2Cor 4 | XteSC | STEP | Ange tep nengeda, Allah er kange dipapu bicaue tenepseudi, melimserya deiki di, nimi lyemna tep ukupu pediserur upu kai perbana tep, pel karepseue. Ukupra kupseudi, apel karepseua tep, ‘Uo, ware kuptepe do?’ tenena gum di, dipru men bulungsangserepa, men tamnupe.

2 Corinthians 4

“Allahdi, pel karepseua tep nengeda, ‘Uo, ware kuptepe do?’ tenen, dipru men bulungsangkamsere,” pepu upu

1 Ange tep nengeda, Allah er kange dipapu bicaue tenepseudi, melimserya deiki di, nimi lyemna tep ukupu pediserur upu kai perbana tep, pel karepseue. Ukupra kupseudi, apel karepseua tep, ‘Uo, ware kuptepe do?’ tenena gum di, dipru men bulungsangserepa, men tamnupe. 2 Ange gum dinin, mali-mali kunge nengdi, ‘Yuk nesala epra kael kepsenung’ tenen, inimamenge keca yala-yala yuma konum tapmepudi, mawa di upu pena cap, mok upu cap men penupe. Tonda, Allah upu tek sisi peseretopu angepu moupra peteremnupe. ‘Yuk nengdi kange deipsetenge’ tenen, nun kange dipapu gwalipra men peteremnupe. Ange yuma men kunup dinin, Allah er dinmaserpa, Allah er tek sisi upu kuretopu, angepu dopra katuai di peteremnupe. Peteremnupa deiki di, nimi yuma gekepmengedi, sun kange tenena neitamai di nun tep, ‘Anengda tek sisipu kununge,’ tenesenunge.

3 Nundi nimi lyemna upu, kai telep upu peterepmepepa, ton neng tep nengeda, men gekepmanto kununge. Ada nimi yuma gum dinin, aupu men gekeptenge nengda, sun teka tenena gum di, depkameng nesalapu kununga cadi, aupu moupra men gekepsetenge. Yuk deiyo tep gume. 4 Uda, tuai mutu yuma talere deiyo ngebo Kain Jen Ngebodi, sun teka tenena gum nesala tep, asuru puna utopu keca karerure. Ukupyopda, anengda, Allah er tek sisi upu men gekepmanto kununge.

Ukurya deiyoda, sun kange dipru neitamai, Kristus er kai telep upu deiki di, Kristus er pio telep kurya keca kael kepmengedi, sun dipruai dirine utopu kuprepa, ‘Betapra kael kepnung’ tenen, Kain Jen Ngebodi nesala tep, asuru pun keca karerure. Karerepa, Kristus er pio telep kupra ila mambul kuryada, er kai telep upu deiki men kael kepmanto kununge. Allah er pio telep kuretopu, Kristus er peda utopu kurure. 5 Nundi, nun pe kange tenenup keca cap, nun pe nong cap tep men peteremnupe. Ange gum dinin, nundi, “Yesus Kristusda, nun Ila Nimi Deiyo Ngebo er tenpu kurure,” pepra peteremnupe.

Tonda, Yesus er amutara kupedi, er pelpu donupa cadi, er tep pel donup dinin, apel donupada, sun Korintus mutu cap, Akaya tara nesala cap, sun tali melimna neng utopu kunupe. Atep nun upu pepmepepa, aupu pio men gekepmanto nesalada, Allahdi teneamutopu, sun depkamenga tep men gekepsetenge. Yuk deiyo tep gume. 6 Allahdi, “Kunungnai neitamai di dirine kupkamre,” pepu. Aupu pepu ngebo Allah, er dipapu pio mambul keca karepseue. Ada nun dipru neitamai, er dirine keca karepseua deiki di, Allah er pio telep kure kecada kael kemnupe. Allah er pio telep kureyada, Kristus er kuramu keca kael kepmepya deiki di, katuai kuserepa, kael kemnupe.

7 Arup pepmasen mambul keca, Yesus moupra tenena tep, dirine utopu keca karepseuada, nun puto gum nesala kunup dinin, nun dipru neitamai kareserure. Ukupmanto ngeda, nimidi kerah tu dopra, mau ketenepmengedi, ukudi dapra derirameng keca, pio boun keca kurure. Ange kuretopu, nun nong peda boun kecapu kunupe. Ada tali tep gume. Deiyoda, nesala yuma, ‘Allahdi mambul keca karepseu ngeda, ila puto weik keca kurur dinin, Allah er puto dipu kuserure. Ada nimi puto di, Allah er kai telep upu peteremnunge, men tenenkameng’ tenen, nimi nong pumbonpu dirin weik keca karepseue.

8 Uda nunda, dana-dana tara yumadi, ikin keca nun nong deiki yakasere dinin, men taingdongoserure. ‘Ware kuptepe do?’ tenen, kange tenimtonup dinin, nun dipru men bulungtamserure. Tonda, “Gume Allah er pel donup ngeda, dakwapye, men kuptepe tep, tapkupe,” pepra men tamnupe. 9 Nun teka tenenupa tep, mali nengdi nun nong deiki ikin keca derisenung dinin, Allahdi men tamserure. Sundi popsengepa tuai sangnup dinin, gawal dakra men gum kupra deipsetenge. 10 Mali nengdi Yesus poptapitopu, ataru-ataru yumada, sundi nun tep popmanto kusenunge. Popmanto kusenung dinino, ange deiyoda, Allahdi uteneserure. ‘Sun nong cap, sun gam kununga cap deiki di, yuk nesala epmengedi, ‘E, sun pel donunga cap, gam tupa kununga capda, ada Yesus er tupa gam kuredi, aneng tep er puto karerepa, adeiki di kununge,’ tenepra, kael kepkameng’ tenen, kuserure.

11 Nun gam tupa kunup dinin, nundi Yesus tep teka tenepmepepa, yuk nengdi, ‘Aneng poptaptepe’ tenen, pio piripetenkamsengada, deiyo ton akapmare. Ada, Allahdi nun tep, ‘Sun tali nimi nong neitamaida, Yesus er gam kuna deiyo keca cap, er kure keca cap, katuai kuprepa, nesala yuma kael kepkamenge,’ teneserure. 12 Ange tep nengeda, nunda ataru-ataru yuma, nun nong deiki ikin keca deipra popmanto kusenung dinino, ukupsenga deiki di sun Korintus mutu nesalada, gam pio kuna deiyo keca kael kemrume. 13 Allah upu neitamaida, menop taru seki upuda ake.
‘Ne teka tenepsa tep, adipapu ne upu pepsi.’ (Mazmur 116:10)

Aupu seku ngebodi teka teneamutopu, nun peda teka tenepra aupu pesenupe. 14 Nun kaele, nun Deiyo Ngebo Yesus Kristus depupa, gam bukra deipu ngebo, Allahdi nun tep gam bukra deipkamsere. Ukupseredi, Kristus cap, nun cap, sun Korintus mutu nesala cap dopra, Allah er kuryai kikiman deipkamsere. Ange teka tenenupa cadi, aupu pesenupe.

15 Arup pepmape upu yumada, sun Korintus mutu nesala, sun makuna cap, sun telep kudina cap tep, akeca yuma kurure. Ukupre pangeda, Allah er kange dipapu bicau teneseredi, melimsere keca, yuk nesala weikanun ton cap, aupu gekepra teka tenepmengedi, weik kupbankamenge. Nimi weik ton cap teka tenepmengopda, sun yumadi Allah tep, “Nun nai Allah, kanda pio telepe,” pepra, weika di pengopda, Allah er si ila di erepra gispal donkamenge.

“Oryankamre taru yumada, Allah teka tenepra, pio moupra kunkamrume,” pepu upu

16 Ange yuma ukunkamra tep, nunda, ‘Uo, ware kupkup do?’ tenen, kware di mali kange doupra, dipru men bulungsangserure. Nun nong bol deikida, tek sisi tumi-tumi yuma ikine kuserepa, bol mali dopkamnup dinin, nun kange dipru neitamaida, Allahdi tumi-tumi yuma telep kupra ukupu nesala utopu puto kemdiserure. 17 Tonda, nun kware di mali kange men dounup deiyo ton ake. Ada, kange mun kange kupsere keca yumada, tek sisi ke tarupu kuserure. Tonda, kanampu kuserure. Kange mun keca kuserya deiki di, amenda pio gam kunkamepaida pio telep kunkamsere. Angeda ila mambula cadi, ukutaru ikin kusere kecada, nun kangeda, ‘Akeca yumada, tek sisa pio kanam utonunpu kuserure. Akecada mambul gume,’ tenenupe. Ila-ila mambul ngeda, ada Allah cap kikiman pio gam kupepa, ila mambul keca karenkamsere ngeda, men nukmanto, pio weika di karenkamsere. Atep tuai mutu kupe taru, ikin kuserenge tep, ‘Angeda, yambul mambul pua,’ tenenupe.

18 ‘Angeda, ware kupra di, teneptepe do?’ tenena gume. Deiyo akapmare. Ada, nun asuru di epmepedi, pio tenenup kecada, tali nimi asuru di eptepe keca gume. Nun pio tenenup kecada, nimi asuru di men eptepe keca pua. Deiyo ton akapmare. Ada, nimi asuru di dinup keca yumada, tek sisi ke kecapu kurura cadi, gum kupkamre ja. Dinino, asuru di men eptepe keca puda, ke taru keca gume. Akecada pio akunkamra cadi, men gum kupmanto keca kurura tep, angepu tenenupe. Ne Paulusdi pepsene.