2 Chronicles 9

Syeba mutu ila nimi deiyo ner, Raja Salomo damai Yerusalem yaua tep, seki upu

1Nimidi, “Raja Salomoda, Allah Yahweh er sipu eremrure. Salomodi, ila mambul pel doramredi, Israel nesala kunge mutuda, pio teleppu kurure,” pepra, lap perembaramipa, ortara ila karen mutu, er sida Syeba mutu taleamudi, deiyo nerdi tupa gekeramnga tep, erdi, ‘Aupu gekepsi ngeda, tek kurur do, gum do?’ tenepudi, ‘Neda Raja Salomo, er damai bena, ne pe asuru di dinkamne,’ tenepu. Konum beuopda, Syeba mutu taleamu nerdi, Raja Salomo tep, ikin upu deiki di asipetepudi kupetepu.

Uda, er Syeba mutu ila nimi deiyo ner Yerusalem mutu benkou taruda, ‘Salomo karepkaman’ tenen, erdi peipupa, er amutara nengdi, kunumna pio weik keca, emas cap, urasin pio telep gel cap, unta bisam pio weik cap, nintong telep keca, er sida rempa-rempa cap, er kikiman embenami neng cap, akeca-keca yuma men nukmanto, weika di kipra dubeu. Er talepra kuramu keca dubeu ngeda, aunta bisam weiknge, sun bali tara deiki deipidi, ange yuma doupra, Salomo damai dubei. Bei dingeda, Syeba mutu deiyo ner, er dipru neitamai teneramunge yumada, Salomo cap upu sisingmarei. 2Syeba mutu deiyo nerdi, akeca-keca yuma tep asipu dinin, abena asipunge yumada, tenpunge peda, ton men tapu. Ange yumada, Salomodi aner penmaunge yuma teneprapudi, akeca yuma deiyonge tep, lap penapu kunmaupa, anerdi gekepu.

3– 4Ange yuma lap pepka cadi, anerdi Salomo ila di kael keamudi lap peramunge cap, kuramunge cap, epka cadi, ‘Uo, erda wareto ngebo do?’ tenepu. Tonda, Salomo er pe ila nimi deiyo ngebo Raja kuramu ati dominge cap, akati dona tep ila mambul pel doramunge cap, Salomo er jen keca ketenepidi, er jen meja deiki deriraminge cap, er mambul pel dorami neng, sun deiki tara deiyo neng cap, sun aneng kikiman lelepra bungami neng cap, Salomo er me cap, jen keca cap tep, melipra karerami neng cap, er anggur me ketenepra melipra karerami neng cap, apel melimna neng yumadi kenengamai opkal cap, tonda Raja Salomodi, Allah er gispal dona tep, gam keca popra, Allah Yahweh er si eremna ati damai yanpa uku dongoraminge cap, ange-ange yumada, Syeba mutu deiyo ner er asurudi epu. Epu dingeda, ‘Uo, akeca yumada, pio-pio telepe. Ange yumada, pio mambule pua,’ tenepudi, mambul kange doupudi, lukdanapu kupudi upepu.

5“Uo, Raja Salomo, ne mutu kuramsidi gekeramsipa, ‘Raja Salomodi ukupra-ukupra pel doramu. Tonda, erda pio ila kael ngebo kurura cadi, erdi, ‘Ukupkurume-ukupkurume, perur ngeda, pio telep dipapu perure,’ pepra, yuk nengdi lap peramneipa, gekeramsi ngeda, tek sisi upupu peramnei. 6Pumun taru aperami ngeda, tek sisipu peramnei dinino, pio men kael keamsidi, ‘Angeda teka,’ kapul men teneramsi dinin, ukutaruda, ne pe asuru di konum yana epne. Ukutaruda, ne pe asuru di epnedi kael kepne. Atep nengeda, ne kangeda, kan ila kael keamuma deiki di, telep kupra pel dororamum keca yumada, katuai di men pepmanto kurura cadi, yuk nengdi metekanunpu peramneipa, gekeramsi dinin, ukutaruda, ange yuma konum yana epmane. Ange weik tarange yumada, pio mambul weik, teleppu kurure.

7Ange tep, ne kangeda, kan domum nerapu yumada, kange deipra kununge. Ange utopu, kan amutara kunge nyapsilip yumada, sun melipmengedi, kan amutara mambul pel dongedi, kan damai yangepa, kan ila kael keamuma deiki di, upu pemem pangeda, gekepmengedi, ‘Telep kange doupra kununge,’ tenepne. Atep ne kangeda, ‘Kan nyapsilip yumada, sun pio kange deipra kununge,’ tenepne,” pepu. 8Upepu dingeda, ange ton pepu. “Ange tep nengeda, kan nai bo Allah, kandi er si eremrum Allah, er si Yahweh tep, erda pio telep kura cadi, nimi yumadi, er tep, ‘Telepe,’ peptenge, tenepne. Sun yumadi, telep upu peprumudi, er sipu eremkamrume. Allahdi kan tep, pio kange deiamkeudi kan tep, ‘Israel yala nesala yuma, sun nimi deiyo ngebo Raja kepkamre’ tenen, wepra deiamkeupa, sun Israel mutu nesala talerume. Allah er si Yahwehdi ukupu ngeda, tali tep men kupke.

Gume, kandi si eremem Allah Yahweh, sun Israel yala nesala tep, bicau teneramudi, ‘Sunda amutu neitamai pio tep kunkamenge,’ teneramudi, ukutaru peda, tupa tenerura deiki di, kan wepra deipkeupa, Israel nesala sun deiyo ngebo Raja konum kurume. Wepra deipkeudi, ‘Angeboda, ukunkamre. Israel nesala sun makuna tep, tek sisingepu pel dopnen baramredi, sun kunkamengtopu, telep kupra upu lepsisikra bongdina tep, deiyo ngebo kupkamre. Tonda, dumsisi kecapu talepra, pel dopbankamre,’ uteneamkeudi, wepra deipkeue.”

Aupu yumada, Syeba mutu ila nimi deiyo nerdi, Raja Salomo tep pepu.

9Upepu dingeda, Syeba mutu ila nimi deiyo nerdi, Raja Salomo tep, pio telep keca duyanmaunge karepu. Erdi karepu keca kunumna weiknge, er sida emas, er ikinda denge pio weik, empat ribu (4.000) kilogram cap, tonda urasin pio telep kunumna weik gel, er si batu permata weikanun cap, ton ngeda, nintong telep keca, er si rempah-rempah weika di karepu. Anintong telep keca rempah-rempah cap, tonda, ‘Jen keca tau pepkamre’ tenen, tapakra derirameng keca cap, duyau ngeda, pio men nukmanto weik karepu. Yuk taru yumada, yuk nengdi Salomo tep, aweika di karepu utopu ton, pio men karerami. Akeca yumada, Syeba mutu ila nimi deiyo nerdi Salomo tep, rempah-rempah weika di kareputopu, ton men karerami. 10Tonda, Raja Huram er nyapu cap, Raja Salomo, er nyapu cap yumadi, laut mokon deiki embarami keca, er sida kapal laut, kiprapidi kunumna pio weik keca, er sida emas telepnge, Ofir mutu di duyana kipipa, akapal deiki di duyai. Tonda, urasin pio kamo telep co lase, er sida cendana (kapyal co atonun) co lase cap, tonda urasin telep, kunumna pio weik gel ton, pio weika di duyai.

11Doupra yai pangeda, Raja Salomodi, urasin pio telep co er sida, cendana co dopropudi, Allah Yahweh er si eremna tep ati, apio moromna co deipra dopu. Tonda, er pe kun ati pumbon ton deipu. Tonda, aco cakrapidi, telep bung-bung pen keca, er sida kecapi cap, gambus cap mut pen neng douna tep petupra deipi. Ataruda, urasin pio telep coda, men nukmanto doupra yai. Ataru dinin, aneitamai taru yuma peda, Yehuda mutu neitamai ton, akeca utopunge ton pio men kuramnga cadi, akeca utopunge men epi dinin, ataru dipapu epi. 12Tonda, nimi deiyo ngebo Raja Salomo, er pedi, tenepunge ton, yuk menenga keca er kunumna weik keca deriramngai di, dopramudi, Syeba mutu ner tep, talipu karepu. Tonda Syeba mutu ner, ila nimi deiyo nerdi, er pe teneramudi, moronmau keca yumada, Raja Salomodi aner tep karepu. Akeca yuma Raja Salomodi dopra, aner karepu pangeda, er cap kikiman yanmai neng yuma cap, menmena kange di tamupra, sun pe mutupu bei.

Raja Salomo isomka kepunge tep upu

13Keteng tamun, keteng tamun yuma dinin, tenpu keteng tamun neitamaida, yuk mutu nengdi, Raja Salomo tep, doupra kareryakarami kunumna weik keca emasda, pio weike. Ada, aketeng tamun yumada, dua puluh tiga ribu (23.000) kilogram kunumna weik gat keca emas doupra kareryakaramipa, dororamudi, mawa deriramu. 14Tonda, yuk nengdi ton, akeca utopunge ton doupra, yana kareryakarami ngeda, men nukmanto. Ada, sun bung keca kunumna ati deiyo neng cap, Arab mutu deiyo neng cap, sun pala tara mutu talepra kurami neng, Gubernur neng cap, sun adeiyo aneng yuma, duyakaramidi, karerami ngeda, men nuki dinin, akunumna weik kecada, pio weika di karerami.

15Aemasda, Salomo dopromudi, kunumna weik gat keca emas, urasin telep ngeda dopra, ‘Mar podan taruda, mar popsenung’ tenen, jen talena neng, sun nong lelimna tep, talen keca, er sida perisaida, dua ratus ketenepra deiamu. Tonda, akeca ketenemna tep nengeda, tenpunge tep nengeda, kunumna weik keca emasda, 3.5 kilogram dopra, akeca perisai ketenepra deiami. 16Ange utopu, perisai meteknge ketenemna tep, kunumna weik keca emas deiki di, denge weik, tiga ratus (300) perisai meteknge ton ketekeiamu. Tonda, tenpu perisai ketenemna tep nengeda, gat keca emas dopnedi, palepra deiamu ngeda, 1.7 kilogram deiki di ketenepra deiamu. Ukupu dingeda, nimi deiyo ngebo Raja Salomodi, akeca yuma doupra, ila telep kun ati, er sida, Istana Libanon Mutu Co Palpal Ati pumbon bena deipu.

17Ange yuma konum dopu dingeda, nimi deiyo ngebo Raja Salomodi, er Raja bungne keca deikida, kunumna weik gat keca, er si emas, ange di dopra, paleprapudi deiamudi, ila nimi deiyo neng bungne kursi keteneipu. Adeikida, ‘Abungne keca urasin telep kupkamre’ tenen, Gaja bisam beleramre ekwe lyomnge cap wisipra dopra deipu. 18Abungne keca er lyomda, yambul weik cadi, akeca welepra bungna tep nengeda, moromna co utopu keca, er si anak tangga, ngangtan bari (6) ketenepra deipu. Abungnai er urasin tarada, ‘Nimi deiyo ngebo Raja, er yane beipye peingna tep, er yan erepra derina tep nengeda, akeca ton ketenepra deipu. Abungne keca dana-dana tarada, Raja er buru butene deipra beipye peingna tep, buri derinai ton ketenepra deipu. Abungne keca damai dinin, dana-dana tarada, gam keca, er si singa pus urasin utopu ngeda, patung petupra deipu.

19Tonda, animi deiyo ngebo Raja, er bungne keca, moromna co utopunge, er si anak tangga, ngangtan bari (6) betapra deipka. Dumsisi tara cap, tebalal tara capda, singa pus urasin utopu keca petupra deiamu. Asinga pus urasin utopu ngeda, er dengeda, amul dam di dutara yuma, dua belas (12) di dopra deiamu. Asinga pus 12 ngeda, atangga dana-dana tara yuma, apus tengamretopu petupra deipi. Abungada, yuk mutu nimi deiyo neng peda, men ketenepra derirami dinin, er Salomo dipapu angepu ketenepra deipu. Akecada, ange tenpu kepra deipudi domu. Akeca utopunge ton, yuk-yuk mutu neitamai yumada, pio men kwamu.

20Nimi deiyo ngebo Raja Salomo, er jen me mau yumada, kunumna weik keca, emas dipapu ketenepra deiamu. Ange utopu, Istana Libanon Mutu Co Palpal Ati pumbon dopra deiami keca yumada, kunumna weik keca, urasin pio telepnge, er si emas dipapu, betapra deiamu. Tonda, urasin telep gat keca dinin, er si perak, ange dopra, akati pumbon derirami keca tep, men betamu. Ada tali tep gume. Deiyoda, Raja Salomodi ila nimi deiyo ngebo keamudi kuramu taruda, urasin telep keca, er sida perak, amutu-amutu neitamai kurami nesaladi, ‘Agat kecada, pio mambul gume,’ teneramya tep, erdi emas dipapu dopra betamderiramu.

21Tonda, Salomodi, ‘Neda yuk karen mutu bena, telep keca kunupkamne. Orkaren mutu nesala cap, ne cap, kunumdanapu kupbankamep’ tenen, er mokon deiki embana tep umpenada, er si kapal lautda, weika di ketenepra domi. Akapal lautda, orkaren mutu si, Tarsis mutu benmanto kwamunge domi. Huram mutu deiyo ngebo, Raja ngebodi peipupa, er mutu kael nengdi, mokon deiki embana tep keca, kapal laut ketenepra domi. Dopra deiamipa, keteng tamun weneri konum kupkopda, akapal di ataru neitamai, ue tenpu orkaren mutu di, Salomo damai tamupra yai. Akapal pumbonda, telep gat keca emas cap, gat keca urasin pio telepnge, gat keca perak cap, ila Gaja bisam er lyom weik ekweda kera cap, tonda ma si merak ma cap, doupra duyakaramidi, Salomo tep karerami.

22Uda, nimi deiyo ngebo Raja Salomoda, yuk mutu nesala tep, sun nimi deiyo kemami nengda, yambul isomka kurami dinin, Salomoda, ila isomka ngebo kuramu. Ange utopu ton, yuk mutu nimi deiyo neng, Raja neng ton dakurami dinin, sun ila kael kemna kurami ngeda, yambul weik pua. Dinino, Salomo erda, pio tek sisi ila kael kemna cap, pio ila isomka cap ngebo kuramu. Atep, ataruda, er kuramnga utopu ngebo ton, pio men kuramu. 23Amutu-amutu yuma neitamai kurami nimi deiyo neng, Raja-Raja neng yumadi utenerami. ‘Uo, nimi deiyo ngebo Raja Salomoda, antapmepedi, Allah erdi peiamupa kael keamunge cap, Allahdi Salomo er dipru neitamai deiamunge yuma cap tep, erdi pepserepa, kael kepkamep’ tenen, yakaramidi gekerami.

24Aketeng tamun, aketeng tamun neitamai yumada, yuk mutu nengdi, ‘Uo, nundi kael keptepe’ tenen, Salomo kuramu mutu damai yakarami taru yumada, er karena tep, yuk-yuk doupra yakarami kecada ake. Urasin pio telep keca dinin, kunumna weik keca, er sida emas cap, perak cap, tonda lyom opkal bol telepnge cap, nimi podana taru, nimi pon keca mar cap, jen cap, nimi pona keca yala-yala yuma cap, ‘Jen keca tau weik pepkamser’ tenen, jen keca tapakra derirami keca, tau pena telep keca, er si rempah-rempah cap, kuda bisam cap, keledai bisam cap, aketeng tamun yuma doupra yakaramidi, nimi deiyo ngebo Raja Salomo tep karerami. Ukuramipa, Raja Salomoda, ila isomka ngebo kuramu.

25Nimi deiyo ngebo Raja Salomoda, er kuda bisam dongona cap, nimi porbana taru, kuda bisam di tu deiki gipra embana keca, er sida kereta kuda cap, akeca ati pumbon derina tep, yambul ati denge pio weik, empat ribu (4.000) ati ton domu. Ukuamudi, er nimi porbana tep, bali tara bukra bisi embana tep, kuda bisamda, dua belas ribu (12.000) di ketenepra deiamu. Ukupra keteneiamu dingeda, ton tara ngeda bokra, Yerusalem mutu neitamai deiamu. Ton weik tara ngeda bokra, mutu-mutu nimi porbana tep keca, er sida kereta perangda, ‘Acei wengkameng’ tenen, ketenepra deiamngaipu deipu.

26Uda, nimi deiyo ngebo Raja Salomo, er dipapu Efrat me tara di dipdongopra, ortara Filistin nesala mutu neitamai kurami nimi deiyo-deiyo neng cap, aneitamai yumada, Salomodi amutu taleamu. Aila me, Efrates me di dipra, ortamna Mesir mutu wilimdonai neitamai, talepra kurami nimi deiyo neng capda, er Salomo dipapu talepra kuramudi, upu peramu. 27Raja Salomodi talepra kuramu taruda, dana-dana tara mutu neitamai kunumdana weik dakuramnga cadi, kunumna telep boun keca er si perakda, Yerusalem mutu neitamai bena deriramngada, tali gel sisa utopu, pio weik kwamu. Tonda, Libanon mutu paramu urasin telep gat co, er sida cemara coda, pio weik tekamnga cadi, tali ara co weik paramra utopu kuamu. Acoda kunumna weik, urasin telep co gum dinin, mutu buma deiki di, ayala co yambul weika di, tali kwamu. 28Tonda, Raja Salomo er pel dona tep, deiyo kepra taleami nengdi, Mesir mutu cap, tonda yuk mutu cap, embaramidi kuda bisam kunupra, tamupra Salomo kuramngai duyakarami.

Nimi deiyo ngebo Raja Salomo talepra kuramu taru, upu yuma buma kepra sekeipu upu

29Uda, nimi deiyo ngebo Raja Salomo, er gam kuramu taru kuramudi, pel doramunge cap, ila di kael kemamunge cap yumada, Allah er upu lap peramu ngebo, nabi Natan kuramunge tep, sekeiami buku neitamai cap, Silo mutu ngebo nabi Ahia kuramunge sekra deiami buku neitamai cap, tonda, amenda kupkamunge tep, upu lap peramu ngebo, nabi Ido cap, er kuramu keca tep, sekeiami buku neitamai ton, Salomo kuramu keca ton, bulupra tenpu kepra sekeipi. Amenda taru kupkamunge tep lap peramu ngebo, er si nabi Ido, erdi, nimi si Nebatdi deiamu ngebo, Raja Yerobeamdi kuramunge ton peramudi, sekeiamu.

30Keteng tamun denge weik, empat puluh (40) tahun neitamai di, nimi deiyo ngebo Raja Salomodi, Israel mutu neitamaida, dakurami neng yumada taleamudi, nimi deiyo kepra Raja kuramu. 31Ukuramnganen, konum seng pepkopda, er Raja Salomo konum depu pangeda, er apu yapu depnepa, sun nong peirami mutupu, er nong ton dopra, tu palipra peipi. Amutu sida, er nai bo sisa, er si Raja Dauddi, talepra kuramu mutupu bena peipi. Bena peipi dingeda, Raja Salomo er mi Rehabeampu, er nai bo yo pununa tep, nimi deiyo ngebo erepra deipipa, teku.