2 Corinthians 12

Paulus er puto boun kupra, ikin kuramunge tep, pepu upu

1Uda, gemena upu utopu upu penupa deiki di, telep men kupra men deipsetu dinino, sun mok upu peteremna deiyo nengdi, gemena upu pengepa, sun upu gekena neng kuruma cadi, aupu ton cap lap pepkusene. Allahdi ne tep ken deiki pepneunge cap, ne dipru tamupneudi, lape pepneunge cap tep, lap pepkusene.

2Allahdi kupneu keca pepkune. Teka tenepra Kristus cap dipru dukdongopra kuramsi taru, orketeng tamun denge weik 14 tahun konum kupu dinin, kupneu keca tupa tenenune. Allahdi ne dopra, im deiki weneringe neitamai deipneue. Dopra ideipneuada, nong kepman dopra dubenue do? Ne sambalapu dopra dubeneu do? Ne walwal dinin, Allah erpuda tek sisi kaele. 3Kange di ton cap pepsene. Allahdi ne nong kepman im deiki welepra deipneu do? Ne sambalapu dopra im deiki deipneu do? Ne walwal dinin, Allah er kaele. 4Allah dopropneudi, im deiki mali keca tenpu pe men kururai, pio telepaipu deipneu. Ideipneupa, gekepsi kecada, nimi upu deiki di men lap peptene. Tonda, ne gekepsi kecada, tuai nesalada depkameng neng cadi, aupu men gekeptenge. Atep, ‘Aupu gekepnung’ tenen, upu konum sekneua cadi, akecada men lape pepsetene.

5Uda apepmasen keca tep nengeda, ada gemena upu pepmanto keca dinino, ne pedi, ne pe tep gemena utopu upu men pepkune. Ne gemena upu deiki penkamne kecada, ne pe yuk, puto ngebo men kunune. Ange gum dinin, ne dipru puto boun kupnerenge teppu, aupupu penkamne. 6Ange kupneunge tep nengeda, tek sisi kupneua tep, ‘Aupu gemena di penkamne’ tenen, peptenya peda, aupu peptenya deiki di, mutana neng walwal di perameng utopu men peptene. Akeca tek sisi kupneua tep pepsene. Dinino, agemena upu utopu upu weika di men penkamne. Ange gum dinin, ne peteremne upu cap, ne kune keca cap gekeprumdi, epnerumyopda, mambul keca akapnere pangeda, ‘Paulusda mambul ngebo,’ tenenkamnerume. Mambul keca men kwapmanerpa, men epmumyopda, ange men tenenkamnerume.

7Uda, co tungkul popserepa, nun nong bol wekseredi, pu weik jeramsertopu, Allahdi ne tep, ikin keca ne nong deiki deiamneue. Deiyoda, Paulusda, ila mambul weik keca gekepra epka tep, Paulusdi, ‘Neda ila ngebo, tenepredi, kange ereipdarur,’ tenepneudi, ikin keca ne nong deiki deiamneue. Allahdi, “Dakuptue,” peipupa, Kain Jen Ngebodi ne tep, ‘Ikin kange doupra kunkamre’ tenen, aikin keca ne nong deiki deipneupa, akunerure. 8Ukupneupa, ue weneri taru deiki di, Allah tep mororamsi. “Naio, aikin kunere ngeda, kandi akeca dopra, ka di ton cap telep kupra deipnetume,” pepra mororamsi.

9Mororamsi dinin, Allahdi ikin kunere ngeda, men dopropneue. Aupu pepneu. “Gume. Pauluso, akeca tupa kwapmakerpa ikin kupkerya peda, ne bicau tenepkenedi, ne kange dipapu melipra karekenun keca doromemdi, teleppu kunkamreme. Akonuma. Deiyoda ake. Ne puto karesenunada, sun pe puto boun kunge nesala tep nengeda, ne puto weika di karepsetenepa, pio telep kunkamenge. Puto boun kumumnya neitamai di, ne puto karenkamsen ngeda, katuai kupkamre ja,” Allahdi pepneu.

Upepneua tep nengeda, ne pe puto boun kupnerepa, ikin kunere keca yuma tep, tali kange deipra weika di, “Telepe pua,” penkamne. Deiyoda, ne pe puto men kupneredi, pio bounpu kunere taru yumada, ‘Kristus er puto weika di karenerepa, adeiki dipu telep kunkamne’ tenen, kange deipra kunkamne. 10Ange tep nengeda, Kristus erpu talepra, er pel donkamne taru neitamai di, puto boun kunere taru cap, yuk nengdi ne tep mali upu pepra derinenge taru cap, kange mun kange dounun taru cap, ne teka tenepsa tep yu nengdi, ‘Nun song’ tenen, ne nong deiki ikin keca derinenge taru cap, ayuma akapnerya peda, ‘Ange telepe pua’ tenen, kange derinkamne. Ada, ne pe puto boun kupnerepa, ikin kunere taruda, tek sisi Kristus puto deiki dipu puto kunkamna tep pepne.

Paulusdi, Korintus mutu neng tep, “Mambul kupnere,” pepra, pepu upu

11Uda, ne kayapu. Gemena upu utopu upu pepmasena deiki di, walwal ngebo utopu kupra pepmanu dinino, sun mali-mali kupmaruma deiki tep pepmasenu. Uda, tek sisi neda ila mambul ngebo men kunun dinino, ton nengdi, upenenunge. “Ukutaru yasengedi, peteremsenge nengda, sunda ila mambule. Dinino, Paulusda yambul mambulpu kurure,” penenunge. Dinino, ne kangeda, sun talipu penunge. Neda amok upu peteremna deiyo neng, yambul sun amngai peda men kunune. Atep, sundi, “Paulusda telep ngebo kurure,” pepmanetum dinin, men penerume.

12Allah erdi wepra dokotemrepa, er upu dopra peterembana tep, gonga kemna deiyo neng, tek sisi Rasul neng pel dongepa, mambul keca katuai kusere ngeda, sun kaele.

Ada, nimi men kupmanto keca cap, ila mambul nimi men kupmanto keca, kunupsek pen pel cap, Allahdi, ‘Tek sisi Allah er puto deiki dipu pel donmange, tenepkameng’ tenen, mambul pel doserenge cap, ayumada sun damai peteremamepu taruda, akuramupa diramrume. Ikin keca akapseu dinin, tamna gum, pio pe deipra, apel-apel yuma doramepupa, amambul keca kuramseu.

13Sundi, ‘Uo, Paulusdi, yuk mutu teka tenemi nengda, sun mambule,’ tenerur dinin, ‘Paulusdi nun Korintus mutu neng tep nengeda, yambul mambulpu teneserure,’ tenenerum do? Gume. Kikiman kuramepu taru sun keca men mororamsisa deiyoda, yuk gume. ‘Ne putan keca karepnenga deiki di ikin keca sun nong deiki deipnun’ tenen, men mororamsisi. Dinin, ‘Ange men moropseua tep, mali kupu,’ tenepnerumyopda, ‘Kaukepkamnerum’ tenen, moropsene.

14Men di ue butene taru sun damai yana peteremamsisi. Ukutaruda, ‘Ue weneringe sun damai bena peteremkamsene’ tenen, konum ketenepmane. Ne putapnere ngeda, sun bung keca tep gum dinin, sun tep bicau tenesenune. Atep, ‘Sun nong deiki ikin keca men deipkun’ tenen, ne putana tep sun keca men moronkamsene. Uda, sun ton tenipetepso. Nyapudi sun nai yapu cap, sun nin yapu cap tep, akeca-keca yuma bupra men enamengadi, amenda bokra karenung do? Gume. Sun nai yapudi sun ketenepra derinung keca bokra sun nyapu tep karenunge.

15Ange tep nengeda, ne akwapmaner keca yuma kunupnyopda, sun makuna tep karepsetenya peda, telepe pua. Angepu gum dinin, sun makuna tep, pel weik doramnepane, ne puto yuma gum kupnetua peda, ‘Ange telepe pua’ tenen, kange deiptene. Nedi sun tep weikanun ton cap dipru karepneryopda, sundi ne tep bicau tenenerum ngeda, metek kupbankamner do? 16Ne walwal dinin, bicau men tenepnerumnya peda, ne kaele. Kikiman kuramepu taruda, ikin keca sun nong deiki men deriramsisi. Ange men kuramsi dinin, ton nengdi, “Gume. Paulusda, mawa di peramseua deiki di, mali kudiramseu,” penenunge.

17Sun ton tenipetepso. Ne kayapu neng dopra, ‘Korintus mutu nesala peterepkameng’ tenen, sun damai dokotepsesa deiki di, sun keca upula dororamsei do?

18Ne kabo Titus tep, “Korintus mutu kunge nesala tep peterembeo,” pepra puto di pepsipa, er cap, tenpu ngebo nun weit utopu ngebo cap kikiman yarei. Titus cap, sun cap kikiman kuramrum taru neitamai di, Titus mawa di tali peptapra, sun keca upula dororamseu do? Gume. Erdi kange dipru dumsisipu kuramu ngeda sun kaele. Nun cap, sun cap kikiman kuramepu taru, telep kupra kurameputopu, Titus peda utopu, sun cap kikiman kuramrum taruda, dumsisipu kuramu.

19Uda, aupu yuma pepmasen taruda, ware tenepmanerum do? “E, Paulusda, ‘Aupu pepnepa, telep ngebo tenepkamneng’ tenen, pepsere.” Utenepmanerum do? Gume. Adeiyo tep men pepsene. Nunda, Kristus cap dipru dukdongopra kupepa, Allahdi nun kupe keca yuma, dipetepra upu bokeipkamsera tep, mawa di tali men peptapsene. Ne kayapu. Ne kune keca yumada, ‘Sun Korintus mutu nesala sun dipru kwa diprap, puto kemdinkamne’ tenen, kunune. 20Ne kware kupnere ngeda pepkusene. Nedi sun damai yanyopda, men di ‘Ukupra, ukupra kutenge,’ teneamsisitopu men kupmum pangeda, mali kange donkamne do?

Ange utopu, sundi ne tep, ‘Paulusda ukupra, ukupra kuptue,’ tenenerumtopu men kupne pangeda, sundi ton mali kange doupkamnerum do? Tonda, ne yanyopda, upu deiki pangdana cap, dipru wilimdana cap, yu weik kuprepa, ila di upu pena cap, yuk-yuk tenedarumdi, yuk-yuk kemdongona cap, luludina cap, kange eremdana cap, kemdana cap, yuk nengdi, ‘Anengda mali neng tenepkameng’ tenen, ‘Mali upu pedina cap kupkamrum do? Ne yankamne taruda, sun Korintus mutu nesala tupa mali kupnunge’ tenen, kware kunerure.

21Tonda, sundi amali keca tupa kuprumpa, epnyopda, ‘Uo’ tenen, mali kange doupnyopda, adeiki di, ‘Allahdi kange mun kange karepnerepa, ali dakamne do?’ tenen, kware kupnere. Sun Korintus mutu neitamai kungedi, mali-mali kuraminge tep, “Uo, nun mali kunupe,” pepra, sun mali kun keca men tapi nesala epnyopda, mali kange doupnedi, ne dipru ikin kunkamnere. Sun mali kungedi men tamenge kecada, ake. Ada, tali upula nyangdana cap, Allah er kure keca tenena gum di, pio mali-mali kuna cap tep, ‘Mambule’ tenena gum di, tali lupra kununga cadi, ne ali dakamne.