2Cor 9 | XteSC | STEP

2 Corinthians 9

1 – 2 Uda, ne kayapu, ne kaele. Sundi, ‘Gume, kankan kunge nesala makuna tep, nun ton co bo bulupra karepkamepe’ tenen, kange deipra keteneiprum ngeda, nedi Propinsi Makedonia tara nesala tep konum lap peramsi. Ukupra lap peramsi. “Gume, sun Propinsi Akaya tara nesalada, orketeng tamun di konum gonga kepra, ‘Nun adipapu co bo bulupra karepkamepe’ tenen, konum ketenepi. Sunda pio telep kununge,” pepra, sun tep kange lon upu, telep upu peramsi. Aupu peramsipane, sun Makedonia tara nesala gekeramidi, ‘Gume, sun Akaya tara nengdi, kange deipra karepkamenga cadi, nun peda, utopu kunkamepe,’ tenepidi ketenepi. Atep, sun Korintus nesaladi, gonga keprumnya deiki di, yuk mutu nesala gekepidi, sun peda ketenepmengedi, karenkamenge.

Ange tep nengeda, sun Korintus nesalada, Akaya tara neitam kurumdi, Allah teka tenenge nesala, sun kankan kunge nesala makuna tep, co bo bulupra karepkamep ngeda, konum kael kepruma cadi, weika di ton cap men penkusene. 3 Dinino, nedi, “Sun Korintus mutu nesalada, tek sisi co bo bulupra ketenepkamenge,” pepra, kange lon upu pepsisitopu, tek sisi keteneprumupa, nun dokotepkamep neng, sun damai amenda yankamenge, pepsene. Tonda, nundi sun tep telep upu peramupu ngeda, ‘Nong men kuprur’ tenen, ayankameng neng sun damai dokotepkamsene.

4 Uda, deiyo ton ake. Ada, Makedonia tara nesala cap, ne cap sun damai yantepepa, sun tek sisi men keteneprumdi, tali dempu kuprumyopda, neda yambul ali dangkamne dinin, sun Korintus mutu nengda, ila di ali dangkamrume. Ada, nedi, “Gume, sun Korintus nesalada, tek sisi ketenepkamenge,” pepsi ngeda, ‘Nong men kuprur,’ tenena tep pepsene.

5 ‘Ali kupserur’ tenen, nedi utenepsi. ‘Telep ngeda, nun weite-du utopu neng sun Korintus nesala damai dokotepmepepa, nimi makuna co bo kapul karepkameng taru, ketenemna pel tep melipmengopda, aco bo bulupra tek sisi ketenepkamenge,’ tenepsisi. Ada sundi, “Co bo weika di bulupra karepkamepe,” pepra pedina upu peamrumtopu, ‘Tek sisi ketenepkamenge’ tenen, aneng dopra sun damai dokotepkamsene. Ukupnepa, sun damai yana melipsengopda, amenda taru aco bo weik konum keteneipmaruma di, kange deipra karepkamrume. Kapul men yape taru, men keteneprumyopda, ‘Amenda taru puto di pepmepya deiki dipu karepsengepa, amenda taru dabal kange doupra karepnung,’ tenena tep, ne Paulusdi pepsene.

“Nimi makuna tep, weika di karena telepe,” pepu upu

6 Apepkusen upu deiki, mambul keca kael kepkuruma tep, pio tenenkamrume. Aupuda, ake. Ware ngebo do yuma, yambula di kouramre ngeboda, amenda taru yambula dipu kipkamre. Weika di kouramre ngeboda, amenda taru weika di kipkamre.

7 Aupu pepmasentopu, nimi yumada, sun dipruai neitamai di, ‘Ukupra karepkamne,’ tenepmenge utopu, yuk nesala melimna tep, bokra karenkamenge. Kange boktoprepa, ‘Karepkun do, gum do?’ tenena cap, yuk nengdi sun tep, “Sun adipapu karepso,” pepsenge nge cap deiki di karena gume. Sun kange deipra pingpinga di karenung nesala tep, Allahdi kange deriserura tep pepsene. 8 Tonda, Allah er kange dipapu bicau teneseredi, pio weika di melimserya deiki di, ataru-ataru yuma, sun akeca-keca yuma putaseretopu, ayala keca yuma kapkamsere. Tonda, Allahdi melimserepa, nun putapseretopu akeca-keca yuma kapseryopda, ware telep kun keca do yuma, pel weika di telep kupra donkamepe. 9 Allah upu neitamai sekinge ton akapmarepa, epra tenenkamrume. Aupuda ake.
‘Allah er mesum dipu karesere kecada, amutu-mutu kunge kankan kunge nesala tep, bokra karerure. Allah er mali kuna pio gum, pio dumsisi kuryada, oryankamre taru yuma pio akunkamre. Angeda men gum kupmanto.’ (Mazmur 112:9)

10 Ange tep aupu ton pepsene. Sun wa koun nesala yal keca yuma karerya deiyo ngeboda, Allahdi nun putasere kwaneng jen keca yuma kareserure. Angebo dipu, sun yal keca yuma kareserepa, sun yal keca weik kuprepa, men ekra derirum keca peda, weika di karenkamsere. Er dipapu, melimserepa, sun dumsisi kun keca pel domumpa, nong weik kunkamsere. 11 Allahdi ukupra melimserepa, ware keca do yuma, weika di karepseryopda, sundi ka tamupra yuk nesala makuna tep, bokra karenkamrume. Akeca yuma tep weika di karenkamserenge deiyoda ake. Ada, amenda go kapre taru yumada, ‘Sundi yuk neng makuna tep, bokra weika di karenkameng’ tenen, akeca-keca yuma karenkamsere. Sun Korintus mutu nesaladi, yuk neng tep bokra nun deiki deipsemumpa, yuk mutu dubena karepmepyopda, akeca doronkameng nesaladi Allah tep, “Nai, telepe,” pio penkamenge.

12 Nimi makuna tep, co bo bulupra karepkamrum ngeda, Allah tep teka tenenge nesala, kankan kunge nesala sun putan keca tep melipkamrum dinin, angepu gume. Tonda, akeca kareprum pangeda, me dinipredi diniselangamretopu, anesala weika di Allah tep, “Telepe,” penkamenge. 13 Nimi makuna tep apel doprumya deikida, yuk nengdi sun Korintus neng tep, ‘Gume, anengda, teleppu kununge’ tenen, katuai kael kepkamenge. Apel doprum pangeda, nimi weika di upenkamenge. “Sun Korintus nesalada, ‘Kristus er kai telep upu teka tenenupe,’ peramengtopu tek sisi aupupu talepra dombanunge. Tonda, sundi nun cap, yuk mutu nesala cap tep, sun keca weika di bokra karesenunge,” penkamenge. Ange tep nengeda, nimi weika di, nun nai bo Allah tep, “Telepe,” penkamenge.

14 Tonda, anesala yumadi, sun Korintus mutu nesala tep, Allah morosenge taru di, sun dipru kareserepa, Allah moronkamsenge. Allah morosenga deiki di upenkamenge, “Gume, Allah er kange dipapu Korintus nesala tep, bicau tenepudi meliamngada, meteka dipu gume. Allahdi sun tep weika di melimamupa, pio teleppu kununge,” pepra Allah moronkamsenge. 15 Ne Paulusdi aupu ton pepne, “Allah, kandi kareserum ngebo, ila mambul ngeboda, nun nimi peramep upu deiki dipapu telep kupra men lap peptepe. Er tep tenepmepedi, kan tep, ‘Nun nai Allah, kanda pio telepe,’ pepra kan si eremkenupe.” Ne Paulusdi pepne.