2Cor 8 | XteSC | STEP | Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Allah er kange dipru bicau tenepudi, sun Makedonia tara teka tenenge nesala, sun puto kemdina tep kareamu ngeda, ‘Kael kepkurum’ tenen, aupu ton pepkusene.

2 Corinthians 8

“Yuk nesala makuna tep, sun talerum keca bokra, weika di karena telepe,” pepu upu

1 Uda, Yesus teka tenepruma tep, nun weite-du utopu kurum nesalao, sun nimi pe, nerapu peda gekepneso. Allah er kange dipru bicau tenepudi, sun Makedonia tara teka tenenge nesala, sun puto kemdina tep kareamu ngeda, ‘Kael kepkurum’ tenen, aupu ton pepkusene. 2 Sun Makedonia tara nesalada, pio ikin weik kurami dinin, akeca-keca yuma pio men kwamupa, bunga yuma men taleami neitamai peda, ila di kange deipra pingpinga di kuramya cadi, yuk karen mutu nesala makuna tep, co bo weik bulupra karepi. 3 Nedi ton epsa cadi, ne tek pepsene. Sundi karepi ngeda, meteka di gume. Sun taleami keca akaputopu, sundi karepmantonge dinin, ange deiki dukdongoprap weika di ton cap men karepmantonge ton cap tapakrap karepi. Ukupra karepi ngeda, ada sun kange tenena deiki dipu karepi. Yuk nengdi, “Tapakra karepso,” pena deiki di gume.

4 Sun Makedonia nesaladi nun tep, pio pe deipra puto di moropsei. “Gume, Allah er teka tenepra dumsisi kunge nesala, sun akeca-keca putapre nesala makuna tep, nundi ton tapakra kareptepe. ‘Angeda pio mambula cadi, ukupkupe’ tenen, ila di putaserure,” pepra moropnei. 5 Nundi sun Makedonia tara nesala tep, ‘Ukupra kunkamenge,’ teneramuputopu men kupi. Gume. Sun Makedonia nesaladi, menmena taru sun pe kange dipru cap, sun pe nong cap dopra, ‘Allah er amutarapu kunkamep’ tenen, Allah tep karepi. Sun pe nong Allah tep karepi dingeda, amenda taru nun tep karepsei. Ange yuma ukupra kupi ngeda, Allahdi, ‘Amutu nengdi ukunkamenge,’ teneamutopu konum kupi.

6 Ange tep nengeda, Titusdi konum gonga keamupa, sun Korintus mutu nesala co bo bulupra karena tep keteneapmumpane, nundi Titus tep peipmepu. “Sun Korintus mutu nesalada, Allahdi bicaue tenepra melimserya deiki di, yuk nesala makuna tep, ‘Co bo bulupra karepkamepe’ tenen, konum keteneiami. Atep, kandi aupu pepra melimbemempa, sundi sun co bo bulunada gawal dakamenge,” peipmepu. 7 Ne kayapu, nun kaele. Ware telep kun keca do yuma, sun Korintus nesalada, yambula di pel men dorume. Sun teka tenerumnge cap, sun upu perumnge cap, sun kael keprumnge cap, sun mawa gum di tek sisipu kurumnge cap, sundi nun tep dipru kareserenge cap, weika di kurume. Nun kaele, ange yuma neitamai di, sunda pio pe deipra, telep kupra kuruma cadi, nun kaele, yuk nesala makuna tep nengeda, co bo karenkamrumnge peda, telep kupra kunkamrume. Yuk neng karena tep, Allahdi melimserya deiki di, dipru neitamai bicau tenenange kareserepa, yuk nesala tep, bokra karenupe.

8 Nedi sun tep, “Adipapu sun kankan kunge nesala makuna tep, adipapu co bo karepso,” pepra puto di, men pepmasi dinino, ne kange tenepman kecada ake. ‘Ada, sun yuk mutu nengdi, ‘Kankan nesala makunkamepe,’ tenen, ila di putaramupa, pio pe deipra pel telep kupra doramitopu, sun Korintus nesala peda, yuk neng tep, pio tek sisi kupra, bicau tenepra makupra karenkameng do, gum do?’ tenen, pepsene.

9 Angeda tali tep men pepsene. Deiyoda ake. Nun Deiyo Ngebo Yesusdi nun yuma tep, bicau teneamseudi, weika di meliamseutopu, ‘Nun peda utopu kunkamep’ tenen, pepsene. Ada, sun kaele, nun Deiyo Ngebo Yesus, er kange dipapu bicau teneamseudi, melipseua deiki di, telep kupra deipseue. Erda im deiki pio ila isomka ngebo kuramu dinin, nun makuna tep nengeda, tali kankan ngebo utopu daudi, tuai mutu kwerepu. Ukupra kuramunge peda, deiyo akapmare. Ada, er tali kankan ngebo utopu daudi, pel dopseua deiki di, ‘Sun tuai nesalada kankan kunge nesala utopu kunung dinin, nedi anesala lyepnyopda, sunda isomka ^{▼▼isomka – Paulusdi, ‘isomka’ pepkada, tali tuai bunga keca tep, men pepseu. Ada, Yesus lyepseupa, pio mambul keca, pio gam kuna deiyo keca karepseua tep ‘isomka utopu kurume’ pepu.} nesala utopu kunkamenge,’ tenepra kupseue.

10 Uda, yuk nesala makuna tep, co bo bulupra karenkamruma tep nengeda, ne kange tenepmanada pepkusene. Sundi telep kunkamrum ngeda ake. Orketeng tamun deikida, ‘Nundi kareptepe’ tenen, putana pe, tek sisi sun keca bokra karena peda, sun Korintus mutu kurum nesaladi, menmena gonga kuramrume. 11 Ukupra kuramruma cadi, ‘Co bo bulupra, kankan kunge nesala makupra karepkemepe,’ tenen, gonga keamrum pelda, ukutaruda gawal dangkamrume. Ada, sun akeca-keca talepra kurumtopu, karepkamrume. Ada, sun menmena taru, ‘Nun ton kareptepe’ tenen, putaramseupa, kange deipra keteneiamrum topu, ukutaru peda, gawal dangna tep, pio pe deipra kange deiprumdi, karepkamrumnge cap, ‘Ukunkamrume’ tenen, pepmasene.

12 Uda, nun kange dipru neitamaida, ‘Uo, akankan kunge neng makuna tep, akeca-keca bulupra kareptepe’ tenen, putana weike akapseryopda, Allah er kangeda, ‘Gume, sundi akapre keca talepra kuramengtopu, karena peda telepe. Bunga weik talenge nengdi, weika di karenkamenge. Angetopu meteka dipu talenge nengda, meteka dipu karenkamenge. Sun tek sisi men kapre keca men karepmanto cadi, angeda men nukra tenepkune,’ teneserure. Atep, ‘Sunda akapre keca talerum utopu, kankan kunge nesala makuna tep, bokra karepkamrume’ tenen, pepmasene.

13 Nundi sun tep putapsere ngeda, ‘Korintus mutu nengdi, yuk nesala tep weika di karepmengepa, ikin kupkamenge. Sun dopropkameng nesalada, kanampu kunkamenge. Korintus mutu nesala Ikin kuprea deiki di, sun dopropkameng nesalada, kange deipra kanampu kunkamenge,’ tenenge ngeda, tek sisi men putaserure. Ange gum dinin, nun tenepmapada, ake. ‘Sun cap, yuk neng cap karepdangedi, kikiman utopu teleppu kunkamenge’ tenen, putaserepa pepmasene.

14 Ange utopu, ukutaruda, sun Korintus mutu nesaladi akeca-keca weik talerum ngeda, bokra kareprumpa, sun yuk nesala akeca pio gum kupupa, ikin kuprepa kunung ngeda, kanam kupkamre. Ukuprum pangeda, ange utopu yuk taruda, sun yuk nesaladi akeca-keca weik talenkameng taruda, sun Korintus mutu nesala talerumnge gum kuprepa, sun yuk mutu nengdi ka tamupra sun tep melipra karepkamsenge. Sun cap, yuk mutu neng cap, ukupra karepdamum dingeda, sun amsepu denepra kunkamrume. 15 Aupu pepmanada, deiyo ton akapmare. Ada, Allah upu neitamai sekami upu ake.
‘Weika di bulupra kipu ngeboda, ila weik men kapupa, ton ngeda men tapu. Tonda, yambul bulupra kipu ngeboda, men sukupa, ton cap men putapu.’ (Keluaran 16:18)

“Allah upu sekaminge dopra konum pepmasene.” Paulusdi pepu.

Paulusdi Titus dopra Korintus mutu nesala peteremna tep, doproipua tep, pepu upu

16 Nedi sun tep bicau tenesenetopu, Allahdi Titus er dipru neitamai bicau tenena deiyonge dongopupa, er Titus peda sun Korintus mutu nesala tep bicau teneserure. Atep ngeda nedi Allah tep, “Telepe,” penune. 17 Nundi Titus tep, “Korintus mutu neng damai melimbenkurume,” pepra moropmupupa, erdi, “Telepe, ne kange deipra melimbenkamne,” pepu. Tonda, angepu gume. Er kange dipu, ‘Ne pingpinga di sun damai melimbenkamne,’ tenerura cadi, nun kaele, erdi sun tep ila di bicau teneserure.

18 Tonda, Titus cap sun damai kikiman yankamre ngeboda, erda Yesus er kai telep upu, nimi lyemna upu tep, pio telep kupra peteremrura cadi, Allah teka tenenge nesala mutu ban-ban yuma er tep, konum kael keamengedi, “Erda pio telep peteremna ngebo,” penunge. Er cap, Titus cap sun damai yankamrerunge. 19 Tonda, sun yuk mutu teka tenenung nesala yumadi angebo tep, “Gume. Nun bulupmupu co boda, sun karerbenkurum taruda, angebo cap kikiman benkamrume,” pepra wepra deipmemei. Uda, aco boda, nimi makuna tep karepkamep ngeda, ada, nun Deiyo Ngebo Yesus er gispal dona tep karepkamepe. Tonda, aco bo karepmepya deiki di, nundi, ‘Uo, akankan kunge nesala makuptepe’ tenen, kange deipseu ngeda katuai kuprepa, yuk neng ton kael keptenge.

20 Yuk nengdi, “Gume, nimi makuna co bo bulupi ngeda, karepmai taruda, sundi mali kupmai,” pepra, ‘Mali upu pepsenung’ tenen, sun Korintus mutu nesaladi bulupra karepkamserum co bo, kipmepedi karerbenkamep taruda, pio moupra karepkamepe. 21 Angeda tali men pepsene. Gume, Allah cap, nimi yuk mutu nesala capdi dinmasengdi, ‘Telep kunkameng do, mali do?’ tenen, moupra dinmasenga cadi, pio moupra tenepmepedi, telep kupra karenkamepe. Allah cap, yuk nesala cap, sun yumadi, ‘Aco bo bokra karena tep, telep kunada ake,’ teneramenga utopu, ‘Angepu kupkupe’ tenen, pe deipra pel telep kupra donmape. Ada amenda ware nesala do yuma, “Sunda mali kupmai,” ‘Men pepsetenge’ tenen, pepsene. Atep, ne cap, si sipepmanu neng cap, kikiman bepedi, aco bo karenkamepe.

22 Uda, sun co bo bokra karerbana tep, deiyo neng yankameng taruda, tenpu ngebo ton dokotepkamepe. Erda, pumun taru pel telep kupra doramupa, nundi er tep, ‘Angeboda tek sisi pe deipra, telep pel dorur ngebo’ tenen, kael kepmepu. Dinino, ukutaruda, erdi sun Korintus mutu nesala tep, ‘Sunda telep neng’ tenen, pio teka tenerura cadi, weika di ton cap pe deipra telep pel donkamsere.

23 Uda, Titus tep nengeda, erda, ne dipru ngebo. Er cap, ne cap, ‘Sun Korintus mutu nesala kan-kan pel donkamneme’ tenen, kikimanpu pel tupa donume. Uda, er cap kikiman yankameng neng yumada, Yesus tep teka teneramya tep, nun weite-du utopu kununge. Sunda, tali neng gume.

Anengdi pel telep kupra donunga deiki di, Kristus tep gispal dopra, er si eremnunge. Tonda, yuk-yuk mutu nesala, Allah teka tenenge nesaladi, nimi makuna co bo bongna tep, ‘Nun yuma men benmanto cadi, anengda nun si deiki di karepbenkamenge’ tenen, wepra deipi neng kununge. 24 Ange tep nengeda, ‘Allah teka tenenge nesala, ban-ban yumadi kael kepkameng’ tenen, sun damai yankameng neng tep, katuai di bicau tenepra makunkamrume. Ukuprum pangeda, nundi sun tep kange deipra, ‘Anengda pio telepe,’ tenesenupa deiyoda, katuai kuprepa, nimi yuma epra kael kepkamenge.