2Cor 13 | XteSC | STEP | Men di ue butene taru sun damai yasi dinin, amenda tara yankamne ngeda, ue weneri tep diryankamsene. Allah upu neitamai sekeipsei upu pepkusene. ‘Ton nengdi, yuk neng tep, “Ukuprap, ukuprap mali kunmange,” pepmengopda, sun adipapu teka tenepra upu bokeiprumdi, men wenepkamrume. Ange gum dinin, yuk neng ton cap buteneto, wenerito tapaktengedi, “Gume, nun pedi asuru epmape. Sun tek sisi amali keca kupmangue,” pepra amsepu peptengopda, adeiki dipapu, ‘Teka, aneng mali kupmange’ tenen, aneng wenepkamrume. Yuk neng cap tapakra, “Nun ton tek sisi epmape,” men peptenge teptoda, aneng men wenepkamrume.’ ( )

2 Corinthians 13

Paulusdi Korintus nesala tep, aupu gawal dangna tep, wenepra pepu upu

1 Men di ue butene taru sun damai yasi dinin, amenda tara yankamne ngeda, ue weneri tep diryankamsene. Allah upu neitamai sekeipsei upu pepkusene.
‘Ton nengdi, yuk neng tep, “Ukuprap, ukuprap mali kunmange,” pepmengopda, sun adipapu teka tenepra upu bokeiprumdi, men wenepkamrume. Ange gum dinin, yuk neng ton cap buteneto, wenerito tapaktengedi, “Gume, nun pedi asuru epmape.
Sun tek sisi amali keca kupmangue,” pepra amsepu peptengopda, adeiki dipapu, ‘Teka, aneng mali kupmange’ tenen, aneng wenepkamrume. Yuk neng cap tapakra, “Nun ton tek sisi epmape,” men peptenge teptoda, aneng men wenepkamrume.’ (Ulangan 19:15)

2 Uda, ue butene taru sun damai yana kikiman kuramepu taru di, sun mali kurami nesala tep, “Kange moupso,” pepra weneamsisitopu, ukutaru peda utopu, yukai kunman dinin, kange di ton cap, aneng tep pepkusene. Nedi sun damai Korintus mutu tamupra yanyopda, sun menop taru peteremamsisi dinin, ka tamupra mali kunge nesala cap, uda, yuk mali kunge nesala cap, ‘Dakwapye’ tenen, “Nun mali kunupe,” pepra, sun mali kun keca men tamenge nesala tupa kungepa epnyopda, “Dakwapye,” pepra bouna di men wenemkamsene.

3 Uda, sundi ne tep, ‘Gume, Kristusdi Paulus tep, er puto karerepa, tek sisi Paulusdi Kristus er upu dopra peteremserur do? Talipu kurur do?’ tenen, ‘Nong kaptupa, eptepyopda, teka tenenkamepe,’ tenenmanerume. ‘Tek do, telel do?’ tenenmaneruma cadi, sun damai yanedi, sun men di mali-mali kurami nesala epnyopda, bouna di gum, puto di wenepra upu bokeipsenepa, adeiki di kael kepkamnerume. Deiyoda, Kristusdi sun kan-kan neitamai pel doseryada, puto bouna di men pel doserure. Sun kange dipru neitamaida, ila puto di pel doserure.

4 Uda teka, sundi Yesus tomopra, sengdin co deiki di popmemei taruda, Yesus puto bounpu kuramu dinino, ukutaruda, Allah er ila puto deiki di, gam bukra deipupa, puto di kurure. Ange utopu, Kristus cap dipru dukdongopra kikiman kunup dinin, nun putoda boun nengpu kunupe. Dinino, Allah er puto kareserya deiki di, nun cap, Kristus cap kikiman kupedi, sun tep makupra pel donkamsepe.

5 Sundi, sun pe tep, moupra kalekdamumdi, tenedankamrume. Kurpetendankamruma deiyoda ake. Ada, ‘Nunda tek sisi Kristus cap dipru dukdongopra kikiman kunup do? Tali upupu pertamnup do?’ tenen, kupetepdamumdi, sun kun keca yumada dirpetendankamrume. Teka teneamruma deiki di, Kristus sun dipruai wekseudi, er cap dipru dukdongopra konum kurum ngeda, moupra kapul men tenipmarum do? Aupu pepman dinino, sun pedi sun pe tep, kupetepdarumpa, nong men kupseredi, tek sisi Kristus cap sun cap, dipru dukdongopra men kumumdi sakmumyopda, sundi, “Kristusda, nun dipru neitamai kurure,” men peptume. 6 Uda ange utopu, ne kaele. Nun kunup keca tenepserumdi, kael kemkamserume. Nunda kurpeten keca deiki di men sakmepu. Tek sisi Kristusda nun dipru neitamai kuserura cadi, nong katuai kuserure. Teleppu kunupe.

7 Ukutaruda nundi sun tep, Allah pio moronupada, pepkusene. Ada, ‘Sun Korintus mutu nesaladi, tenpu mali kun keca peda men kunkamenge’ tenen, morosenupe. Ada yuk neng epsengedi, ‘E, Paulusdi peteremamu nesala, Korintus mutu nesala teleppu kununga cadi, Paulus cap, er kikiman peteremenge neng cap, teleppu kununge. Sun kurpeten keca utopu men saki, tenenkamseng’ tenen, men pepsene.

Ange gum dinin, yuk nengdi nun tep, ‘Gume. Paulus cap, er cap peteremenge neng cap, mesumpu pel donunga tep, kurpeten keca utopu saki,’ tenepsetenga peda, angeda mambule gume. Mambul ngeda, ‘Sun Korintus mutu nesaladi, dumsisi kecapu talepra pio kunkamrum’ tenen, Allah tep morosenupe.

8 Nun kunup keca yuma dingeda, Allah er tek sisi upu tep, men sektapra yaniptepe. Ange gum dinin, nunda, ‘Allah er tek sisi upu telep kupbarepa, du weik moupkamre’ tenen, pel donupe. 9 Yuk nengdi nun tep, ‘Sunda puto gum neng kununge,’ tenepsengedi, pepsenga peda, angeda mambule gume. Sun Korintus mutu kurum nesaladi, Yesus tep puto di talepra, tupa telep kuprumyopda, nun kangeda, ‘Telepe pua,’ tenenupe. Nundi sun tep Allah morosenup kecada ake. Ada, ‘Allahdi sun mali kun keca yuma gum kupra deiptudi, pio telep kupra deiptupa, sun dipru wisiptue’ tenen, Allah tep morosenupe.

10 Adeiyo tep nengeda, ne cap, sun cap kikiman men kunup taru neitamai di, asurat deiki pepmasentopu, aupu wenepra sengsenune. Tonda, ‘Ne upu gekepnengedi, sun mali kun keca yuma taptengopda, nedi sun damai bena kunkamep taruda, bouna dipu kuptenepa, tali kange deipra kikiman kunkamepe’ tenen, aupu utopu upu sekra surat dokotemsenune. Nun Nimi Deiyo Ngebo Yesusdi ne tep, ‘Ne tep teka tenenge nesala tep, deiyo ngebo kunkamre’ tenen, pel kareamneua deiyo kecada, ‘Karepnepa, erdi sun teka tenenge nesala tep, sun dipru kwa diprepa, dipru wisipkamre’ tenen, karenerure. ‘Sun nong deiki ikin keca deiprepa, sun dipru pu jenkamre’ tenen, pel dona deiyo keca karenerepa, men pel donune.

Asurat gawal dangna tep pepu upu

11 Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Nedi sun tep, ‘Uo, ukupra, ukupra kuptenge’ tenen, putanere ngeda pepsenepa, sun gekepra kunkamrume. Ada, ‘Allahdi nun mali kun keca yuma gum kupra deipsetudi, pio dumsisipu kupra deipserepa, dipru wisipkamsere’ tenen, putarepa, kunkamrume. Tonda, tenpu kangepu tenepra, telep kupra kikiman kunkamrume. Pangdana cap, podana cap, mali kudana cap gum di, bouna di telep kupra kikiman kunkamrume. Ange yuma konum kupmum pangeda, nun nai bo Allah cap, sun cap dipru dukdongopra kunkamrume. Sun tep tapseredi, yuk men kunkamre. Allah erda, yuk neng tep bicau tenepra makundana deiyo keca kareserure. Tonda, nun cap, yuk neng cap, dipru boun kupra telep kupra kikiman kuna tep, deiyo keca kareserure. ‘Er cap, sun cap kikiman kunkamrum’ tenen, Allah moropsene.

12 Sun cap, yuk teka tenena neng cap antaprumyopda, buru karepdamumdi, ^{▼▼buru karepdana – Yunani upu deiki di, ‘Antapmumyopda, Yesus si deiki di, mutupdankamrume,’ pepra seku dinin, nun akuramnup mutu neitamaida, ange men kunupa tep, ange men sekmepu. Sun kurami mutu neitamaida, ange kuramya tep, Paulusdi, ‘Gispal dopdamumdi, Yesus si deiki di, mutupdankamrume,’ pepu.} “Telepe,” penkamrume. 13 Tonda, Allah tep konum teka tenepidi, ne kune mutu kungedi sun Korintus mutu teka tenerum nesala tep, “Telepe,” pesenunge.

14 Nedi sun Korintus mutu kurum nesala tep Allah morosenun kecada ake. Ada, ‘Nun Ila Nimi Deiyo Ngebo Yesus bicau teneseredi, er kange dipapu tali melipra karesere kecada, weika di karenkamser’ tenen, Allah moronune. Tonda, nun nai bo Allahdi bicau teneseredi, melimserenge cap, Allah er Lek Sambaladi nun dipruai kuseredi, melimserepa, ‘Sun cap, yuk teka tenenge neng cap, dipru dukdongopra kunkamrum’ tenen, Allah morosenune. ‘Ayumada pio kunkamser’ tenen, Allah morosenune.

Atep, ne Paulusdi telepe pepsene.

Acapu deipsene.