Angeboda, mali kupka cadi, wenepkurume,” pepmenga peda, anengdi angebo tep, ateng koupmengedi, nimi upu lepsisikra pena deiyo neng damai, angebo dopra, kan si eremna ati damai dinin, kan karena tep, pala gel di taplakra yakeiamepyai, amesba damai duyangopda, angebo er tenpudi, pedina upu deiki di, ‘Gume, ange mali kuna ngeda, ne tek sisi men kupmane. Dinino, mok upu pepnyopda, Allahdi ne wenemna tep, wipdongopnetudi, poptapnetue,’ pepre pangeda, kandi gekenkamrem’ tenen, moropkene naie.

23 Sun aneng utopu neng ton, kan ati damai yangedi, upu pepmengedi moropmengopda, kan im deiki di gekenkamserume. ‘Gekepsememdi, upu bokeipkamserum’ tenen, pepkene. Allah im deiki di, kael kepra gekepsememdi, ‘Angeboda, tek sisi mali kupmare. Angeboda, mali men kupmare,’ tenepsemem dingeda, amali kupmare ngeboda, amali kupmaretopu, ikin menenga keca, er wenemna tep karenkamrume. Tonda, mali men kupmare ngeboda, er telep kecapu kupmaretopu, ‘Telep kupra kweipkamrum’ tenen, moropkene. Tali men tamkamrume.” Raja Salomodi upepra Allah tep moropu.

24 Tonda, aupu pepra Allah tep moropu.

“Ukupmanto nge ton, Allah kan nyapu, sun Israel nengdi, kan damai mali kupmenge pangeda, kandi wenemna keca karepsemempa, nun mar podan nengdi popra bisipsengepa, mambul kange doupmepedi, kan damai akati ton tamupra yapedi, ‘Uo naio, nun mali kupe kecada, tapmepa cadi, kanda nun nai bo Allah, tenpu kuruma tep, kan dipapu lyepropsetume,’ pepra moropkepyopda, ‘Kandi gekenkamseruma’ tenen, moropkene. 25 Ange tep nengeda, ne nai bo, kanda im deiki tara kunkamrem taruda, sundi moronkameng ngeda, moupra gekenkamrume. Ukumemdi, kandi wepra deiamum nesala, sun mali kunkameng nge yuma tep nengeda, kandi kaukepsememdi, lyepronkamserume. Ukupsememdi, sun anesala yuma tep, kandi pedina upu deiki di, ‘Amutu pio tep karepkamsene,’ peiamum mutupu, tamupra dubena deipmempa, acapu kunkamenge. Tonda Israel nesala, nun apu yapu pe tep nengeda, amutupu konum kareamume.

26 Tonda, ukupmantonge ton, Israel nesaladi mali kupmenge pangeda, sun wenemna tep, mo cepredi doupu maprepa, sun me gum kupbaryopda, sun mali kuramenge keca loptapra, akati kuryai tara epmengedi, kan si eremna ati tupa tenepmengedi, kan tepapu tenepra morokengedi, ‘Uo kanda, nun nai bo Allah Yahweh tenpu kuruma cadi, kan sipu eremkenupe,’ penkamkenge. Upenkameng taruda, sun anesala urasin, kan ati dam tara deipmengedi, kan Allah tepapu moronkamkenge. 27 Sundi, ‘Allahdi lyepropkamser’ tenen, kan tep moropmengopda, nun nai Allah, kan im deiki kumemdi gekemempa, kan amutara kunmap nesala, nun Israel neng tep, nun mali kupe keca yuma tep, kau kemsememdi, lyemdonkamsereme. Tonda, kan amutara kupe neng, nun mali kun keca cap, kandi wepra deipmum neng, nun Israel nesala nun mali kupe keca capda, kau kemnapu kunkamserume. Ukunkamrum taruda, kandi, ‘Telep ban bisida ake, telep kunkamrum ngeda ake,’ pemempa, gekepmepedi, nun abisipu dukdongopra bankamnupe. Kandi nun tep, telep upu pemsemumdi, ‘Amutu talepra kunkameng’ tenen, kareamsemum mutu, amutu deiki di ila mo karepsemempa, pio-pio tep cemamrepa, nundi amutu talepra pio tep kunkamepe’ tenen, moropkene.

28 Ton ukupmanto ngeda, amutu neitamai ila jen putaramsere taru do, ange gum dinin, kange mun pu weik jeramserepa, nimi weika di denkameng taru do, tonda sun koun keca kouamengepa, lyuramrenge cap, koun keca koluramre taru cap do, ange gum dinin, ila po weika di yana, nun kouramep keca jeramser taru do, tonda nun mar podan nengdi yana poryakakamseng taru do, uda ware kange mun keca yankamre taru do yuma, nun Israel yala nesaladi, kan tep moropmepyopda, ‘Kandi gekenkamserum’ tenen, moropkene naio.

29 Kange mun keca kupre pangeda, nun Israel nesala yumadi, yuk-yuk dinin, ‘Uo, ne mali kune kecada, ake,’ tenepmepedi, moronkamkepe. Ukupmepedi, kan si eremna ati damai men yanmanto kupkamep dinin, kan si eremna ati tenepmepedi, kan tepapu tenepra, nun buru erepra, kan ati dam tara deipmepedi, ‘Nun nai makupra lyepseo,’ pepra, moronkamkep taruda, ‘Kandi gekenkamserum’ tenen, moropkene naie. 30 Moropkepe pangeda, kan adipapu im deiki mutu kumamemdi, gekenkamserume. Gekepsememdi, nun mali kun keca tep, kau kepsememdi, lyemdonkamserume. Nai kandi tuai mutu neitamai kunge nesala yuma tep, nun dipru neitamai kure kecada, kan kael cadi, telep do, mali do, nimidi sun yuk-yuk mali kuramengetopu, tonda telep kuramengtopu, kandi upu bokeipkamsereme. Nai kan dipapu nimi cap, sundi deipmenge neng cap, tuai nesala yuma, sun dipru neitamai kure keca yuma dimemdi, kael kemserume. Angeda, yuk nengdi ton men kuptenge. Ange yumada, kan tenpua kuptuma tep, kan teppu moropkene.

31 Nimi dipru epmemdi, upu bokeipsemem pangeda, Israel nesala pe, yuk mutu nesala peda, sun yumadi kael kepkamenge. Ada, ‘Uo, Allahda, pio ila mambul ngebo cadi, mali kupmepepa, wenepserur’ tenen, kware pio weik kunkamenge. Ukupmengepa, kandi sun tep, go kuna ton cap karepmempa, kunkameng taruda, kan cap, kan si cap tep, pio si eremkamkenge. Kan sipu eremengedi, kandi, ‘Ukunkamrume, angeda pio men kunkamrume,’ peiamsemum upuda, pio talepra dombanapu kunkamenge’ tenen, moropkene. Tonda, kandi nun co puna neng tep, kareamum mutupu, ‘Acapu kunkameng’ tenen, moropkene.

32 Tonda, sun yuk mutu dadi tengyakan neng, sun Israel neng guma dinin, ‘Allah er si erepkup’ tenena tep, sun yuk karen mutu di, aca kunup mutu neitamai yankameng neng tep pepkune. Anengda, karen mutu kunge dinin, yuk nengdi pengepa, kan si cap, kan kumem keca cap, kan ila puto deiki di pel domemnge cap tep, ton gekenkamenge. Gekepmengedi, ‘Nun ton Israel nesala kunge mutu dirbenkup’ tenepmengedi, yakankameng taruda, kan upu gekena tep, kan ati damai yangedi, kan tep pio moronapu kungedi, kan sipu eremkamenge. Kan si eremkamkeng taruda, ‘Kandi animi bo neng peda, sun mororamkeng keca gekenkamrum’ tenen, moropkene naie.

33 Atep kan kunkamrem ati damai di, ada im deiki di, sun animi bo nengdi moronkamkeng nge cap, tonda sundi penkameng nge capda, gekepmemdi karenkamrume. Ange utopu, kupmem pangeda, sun amutu dana-dana mutu kunge nesala cap, tuai ban-ban yuma kunge nesala yuma capdi, kan upu gekepmengedi, kan tep kael kepmengedi, ‘Uo, Allah Yahwehda, tek sisi ila mambul weik ngebo kurure,’ tenen, kan tep kware kuprepa, gispal donkamkenge. Ada, kan nyapu sisa, nun Israel nengdi, kan tep tenenup utopu, sun yuk-yuk mutu nesala peda, utopu tenenkamkenge. Tonda, nedi moupra dopmaken atida, sun mutu-mutu yuma kunge nesala yumadi, ‘E, Raja Salomodi, akati dopkada, Allah er si eremna cap, er upu gekena cap kururaida, ake,’ tenenkamenge.” Raja Salomodi, Allah tep moropu.

34 Salomodi upepra Allah tep moropudi, aupu ton dukdongopra moropu.

“Tonda ukupmanto, kandi kan nyapu sun Israel neng tep, dan mutu do yuma, amutu neitamaida, sun podan neng kununga cadi, sun damai bemumdi, popbisipkamrume,’ pepra, sun Israel nesala dokotepkamrumaida, sun benkunge taruda, sundi kan tep, ‘Uo nun naie, melipsemempa, nun podan neng tep popbisipkamtepe,’ pepra moronkamkenge. Ada, moronkamkeng taruda, kan si eremna tep, akati dopsipa, tupa akupmare tarapu, sundi bopatekra amnyo karekra epkamenge. Tonda, kandi akati arum Yerusalem mutu, kan si derinai tep wepmumai, atarapu tenepmengedi, epkamenge. Ukupmenge taru yumada, moronkamkenge. 35 Sundi, ‘Nun nai Allahdi melipsetue’ tenen, moropkamkeng keca cap, ‘Nun kaypu neng ton meliptue’ tenen, moronkamkeng keca cap, moropkenge pangeda, kanda im deiki kuremai di, kan mawa nesala gekepmemdi, ‘Sun mororamengtopu karenkamrum’ tenen, moropkene naie. Ada, kan nyapu Israel nengdi, sun mar podan damai benkungedi, kan tep moropkengopda, kan adipapu gekenkamrume. Gekepmemdi, sun moronkamkeng nge cap, sundi perbankameng nge cap tep, makunkamrume.

36 Dinino, kan nyapu sun Israel nesaladi, amenda taru kan damai mali kupkamenge. Nun kaele, dan tara nesala do yuma, nimi tenpu ngebo peda ton, telep ngebo ton men kunupe. Atep, mali kupmenge pangeda, yu kupkerepa, kandi aneng dopra, sun podan neng deiki deipmempa, ayu nengdi kan nyapu popra bisbisa kapmengedi, Israel nesala tomopmengedi, sun pe karen mutu dubengedi, wenemna ati dongopmengopda, amutuda karenai do, damai do, derirbenkamenge. 37 Ukupmengepa, kan nyapu sun Israel nengdi, akaren mutu neitamai di, mali kange doupmengedi, ‘Uo, nun tek sisi mali kupmupka deiki di, awenepmaserpa, wenemna ati bukmape’ tenen, sun pedi tenepra, dipru neitamai di tenepmengedi, wenemnai bena deiamengai dipapu, ‘Uo nun tek sisi ila mali keca kupmepu. Pio mali bisi bepudi, mali-mali weik kuramupka deiki di, nun nai Allah tep yanipmepudi, pio mali kupmupka tepa,’ tenepmengedi, sundi, ‘Nun nai bo Allah lyepseo,’ pepra moropmengopda, kandi gekenkamrume, naie.

38 Ada, tali sun sipyal deiki dipapu pertamna gum dinin, sun Israel nengdi, sun podan neng tep, popra bisipsengedi, wenemna ati dubena deipmengopda, amutu neitamai di sun dipru neitamai di mali kupi ngeda tapmengedi, kan tep sun dipru cap, kange cap, kan deiki deipkengopda, ‘Ange ton gekenkamrum’ tenen, moropkene. Sundi moropkengedi, kandi sun cap, sun apu yapu cap tep, kareamum mutu cap, kandi wepmum mutu Yerusalem cap, kan si eremna ati dopsinge yuma cap, angeda kange di ton cap tenepmengedi, moropkengopda, gekenkamrume, naie.

39 Tek sisi sun adipapu, ‘Nun nai Allahdi melipsetue’ tenen, kan tepapu moropkamkeng keca cap, ‘Nun kaypu neng ton melipsetenge’ tenen, moronkamkeng keca cap, moropkenge pangeda, kanda im deiki kuremai di, kan mawa nesala sun upu gekepmemdi, ‘Sun mororamengtopu karenkamrum’ tenen, moropkene naie. Ada, kan nyapu Israel nengdi, sun mar podan damai benkungedi, kan tep moropkengopda, kan adipapu gekenkamrume. ‘Gekepmemdi, sun mororamengtopu, makunkamrume’ tenen, moropkene naie.

Salomodi upepra moropu.

40 Upepra moropu pangeda, Raja Salomodi, aupu ton dukdongopra pepu. “Ange tep nengeda, kandi moupra epsememdi, bicau tenepsemem dingeda, nedi kan tep moropken ngeda, dan taru do yuma, kan nyapu nun Israel nesaladi, moronkamkep nge yumada, ‘Gekepmemdi makunkamserum’ tenen, moropkene. 41 Ange tep nengda, “Teka, nun nai bo Allah Yahweh, kan ukutaru adipapu bukmemdi, Allah kan si eremna tep ati bememdi, acapu pio kunkamrume. Ada, kan ila puto peten kemna tep, derina tep keca, telep co bekin dopra deipi keca, er sida, Peti Perjanjian deipmap ati damaipu, akati wekmemdi, pio tep akati neitamai dakunkamrume. Ukuramemdi, kan si eremna pel dona deiyo neng, kandi wepra deipmum neng, sun imam-imam neng yuma tep, tupa-tupa melipra lyemdonkamrume. Tonda, kandi, ‘Ne mawa nesala kunkameng’ tenen, wepra deipsemum Israel yala nengda, nundi, ‘Uo, Allahdi pio telep kupra melimserure’ tenen, telep kange deipmepedi, kan si pio tep eremkamkepe. ‘Ukunkamep’ tenena tep moropkene naie.

42 Nun deiyo ngebo Allah Yahweh, kandi wepra deipnemum nimi deiyo ngebo, ne Salomo tep, ‘Dabal kupkerepa, ne tep pio men tapkamnerem’ tenen, moropkene naie. Ada, kan adipapu ne tep, ‘Erda, Israel nesala talepredi, Raja kunkamre’ tenen, wepnemumdi, erepra deipnemuma tep pepkene. Tonda, kan amutara kuramudi, pel telep kupra doramkeu ngebo, Raja Daudda, er tep ila di bicau teneramumdi, ‘Ukupkamkene,’ pepra, pedina upu deiki di peramumnge yumada, ‘Lumdongona gum dipapu, ange yuma tupa-tupa kunkamrum’ tenena tep, moropkene naie.”

Raja Salomodi Allah tep moropudi, sengpepu.