Abuku seku deiyo ngeboda, Yohanes kuramu. Yohanesda, Yesusdi wepra deiamu neng, sun 12 neng kan-kan ton kuramu. Yohanesdi, asurat cap, butene ton cap sekra, asurat weneri deiki er si deipu. Asuratda, butenenge sekra deipu. Tonda, Yohanesdi, Injil Yohanes cap, buku Wahyu cap sekra deipseue. Yohanesda, Asia tara neitamai peterep embaramudi, Efesus mutu ton embeua cadi, asuratda, Asia tara neitamai dinin, Efesus mutu kuramu taru di, sekra dokotepupa, Asia tara nesala dopra embaramidi, dirami.

Yohanesdi asurat seku taruda, Yesus er kai telep upu peterembana neng cap, tonda Allah upu yuma peteremna deiyo neng capdi, aupu dopra yuk mutu yuma peterep embarami. Ukurami taru neitamaida, sun embarami mutu nesaladi, apeteremna neng sun putan keca melipra karerami. Allah er tek sisi upu peteremna deiyo nengdi ange kuramitopu, sun mok upu peteremna neng peda utopu kurami. Ange tep nengeda, Yohanesdi, ‘Yesus teka tenenge nesalada, mok upu peteremna neng sun damai yangepa, mankau kange doupra, sun putan keca tep melipra karenung’ tenen, upu seku. Atep, Yohanesdi, “Peteremna nesala yuma sun damai yangepa, tali kange doupra, tali lupra gekena gume. Sun penge upu yumada, moupra gekerumudi, ‘Tek do, telel do’ tenen, kunupetenkamrume. Telep ngeda, gekenkamrume. Mok ngeda, gekena gume,” pepu.

2 John

Asurat gonga kemna tep, pepu upu

1Ne sun deiyo ngebodi, sun tep aupu seksene. Sunda, Allahdi anuamseupa, teka tenepra, Allah upu ati kikiman wengrum neng yuma pe, uda sun teka tenerum neng pe tep, aupu seksene. Neda, Allah er tek sisi upu talepra kunedi, bicau tenesenune. Tonda yuk mutu neng dinin, Allah pesere upu, er tek sisi upu tep, kange derinung neng yumadi, sun tep bicau tenenunge. 2Allah er tek sisi upu teka tenepra talemepepa, er upuda, nun dipru neitamai tup kuserure. Ukusere atep, er upu teka tenepra, pio talenapu kupepane, er upu nun dipruai pio kunkamsere. Sun tep bicau tenenada, nedipu gume.

Ange tep nengeda, sun tep bicau tenenada, ne pe, nesala ban-ban yuma, Allah upu teka tenepra talenung nesala yuma pe, nun yumadi sun tep bicau tenenupe. 3Nun telep kupra kupya deiki di, men melimserur dinin, Allah er kange dipu bicau teneseredi, tali melimserure. Ukuseredi nun kange mun keca cap, nun putaramserenge yuma cap, diserura tep, ange yuma putaseretopu, bicau tenepra melimserure. Ayuma ukupserya deiki di, nun cap, yuk neng cap, uda Allah er pe cap, mali kange douna gum di, telep kupra amsepu kunupe.

Apepman keca yumada, nun nai Allah cap, er Mi Sisa Yesus Kristus capdi pio kareserunge. Kareserengepa, dopropmepedi telep kupra dumsisikra kuna cap, bicau tenepra makudana capdi, kunkamepe. 4Yuk nengdi sun tep upepnei. “Nun nai Allahdi, ‘Ukunkamrume,’ pepseutopu, aneng yuma gum dinin, sun kan-kan neitamai di ton nesalada, Allah er tek sisi upu gekepra dumsisipu kununge,” pepnei. Upepneipa, gekepsa tep, ne kange pio telep deipsi.

5Ukuda, yuk upu ton pepkune. Sun teka tenerum nesala tep bicau tenesenune. “Ukunkamrume,” pepra sekusen upuda, ukupunge gume. Nun yuma teka tenepmupu taru di, aneitam taru yuma, aupu konum gekenupe. Aupuda ake. Nun yumadi bicau tenepra makudanapu kunkamepe pepne. 6Uda bicau tenepra makudanapu kunkamep pepman ngeda, ake. Wareto kuna do, gume. Ada, Allahdi, “Ukunkamrume,” peipseu upu yuma gekepra domembanapu kunkamepe. Yuk ton gume. Allahdi, “Ukunkamrume,” pesere upuda angepu kurure. Atep, sun teka teneprum taru di gekeramrumtopu, ukutaru tupa sun yumadi bicau tenepra makudanapu kunkamrume.

7Mok upu penung neng weike konum mutu-mutu yuma peterembanunge. ‘Sundi mok upu teka tenepmengedi, tali bisi domyankamsenge’ tenen, peterembanunge. Tonda anengdi, ‘Yesus Kristus nimi nong utopu kupra konum yaue’ tenen, teka men tenenunge. Atep aupu teka tenepra men peteremnunge. Aneng kuramenge utopu kunge neng yumada, sunda mok neng kununge. Ton, ‘Yesus Kristus cap, er kure keca yuma cap, bisiptepe’ tenen, kununge, pepne.

8Atep sun yuma kange moupkamrume. Sundi telep pel dadoramrumupane, Allahdi, ‘Menenga keca karepkamsene,’ tenepunge cap, kange deipra erepra deipseredi, im deiki telep keca karepkamserenge cap, ‘Gum kupserur’ tenen, sun yuma moupkamrume. Ada, ‘Allahdi tenemu keca yuma karepkamser’ tenen, pio mouprume, pepsene. 9Ware neng do, yuma, sundi, Yesus Kristus erdi peteremu upu tapra, erdi men peteremunge dinin, yuk tali upu dukdongopra peteremnung nesala yumada, Allah sun dipruai men kurure. Ange gum dingeda, ware neng do yuma, Kristus peteremu upupu talepra, domembanung nesala yumada, nun nai Allah cap, er Mi Sisa Yesus cap, sun dipruai kurunge, pepne.

10Ware neng do yuma, Kristus peteremu upu gum dinin, sun pedipapu tenenung keca talepra, sun damai peteremyangopda, aneng tep, “Telepe, nun ati kikiman bukrap, kwaneng jenkamepe,” pepra men namdonkamrume. Amok upu neng talepra, sun cap, sun pe ati men wengkamrume. 11Ada, amok upu peteremnung neng tep, “E, ne kabo telepe, kikiman bukuneme,” pepra, namdorur ngeboda, aupu pepra makupra kurya deiki di, er pedi ton, amok peteremna neng cap, amsepu mali pel dorunga tep, pepne.

12Uda nedi sun tep, upu weikanun ton seksetene dinino, kertas cap, sengna keca cap deiki di, sekra men pepkusene. Ange gume, neda, ‘Uo, ukupkamne,’ tenenunada, pepkune. Ada, ‘Sun cap, ne cap, nun kange pio deipdatepe’ tenen, ‘Uruna tep, ne yanyopda, meneng damai akuramtepedi, upu sisingdaramtepe,’ tenenune. ‘Ukuptepetoda, kange pio deipdatepe,’ tenenune. 13Atep acapu deipne. Allahdi anuamseupa, Allah teka tenepra, amutu kupedi, er upu gekenup neng, nundi sun yuma tep, telepe pepsepe. Nundi sun tep, ‘Nun weitapsilip utopu kununge,’ tenesenupe.

Telepe, ne Yohanesdi akonum pepne.