2Cor 7 | XteSC | STEP | Ne kayapu, Allahdi nun yuma tep, ‘Ukupkamsene,’ pepra, arup pepmasen upu pediramseupa, akapsera cadi, ware mali kun keca cap, mali tenena keca cap do yuma, nun nong mali kudiserenge cap, nun kange dipru mali kudiserenge cap, adipapu tamepedi, mengne nesalapu kunkamepe. Ada, ‘Nun nai bo Allahda, pio mambule’ tenen, er si eremna tep dumsisipu kunkamepe. Ange kunkamepa tep, ne Paulusdi pepsene.

2 Corinthians 7

1 Ne kayapu, Allahdi nun yuma tep, ‘Ukupkamsene,’ pepra, arup pepmasen upu pediramseupa, akapsera cadi, ware mali kun keca cap, mali tenena keca cap do yuma, nun nong mali kudiserenge cap, nun kange dipru mali kudiserenge cap, adipapu tamepedi, mengne nesalapu kunkamepe. Ada, ‘Nun nai bo Allahda, pio mambule’ tenen, ^{▼▼mambule – Ton kael nengdi sun Allah upu buku neitamaida, ‘mambul’ men sengnung dinin, ‘kware’ sengnunge. Aupu sektepetoda, ayatda ukupra pepsetue. ‘Nun nai Allahdi wenepserur’ tenen, kware kunupa cadi, dumsisipu kunkamepe.} er si eremna tep dumsisipu kunkamepe. Ange kunkamepa tep, ne Paulusdi pepsene.

Paulusdi, “Sun malinge tamrumdi, teleppu kunmaruma tep, ne kange deipne,” pepra lap pepu upu

2 Ne kayapu, sundi nun tep dipru karepserepa, bicau tenepseso. Nundi yuk nesala yuma tep, mali men kudiramupu. Tonda, nundi yuk nesala yuma tep, mok upu men peteremamupupa, sun mok upu teka men tenerami. Tonda, ‘Yuk neng sun keca upula doproptepe’ tenen, mawa di men peramupudi, upula men doramepu. Tonda, ikin keca yuk neng deiki men deriramepu. 3 ‘Nun kayapu, dipru karepseso,’ pepmasenada, ‘Sun Korintus nesalada mali neng kununge,’ pepra, ‘Sun tep mali upu pepkune’ tenena di, men pepmasene. Ange gume. Men di pepsisitopu, nundi sun tep pio bicau tenenupa cadi, ‘Korintus mutu neng sun makuna tep, pio kunkamepe. Tonda, sun melimna tep, nun dena peda telepe pua,’ tenesenupe.

4 Gume, ne Paulusdi sun tep, pio telep kange deipsisidi, tenimtona gum di, ‘Anesalada telep neng,’ tenesenune. Yuk mutu nesala tep, ‘Sun Korintus nesalada, pio telepe,’ pepra lap penune. Sun kumumya tep nengeda, tenepnedi, ne telep kange doupra kunune. Tonda ne dipru kwa dimnerume. Ikin keca kuserya neitamai peda, nedi sun tep, tenepnedi, pio telep kange doupra, pingpinga di kunune.

5 Angeda tali tep men pepsene. Gume, nun Makedonia tara yamepu taruda, ataru-ataru yuma dana-dana tara di ikin keca kwamseupa, kange mun kange doupra kuramepu. Ataru yuma neitamaida, mali nengda nun upu tep, yu kupupa upu sengdongona cap, pangdana cap kuramseipa, nun pe kange dipru neitamaida, ‘Uo, ware kupkamser do?’ tenen, kware kuramseu. Ataru yumada, tali kange doupra beipye peingna taru, metekanunpu men kwamseu. Ikinepu tupa kuramepu. 6 Kange mun kuramseu dinino, ikine kuramre nesala yuma tep, dipru kwa dipra melimre ngebo Allahdi melipseue. Ada, nun kabo Titusda, nun damai yaseua deiki di, Allahdi nun tep dipru kwa dipra melimamseu.

7 Dipru kwa dipra melipseue ngeda, ada Titusdi nun damai yaseua deiki di kupseue. Tonda, sundi Titus tep melipmemerumnge lap pepseupa, gekepmupka deiki di, nun ton dipru kwa dipseue. Titusdi ne tep upepneu. “Gume, sun Korintus mutu nesaladi kan Paulus tep, ‘Uo, er cap antaptepe’ tenen, putarepa, tenekenunge. Tonda, ‘Paulus ikin kuprepa, uo, ware kuptepya deiki di, Paulus meliptepe do?’ tenekenunge. Tonda, sun Korintus mutu nesaladi, ‘Mali kuramepupa, Paulusdi wenepseunge tep, dipru engepra kunupe,’ peipkei. Aupu yumada, Titusdi lap peipneu. Kange deipra kuramsi dinin, aupu yuma pepneua tep nengeda, sun Korintus nesala tep, ne kange deipsidi, pingpinga di kupsi.”

8 Uda, yuk upu ton pepkune. Nedi sun tep, wenemna surat menmenange sekeipsisi. Asurat epruma deiki di, mali kange doupra engeprumnge tep, ‘Uo, angeda men kupmatene’ tenen, mali kange doupsi dinin, ukutaruda ange tupa men tenenune. Ukuda ne kael kepsi. Ne surat deiki di, ke tarupu mali kange doupra engeprum dinin, amendada, ka di ton telep kupruma cadi, ukutaruda, ne kange deipne.

9 Ne kange deipmanada, ‘Sun mali kange doupra engepye’ tenena tep gum dinin, ‘Sun mali kange doupra engepya deiki di, sun mali kun keca yuma tapidi, ka tamupra teleppu kupye’ tenen, kange deipsene. Allahdi, ‘Ne nyapu mali kupmengepa, mambul kange doupkamenge,’ teneamseutopu, mambul kange doupra engepruma cadi, nundi asurat sekra pepsepu upu deiki di mali kupra men deipsepu.

10 Allahdi mambul kange kareserya deiki di, engenup dinin, ange deiki di mali kunup keca yuma tapmepedi, lyemna keca tep teka tenepmepepa, Allahdi lyemserure. Lyepseryopda, nun amenda taru, “Uo, ange men kupmatepe,” tenepra mali kange pio men dounupe. Allahdi wenemserya peda, amendada malinge tapmepedi, teleppu kupedi, gam kunkamepe. Dinino, sun tali kunge nesala, Allah teka tenena gum nesalada, sun mambul kange doupra engeramenganen, amenda taruda, sun dipru buluksakrepa denapu kununge.

11 Uda, sun Korintus nesala ton tenipetepso. Wenemna surat dokotepsepupa, Allahdi sun dipru neitamai pel dopupa, sunda mambul kange doupra engeprumnya deiki di kupseu ngeda telepe pua. Ada ake. Sundi ne tep, ‘Anengda, telep neng tenepkamser’ tenen, pio pe deipra upu peramnerumnge cap, tonda, ‘Mali kupseu keca gum kupra deiptepe’ tenen, pe deipra pel doramrumnge cap, tonda, ‘Uo, warya tep mali kun keca nun neitamai tupa kapser do?’ tenen, kwar daramrumnge cap, tonda, ‘Mali kun keca tapra, teleppu kunkamepe’ tenen, putana cap, ‘Mali kupserenge tapra, telep kupra betaipkamep’ tenena cap, tonda, mali kupserenge tep, “Dakwapye,” men penkamep dinin, malinge yuma tep ‘Upu bokeipmepedi, lepsikamepe’ tenena cap, uda ayuma tep nengeda, ne kangeda telepe pua.

Adeiyo yuma tep nengeda, sundi apel yuma doramruma deiki di, ‘Anengda, telep kun nesalapu kununge’ tenen, katuai kuprepa konum kael kepsepe.

12 Atep ne kayapu, ne surat sekeipsisi ngeda, ada mali kun ngebo tepapu men sekeipsisi. Ange utopu, amali kupu ngebodi, mali kupupa, erdi mali kupra deipu nesala tepapu men sekeipsisi. Ayuma gum dinin, Allahdi dinmaserpa, sun Korintus mutu nesaladi, ne cap, ne kikiman pel donup neng tep kange deipra dipru kareserepa, mambule teneserum ngeda, ‘Katuai kuprepa kael kepkameng’ tenen, asurat sekeipsisi. 13 Ange yuma tep nengeda, nun dipru kwa dipra melimserepa, kange deipra kunupe.

Angepu gum dinin, sun Korintus mutu nesaladi, sun kuramrumnya deiki di, nun kabo Titus er kange dipru kwa dipra melimamrume. Ada Titusdi, sun tep, ‘Mali tupa kunkameng do? Malinge tapra dumsisipu kunkamenge do?’ tenepu dinin, ukuda konum telep kupruma cadi, er kange deipra pingpinga di kuramupa, nun pedi ange epmupudi, kange deipmupu.

14 Uda, Titusdi sun damai kapul beu taruda, nedi sun tep, “Korintus nesalada pio telep kununge,” pepra kange lon upu pepsipa Titus gekepu. Titus cap kuramrum taru aupu pepsitopu, kuramrumpa epka cadi, nedi er tep pepsi upu tekpu kupka cadi, ne ali men dasi. Uda, nundi, sun Korintus mutu nesala tep, peramepu upu yuma, tek sisi upu kwamupa, perameputopu, nundi Titus er gekena tep, “Korintus nesalada pio telep kupra kununge,” pepra kange lon upu pepmepunge yuma, ange utopu kuramrumpa, konum katuai kupka tep, ange peda tek sisipu kurure.

15 Tonda, Titusdi sun cap kikiman kuramrum taru tep, kange di tenepredi, ‘E, sun Korintus nesalada, ne upu yuma moupra gekeramneidi, ‘Titus cap, er upu capda ila mambule’ tenen, kwar dangna deiki di moupra gekeramnei,’ teneserure. Ukupra tenesere dingeda, Titusdi sun Korintus nesala tep, weika di kange deipra dipru kareserure. 16 Telep kupra kuramruma cadi, nedi sun tep kange bongtona gum di, ‘Sun Korintus nesalada, tek sisi telep kunkamenge,’ tenesenune. Atep ne kange deipsene.