2Ch 7 | XteSC | STEP | Nimi deiyo ngebo Raja Salomodi, Allah tep konum moropra sengpepu pangeda, adipapu, uku bu im deiki di sakudi, Allah Yahweh er gispal dona tep, yapi keca doupra, yana ketenepra deipinge yumada, uku di jeproudi gawal daku. Ukupu dingeda, Allah er si eremna tep ati neitamai yumada, Allah Yahweh, pio telep ngebo kurura cadi, er pe ila dirine pio weik, Allah er si eremna ati wekra dekpepra diniku.

2 Chronicles 7

Allah Yahweh er si eremna atida, Raja Salomo cap, Israel neng capdi, buplan pangna tep, ‘Akatida telep kweipmepedi, sah kepkup’ tenen, pel dopi upu

1 Nimi deiyo ngebo Raja Salomodi, Allah tep konum moropra sengpepu pangeda, adipapu, uku bu im deiki di sakudi, Allah Yahweh er gispal dona tep, yapi keca doupra, yana ketenepra deipinge yumada, uku di jeproudi gawal daku. Ukupu dingeda, Allah er si eremna tep ati neitamai yumada, Allah Yahweh, pio telep ngebo kurura cadi, er pe ila dirine pio weik, Allah er si eremna ati wekra dekpepra diniku. 2 Ange tep nengeda, akati pumbon pel dona deiyo neng, sun imam-imam nengda, Allah Yahweh er ati neitamai pio men wekmanto kupi. Ada, Allah Yahweh er pe ila dirinda, Yahweh er si eremna ati neitamai yuma yana wekra diniku.

3 Akati damai bulupra wekmai nesala, sun Israel yala nesala yumadi, dinmaidi, im deiki di auku bu kwereyakanmaunge cap, Allah Yahweh er pe ila dirineda, Allah Yahweh er si eremna ati neitamai diniku pangeda, sun yumadi gutam tu dipdongopmaidi, sun asoda tuai genepdongopra deipi. Sun asoda, tu deiki dipdongopmaidi, Allah tep gispal donmai. Tonda, sun Israel nesala yumadi, Allah tep gispal dona cap, mut pena cap, kunmaidi, er si eremai. Sundi penmai upuda ake. “Uo, nun nai bo Allahda, pio telep kuredi, nun tep weika di telep kudiserure. Erdi nun tep, ila di bicau teneseredi, erdi, ‘Ukunkamrume, ukupmumnyopda, nedi pio telep kupra deipsenedi, kalekra melimkamsene,’ pepra, pedina upu deiki di peiamseu ngeda, lumdongona gum dipapu, pio men tapkamsere. Tupa melimnapu kunkamsere,’ pepra, gispal donmai.

4 Allah er si gispal donmai pangeda, Raja Salomo cap, sun Israel nesala yuma capdi, Allah Yahweh adinmauai di, er si eremna cap, er gispal dona cap tep, yapi keca popra karenmai. 5 Ukupi dingeda, nimi deiyo ngebo Raja Salomodi, Allah Yahweh er si eremna tep, nimidi peirami yapi keca sapi bisamda, denge pio weik, dua puluh dua ribu (22.000) cap, domba bisam seratus dua puluh (120.000) cap di popra karepu. Ada, ‘Nun nai bo Allah Yahweh cap, nun Israel nesala cap, telep kupra kikiman kunkamep’ tenen, akeca karepu. Er cap, sun Israel nesala yuma cap, ukunmaiya deiki di Allah Yahweh er si eremna tep atida, ‘Konum telep kweipmape’ tenen, sah kemna peramengtopu, ange tenena tep akonum kupi.

6 Sun imam-imam neng kuna tep ketenepra deiamyai teki. Ukupitopu, sun Lewi yala neng peda, mut pena tep keca, alat-alat musik cap penmaipa, ton yuk nengdi mut penmaidi, ‘Pio telepe,’ pepra, Allah Yahweh tep, gispal donmai. Sun Allah er si eremne mut penmai kecada, men taru nimi deiyo ngebo Raja Dauddi dopra, deiamu keca yuma doupmaidi, mutda penmai. Mut penmaiya deiyoda ake. Allah Yahwehdi, nun tep, ila di bicau teneseredi, erdi, ‘Ukunkamrume-ukunkamrume. Ukupmumnyopda, nedi pio telep kudisenedi, kalekra melimkamsene,’ pepra, pedina upu deiki di peiamseu ngeda, ‘Lumdongona gum dipapu, pio men tapkamsere. Tupa melimnapu kunkamsere,’ tenena tep, gispal donmai. Uda, menop taru, Raja Dauddi, mut deiki di Allah tep, ‘Kanda pio telepe pua,’ peiamu taruda, sun imam nengdi, lelim pena keca, er si terompet lelim pong penmai pangeda, sun Israel nesala yumada, tekmaidi mut penmai.

7 Ange yuma konum kupi dingeda, Allah Yahweh er si eremna ati bura tara dinin, akati damai keteng yakan tarada, imam-iman neng yuma wekmantoaida, nimi deiyo ngebo Raja Salomodi, ‘Atumida, aceida yuk kuna tep gum dinin, Allah Yahweh er gispal dona tep karepkup keca yuma, aceipu karepkup’ tenen, akati dam go telep kweipudi, akeca-keca yuma adipapu Allah tep karepu. Aca karepunge deiyoda, Allah Yahweh er si eremna tep, gam keca popra uku dongopu. Tonda, nimidi wa pepra kourameng jen keca, gandum cap, bisam kop pio telepnge capda, ‘Allah cap, nimi cap, telep kupra kikiman kunkamep’ tenen, antamderina tep, akeca yuma duyana, uku dongopra, si erepu. Ada, gel di taplakra yangderin keca, er si mesba cap, telep gat keca, er si tembaga deiki, Raja Salomodi domu ngeda, akeca uku dongomna tepaida, ila di men domu. Akati dam go neitamai karepka deiyoda, men taruda, Salomodi tembaga mesba ketekepra deipkai deiki di, akeca-keca yuma tenpu taru dipu men deipmanto kupka cadi, akati dam go neitamaipu karepu.

8 Uda, ataru adipapu nimi deiyo ngebo Raja Salomo cap, sun Israel nesala yuma capdi, ue ngangtan bari tumi neitamai yumada, ila kailya kalemami. ^{▼▼kailya kalemna – Ataru kailya kalemaiyada, ‘Menop taruda, Mesir mutu tapra, pio katawai mutu neitamai embanapu kuramupu ngeda, tupa tenenkamepe’ tenen, keana taru tep yambul bura ati dopidi, acapu mapmai.} Akailya kalemna tep, bupra yanamidi wengami Israel nengda, denge pio weika di kurami. Sun abulupra yanami mutuda, dapu tara mutu, (arah utara), mutu si tenpu Hamat mutu bisi ban tara di dipra, iknapi tarada (arah selatan), adinin Mesir mutu bisi bana tep wilimdonai, arah selatan sirikaida, Israel nesala kurami mutu-mutu yuma bulupra, ila kalemna kalemai. 9 Ue banbari tumi deiki di, sun Israel mutu nesala yuma bulupra yanamidi, sirik tumi konum kupka cadi, sirya kalepra jepi. Uda, ‘Allahdi, nun mali kun keca daepseredi, kaukepkamser’ tenen, gam keca popnedi, mesba deiki di, uku dongopyai tep nengeda, ue yoneitam bari (7) tumi deiki di, kalemna kaleami. Ange konum kupyopda, kange di ue yoneitam bari tumi ton, ataru neitamai di, ‘Menop taru keana taru tep, metek co teru di, metek bura ati dopra kuramepu ngeda, tupa tenenkamep’ tenen, ila kalemna ton kaleami. Akalemna butenenge konum kupyopda, sirik tumi, banbari (8) tumi tep, Yahweh er si eremna tep, bulupra gispal dopi.

10 Ukupra dakunmaiyanen, ware yoneitam bari (7) ngeda, tumi tanggal 23 deiki di, nimi deiyo ngebo Raja Salomodi, sun amutu bulupra yai nesala yuma tep, ‘Sun pe mutu tamupra benkurume,’ pepupa tamupra bendopi. Tamupra beidi, sun kange pio deipi ngeda, sun nai bo Allah Yahwehdi, sun apu bo Raja Daud cap, er yo punupu ngebo, Raja Salomo cap, Allah er mawa neng sisa, sun Israel nesala tep, pio telep-telep kweiamunge tepapu, sun telep kange deipidi, sun kange dipru teleppu kupi.

Allah Yahwehdi nimi deiyo ngebo Raja Salomo damai, kange di belepra teku upu

11 Nimi deiyo ngebo Raja Salomodi, gonga kepra, apel-apel yuma doramya deiki di, Allah Yahweh er si eremna tep ati konum doramnganen, konum dopra gawal dakudi, buplan pakra sah kepu. Tonda, ila nimi deiyo ngebo Raja Salomodi, er pe mana atida, pio telep ila ati ton, er sida istana doramyanen gawal daku. Akati butene konum gawal dakua tep, er kange neitamai di, ‘Ukupra donkamne,’ tenemutopu, yuma kupra dopu. 12 Ukupra, akati butene konum dopra gawal daku pangeda, Allah er si Yahwehdi atumi lukunda neitamai di, Salomo damai yaudi lap pepu. Allah Yahwehdi pepu upuda ake. “Salomo kandi, ne tep moronerum ngeda, konum gekepkesidi, kandi moropnemumtopu, konum melipmakene. Melipmakena cadi, kandi dopmum atida, yuk wepra keteneipnedi, aceida ne tep yapi keca popra uku dongomyakanai kepra konum deipmane. 13 Uda, ukupmantoda, amenda taru sun Israel nesaladi, mali kupmengepa, sun wenemna tep, nedi im neitamai kuramre dua pepnepa, mo men cepmanto kupkamre do, sul po dokotepnepa, sul podi nimi kourameng keca yuma jepredi gawal dakamre do, agum dingeda, ila kange mun pu do, mutmuta yuma gum kuna tep, deiyo keca dokotepnyopda, ne nyapu sisa sun Israel yala nesala yumadi, ange epmengopda, ne tep moropkamnenge.

14 Akange mun keca kareptene pangeda, yuk nengdi, ‘E, anesalada, Allah Yahweh, er ngepu kununge,’ pepra, ne nyapu sisa sun Israel nesala, ne si deiki penung nengda, sun dipru amu kepra kuptenge dingeda, ne tep, ‘Naie melipra lyepsetume,’ pepra, pio moropkamnetenge. Tonda ukuptengedi, sundi mali kunge keca yuma, tek sisi tapkamenge. Ukuptengopda, ne im deiki kununai di, sundi ne tep moronkamneng ngeda, gekenkamne. Gekepne dingeda, sun mali kunung keca tep nengeda, nedi kaukepnedi, daepkamne. Tonda, sun kunkameng mutu yumada, pio tamupra telep kupra deipkamne.

15 Ukutaruda, nedi ne nyapu sisa kungedi, ati donung mutu neng tep, moupra dinedi, sun yumadi moronkamneng ngepu, gekepnedi, sun tep melimkamne ngeda, moupra tenimkamne. Ada acei kungedi, akati damai di ne tep si eremengedi, moronkamneng ngepu, gekepnedi melimkamne. 16 Atep ange yumada, tek sisi nedi kunkamne. Deiyoda, acei mutu, akati neitamaida, nedi konum weiamsidi, konum ketenepra deiamsi. Ada, ‘Ne tep pio tupa-tupa si eremkamnengaida, aca’ tenen, konum weiamsi. Akatida, nedi moupra dinedi, dorkupbankameng taru yumada, ne dipapu ne mawa nesala, Israel neng tep, pio melimkamne. 17 Ukupne dingeda, Salomo kanda, kan nai bo Raja Dauddi, inimna gum di dumsisipu, nedi tenepra peipnepa kuramutopu, tonda nedi, ‘Angeda kunkamrume, angeda pio men kunkamrume,’ peiamsi upu moupra taleamutopu, ange peda nedi dopra, kan deikipu deipkene. Atep kan peda, nedi peramsi upu yuma cap, kan tepapu pepkesi upu cap, ngepu moupra talepmemdi, pio dombanapu kupmumnyopda, telep kweipkamkene.

18 Nedi pemkesitopu kumem pangeda, nedi kan nai bo Daud tep, ‘Ukupkamne,’ peiamsitopu melimkenepa, kandi Israel nesala talememdi, sun ila deiyo ngebo, Raja pio kunkamrume. Ada, sun Israel nesala yuma tep, sun deiyo ngebo kepra deipkenepa, pio talepra kunkamrume. Yuk ngebo tenpu peda, Israel nesala sun deiyo ngebo men kupkamtue.

19 Dinino, kan cap, kandi deipmempa, deipdanen bankameng nesala yumadi, ne si tapmumdi, yuk isok-isok sipu erepbamumnyopda, wenepkamsene. Ange utopu, nedi, ‘Angeda kunkamrume, angeda pio men kunkamrume,’ peiamsi upu cap, ‘Angeda mem keca,’ peiamsi upu cap yuma, yanipmumdi epra tapmumnyopda, wenemkamsene. 20 Sundi ne peramsisi upu yaniptapmumnyopda, sun wenemna tep kunkamne ngeda ake. Ada, ne nyapu sun Israel nesala tep, ‘Atelep mutupu pio akunkamenge,’ peramsidi kareamsi mutuda, kange di tamupra dopropkamsene. Tonda, kandi dopnemum ati ne mambul ati kunkamre. Dinino, sundi malipu kupmumnyopda, akati pumbonda, ‘Ne sipu eremkamenge’ tenen, ne si akati deiki deipman dinin, sundi ne tapnemumnyopda, ne pe akati di gopra bendopkamne. Ukupnepa, nimi yuk mutu neng yumadi, sun Israel nesala tep, mali-mali pepmengedi, nyek-nyek pepra autunkamenge. Tonda, sun Israel nesala tep, ‘Sunda tali neng pua,’ penkamenge.

21 Ukutaru kandi pio urasin telep ati dopnemum ngeda, urasin pio telep ati kurure. Akati utopu ton men kurur dinino, sun Israel nesaladi, mali-mali kupmengedi, ne tapnengopda, nedi akati tapnepane, akati pio mali kupbankamre. Akati mali kuprepa, yu nengdi akati uruptapkamenge. Ukupre pangeda, amenda taru akati dam embange neng epmengedi, ‘Uo, akati mali kupkada, ware deiyo keca tep kupu do?’ tenen, lukdankamenge. Lupdangedi pepkamenge, ‘Uo, ware keca deiyo tep, Allah er si Yahwehdi, akati cap, amutu cap, anesala cap tep, mali kupra deipu do?’ penkamenge.

22 Aupu yuma upepmengepanen, sun yuk nengdi upenkamenge. ‘Gume, sun Israel nesalada, sun nai bo Allah er si Yahwehdi, sun co puna neng, Mesir mutu di doupra duyanamu ngebo, er si yanipidi, tali isok-isok sipu erepidi, isok amutara kuramipa, Allah er si Yahwehdi anesala yuma, sun wenemna tep, akati mali kweipudi, kange mun keca weika di anesala tep konum karepke’ tenen, penkamenge. ‘Ada er yu keca, sun aneng nong deiki deipudi, weika di kareramupa, sun ikin weik kununge,’ penkamenge.” Allahdi Raja Salomo tep pepu.