2 Corinthians 11

‘Korintus mutu nesaladi, mok upu talepra mali bisi benung’ tenen, Paulusdi pepu upu

1Uda, ne kayapu. Nedi yambulanun walwal nengdi tali-tali pertamamengtopu pepnepa, ‘Tali dimpepra gekepkunerum’ tenen, moropsene.

2Nedi sun tep tenepnedi, ‘Anengda ne mawa neng cadi, yuk neng damai kepropmengyopda, anengdi talepmengepa mali kupnung’ tenen, sun tep dipru karepnerepa, namdosenune. Allahdi nun yuma tep bicau teneseredi, dipru kareserepa, namdoseretopu tenesenune. Uda, ukupmanto upu pepkusene. Ada, tenpu tara nengdi, tenpu ner dopra, yuk tara neng tep, “Anerda, yuk nengdi men dopi. Pio telep kaber nerpu kurure,” pepra, kareramengtopu, kunune. Ada, sun ner karedana nengdi peramengtopu, nedi sun tep uteneamsisi. ‘Korintus nesalada, Kristus er upupu teka tenepmengepa, tenpu ngebopu, Kristus er dipapu anesala talenkamre’ tenen, sun Korintus mutu nesala tep wepra deiamsisi.

3Uteneamsisi dinino, ukuda ne kware kupnere. Ada, Kain Jen Ngebodi, mawa di upu telep-telep kupra pepupa, Hawadi, mok upu teka teneputopu, ‘Sun Korintus nesala peda utopu kuprum’ tenen, pepsene. Ada, gonga kemna taruda, sundi yuk upu tapakra teka tenena gum dipapu, tek sisi Kristus er teppu teka teneamrum dinin, yuk nengdi, yuk upu peterepsenga deiki di, ‘Sun kange tenenange deiki di yuk mali bisi lerekra berum’ tenen, kware kupnere.

4Tek sisi nundi Yesus er upu peteremamsepu utopu gum dinin, yuk nengdi mok upu deiki di Yesus tep peterepsenepa, ‘Teka teneprum’ tenen, pepsene. Tonda, yuk nengdi, nimi lyemna tep mok upu, peteremsengepa, ‘Mok isok teka tenepra doproprum’ tenen, pepsene. Sunda, ‘Aupuda tek do, telel do?’ tenen, moupra tenena gum dipapu, yuk nengdi pesenge upu, adipapu kanam dipu gekepra dororume. Ukurum ngeda mali pua.

5Yuk nengdi, amok upu peteremna deiyo neng tep, upenunge. “Uo, sunda, Allah upu dopra peteremna tep, gonga kemna ila-ila mambul deiyo neng kununge,” penunge. Yuk nengdi amok neng tep, “Ila mambul neng,” penung dinino, ne kangeda, sunda ila mambule men kununge. Ne kangeda, ‘Sunda ila mambule, nepuda yambul mambule,’ men tenenune. ‘Neda yambul mambul ngebo, sun amutarapu kunune,’ men tenedanune. 6Neda, ila sekolah kael nengdi men peterepneipa, pio urasin telep upu, gekena pio telep upu, tali lupra men penun dinino, tek sisi Allah er upu talepra dombana deiyo ngeda ne kaele. Sun cap kikiman kuramepu taruda, nun kuramepu keca yuma deiki di, ange konum katuai kupupa, kael keamserume.

7Amok upu peteremna nengdi, “Nundi peterepsepepa, sun Korintus mutu nengdi, co bo karenkamserume,” pepra morosenung dinin, nedi, sun Korintus mutu kurum nesala tep, Allah upu peteremamsisi taruda, ‘Peterepnepa, co bo karenkamnerume,’ pepra, pio men mororamsisi. ‘Sun Korintus mutu nesala ereipnedi, co bo morona gum di, Allah er upu peteremkamne’ tenen, sun amutara utopu kuramsisi. Ukuramsada, mali kuramsi do? Gume, ne kangeda, angeda mali men kuramsi. 8Yuk mutu neng men di konum teka tenemi nesaladi, ne makuna tep, co bo melipra kareamneiya deiki di, sun Korintus mutu kurum nesala tep melipra peteremamsisi. Ukuramsa deiki di, co bo kareramnei neng tep nengeda, yambulanun upula dorona utopu kuramsi.

9Tonda, sun cap kuramepu taru neitamai, ne putaramneu keca gum kupneupa, ‘Ne putan keca gum kupnerepa, aneng moropnepa, sun Korintus nesala, sun nong deiki ikin keca deipnun’ tenen, sun tep men mororamsisi. Tonda sun teka tenepra Propinsi Makedonia tara di, Korintus mutu yaidi, ne putaramneu keca kareryakaramnei. Pumun taru pe, ukutaru pe, amenda taru peda, ne putan keca men morosenuna cadi, ne kun keca deiki di ikin men kemdisenune.

10Kristus er tek sisi upu ne kange dipru neitamai kunerure. Tali men pepsene. Ange tek sisi kuretopu, apepkusen upuda, tali men pepkusene. Uda, Propinsi Akaya tara neitamai kunge nesala kan-kan di, ware ngebodi upu seknetupa, apepmasen upu yapkamne do? Gume, ne putan keca tep, men mororamsisa deiki di, ikin keca sun nong deiki men deiamsisitopu, tupa men kunkamne. Ada ne morona deiki di, ikin keca sun nong deiki men derinkamsene. Angeda, ne kange derinerura tep, pepsene. 11Allahdi ne tep, ‘Paulusda, tek sisi Korintus mutu kunge nesala tep, pio bicaue tenerure’ tenen, konum kael keamneu.

Angeda tali men pepsene. Atep, “Paulusdi aupu pesere ada, nun tep kange men deipseua cadi, er peteremna kunumna tep, ‘Co bo karepneso,’ pepra men moroserure,” upepra men penkamnerume. 12Ne men di kuramsi utopu tupa kunkamne. Ada, ne peteremna pel tep, kunumna keca men moronkamne. Ukupne pangeda, sun mok upu peteremna nengdi, sun pe kange, ila erepdangedi, “Gume. Paulusdi peterepra kuramre utopu kunupe,” pepra men gemeptenge. Ne kune keca yuk, sun kunge keca yuk tep pepsene.

13Gume, sundi, “Paulus utopu kunupe,” pepra gemenge nengda, mok upu peteremna nengpu kununge. Sunda, “Allah er upu dopra peterembana tep gonga kemna deiyo neng kunupe,” penung dinino, tek sisi men kununge. Sunda mawa dipu tali pel donunge. Sun mok upu peterepra, tali pel donga deiki di, yuk neng mankau di mok upupu teka tenenunge. 14Ukununga tep nengeda, men lukdatepe. Aneng sun nai bo Kain Jen Ngebo peda utopu, ‘Dirine karena im deiki pel don ngebo, malaikat, tenepkamneng’ tenen, malaikat nong cap, urasin cap utopu daredi nimi damai yakarure. 15Ukurura cadi, katuai konum kupsere. Er amutara kunge nesala, er nyapu yumada, ‘Allah er dumsisi kuretopu, dumsisi kuna tep, pel melimna neng, tenepkamseng’ tenen, dumsisi nong-nong kununge. Ukupra mawa di kununga cadi, sun mali-mali kurameng keca weik akuretopu, amendada Allahdi sun tep upu bokra deipredi, aneng tep weika di wenepra ponkamre.

Paulus er kange ikin kuramunge tep, pepu upu

16Uda, kange di ton cap pepsene. Ware ngebo do yuma, ‘Paulusda, tali walwal ngebo, kange douna gum ngebo kurure,’ men tenenkamnerume. Neda walwal ngebo gum dinino, ukupra tenepnetuma peda, aupu gekepneso. Ada, sun walwal nengdi tali upu pengepa, yuk nesaladi, ‘Dakwapye, aupuda dapeptue’ tenen, dimpepra tali gekeramengtopu, gekepneso. Sun mok peteremna nengdi gemena upu peramengtopu. Ne yambul gemena upu utonun pepkusene. 17Uda, sun gemena nesaladi, ‘Nunda, ila kael neng’ tenen, kange ereipdangedi, tali-tali peramengtopu pepkusenada, nun deiyo ngebo Yesusdi peramretopu men pepman dinin, sun ali dangna cap, wenemna cap tep, walwal ngebo peramretopu pepkusene.

18Uda, sun mok upu peteremna neng cap, yuk nesala capdi, sun pe kange erepdangedi, gemena upu peramengtopu, nedi ton, yambulanun utopu pepkusene. Ada, sun mok upu peteremna deiyo nengdi, sun damai yana, gemena upu utopu penunge. Atep ne peda yambulanun gemena utopu upu pepkusene. 19Sunda, ‘Nun Korintus mutu nesalada, ila kael neng konum kunupe,’ tenedaruma cadi, pio walwal nengdi sun damai yana mok upu peterepsengopda, sundi tali kange deipra gekenapu kurume. Sun wenemna tep pepsene.

20Angepu gum dinin, ware neng do yuma, sun damai yangedi sun Korintus mutu neng tep, “Ukupso, ukupso,” pepra, sun yanipsengedi, sun amutara kemdongosenge neng cap, sun telep keca yuma upula dorosenge neng cap, mawa di tali upu pepsengedi, sun yanisenung neng cap, sun pedi erepdangedi, “Nunda sun deiyo neng kunkamepe,” pesenge neng cap, uda sun damai yana, sun urasin buru di bongopsetenga peda, sun Korintus mutu kurum nesalada upu men sengrume. Tali dimpeprappu kurume. Ukumumyada warya tep do?

21Sun cap bouna di kuramepu taruda, ange men kupsepua cadi, ukumumyada warya tep do? Sundi nun tep, ‘Sunda, puto gum neng,’ teneserum do? Neda walwal ngebodi tali-tali peramreto pepmasenada, sun ali dangna cap, wenemna cap tep pepsene. Sun mok upu peteremna deiyo nengdi sun pe kange ereipdangedi, gemena upu peramengtopu, ne peda utopu pepkusene.

22Sun mok upu peteremna deiyo neng gemengedi, ila upu penge nesalada, “Nunda Ibrani yala nesala kunupe,” pepra penung do? Ne peda Ibrani yala sisa ngebo kunune. Sunda, Israel yala nesaladi deiami nesala kunung do? Ne peda Israel yala ngebodi deipneupa, akunune. Ne peda, Abrahamda ne co puna ngebo kuramneu. 23Ne kayapu, neda mutana ngebo utopu pepmasenada, sun wenemna tep pepsene. Uda, sun mok upu peteremna neng gemengedi “Nunda Kristus er pel dona tep melimna neng kunupe,” penung do? Sun tali penung dinin, neda, Kristus er pel melimna ngebo, tek sisi deiyo ngebo, sun deiki tara kunune. Sunda, yambula di pel domi dinin, nepuda pel weika di doramsi.

Sunda, yu nengdi tomopidi, wenemna ati dongopipa, ue yambulanunpu kurami dinin, neda ataru-ataru weika di tomopneidi, wenemna ati dongop embaramneipa, ue denge weike kuramsi. Sunda, yu nengdi balana dopra, sun tep meteka dipu bongopi dinin, ne tep ngeda pio weika di bongoramneie.

Tonda, neda ataru ton, ataru ton, ikin weik kuramneupa, ue denge weika di depmanto kuramsi. 24Sun Yahudi yala deiyo nengdi, mali kun neng wenemna tep, balana di denge weik 39 nukrap bongopra poramengtopu, sundi ne tomopneidi, ue pamu bari taru yuk-yuk deipra, balana di denge weik 39 nukrap bongopra popembaramnei.

25Angepu gum dinin, ue weneri taru, gat co balana doprapidi, ne bali tara bongopnei. Tenpu taruda, gel dopra ne nong deiki dopra popnei. Ukupipa, depmanto kupsi. Ue weneri taru, gapung co weksidi, laut mokon deiki embaramsipane, nun gapung co mokon jepupa, depmanto kuramsi. Ukupsi taruda, tenpu lukunda yuma cap, keteng komuni yuma cap, ila laut mokon deiki dopra embaramneu.

26Ne peterep embana pio kuramsa tep, orbenapna, ayanapna kemdanapu pio kunune. Ne ati pio kupra kunai ton men kwapneue. Popmanto kuramneu kecada ake. ‘Ila embare me goupra, ortara benkun’ tenen, piripteremsi taruda, me jepmanto kuramneu. Tonda, ‘Upula dopropkup’ tenen, popra dalum donge neng cap, ne mutu sisa neng dinin, yu neng cap, Yahudi yala gum neng teka men tenenge neng cap, uda, “Nunda teka tenenupa cadi, sun weitapsilip utopu kunupe,” penung dinin, tek sisi Yesus teka tenena gum, mok upu penge neng cap, ange yuma, ikin kuramneunge deiki di popmanto kuramneu. Tonda, popmanto kuramnei mutuda, ila ati arum domipa, nesala weik kuramyai cap, nesala gumai bura mutu cap, laut mokon deiki embaramsai cap, amutu-mutu yuma embaramsi taru neitamaida, popmanto kuramnei. 27Pio pe deipra pirirtereramsidi, ikin pel weik doramsi. Yuma tumi yuma, mana gum pel donapu kuramsi. Ukuramsa neitamaida, ue denge weik ngeda, me cap, jen cap men kwamneua tep, tali putanapu kuramneu. Tonda, opkal men kwamneu taruda, nong banangapu kuramsidi, barye bungamsi.

28Ange yuma ikin keca weik akapmar dinin, angepu gume. Tumi-tumi yuma ikin kange doupra, ‘Uo, Allah teka tenenge nesala mutu-mutu yumada, telep kupra kunung do, gum do?’ tenen, kange mun kange doupra kuramsidi, tupa kunune. 29Ada, ware teka tenepre ngebo do yuma, sun kange dipru boun kuprepa, ikin kupmengopda, ne peda utopu sun aneng tep tenepnedi, ikin kange doupra puto boun kupnerepa, kunune. Ange utopu, mali kun keca di sun dipruai gidarepa, mali kupmengopda, ne dipru neitamai di, ‘Uo’ tenen, mali kange doupra kunune.

30Sun mok peteremna deiyo neng kange ereipdangedi, gemena upu peramengtopu men pepkune. Neda, ne puto boun kunerenge tep, gemena upu yambulanun utopu pepnedi, katuaipu penkamane. Ne puto boun kunerenge tep, kange derinune. 31Nun Deiyo Ngebo Yesus, er nai bo Allahda, er kaele, apepmasen upu yumada, mok men pepsene. Tek sisipu pepne. Nesala ban-ban yumadi, nun nai bo Allah er si tep, adipapu eremkamenge. 32Damsyik mutu kuramsi taru kupneu ngeda pepkusene. Ada amutu yuma talepra kuramu ngebo Raja Aretas, er amutara nimi deiyo ngebo Gubernur ngebodi, ‘Paulus tomopmepedi, ateng koupkamepe’ tenen, Damsyik mutu kurami jen neng yuma tep, “Damsyik mutu dana-dana yumada, Paulus tep, kalekmumdi, epmumyopda, angebo tomopso,” pepra deipu.

33Upepra deipupa, kalekra dinmaiyadi, ‘Tomopkamep’ tenen, piripterepi dinino, akati arum dana-dana yuma ila lyom gel beilya wiamya neitamai jendela bon kwamnga di, ne kayapu nengdi ila tapu keranjang utopu wiamya di, akeca pumbon dongopneidi, tapu gerekrap tapnenep-nenep banmaneianen, tuai bura tara dokotepneipa, loptapra bendopsa tep, aGubenur ngebodi men tomopneue. Ne Paulusdi pepsene.