2Cor 6 | XteSC | STEP | Nunda, Allah er pel kikiman melipra donup nengdi, sun Korintus mutu nesala tep puto di pepsepe. “Allah er kange dipapu bicau teneseredi, makupra lyemsere ngeda, teka teneprumdi doproprumyopda, tali-tali kuna cap, tali tenena cap, mali kun cap men kunkamrume. Allahdi teneamseutopu dumsisipu kunkamrume,” pepsepe.

2 Corinthians 6

1 Nunda, Allah er pel kikiman melipra donup nengdi, sun Korintus mutu nesala tep puto di pepsepe. “Allah er kange dipapu bicau teneseredi, makupra lyemsere ngeda, teka teneprumdi doproprumyopda, tali-tali kuna cap, tali tenena cap, mali kun cap men kunkamrume. Allahdi teneamseutopu dumsisipu kunkamrume,” pepsepe. 2 Apepsene upu deiyoda ake. Ada Allah upu neitamaida, Allahdi Israel nesala tep peipupa, nabi Yesayadi seku upu ake.
‘Allahdi upepu, “Nedi, ‘Anesala makupkamne’ tenen, kange deipsi taru konum kupupa, sundi moropnerumpa, gekepsidi makupsisi. Nedi, ‘Nimi lyemna taru adano,’ teneamsi taru konum kupupa, sun tep makupra lyepsisi,” pepu.’ (Yesaya 49:8)

Atep, Yesayadi sekra deipu upu peseretopu, ne Paulusdi sun Korintus nesala tep pepsene. ‘Ange yumada, yuk taru dipu tenenkamepe’ tenen, men kunkamrume. Ukutaruda, Allahdi kange derisere taru konum kupsere. Ukutaruda, Allahdi lyemsere taru konum kuserura tep, adipapu teka tenepra telep kupra kunkamrume, pepsene.

Paulusdi, “Teka tenena gum nesaladi, nun nong deiki ikin keca derirsenunge,” pepu upu

3 Uda yuk upu ton pepkusene. Nundi Allah er pel donup keca yuma tep, ‘Yuk nengdi mali pepsenung’ tenen, kange moupmepedi pel pio moupra donupe. Ada, yuk nengdi, “Angeda mali kunung kecada ake,” pepsetenge keca yumada tek sisi men kunupe. Mali kuptepepa, yuk neng epmengedi, ‘Mali kange doupmengedi, teka men tenepnung’ tenen, mali men kunupe. Akeca men kupedi, pio moupra dumsisipu kunupe. 4 Mali kuna pio gum dipapu, nunda Allah er amutara kupedi, er pel melimna neng kunupa cadi, yuk nesala yumadi, nun kupe keca yuma epsengedi, ‘Anengda telep nengpu’ tenen, kael kepkamenga tep, wareto kun keca neitamai do yuma, dumsisipu kunupe. Ikin kuserya peda, tamna gum, pio pe deipra pel tupa donupe.

Ikine kusere kecada ake. Kange dito-duto kuna cap, ikin kupserepa dipru pu jena cap, kange mun keca kuserepa, kange mun kange doupra kuna cap, 5 mali nengdi nun nong deiki balana di bongopra posenunge cap, ateng koupra wenemna ati dongosenunge cap, nesala weika di yu kuprepa deremdaramenge nge cap, pio ikin pel donupnge cap, lukunda mana gum di gam pio bungmepenge cap, jen gum kupserepa jen bulung bungmepenge cap, ayuma akapserya peda, nun pel men tamnupe.

6 Yuk neng yumadi, ‘Anengda telep nengpu kununge, tenepkamseng’ tenen, kunup kecada ake. Nun kange dipru neitamaida, mali kuna pio gum, dumsisipu kuna cap, ‘Deiyo ake’ tenen, moupra gekena cap, kael kemna cap kunupe. Tonda, ikin kuserenge do, mali kupsenunge do, akeca tep berbera yu kuna gum di, bouna di kuna cap, yuk nesala sun putana tep makuna cap kunupe. Tonda, Allah er Lek Sambala puto deiki kuna cap, mawa di kuna gum dinin, yuk nesala tep tek sisi bicau tenepra makuna cap kunupe. 7 Tonda, mok upu men penup dinin, pio tek sisingepu pena cap; Allah er puto kareserepa, adeiki di moupra pel dona cap, ange yuma kunupe. Ayumada jen nengdi, buru dana-dana tara jen talepra porbaramengtopu, mali kuna pio gum, dumsisipu kunupa deiki di, Allah er pel donupe.

8 Yuk nesaladi nun tep, kange deipra gispal dosenge taru pe, yuk nengdi nun tep, yu kuprepa mali upu pesenge taru peda, apel men tamnupe. Teleppu kunupe. Tonda, yuk nengdi nun tep, mali upu pepra luludisenge taru pe, nun kupe keca tep telep upu pesenge taru peda, Allah er pel men tamnupe. Nunda, inimna gum, katuai dipu nun pel dopra telep kunup dinin, yuk nengdi nun tep, “Gume, sunda mok nengpu kununge,” pesenunge.

9 Aneng yumadi nun tep kael kemsenung dinin, “Anengda, mambule gume, sunda tali neng pua,” pesenunge. Sundi nun tep, “Gume, anengda depkameng ja, atep sun dakwapye,” pesenung dinin, men potamsengepa tupa gam kunupada sundi ton diserume. Nun nong deikida, balana di weike bongopra posenung dinin, kapul men poptapseipa, men depmupka cadi, sun kaele, nun tupa gam kunupe.

10 Tonda, nundi, ‘Uo’ tenen, kange mun kange doupra engenup dinin, ange akapserya peda, ataru yuma nun dipruai kange deipra kunupe. Nunda, akeca-keca men kwapserepa, tali kankan kunge nesala kunup dinin, nun mambul pel donupa deiki di, yuk nesala weik ila mambul keca dopropmengedi, isomka utonun kununge. Uda, nunda tuai mutu neitamai tali akapre keca tep, bunga yala-yala yuma talepra men kunup dinin, tek sisada nun konum dopropmepu ngeda, ila mambul keca cadi, nun kangeda, isomka nesala utopu kunupe.

11 Uda, ne kayapu, nundi sun Korintus mutu kurum nesala tep, nun dipru weika di kareserepa, upu tali lupra katuai dipu penmasepe. Inipra men pesenupe. Ada, ‘Anesala cap dipru dukdongopra kikiman kutepe’ tenen, katuai dipu pepsenupe. 12 Nundi sun tep, telepe pena cap, dipru karena cap, bicau tenena cap weika di kusenup dinin, sun Korintus mutu kurum nesaladi nun tep, ange utopu men teneserume. Tonda, nun tep dipru kareprepa, bicau men teneserume. 13 Ange tep, nedi sun tep, ‘Ne nyapu utopu kununge,’ tenesenuna cadi, ne nyapu akwapnetupa, nedi ne nyapu sisa tep, pepteneya utopu, sun tep pepsene. “Nimidi yuk neng tep telep kupra karedaramengtopu, sun adipapu nun tep, ‘Dipru dukdongopra kikiman kunkamepe’ teneprumdi, kange deipra sun dipru kareserume. Telep ngeda, ange pua,” pepsene.

“Teka tenena nesaladi, teka tenena gum neng cap, kikiman dodana cap, pel tonpa dona cap men kunkamrume,” pepu upu

14 Ne kayapu, sun teka tenena nesaladi, nerapu do, nimi do, teka tenena gum nesala men dodankamrume. Tonda sun teka tenena nesala cap, teka tenena gum nesala cap, pel tonpa men donkamrume. Apepmasenada tali tep gume. Sun tenipetepso. Dumsisi kun nesala cap, pio mali kun nesala cap, sun kange dipru amsepu kurur do? Yuk-yuk kurur do? Ange utopu, kunungna cap, dirine cap kikiman kuna telep do? Gume, angeda men kupmanto.

15 Ange utopu, pio dumsisi ngebo Kristus cap, pio mali kurur ngebo Kain Jen Ngebo, tonda er si ton Belial cap, kikiman telep kupra kuretenge do? Gume, angeda men kupmanto. Angetopu, Yesus tep teka tenenge nesala cap, Yesus tep teka men tenenge nesala cap, sun kange dipru tonpua kurur do? Gume, ange peda men kupmanto. Atep sun teka tenerum nesala cap, teka tenena gum nesala cap kikiman dodana cap, pel tonpa dona cap meme. 16 Tonda, Allah er si eremna tep, ila mambul ati cap, tali keca isok si eremenge ati cap, kikiman utopu keca do? Gume. Nun kange dipru cap, nong capda, Allah er wengna ati utopu kunupe. Allahdi upepu.
‘Ne cap, sun cap kikiman kupedi, sun cap kikiman embankamnupe. Neda sun nai bo Allah kunkamne. Sunda, ne nyapu kunkamnenge.’ (Imamat 26:12)

Allahdi peipu upu pepsene. Tonda, Allah upu neitamai seki upu ton ake.
17 Allahdi upepu. “Ange tep nengeda, tali nesala, teka men tenenung nesala kankan kurumai tapra, yukai kepronkamrume. Amali kunge neng cap, sun cap kikiman wisipra kuna mali tep, sun yuk-yuk kunkamrume. Ne Allahdi pepsene.
Nedi sun tep, ‘Angeda mali keca cadi, talena meme,’ peamsisinge, tenpunge peda men talepra kuprumyopda, neda sun damai yana dopropsenedi kikiman kunkamepe. (Yesaya 52:11; Yeheskiel 20:34, 41)
18 Dopropsenedi, neda sun nai bo sisa kunkamsene. Sunda ne nyapu cap, ne ner nyapu cap kunkamnerume.
Neda akeca-keca yuma bisbisa kapra, deiki tara puto weik kune ngebodi pepsene,” ne Allahdi pepsene. (2 Samuel 7:8, 14)

Allahdi peipua, Samueldi sekeiamseu upuda, ne Paulusdi pepsene.