2Cor 3 | XteSC | STEP | Uda, aupu pepmasenada, ‘Sundi telep neng tenepkamseng’ tenen, nun si ereipdanmapdi penmap do? Gume. Tonda, yuk neng peterep benkunge taruda, sun upu gekepkameng nesala, ‘Teka tenepkamseng’ tenen, deiyo nengdi surat rekomendasi neitamai di, “Anengda telep neng cadi, sun upu gekepso,” pepra sekeipmengepa, adeiki dipu peterep embanunge. Dinino, ato surat rekomendasi ngeda, sundi nun tep seksetumnge pe, yuk nengdi sun gekena tep sektengenge peda, tek sisi men putaserure.

2 Corinthians 3

Allahdi, nimi lyemna tep, ukupu pediramser upu pel dona tep, pepu upu

1 Uda, aupu pepmasenada, ‘Sundi telep neng tenepkamseng’ tenen, nun si ereipdanmapdi penmap do? Gume. Tonda, yuk neng peterep benkunge taruda, sun upu gekepkameng nesala, ‘Teka tenepkamseng’ tenen, deiyo nengdi surat rekomendasi neitamai di, “Anengda telep neng cadi, sun upu gekepso,” pepra sekeipmengepa, adeiki dipu peterep embanunge. Dinino, ato surat rekomendasi ngeda, sundi nun tep seksetumnge pe, yuk nengdi sun gekena tep sektengenge peda, tek sisi men putaserure. 2 Gume, kertas bo deiki sengmenge upuda men putaserure. Deiyoda ake. Sun peda nun lap pen surat utopu kurume. Angeda kertas bo deiki sengna gum dinin, nun dipruai deiki sengna utopu kurumpa, nesala ban-ban yuma epsengedi, kael kemsenunge. Ada, ‘Paulus cap, er nyapsilip capdi, telep pel donung do, gum do?’ tenen, sun Korintus mutu nesala tep peteramepupa, teka teneprumdi, telep kurumupa, nimi yuma eptengedi, nun tep, kael kepsetenge.

3 Sun teka tenepra dumsisi kurumnya deiki di, konum katuai kuserure. Sunda, Kristusdi surat sekeipsetua utopu kurume. Nundi Allah upu peteremna pel doramepupa, nong kuramu ngeda, sun teka teneramrumdi konum akurume. Dinino, akatuai kusemum ngeda, sengna keca cap, tinta bolpoin me capdi men sekmepu. Ange gum dinin, Gam Kure Deiyo Ngebo, Allah er Lek Sambaladi sun tep, sun dipru neitamai pel doramseupa, ukutaruda lap pen surat utopu kurume. Erdi surat sengna utopu pel doramseu ngeda, pala gel deiki men seku dinin, sun nimi dipru neitamai pel dopseua ngeda, sengna utopu katuai kuserure.

4 Uda, apepmasen upu yumada, kange tenimtona gum, pio tek sisi tenenupe. Ange pio dimpepra teka tenenupada, Allah dinmaserpa, Kristus cap dipru dukdongopra, kikiman kupepa, Kristus deiki dipu kunupa cadi, nun kange men boktopmasere. 5 Uda, ‘Nunda nimi men kupmanto keca, pio telep kunupsek pen pel don nesala kunupa cadi, akeca-keca yuma kwapserepa, nun mambul neng kunupe’ tenen, men peptepe. Dinino, Allah er dipapu karesere pel dona deiyo keca, nimi men kupmanto kunupsek pen pel dona deiyo keca kareserepa, telep kupra doptepyopda, nun puto deiki dipu gume. Ada, Allah er puto deiki dipu kunupe.

6 Allahdi nimi lyemna tep, “Ukunkamsene,” pepra pedisere upuda, ‘Ukupu upu dopra, peterep embenkameng’ tenen, nun tep wepra deipseue. Wepra deipseudi, nimi men kupmanto keca, kunupsek pen pel dona deiyo keca karerserure. Aupuda, nimi lyemna tep, ukupu upuda, mem upu surat sengmenge upu deiki di men kurure. Ange gum dinin, Allah er Lek Sambala deiki dipu kurure.

Deiyoda ake. Mem upu surat deiki sengmenge upuda, nimidi, ‘Angepu talepra dombepya deiki di kunkamepe’ tenen, piripetenung dinin, telep kupra men dombenmanto kununga cadi, aupuda nimi poserepa, derameng keca utopu kurure. Dinino, Allah er Lek Sambalada, er pel doserya deiki di, nimi gam kuna deiyo kecapu karerserure. Ange tep nengeda, Allah er nimi lyemna upu, pediramser upu, ukupu ngeda, er Lek Sambaladi gam kuna deiyo keca kareserenge deikipu kurure.

“Allahdi nimi lyemna tep, ukupu pediramser upuda, pio telep kurure,” pepu upu

7 Uda ne kayapu, sun ton tenipetepso. Pumun taru Allahdi peipupa, Musadi pala gel dopra, agel deiki mem upu sekra deipu ngeda, nimidi aupu talepra pio dumsisipu men dombanmanto kuramya tep, nimi dena keca utopu kupseu. Ukupseu dinin, aupu yau taru peda, pio telep kupra dirine weik deiki di yaue. Dirine weik cap yau taruda, Musa epupa, er urasin peda dirine weik kupu. Dirine weik kupu dinin, yambul gum kupbaramu taru peda, sun ataru dirami nesala, Israel nesaladi Musa er urasin dirine weik tupa kuramnga cadi, tupa-tupa men dirami. Deiyoda, aupu yau taruda, dirin weik kupupa, ila mambul weik kuramnga tep, tupa men epmanto kurami. Dinino, amenda taruda, Musa er urasin deiki kupu dirineda gum kupbaramu.

8 Pumun taru nimi dena utopu upu, mem upu yau taruda, dirine weik kupka cadi, Allah er Lek Sambaladi pel donkamsere ngeda, pio telep kupra, dirin weik cap, mambul kuna pio weik cap kunkamre. Pumun ngeda er mambul kuna cap, dirine capda, yambul pua. Ukutaru konum yanmasere ngeda, mambul pio weike.

9 Musadi mem upu sekamu ngeda, nimidi aupu yuma gekepra dumsisi men kupmanto tep, aupu deiki Allahdi kupetepseryopda tek sisi depkamepe. Dinino, apumun taru mem upuda telep kupra dirine weika di yaue. Ukupu yakare upuda, Allahdi nun mali kunup nesala tep, bicau teneseredi, “Sun cap, ne cap kikiman kuna tep, ‘Sunda dumsisi kun nesala kurume,’ pepra konum deipsene,” pepra deriserure. Nun mali kun keca daepra gum kupra derina tep, er kange dipapu aupu peserure. Upeserura tep, aupuda pio telep kupra, ila mambul weik kurure. Atep, ne kangeda, pumun upuda dirine cap, mambul kuna capda, yambula dipu yaue. Ukupu yanmaser upuda, ila mambule pepsene.

10 Pumun taru yau upu, mem upu yau taruda, dirine weik kupupa, “Aupuda, mambul weik,” tenerami dinin, ukutaru yakare upuda, pio telep kupra, ila mambule kurura cadi, pumun upu cap, ukutaru upu cap, kikiman tenipetepmepe dingeda, ‘Ukupu yanmaser upuda, ila mambule cadi, pumun mem upu yau ngeda, metek mambule pua,’ tenenupe. 11 Tonda, pumun mem upu yau ngeda, ke tarupu kuramu dinin, telep kupra dirin weik capdi yaue. Dinino, ukutaru yakare upuda, ke taru gume. Aupuda, pio kunkamre keca cadi, aupuda pio telep kupra, ila mambul upu kurure. Pumun ngeda yambul mambul pua.

12 Ange tep nengeda, ukupu yakare upuda, ‘Pio akunkamre,’ konum tenenupa cadi, nun kange aupu deiki deipra, nun kwar-kwar kuna gum dipapu, pio kika deipra aupu peteremnupe. 13 Musada, Allahdi amem upu karepmemeupa epka cadi, er urasin deiki dirine weik kuramupane, adirin gum kupbaramu taruda, ‘Israel nesaladi ne urasin dirine gum kupbanmanere ngeda epnenung’ tenen, er urasin deiki opkal sekropa di lelipra embaramu. Musada ukuramu dinin, nunda ange utopu men kunupe.

14 Dinino, sun Israel nesalada, Allahdi sun kange tenena tep nengeda, kange wang-wang perur keca karepupa, telep kupra kange men tenerami. Kange douna gum kunapu kurami. Akeca karepu taru di dipra, ataru neitamai yuma cap, ukutaru cap, sun Israel nesaladi Musa sekeiamu mem upu, peterepmengepa, moupra men teneptenge. Musadi er urasin opkal di lelipupa, er urasin dirine moupra men epmanto kuramitopu, ukutaru peda Israel yala nesaladi Musa sekeiamu upu gekepmenge taruda, kange wang-wang penapu kununge. Kristus teka tenepmepepa, er dipru dukdongopra deipserya deiki dipu, kange wang-wang pena keca gum kuptua tep, sun Israel nesalada, tupa moupra men teneptenge.

15 Ukutaru peda, Musa sekeiamu upu peterepmengepa, Israel yala nesala gekepmengedi, ‘Deiyo ake’ tenen, moupra men teneptengedi, men kael keptenge. Nimi urasin opkal sekropa di lelipmengepa, yuk neng men eptenge utopu, Israel nesala sun kange dipruaida, wang-wang pena deiyo keca tupa kurure. 16 Kange wang-wang pena keca tupa akurepa, sun Israel nesala moupra men teneptenge. Dinino, Israel yala neng do, ware neng do yuma, nun Deiyo Ngebo Yesus tep, teka tenepmengopda, adipapu sun kange wang-wang pena keca gum kurure. Ataru dipapu katuai kael keptenge.

17 Uda, Nun Deiyo Ngebo Kristusda, Allah er Lek Sambalapu kurure. Tonda dan mutu do yuma, Kristus er Lek Sambala kuredi pel doryai yumada, ateng kouserur keca yuma loptapra lyemserure. 18 Tonda, nun yumada, nun urasin lelimna gum dingeda, oktu deiki di nimi urasin diramengtopu, nun kupya deiki di, yuk nesaladi, Yesus er kure keca dinunge. Ada, nun Deiyo Ngebo Yesus Kristus, er pio telep kuretopu epmengedi, kael kemnunge. Nun Deiyo Ngebo Yesusda, Allah er Lek Sambalapu kurure. Er pio telep kurya deiki di, nun dipruai pel doseredi, er telep kuretopu, nun peda utopu telep kupra deriserure. Er kuretopu telep kudisere taru yumada, telep kupbaramepyane, amendada pio telep kunkamepe. Ayumada, Yesus Kristus dipapu, telep kupra deriserure.