2Cor 5 | XteSC | STEP | Uda yuk upu ton pepkusene. Nun yuma kaele. Tuai mutu kunup taruda, nun nongda, opkal ati, er sida tenda, utopu ke kecapu kurure. Nun nongda ke tarupu kurura cadi, mali kuprepa depmepyopda, anong gum kupseryopda, yuknge dopropkamepe. Ukunkamepnge tep, ukupmanto upuda ati pepkune. Allahdi konum tek sisi pio akapkamre ati keteneipseu ngeda akapmare. Akatida, nimi buru deiki men dopi. Akatida im deikipu kuredi, pio yuma taru akapkamre.

2 Corinthians 5

Im deiki kunkamnupai tep, pepu upu

1 Uda yuk upu ton pepkusene. Nun yuma kaele. Tuai mutu kunup taruda, nun nongda, opkal ati, er sida tenda, utopu ke kecapu kurure. Nun nongda ke tarupu kurura cadi, mali kuprepa depmepyopda, anong gum kupseryopda, yuknge dopropkamepe. Ukunkamepnge tep, ukupmanto upuda ati pepkune. Allahdi konum tek sisi pio akapkamre ati keteneipseu ngeda akapmare. Akatida, nimi buru deiki men dopi. Akatida im deikipu kuredi, pio yuma taru akapkamre. 2 Im deiki keteneipseunge akapmar dinin, tupa tuainge neitamaipu kupe taru yumada, ‘Uo, ukupu opkal kenengmengetopu, Allahdi im deiki nong keteneipseu ngeda, konum dongopra kenektepi’ tenen, pio putaserepa, mali pepra kunupe. 3 Uda, im deikinge kenekeipsere pangeda, tali nong dempu men kunkamepa tep, pepsene. Depmepyopda, nong dempu, nimi sambalapu men kunkamepe. Allahdi ukupu nong, im deikinge karepkamsere.

4 Apepsene upuda, deiyo ake. Ada, tuai mutu kupe taru yumada, ke nongpu kupedi, ‘Uo, ikin kuserure’ tenen, mali pepra engenupe. Ada, ‘Nun tuai nong gum kupsetupa, tali dempu kuptepe’ tenena gum dinin, ‘Nun nong ke taru tep kapseunge gum kuptupa, im deiki nong dopra, anong dongopra kenekeipsetue. Ukupseryopda, nun tuai nong deprepa, gum kupre pangeda, pio gam kunkamepnge deiki di, im deiki nong kepra, pio gam kutepe,’ tenena tep pepsene. ^{▼▼gam kunkamepnge – Aupu pepunge deiyoda ake. Ara, Yesus lyepseua deiki di, nun yo punupseua tep, teka tenenung nesala, tuai mutu neitamai di, sun tali nimi nong depmenga peda, amenda taru im deiki pio gam kunkamenge.} Tonda, ‘Dena deiyonge gum kuptupa, pio gam kuna deiyongepu akunkamre’ tenen, putana tep pepsene.

5 Uda, arup pepmasen upuda, nun nai bo Allahdi nun tep, ‘Anesalada pio gam kunkamenge,’ teneamseudi, ketekepra deipseu deiyoda akonuma. Tonda, ukupmanto upu pepkusene. Ada nimidi, ner dona tep, amenda taru akeca-keca weika di karepkamenga tep, dopropkameng nesala, ‘Teka tenepkameng’ tenen, gonga kepra menmena keca, ner burudana kareramenge. Ange utopu, Allahdi er Lek Sambala menmena karepseupane, dakuramepyanen, amenda taruda, gam pio kunkamepe. Ada, amenda taru yankamser keca yuma, ‘Tek sisi kupkamre, tenenkameng’ tenen, er Lek Sambala menmena karepseu dinin, amendada, pio gam kunange ton karepkamsere.

6 Ange tep nengeda, ataru-ataru yumada kange tenimtona gum dipapu, ‘Pio tek sisi kunkamsere’ tenen, dimpeprappu kika deipra kunupe. Tonda, nun kaele, tuai deiki nimi nong neitamai tupa kupe taruda, nun yuk mutu kunupe. Tonda, nun Deiyo Ngebo Yesus yukai kurure. 7 Nunda, asuru di dinupa deiki dipu men kunupe. Ange gum dinin, teka tenena deiki dipapu kunupe. 8 Arup pepmasentopu, nun kange tenimtona gum dipapu, teka tenepra dimpeprappu kunupe. Nun kange putasere ngeda, tuai nimi nong kunupada, dakaptupanen ange tapra, nun Deiyo Ngebo Yesus kuryai kikiman kutepetoda, ‘Angeda pio telepe,’ tenenupe.

9 Ukupra tenenupe. Ange tep nengeda, ‘Nun nimi nong tupa kupedi, tuai gam kupe taru do, ange tapra, im deiki mutu kunkamep taru do, ila mambul tenenup ngeda, ada Allahdi kange deipsetue’ tenen, er teneseretopu angepu talepra, dumsisipu kunkamepe. Yuk keca ton putaserepa, men kunupe.

10 Aupu pepmasenada, mesum tep men pepsene. Gume, nesala ban-ban yuma amenda sirya taruda, Kristusdi nimi yuma upu bongna tep, ila bungna keca deiki bukrepa, er damai yankamepe. Kristusdi, nimi yuma dipetepseredi, nimi yuk-yuk dinin yuma, sun pel doraminge cap, upu peraminge cap yuma akuramitopu, upu bokra deipkamsere. Ada, nimi nong kupra pel doramepunge tep, telepnge pe, malinge peda dipetepseredi, upu bokeipkamsere. Atep, ‘Ware pel doptepepa, Allahdi kange deipsetu do?’ tenenapu kunkamnupe, pepsene.

Allah yuk, nun yuk kuramepupane, telep kupra deipseudi antaipseua tep, pepu upu

11 Atep nengeda, Allahdi upu bokeipkamser taruda, ‘Mali kupmepunge tep wenepserur’ tenen, kwar dangnada kuserura cadi, nundi yuk nesala yuma tep, ‘Sun malinge taptengedi, Yesus tep teka teneptenge’ tenen, pio pe deipra peteremnupe. Nun kuramepe kecada, Allah er kaele. Tonda, ne putapnere ngeda, sun Korintus mutu nesala, sun kange dipru neitamaida, nun kupe keca yuma katuai kuprepa, ‘Kael kepsetume’ tenen, putanerure. Nunda mawa di, tali upu men penupe.

12 Nundi, ‘Korintus mutu nesaladi, nun tep, telep tenenkamseng’ tenen, aupu men pepmepe. Nun pedi nun pe tep nun si men ereipdanmape. Ange gum dinin, ton nesalada, nimi dipruai kapre keca men tenengedi, nong bol deikinge, nun asuru di dinup keca, urasin kaprengepu tenenunge. Ange utopu tenenge nesaladi, nun tep mali pepsengepa, ‘Sun Korintus nesaladi upu tamupra peptuma’ tenen, aupu yuma lape penmape. Tonda, ‘Ange lap pepmepepa, moupra kael kepsetuma’ tenen, penmape.

13 Uda, ton nesala dingeda nun tep, “Sun kunge kecada mutana nengdi kungetopu kununge,” pesenung. Mutana neng men kunup dinino, mutana neng utopu kuptepya peda, ‘Yuk nesala yumadi, Allah er pio telep kureyada, moupra kael keptenge’ tenen, Allah er pel donupe. Kange doupra, moupra kunge neng utopu kupmepyopda, angeda ada sun Korintus nesala, sun makuna tep kunupe. 14 Ange kumepya yumada, deiyo tenpupu kurure. Ada, Kristus erdi nun yuma tep, bicau teneseredi, melimserya deiki di, er puto kareserepa adeiki di er pel donupe. Ange peda, tali tep gume. Kange tenimtona men kapserepa, pio tek sisi tenenupe. Nun kaele. Yesusdi, ‘Nesala ban-ban yuma depkameng’ tenen, tuai mutu nesala yuma sun lyemna tep, erda tenpu ngebodi, nun yo pununa tep depseue.

Ange tep, nun kaele. Kristus depseua deiki di, nun yo punupseua tep, Kristus depseua deiki di, nun yuma konum depmupke. ^{▼▼konum depmupke – Aupu pepunge deiyoda ake. Ada Yesus depseua deiki di yo punupseua tep, teka tenenge nesala, tuai mutu di sun tali nimi nong depmenga peda, amenda pio gam kunkamenge.} 15 Tonda, Kristusdi nimi yuma yo pununa tep depseuada, ‘Sun gam kunkameng taruda, sun pe putan keca tepapu tenepra, tali-tali kunkameng’ tenen, men depseue.

Ange pio gum dinin, Allahdi tenepkada ake. Ada, ‘Anesala yuma, sun yo pununa cap, sun lyemna cap tep, Yesus depu.’ Depu dinin, Allahdi gam bukra deipu ngebo, ‘Yesus er tep teka tenepmengedi, er teppu tenengedi, erpu talepra, er pelpu dopra kunkameng’ tenen, Yesusdi yo punupseudi, depseue.

16 Ange tep nengeda, ukutaru di dipra oryankamre taru yumada, sun teka tenena gum nengdi, yuk neng tep tenedarameng utopu, nundi yuk neng yuma tep, ange utopu men tenenkamnupe. Pumun taru nundi Kristus tep, tali nesala teneramengtopu, ‘Angeboda tali ngebo,’ tenepmepu dinin, ukutaruda ange tupa men tenenkamepe. 17 Ange utopu tupa men tenenupa cadi, aupu pepsene. Ware ngebo do yuma, Kristus tep teka teneprepa, dipru dukdongopra kikiman kuryopda, erda pio ukupu ngebo utopu kurure. Er kange tenena cap, er dipru cap, er kure keca cap yumada, Allahdi, angebo pumun di kuramunge yuma gum kupra deipredi, ukupungepu karerure.

18 Ange yumada, Allah er dipapu pel doserepa, kareserure. Pumun di Allah yuk, nun nimi yuma yuk-yuk kuramupudi, er cap kikiman men kupmanto kuramepupane, Allahdi nun lyemna tep, Kristus dokotepseupa, er pel dopseua deiki di, er cap antaipra deipseudi, telep kupra deipseue. Atep ukutaruda, er cap kikiman kuptepe. Allah ukupseudi, ‘Anesala yumadi, ne Allah cap, nimi cap antapra kikiman telep kuna tep, ne kai telep upu yuma lap pepra peterep embankamenge,’ tenepseudi, wepra deipseudi, apel karepseue. 19 Nun peteremnup upuda, ake. Allah cap, nimi cap antapra telep kuna tep deiyo upu adano. “Ada, Allahdi tuai nesala yuma, sun mali kunge keca tep, ‘Kaukepra daepnedi, ka di ton men tenepnedi, sun malinge tep men wenepra popkamne’ tenen, Kristus doproipseupa, Yesusdi er nimi lyemna pel dopseua deiki di, Allahdi nimi ban-ban yuma cap, er cap antaipra kikiman telep kupra derirserure.” Aupu yuma lap pepra kai peterembana tep, Allahdi nun wepra deipseupa, apel talepra donupe.

20 Ange tep nengeda, nun Allah upu peteremna gonga kemna deiyo nengda, Allah er si deiki di, nimi lyemna tep, er kai telep upu peterembana neng kunupe. Ada, Allah er pedi sun tep meneng dam yana pepsetutopu, nun deiki peserepa, aupu dopra sun damai peryakanupe. Ange tep nengeda, Kristus er pedi sun meneng dam men pepsetua cadi, nunda er si deiki di sun tep pesenupe. Nundi sun tep penup upuda ake. “Allahdi nimi lyemna tep, antapra telep kupra deipsere ngeda, sun ton teka tenepra doronkamrume,” pepra pesenupe.

21 Uda, Allahdi nun lyemna cap, yo pununa cap tep, mali kun keca tenpunge pe men kuramudi, pio dumsisi kure ngebo Yesusda, Allahdi dopra, tuai nesala nun mali kun keca yuma er nong deiki deipupa, nun malinge yuma dopra gum kupra deipseue. Ada, nun yo pununa tep, kupseue. Ukupka deiyoda ake. Allahdi uteneamu, ‘Tuai nesala yuma, mali kun neng kunung dinin, neda Allah pio dumsisi kunetopu, Kristus cap anesala cap dipru dukdongopnepa, Kristus deiki di, anesala dumsisi kupra deipkamne,’ tenepudi, Allahdi apel dopseue. Ne Paulusdi pepsene.