2Cor 10 | XteSC | STEP | Uda, yuk upu ton pepkusene. Kristus er pe kange eremna gum di, dipru boun kupra kuna cap, ‘Ne kabo mali kange doprur’ tenen, bouna di kuna cap kareserya deiki di, aupu ton pepra moropkusene. Ne Paulusdi pepsene. Ne kaele, sun kankan ton nengdi upenenunge. “Gume, Paulusda, kikiman bukra didanup taruda, kwar-kwar kunge neng utopu kurur dinin, nun kikiman men kupe taruda, balila weik ngebo kuretopu, puto di peserure,” penenunge.

2 Corinthians 10

Paulus er pel doramunge tep, lap pepu upu

1 Uda, yuk upu ton pepkusene. Kristus er pe kange eremna gum di, dipru boun kupra kuna cap, ‘Ne kabo mali kange doprur’ tenen, bouna di kuna cap kareserya deiki di, aupu ton pepra moropkusene. Ne Paulusdi pepsene. Ne kaele, sun kankan ton nengdi upenenunge. “Gume, Paulusda, kikiman bukra didanup taruda, kwar-kwar kunge neng utopu kurur dinin, nun kikiman men kupe taruda, balila weik ngebo kuretopu, puto di peserure,” penenunge. 2 Ton neng dingeda, nun tep utenesenunge. ‘Gume, Paulus cap kikiman kunge nengda, tali teka tenena gum nesala tenepra kuramengtopu kununge.’ Ukupra tenesenung nesala tep nengeda, kika deipra puto weika di kunkamne. Dinino, sunda ange utopu men teneserum nesalada, nedi sun damai yanyopda, ‘Bouna dipu upu pepra pel dopsetene’ tenen, moropsene. Ne putapnere ngeda, bouna dipu pel dosetene.

3 Yuk nengdi nun tep, “Tali neng kununge,” tenesenung dinin, aupu gekepso. Atuai mutu neitamai di kunup dinino, tali teka tenena gum nesaladi tenepmengedi kuramengtopu men kunupe. Ange gum dinin, mali kun keca yuma bisbisa kamna tep, Allahdi karesere puto keca di pel donupe. 4 Teka tenena gum nesaladi, ‘Popserur keca bisbisa kapkamep’ tenen, tali tuai jen talepra porbaramengtopu men kunupe. Sunda, tali tuai jen talepra porbarameng dinin, nun talenup kecada, pio yuke. Allahdi er im deiki puto kapre keca kareserepa, mali keca bisbisa kamna tep, pel donupe. Jen talena nengdi, sun tep popterepmenge nesala tep, sun doameng ati ila puto ati kaptua peda, yawa portamamengtopu, Allah melimserepa, nundi im deiki puto kapre keca talenupdi, Allah upu yanina nesala penge upu yuma bisbisa kamnupe.

5 Ukupra kupe taruda, Allah yanina nesala penge upu yuma cap, sundi, ‘Yuk neng Allah teka tenepnung’ tenen, sun pe kange erepra gemena di penge upu cap yumada, bisbisa kapra, gum kupra derinupe. Ukupra pel donupa deiki di, nun kange tenena cap, yuk nesala sun kange tenena cap tamupseryopda, Kristusdi, ‘Ukunkamenge,’ teneseretopu, amsepu kupra tenepedi, er upu gekepmepedi, angepu talepra er tep dombanupe. 6 Uda, sun Korintus mutu nesala kan-kan, ton nengdi, sun mali kunge keca tapidi, Kristus tep, pio telep kupra dombanunge. Ton nengda, tupa malipu kununge. Amenda taru, Allah upu yanipra tupa mali kupkamrumnge yumada, konum keteneiamepya di, wenepra upu sengdinkamsepe.

7 Sunda nong bol deikingepu epmumdi, angepu tenepra upu bongdirum ngeda mali kurume. Ware ngebo do yuma, “Neda Kristus er mi kunune,” tenepre ngeboda, kange di ton cap moupra er pedi tenenkamrure. Ada, erda Kristus mi kuretopu, nun peda utopu Kristus teka tenepra dombapepa, er nyapu kupra deipseupa kunupe. Nunda kikiman utopu cadi, sun yuk neng, dipru eremdangedi, nun tep, “Sunda tali neng pua,” men tenepra pepsetenge. 8 Allahdi pel dona deiyo keca karepseu ngeda, ada sun teka teneprum nesala tep, dipru kwa dipra melimna cap, peteremna cap, dipru wisi kemdina cap tep, kareamseudi, ‘Peteremna deiyo neng kunkameng’ tenen, konum wepra deipseue. Ada, ‘Sun Korintus mutu kune nesala, sun nong deiki ikin keca deipmepepa, sun dipru pu jenkamre’ tenen, men pel donupe. Allahdi apel dona deiyo keca karepseunge tep, kange lon upu peptenya peda, ali men dangkamne.

9 Uda nedi sun mali kurumnge tep, upu sengdisenun suratda, “Sun kware dangna tep sengkune,” men tenenuna cadi, sun peda ange men tenenkamrume. 10 Sun dipru eremdange neng dingeda ne tep upenunge. “Gume, Paulusdi upu sengserur surat deikida, puto di peserepa, ikin kuserur upu peserur dinino, er pe nong nun damai yaryopda, erda tali ngebo utopu kurure. Erdi pesere upuda, tali upu cadi, nong men kupkamre. Erda, ila mambul ngebo gume,” pepra penenunge. 11 Aupu utopu upu penenge nengda, adipapu ton cap tenipkamenge. Sun cap kikiman men kupe taruda, nun surat deiki di puto di penuptopu, amenda taru sun damai yape dingeda, asurat puto upu sekmeputopu, puto weik neng kunkamsepe. Atep, ‘Puto di wenepserur’ tenen, kange moupra kunkamrume.

12 Ton neng dangeda, sun pedi sun pe tep, “Nunda ila mambul neng,” pepra kange eremdanung dinin, nundi anesala tep, “Nunda aneng utopu kunupe. Sun pe, nun pe mambule utopu kunupe,” men penkamepe. Sun pedi sun pe kunge keca tep, kupetepdangedi, ‘Uo, nunda ila mambule. Nun pe tara neng kungetopu, nun peda utopu telep kunupe,’ tenen, kange eremdange ngeda, sun pio walwal di kununge. Angeda ila kael kemna keca deiki di men kununge. Ada walwal kuna pua.

13 Sun pedi sun pe tep, kange erepdangedi, kange lon upu pedaramengtopu men penkupe. Allahdi nun tep, “Amutu neitamai pel donkamenge,” teneamseutopu go karepseupa, pel doramepu mutu tep, kange lon upu peptepe dinin, nun bena pel men doramupkai tep, upu men pepkupe. Allahdi kareamseu mutu neitamaida, sun mutu Korintus mutu ton akapu. 14 Nundi sun damai men yan peterepmatepe teptoda, sun Korintus mutu kurumai tep kange lon upu men peptepe dinin, nundi Kristus er kai telep upu, nimi lyemna upu dopra peterep embaramepudi, sun mutu ton peteremamsepu. Menmena taru yana sun mutu peteremna gonga kemna deiyo nengda, nun pua. Atep nun tali tep men penupe.

15 Ange utopu, yuk nengdi pel doraminge tep, kange lon upu utopu upu men penupa cadi, sundi nun tep, “Sun mali penunge,” men pepsetenge. Nundi sun tep, ‘Uo, ukuptenge, ukuptenge’ tenen, putasere ngeda, ada, ‘Sun teka teneprum ngeda weik kupbarepa, wisipyopda, sun Korintus nesala neitamai pel weikanun ton cap doptepe’ tenen, putaserepa, tupa tenesenupe. 16 Sun mutu neitamai pel weik ton cap doptepe dingeda, amenda taru nundi nimi lyemna tep, kai telep upu dopra, sun kurum mutu adine, ortara yuk karen mutu ton peterep embenkamepe. Yuk nengdi, sun pel donge mutu neitamai konum pel doraminge tep, upu men penkamepe. Angeda nun putana gum tep, ‘Yuk karen mutu peterep embetepe’ tenen, putaserure.

17 Dinino, kange lon upu pena tep nengeda, telep ngeda atenpu pepkusene. Ada, kange lon upu penkamre ngeboda, nun Deiyo Ngebo Yesus er teppu, kange lon upu peptue. Yuk keca tep, kange lon upu pena gume. 18 Apepmasen upuda tali tep men pepsene. Allahdi, “Angeboda tek sisi telep kurure,” pepra ereipkamre ngeboda, ada er pedi er pe tep ereipdare ngebo gum dinin, nun Deiyo Ngebo Yesusdi, “Erda telepe,” pepra ereipkamrur ngebo pua. Ange tep nengeda, kange lon upu penada, Yesus er teppu pena telepe pepmasene.