2Cor 2 | XteSC | STEP | Ange tep nengeda, nedi utenepsi. ‘Gume, men di sun Korintus mutu nesala damai benamsidi, pel doramsipa, sun ikin kange douamitopu, ton cap men kunkamne,’ tenepsidi sun damai kange di ton cap men yasi.

2 Corinthians 2

Korintus mutu nesala asurat epmengedi, ‘E Paulus tek sisi bicau teneserure, tenepkameng’ tenen, sekeipu upu

1 Ange tep nengeda, nedi utenepsi. ‘Gume, men di sun Korintus mutu nesala damai benamsidi, pel doramsipa, sun ikin kange douamitopu, ton cap men kunkamne,’ tenepsidi sun damai kange di ton cap men yasi. 2 Uda, nedi sun tep wenepsenepa, sun mali kange doupra, ‘Uo’ tenen, engepmumyopda, ware mutu nesala ton, telep kuptengepa, ne kange deiptene do? Yuk neng ton gum tep, ‘Ne wenepsenepa engenmange nengdi, ne kange derina tep, men kweipnetenge’ tenen, ‘Sun wenemna tep, sun damai kapul men benkamne,’ tenepsa tep pepsene.

3 Ataru di ikin surat sekeipsisinge deiyoda pepkusene. Ada, ‘Gume, ne kange derina tep, telep kuptengepa, ne kange deiptene,’ tenenun nesalada, sun Korintus mutu kurum nesala cadi, ‘Sundi mali kupmengepa, nedi sun tep, ikin kange doupnun’ tenen, menmena taruda, surat tenpu sekra dokotepsisi. Ada, ‘Mali kupnung’ tenen, upu sengdongona tep, men di asurat sekeipsisi. Tonda, utenepsisi. ‘Gume, sun Korintus nesala yumada, ne telep kange doununtopu, sun peda utopu telep kange doupra, kikiman kunkamepe,’ tenepsidi kange tenimtona gum di, angepu teka tenepsisi.

4 Menmena surat sekeipsisi taruda, pio ikin kange douna cap, ‘Uo’ tenen, mali kange doupra, dipru pu jena cap, engeramsidi, ase me weike kuramneua deiki di, asurat sekeipsisi. Ikin surat sekeipsisi suratda, ada, ‘Aneng asurat epmengedi, mali kange doupra engenkamenge’ tenena tep men seksi. Ange gum dinin, ‘Asurat epmenga deiki di, nedi sun Korintus nesala tep, pio weika di bicau tenenunada, kael kepkamnenge’ tenen, asurat sekra dokotepsisi. Nedi sun tep bicau tenesenuna tep, asurat sekra dokotepsisi.

“Mali kupu ngebo tep, ‘Telepe dakwapye,’ pepra kaukemkamrume,” pepu upu

5 ‘Puto weika di pepnepa, ikin kange doupkamenge’ tenen, men pepsene dinino, men di mali kupu ngebo mali kupka deiki di, ne mali kange doupra engepsi dinin, ada yambul mambule. Er mali kupka deiki di, sun Korintus mutu kurum nesala yuma tep, mali kupra deipseue. Ukupseua tep, mali kange doupra engeprumada, ila mambule. 6 Er mali kupunge tep, sun gung weika di, er nong deiki ikin keca konum wenepra deiprum ngeda, akonuma, tenepne. Yuk wenemna keca ton tapakra, er nong deiki men derinkamrume.

7 Ukutaru tep nengeda, sun adipapu er mali kupunge tep kaukeprumdi, er dipru moupra kwa dipkamrume. Ukunkamruma deiyoda, erdi, ‘Uo, ne pio mali kupsi’ tenen, pio engena cap, tenimna cap, mambul kange doupra kurya deiki di, ‘Er dipru ton cap buluksakrur’ tenen, pepsene. Sundi er tep konum weneprum ngeda, akonuma pepsene. 8 ‘Angeboda, mali kange doupra, er dipru buluksakrur’ tenena tep nengeda, ne puto di pepsene. Sundi er tep, “Kao, angeda konuma. Nundi kan tep tupa bicau tenepra makunkamkepe,” pepra, adipapu penkamemerume.

9 Asurat sekeipsisinge deiyo ton pepkusene. Ada, ‘Ujian kemamenga utopu, sun Korintus mutu nesala tep kurpetepnepa, ware telep kun keca do yuma, ne pene upu yuma gekepra, telep kunkameng do, gum do? Tongeda tapkameng do?’ tenen, asurat sekeipsisi. 10 Ukutaruda, ware nesala tep do yuma, mali kupmengepa, sundi aneng tep kaukepmumyopda, nedi ton utopu, aneng tep kaukepkamne. Mali kupmengepa, kaukepmanto keca akapyopda, ne kaukemnunada, sun telep kudina tep, akeca kaukemnune. Nun deiyo ngebo Yesus Kristusdi, dinerepa, sun telep kudina tep, sun mali keca kaukemnune. 11 Tonda, nundi, yuk nesala sun mali kunge keca kaukemnupada, mesum tep men kunupe. Ukununa deiyoda, ‘Kain Jen Ngebodi, nun mankau kange dounmape taru, mali kudiserur’ tenen, kunune. Uda, Kain Jen Ngebodi nun yuma tep, ‘Anengda, mali kudinkamne’ tenen, inipra mali-mali kudiserur kecada, nun konum kael keamepu. Akecada walwale men kuserure. Ne Paulusdi pepsene.

Teroas mutu neitamaida, Paulus ikin kupunge tep, pepu upu

12 Uda, yuk upu ton pepkusene. ‘Kristus er pel dona tep, nimi lyemna upu, kai telep upu peteremkamne’ tenen, Teroas mutu benamsi taruda, Allahdi er upu peteremna tep, go telepnge konum keteneipneu ngeda, epra kael kepsi. Ada nimi wengna tep, buplan ila di paktapra deriramengtopu, pio telep go taru karepneupa, ‘Amutu nesala petereptene’ tenen, konum kael kepsi. 13 Kael kepsi dinino, ne weit utopu ngebo Titusda, Teroas mutu men kuramupa, men epsa cadi, ‘Uo, ne kapda telep kurur do, gum do?’ tenen, ne kange dipru neitamaida, telep kupra men dimpepneu. Titus men epsa cadi, sun Teroas mutu nesala tep, “Telepe dakuso,” pepra, sun mutu tapsidi, kirikra Makedonia tara besi.

14 Allah tep, “Telepe,” pio penune. Uda, ton tara nesaladi, ton tara nesala tep popbisipmengedi, aneng tomopmengedi, kange deipra, kulmana deipra, aneng dubaramengtopu, nun nai bo Allahdi, nun yuma tep, konum taleserure. Taleserepa, ‘Yesus Kristus, er amutara kunkameng nesala, erdi duberepa, sunda er amnyo tara yakangepa, nimi yuma dinkameng’ tenen, Allahdi nun teka tenenup nesala dopropseudi, Kristus er amutara konum deipseue. Telep kait keca di nintong telep keca embarepa, nimi gekeramengtopu, Allahdi mepra embaredi, nunda er amnyo tara yakape pangeda, erdi melimserepa, nun cap, Yesus cap dipru dukdongopra kunupa deiki di, nesala ban-ban yuma epsengedi, Kristus tep kael kemnunge.

15 Tonda, nun cap, Kristus cap, dipru dukdongopra kupedi, er upu peterepmepya deiki di, Allahdi kange derirserure. Allahdi nintong telep keca gekepredi, kange deirurtopu, Kristusdi, nun teka tenenup nesala dopra er nai bo Allah tep karerepa, Allahdi nun tep kange deriserure. Dinino, Yesus er telep upu peteremnupa deiki di, dakunge nesala gekenung dinin, sun kange yuk-yuk tenenunge. Ton nesalada gam kunkamenge. Ton nesalada, depkamenge. 16 Atep nengeda, ton nesalada, Yesus er upu gekepmengedi, ‘E, aupuda pio telep upu kurura cadi, ange gekepmepyopda, Allah lyepserepa, gam pio kunkamepe. Anesalada, gamna keca siltong telep perseretopu kununge,’ tenenunge.

Dinino, ton nesalada, depkamenga cadi, anengda, Yesus er upu gekepmengedi, ‘E, aupuda nun dabale. “Allahdi wenepserepa depkamepe,” penmasengada, nun songe. Sun teka tenenung nesalada, konuma lyuramre keca potamna tong peserurtopu kununge. Anengda, nun songe,’ tenesenunge. Atep, Yesus upu gekenge nesalada, sun kange yuk-yuk kurura tep, ware nesala sun pe puto deiki dipu, amambul pel doptenge do? Gume, ange men kuptepe.

17 Ange pepmanada, mesum dipu men penune. Uda, yuk nesala weika di, ‘Allah upu peterepmapya deiki di, nesala gekepmengedi, co bo weik karepsengepa, co bo weik doproptepe’ tenen, mawa di pertamnunge. Dinino, nunda ange utopu men kunupe. Ange gum dinin, nunda Allah diserepa, nun cap, Kristus cap, dipru dukdongopra kikiman kupedi, inimna cap, mawa di pena cap gum dipapu, tek sisi upupu katuai penupe. Ukunupada, Allahdi dokotepseu neng kunupa tepa. Tonda, Yesus er upu penup taru yumada, ‘Allah damai tekra peptepetopu, kunupe,’ tenenupa cadi, Allahdi diserura tep, ange moupra tenepmepedi, pio tek sisi upupu penupe.