2Ch 8 | XteSC | STEP | Raja Salomodi Allah er si eremna tep ati cap, tonda er pe nimi deiyo ngebo Raja kuna ati cap tep nengeda, akati butene doramu keteng tamunda, denge pio weik dua puluh (20) tahun deiki di, apel doramnganen, gawal daku.

2 Chronicles 8

Nimi deiyo ngebo Raja Salomodi talepra kuramu keca tep, pepu upu

1 Raja Salomodi Allah er si eremna tep ati cap, tonda er pe nimi deiyo ngebo Raja kuna ati cap tep nengeda, akati butene doramu keteng tamunda, denge pio weik dua puluh (20) tahun deiki di, apel doramnganen, gawal daku. 2 Adininda, nimi deiyo ngebo Raja Huramdi, ^{▼▼Huram – Angebo er sida, yuk Allah upu buku neitamaida, er si tep ‘Hiram’ sengnung dinin, Ibrani upu deiki di ‘Huram’ sekeiamitopu, nun peda asipu sekra deipmepu.} menop taru Raja Salomo tep kareamu mutu neitamaida, ila ati-ati arum kwamu dinin, konum mali kupupa, Salomodi peipupa, er pel don nengdi, akati-akati arum lepsisikra doamipa, Israel nimi deiyo ngebo Raja Salomodi, sun Israel nesala tep, ‘Tamupra amutu-mutu neitamai bena kunkurume,” pepupa, sun Israel nesala kankan di, nimi weika di amutu neitamai bena kurami. 3 Tonda, nimi deiyo ngebo Raja Salomodi upepupa, er jen talena nengdi bena, Hamat-Zoba mutu popra bisbisa kapidi, amutu yuma dalupra bena dopropidi, anengda Salomo er amutara kurami.

4 Ukupi dingeda, ila katawai mutu neitamai dinin, amutu sida, Tadmor mutu, er jen talena nengdi, puto kepra bena doramidi, amutu neitamai kwamu ila ati arumda, er pel don nengdi lepsisikra domi. Ukupi dingeda, akati arum ila lyom gel beilya deipra ongopdopidi, ila pala gel taplakra yakra deipidi, lyom gel beilya deiami. Ange utopu, ila gel beilya ton, bung keca ketenemderinai tep, Hamat mutu neitamai kwamu ati arum dana-dana tara yumada, ila lyom gel beilya deipra ongopdomi. Tonda, Salomodi peipupa, er pel don nengdi, Hamat tara neitamai, nimidi, wa pepra koupnedi kipra jerami, keca yuma dopra, akeca-keca yuma mawa derinai tep, deiyo mutu keiami.

5 Ange tep nengeda, sun aneng dipapu, Bet-Horon mutu itara cap, tonda Bet-Horon mutu utara cap, ila puto di ila lyom gel beilya deipra ongopdopidi, agel beilya neitamai wengbana bisi buplan ton, potokra lelipdongomi. Tonda, ‘Akati arumda, mali nengdi tali lupra men wekamtenge’ tenen, abuplan puto di dengdongona tep, gat keca er si besi di, lyom co urasin utopunge ketenepra, abuplan-abuplan deiki deiami. 6 Ange utopu ton, nimi deiyo ngebo Raja Salomodi peipupa, Balat mutu neitamai peda, akati arum uruptamaminge lepsisikra domi. Tonda atara neitamaida, utopu ton Salomodi peipupa, amutu neitamai wa pepra kourami keca, dopra derina tep, ati domi. Utopu tonda, kuda bisam di gipra, tu deiki embana keca, nimidi akeca deiki bukra, yuk neng porbana tep keca, er si kereta kuda, dopra derina cap, tonda jen talena neng bana tep kuda bisam derinai peda, amutu neitamai ketenepra deiami. Ange utopu, Yerusalem mutu neitamai pe, Libanon mutu neitamai peda, Raja Salomodi, ‘Akeca dopkamne,’ teneamunge yumada, amutu neitamai cap, er Raja Salomodi taleamu mutu neitamai yuma capda, erdi peipupa, er pel dona deiyo nengdi, apel dorami.

7 – 8 Tonda, Salomodi dan mutu do yuma, amutu-amutu neitamai kurami nesala tep, “Nedi karena gum dipapu, ne pel tali dopneso, pepnepa, apelpu donkamnerume,” pepra peramupa, er putaramutopu, ila ikin pel dimamupa, apel dorami mutu nesalada ake. Ada, Amori tara kurami nesala cap, Het tara kurami nesala cap, Feris tara kurami nesala cap, Hewi tara kurami nesala cap, Yebus tara kurami nesala cap, anesala-anesala yumada, Salomo er pel tep, tali pel dorami. Ada, pumun taru Israel mutu neitamai, anesala yala-yala yuk-yuk dakurami dinin, sun Israel nesaladi, Kanaan tara yuma bisbisa kapi dingeda, anesala men poptami, gawal men daki.

Sun anesalada, ton tara ngeda, tupa gam kuramya cadi, Raja Salomo dipapu pel dimamupa, anesalada menenga keca dorona gum dipapu, er pel talipu dorami. Sun ayala nesalada, Kanaan di deiamupa, deipdanen yakarami nesala kuramipane, sun Israel nesala, amutu beidi, amutu kurami nesala yuma bena popi taruda, anesala yuma gawal men daki. Sundi, tupa tamipa gam tupa kurami nesala tep, ila ikin pel dimamupa, pel dorami. Sun anesalada, menop taru pe, ataru peda, sun Israel nesala, sun pel melipra dona neng kununge.

9 Dinino, Raja Salomodi Israel yala nesala tep nengeda, ikin pel ton dipnepa, men dorami. Ange gum dinin, Raja Salomodi sun Israel neng tep, jen talena neng kemdina cap, jen neng gung yuk-yuk tep, deiyo kemna neng kemna cap, sun ajen talena neng yuma, ila nimi deiyo ngebo kemna neng cap, tonda kereta perang deiki tekra bana neng, sun gonga kemna deiyo ngebo kemna cap, tonda kuda bisam bali deiki bukra, nimi porbana neng cap, apel donangepu, Israel yala nengpu wepra deriramudi, apel kareramupa, talepra dorami. 10 Tonda, Raja Salomo er pel yala-yala yuma dorami neng, denge pio weik kuramya cadi, aneng sun deiyo nengda, denge dua ratus lima puluh (250) neng ton wepra deiamupa, sun anengdi, Salomo er pel yala-yala yuma dona tep, wepra deiamupa doromi neng tep, kalengamidi, pio ikin pel dimamipa dorami.

11 Nimi deiyo ngebo Raja Salomo, Mesir mutu di taleamu deiyo ngebodi deiamu ner, Salomodi domu. Doamupa, anerda, menop taru Salomo er nai bo Daud, erdi domu pio telep ati pumbon kuramu dinin, Salomodi, ‘Gume anerda, Daud er ila ati pum kuramu dinin, Allahdi peiamu upu dopra, telep co bekin pumbon dongopi keca, er si Peti Perjanjian, angeda Daud er ati keana taru tep, dadeiamya cadi, akati konum pio lengai utopu kurure. Atep nengeda, nedi Mesir mutu di domsi nerda, tupa Daud ati men kunkamre,’ tenepudi pepu. Atep aner dopra, yukai deipu. Ada, Salomodi aner tep, yukaida, ati dopra keteneipupa, aner acapu kuramu.

12 Uda, ataru-ataru neitamai yumada, nimi deiyo ngebo Raja Salomodi, yapi keca popra, Allah Yahweh er si eremna cap, er gispal don cap tepai, gel pala deiki di yakra deiamu keca, er si mesba deiki di, uku dongoramupa, uku di akeca yuma jepropu. Amesbada, Allah Yahweh er si eremna ati damaipu dinin, urasin tara domipa, adeiki di uku sengamipa, gam keca popra yanedi, ange deiki dongoramu. 13 Agam keca popra yana, uku dongomamu keca yumada, menop taru Musadi, mambul upu deiki di, “Ukupkamrume, angeda ukupra karepmumdi, Allah tep si eremkamrume,” pepra deiamutopu, kuramu. Tonda Musadi, “Pio ila tumida, aware cap, atanggal cap kunkamre,” peramutopu, Salomodi ukuramu. Ada, ila tumi, pel dona gum dipapu, beipye peingna tumi, Sabat tumi cap, ukupu war tengne taru cap, tonda yuk ila tumi ngeda, keteng tamun, keteng tamun yuma neitamai, ila tumi weneringe ton akwamu. Ada, Nena Gum Roti kwaneng kalemna tumi cap, Nimi Kourami Keca ila di Kin Tumi kalemna cap, tonda yambul co teru di, Keana Bura Ati don tumi cap, ange yumada Musadi peiamutopu, Salomodi angepu talepra ukuramu.

14 Tonda, Salomodi, er nai bo sisa Dauddi, “Ukupra kunkamrume,” pepra deiamutopu, Raja Salomodi, sun imam-imam neng tep, gung yuk-yuk wepra deipudi, “Sun agungda, ataru neitamai Allah er si eremna ati pumbon, pel donkamrume. Sun yuk gung nimida, yuk taru neitamai, apelpu dinin, menmena taru pel donung neng punupra, apelpu donkamrume,” pepra deipu. Apeiputopu, sun anengdi angepu ukurami.

Tonda, Allah Yahweh er si eremna tep, mut pena cap, imam-imam neng pel doraminge melimna tep nengeda, Salomodi, sun Lewi yala nengdi deiamipa, dadeipdanen yakarami nengpu, wepra deiamudi, “Agungda, ataru pel donkamrume, sun yuk gungda, aneng punupmumdi, apelpu donkamrume,” pepra deipu. Atep, sun imam neng dipu, Allah si eremna tep wengami taru yumada, aLewi yala nengdipu melimami. Utopu ton, Allah Yahweh er ati buplan dam yuma melipra kalengna neng peda, sun gung yuk-yuk bokra deriramutopu, apelpu dorami. Ange-ange yumada, Allah er amutara kuramu nimi deiyo ngebo, Raja Dauddi, “Ukupra kupbankamrume,” pepra deiamutopu, Raja Salomodi angepu kuramu.

15 Uda, Raja Dauddi sun imam-imam neng cap, sun Lewi yala neng cap, Allah er ati pumbon pel donange tep, “Ukunkamrume,” pepra, deiamunge yumada, angepu talepra, pel dorami. Tonda, sun Lewi yala neng tep, ‘Allah karena tep, kunumna weik bung keca yala-yala yuma derina ati, ukupra pel donkamrume,” peiamunge cap, tonda yuk-yuk pel donange cap tep, peramung yumada, moupra taleramidi, angepu pel dorami. 16 Atep nengeda, nimi deiyo ngebo Raja Salomodi, ‘Allah er si eremna ati dopkamne’ tenen, keteneamu ati don keca cap, pel donange cap yumada, er pel dona deiyo nengdi konum dopra gawal daki. Ada, akati pel dona tep, gonga keamu taru di dipdongopra, ayumnya co di dipdongopra, adinin Allah Yahweh er ati yuma dopra gawal daki. Ada, pio telep kupra adipapu dopra seng pepi.

17 Uda, ange yuma konum kupu dingeda, nimi deiyo ngebo Raja Salomo Ezion-Geber mutu cap, Eliot mutu cap beu. Amutu buteneda, ila laut mokon damai tara, er si Akaba, amutuda Edom mutu neitamai kwamngai beu. 18 Tirus mutu taleamu nimi deiyo ngebo, er si Raja Huramdi, er amutara tara pel don neng, laut mokon deiki ila gapung co, er si kapal doupra embana tep, pio ila kael keami neng, er Huram nyapu ton wepra dopramu. Ukuamupa, Raja Salomo er nyapu cap, sun kikiman agapung co, er si kapal doupra embaramyanen, ortara karen mutu sida, Ofir mutu bei. Ofir mutu konum benapidi, sun anengdi kunumna weik gat keca, er si emas, er ikinda lima belas ribu (15.000) kilogram, benapidi, doupra nimi deiyo ngebo Raja Salomo er damai tamupra duyai.