2 Corinthians 1

Paulusdi, “Telepe” pena tep, sekeipu upu

1Telepe, ne kayapu, ne Paulus cap, nun weit utopu ngebo Timotius cap, nun butene di asurat sekeipseneme. Ada, sun Allah tep teka tenepra Korintus mutu kurum nesala cap, uda, Akaya tara teka tenenung nesala yuma cap tep, asurat sekeipseneme. Ne Paulusda, Allahdi teneamneutopu, Yesus Kristus er upu dopra peterembana tep, gonga kemna deiyo ngebo, Rasul ngebo wepra deipneupa, apelpu tupa donune.

2Nun nai bo Allah cap, nun Deiyo Ngebo Yesus Kristus cap, sun butene di, sun teka tenena nesala tep, sun kange dipu bicau teneserengedi, mesum dipu melimsereng nge cap, uda telep kuna tep, kange deipra telep kuna deiyo keca cap, kareserunge. ‘Abutene keca pio karenkamsereng’ tenen, Allah morosenume.

Paulusdi Allah tep, “Telepe,” pepu upu

3Nun Deiyo Ngebo Yesus Kristus, er nai sisa ada, nun nai bo Allah tep, “Kanda pio telepe,” pepra, er si pio eremnupe. Erda, nimi yuma tep dipru kareserure. Nun Deiyo Ngebo, tonda nun nai bo kuredi, kange mun kusere taru yuma, nun dipru kwa dipseredi, melimserure. Nun Melimna Deiyo Ngeboda, Allah kurure. 4Nun ikine kusere taru neitamai yumada, erdi dipru kwa dipra makuserure. Dipru kwa dipra makuserya deiyoda, ‘Yuk nesala ton ikine kupre taruda, ne nyapudi aneng tep, dipru kwa dipra makunkameng’ tenen, melimserure. Yuk nesala kange mun kuprepa, ‘Ware kupra deiki di meliptepe do?’ tenena gume. Ada, Allahdi nun tep, dipru kwa dipra melimserya puto deiki dipu, nundi yuk neng tep melimnupe. Yuk ton gume.

5Ada tali tep gume. Kristus er kange mun kuramu ngeda, nun pe deiki ton kuserepa, kange mun kange dounupe. Yesus er upu peterembape taruda, yuk nengdi, ikin keca nun nong deiki derisengepa, ikin kuserure. Dinino, ikin weik kuseretopu, Kristus tep teka tenepra, er cap dipru dukdongopra kunupa deiki di, nun dipru weika di kwa dipra melimserure. Yesus melimserya deiki dipapu, nundi yuk nesala tep, ikin kunge taruda melimnupe. 6Ange tep nengeda, nunda, ‘Uo’ tenen, ikin kupseryopda, utenenupe. ‘Gume, ada nun kayapu neng, sun dipru kwa dimna cap, sun lyemna cap tep, ikin kuserur dinin, amenda taruda nun kayapu neng ton melimkamepe. Allahdi nun dipru kwa dipra melipseryopda, ada sun dipru kwa dimna tep kuserure,’ tenenupe. Kange mun kange douprum taru neitamai yuma peda, Allahdi sun dipru kwa dipra melimserya deiki di, pel tamna gum dipapu, pio pe deipra, bouna di pel tupa dorume. Ada, nun nong deiki ikine kuserenge utopu, sun nong deiki aikin kecapu kuserya peda, sun teka teneprum keca adipapu men tamrume. Pio pe deipra, bouna di pel tupa dorume.

7Nun kaele, nun ikin kusere keca, sun Akaya tara nesala peda utopu ikin kuruma cadi, Allahdi nun dipru kwa dipra melimseretopu, Allahdi sun pe tep, dipru kwa dipra melimkamsere. Ange tep nengeda, nun kange tenimtona gum di sun Akaya tara kurum nesala cap, Korintus mutu nesala cap tep, ‘Anengda, teleppu kunkamenge’ tenen, kange deipra tenesenupe.

8Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Nunda, Propinsi Asia tara kuramnumu taruda, ikine kuramseunge tep, ‘Kael kemna gum di, walwal kuprum’ tenen, aupu ton pepkuseneme. Ataruda, ila ikin keca weik kuramseupa, kange mun kange douamnumnganen, ‘Uo, pel tupa men dopteneme. Nun pio men kupmanto kupsere’ tenen, ikin weik kuramseupane, nundi mambul kange doupra, ‘Gume, nun depkanem ja,’ teneramnumu.

9Angeda tek sisi pepne. Nun kange dipru neitamaida, ‘Nun tek sisi depkaneme,’ teneramnumu. Pio mali kange doupra, ‘Depkamneme,’ teneramnumu dinino, ange pio ikine kuramseuada, tali tep men kupseue. Deiyoda, Allahdi nun tep, utenepseu. Sundi, ‘Nun tuai nesala, nun puto deiki dipu apel dopteneme, teneprerung’ tenen, ikin keca karepseupa, ikin weik kuramseue. Tonda, Allahdi nun tep utenepseu. Sundi, ‘Nun puto deiki dipu gume. Allahda konum depmenge nesala gam bukra derirur ngebo, er puto deiki dipu apel dopteneme’ tenen, ‘Kael kepkamrenge,’ tenepseudi, ikin keca karepseue.

10Uda, nun ikin weik kuramseupa, depmanto kupnumu dinin, Allahdi lyepra loptapseudi, telep kupra deipseue. Tonda, amenda taru peda, pio lyemkamsere. ‘Allah dipapu pio lyemkamsere’ tenen, nun kangeda er deikipu deipra, er tep teka tenepra dinume. 11Ukupra kunkamnem taru neitamai yumada, sun Korintus mutu nesaladi nun tep, Allah moroseruma deiki di melimserume. Ukupra sundi nun tep Allah morosemum pangeda, yuk nesala weika di nun tep tenesengedi, “Allah, kan tep ‘Telepe,’ pepkepe,” pepra, er si erepra penkamenge. Ada, nesala weika di nun tep, Allah mororamengepa, Allah er kange dipapu bicau teneseredi, melimserenge tep nengeda, nesala weika di Allah tep, “Naio, nun mororameputopu, Paulus cap, er melimna neng cap meliamuma tep, ‘Telepe,’ pepkepe,” penkamenge. Ne Paulusdi pepsene.

Paulusdi, ‘Ukupkamne,’ tenepu dinin, nong men kupu keca tep, lap pepu upu

12Uda, ne kayapu, nun kange deipra aupu pepsetepe. Nun mawa upu pena gum dipapu, nun kange dipru dumsisipu kupseredi, aupu penupe. Amutu ban-ban yuma kuramepu taru cap, uda ila mambulnge, sun cap kikiman kuramepu taru yuma cap, mali kuna pio gum di, dumsisipu kuramepu. Mawa pena pio gum dipapu, tek sisipu kuramepudi, pel doramepu. Adumsisi kuna cap, inimna gum di tek sisi kuna capda, Allahdi kareserure. Ukupra kunupa yumada, teka tenena gum nesaladi, ‘Nunda ila kael neng,’ tenengedi kurameng utopu, ange deiki men kunupe. Nunda, Allah er kange dipapu bicau teneseredi, melimserya deiki di kareseretopu, pio dumsisipu kunupe.

13Sun men pepmanto upu cap, men gekepra kael kepmanto upu capda, men sekra dokotemsenupa cadi, nunda teka tenena gum nesaladi, ‘Angeda ila kael keca,’ tenengetopu, aupu deiki di men penupe. Ne Paulusdi pepsene. Tonda nedi sun tep, ‘Uo, ange kuptenge’ tenen, putanere ngeda ake.

14Ada, pumunda sundi nun tep, yambul kael keamserumtopu, amenda taruda ila di kael kepserumdi, yuma moupra tenepserumyopda, sundi nun tep, kange deipra, “Sunda pio telepe,” pepra kange lopkamsere. Ange utopu, nun Deiyo Ngebo Yesusdi, tuai mutu tamupra yankamre taruda, nundi sun tep, “Anengda pio telepe,” pepra, kange lopkamsere.

15Uda, arup pepmasen upu, kange bongtona gum di, ‘Pio tek sisi kupkamre’ tenen, teka tenepsesa tep, ukupra teneamsisi. Ada, ‘Sun Korintus mutu nesalada, sun damai menmena uruna tep, bena kunmapyanen, sun tapra yukai benmanyane, amenda taru kange di ton cap, sun damai yanyopda, ue butene tumi kikiman kunkamep deiki di, telep kupra deipkamsere,’ tenepsisi. 16Ada, ‘Makedonia tara benkamnedi, bisi neitamai benkamne taruda, sun damai bena kunkamne,’ teneamsi. ‘Ukupnyopda, amenda taru Makedonia tara konum benedi, ka di tamupra abisipu yankamne taruda, kange di ton cap, sun Korintus mutu neng damai yankamne,’ teneamsi. ‘Sun damai konum yane pangeda, ne Yudea tara benkamne taru, sun Korintus mutu nengdi, Yudea tara bana tep, makupra dokotepnetenge,’ tenepsisi.

17Uda, aupu pepmasentopu tenipetepsidi, ‘Ukupkamne,’ tenepsi taruda, sundi, ‘Paulusda, tali kuna tep kupseu,’ tenepnerum do? Tonda, sundi ne tep, “Ukunkamne, ukunkamne,” pepra tenepre taru yumada, sun teka tenena gum nesaladi kuramengetopu kurure. Ada sundi, tenpu taru dipu “Teka, ukunkamepe,” tonda “Gume, men kunkamepe,” pepra, tali mawa di pertamamengtopu kurure. Ange utopu tenepnerumdi do?

18Gume. Allahdi, “Ukunkamne,” pepra peseretopu, pio tamna gum di, tek sisi angepu kuramretopu, nundi sun tep pesenup upuda, utopu kurure. Kange bongtona deiki di, tenpu taru dipu ton ngeda, “Teka,” ton ngeda, “Gume,” men pesenupe. Moupra tenepmepedi, tek sisingepu pesenupe. 19Ada tali tep gume. Ne Paulus cap, Silas cap, Timotius cap, nundi sun kan-kan di peteremupu upuda, ton ngeda, “Teka,” ton ngeda, “Gume,” pepra, kange bongtona deiki di men peramupke. Allah er Mi Sisada, Yesus Kristus, er pesere upuda, ‘Teka penkun do? Gume penkun do?’ tenepra men kurure. Yesus er upuda, yuma taru yuma, tek sisi upupu, peserure.

20Apepmasen upu deiyoda ake. Allah erdi nun tep, “Ukunkamsene,” pepra pediramseu upu weike akapmarya peda, Kristus er pel doserya deiki di, Allah apediramseunge yumada, tekpu kurure. Aupu yumada, nong tek sisi kupkamre. Tenpunge peda men tapkamre. Ange tep nengeda, nun cap, Kristus cap, dipru dukdongopra kunupa deiki di, ‘Allah pediramseu upu yumada, Kristusdi pel doserya deiki di, tek sisi nong kunkamre’ tenen, “Teka,” penupe. Tonda, ‘Angeda tek sisi nong kupkamre’ tenen, “Amin,” penupe. Ukupra penupa deiki di, Allah er si erepra er tep gispal donupe.

21Uda, nun cap, sun cap, Kristus cap, dipru dukdongopra kikiman kuna cap, teka tenena cap tep, er puto karepserepa, pio dimpeprappu kunupe. Ukuna tep, dipru puto kemdina deiyo keca karesere deiyo ngeboda, ada Allah erpu kurure. Er dipapu nun tep, ‘Anesalada, ne mawa nesala kungedi, ne pelpu donkamnenge’ tenen, wepra deipseue. 22Ukupmanto ngeda, bisam amul sekmengepa, yuk neng epmengedi, ‘E abisamda angebo ernge,’ tenen, kael kemamengtopu, Allahdi nun tep petemkemdina keca karepseue. Ada, yuk nesaladi, nun tep, ‘Anengda, Allah er mawange, tenepkameng’ tenen, Allahdi er peten kamdin keca nun deiki deipseue. Ukupseudi, ‘Amenda taru kupkamre keca, tek sisi kupkamsere, tenepkameng’ tenen, ner burudana utopunge tep, menmenada er Lek Sambala dopra, nun dipruai dongopseue. Ada menmena karepseunge tep pepsene.

23Uda, yuk upu ton pepkusene. ‘Teka tenepkunerum’ tenen, Allah dinmanera deiki di, aupu tek sisipu pepsene. Ne pumun di sun damai Korintus mutu tamupra men yasi deiyoda, ‘Ikin keca sun nong deiki men deipkamne,’ tenepsa tep, sun damai tamupra men yanamsi. 24Apepmanada, ‘Nundi ila nimi deiyo neng utopu kupra, sun teka tenerum nesala tep, sun deiki yaniptepe’ tenen, men pepsene. Angeda gum dinin, sun teka tenepruma deiki di, kange bongtona gum di, pio dimpepra kuruma cadi, nun cap, sun cap, kikiman pel doramepepane, sun kange deipra, pingpinga di kunkamrume. ‘Ukunkamruma’ tenen, aupu adeiki tara pepmasene. Ne Paulusdi pepsene.