2Ki 1 | XteSC | STEP | Nimi deiyo ngebo Raja Ahab, Israel mutu neitamai talepra kuramu ngebo konum depu pangeda, sun Moab mutu nengdi, ‘Israel tara nesala popbisipkamep’ tenen, Israel yala nesala tep, bisbisa kapra doupra bei.

2 Kings 1

Nabi Eliadi nimi deiyo ngebo Raja Ahazia depu nge tep lap perbeu upu

1 Nimi deiyo ngebo Raja Ahab, Israel mutu neitamai talepra kuramu ngebo konum depu pangeda, sun Moab mutu nengdi, ‘Israel tara nesala popbisipkamep’ tenen, Israel yala nesala tep, bisbisa kapra doupra bei. 2 Tenpu tumida, nimi deiyo ngebo Ahab, yo punupu ngebo, Israel yala nesala talepra kuramu nimi deiyo ngebo Raja Ahaziada, er pe mutu Samaria mutu neitamaida, er kuramu ati, alau ati kunmaupa, akati ason co lupka cadi, er ason co cokrapupa, itara di saku. Saku dingeda, er asaka popu susu dilada, ila kange mun kupu. Ukupka tep, Raja Ahaziadi nimi wepra dokotepupa, sun amutu neitamai di si eremami isok, Bahal-Zebub, er si eremamami ati damai tep, asimbei. Ada, Filistin mutu neitamai dinin, Ekron mutu neitamai di, Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupkada, ‘Baal pepetepmengepa, ikin kuprepa, ‘Bal sisa tenepnung’ tenen, nundi Bahal sekmupke. Si yuk sekmepu dinino aisokda tenpua.} isok si sipepra, si eremami isok tep, “Uo nun nimi deiyo ngebo Raja Ahaziada, gam bukamre do, gum do?” pepra, asimbei. 3 Sun anengdi asimbei dinino, Allah Yahweh er im deiki pel don ngebo, malaikat dokotepupa, erdi nabi Elia, Tisbe mutu ngebo tep, er damai bena pepu. Malaikatdi pepu upuda, ake.

Nabi Elia kanda benkurume. Ada, Samaria mutu di, Ekron mutu asimbanmai neng damai benkurume. Ada, nimi deiyo ngebo Raja Ahazia, erda Samaria mutu talerur ngebodi wepra deipmarpa, yakanmange neng cap, antapdankamrume. Ukupmum dingeda, upepkamrume. “Sun Israel mutu neitamaida, tek sisi Allah ton men kurur do? ‘Allah men kurure,’ teneprumu deiki di, Ekron mutu nesaladi, si eremenge isok, er si Bahal-Zebub damai asimberum do? Ware keca deiyo tep, aisok damai berumdi, ‘Nun deiyo ngebo Raja Ahazia depkamre do, gum do?’ pepra, asimbenmarum do? 4 Tali isok tep, asimbenmaruma tep nengeda, ne Allah Yahwehdi, Raja Ahazia tep upepne. ‘Nimi deiyo ngebo kan Raja Ahaziada, aisokdi men kwetepkamkere. Kan damapmaremai di, men bukamrume. Aca dipapu, depnapu kupkamrume,’ pepkene. Sun asimbenmarum nengdi, sun deiyo ngebo Raja Ahazia tep upepbenkurume!” Allah Yahwehdi nabi Elia tep peipmaue. Apeipmaua upu konum upepu pangeda, Elia adipapu, ‘Aupu lap perbenkun’ tenen, beu.

5 Nabi Eliadi, aupu konum pepra, seng pepu pangeda, Raja Ahaziadi awepra deipmau neng yumada, tamupra sun nimi deiyo ngebo Raja damaipu bei. Ukupra beidi, Rajadi tamupra asipetepu. “Sunda ware deiyo tep menmena tamupra, ne damai yanmarum do?” pepra asipetepu. 6 Upepupa, awepra deipmau nengdi pepi. “Nimi tenpu ngebo ton, nun bisi banmapa, neitamai ton antapdapu. Tonda, angebo erdi upepseue. ‘Gume, sunda adipapu tamupkurume. Ukupmumdi, sun deiyo ngebo tep, perbenkurume. Ada Allah Yahwehdi upepsue, “Sun deiyo ngebo Raja Ahazia damai perbenkurum upuda ake.

Ada, sun Israel mutu neitamaida, Allah ton kurur do, gum do? ‘Allah men kurure,’ tenepmaruma deiki di, asimbenmarum do? Ekron mutu nesaladi, isok si Bahal-Zebub, er si eremenge isok damai sun benmarumdi, ‘Nun deiyo ngebo Raja gam kunkamre do, gum do?’ pepra, morona upu bena pena tep, Ekron mutu neitamai banmarumada, ware deiyo tep do? Tali isok tep mororbenmaruma tep nengeda, ne Allahdi pepsene. Sun deiyo ngebo Raja Ahazia, er pu jere ngeda, pio men kwetepkamre. Erda amapmaryai di, men bukamre. Kip men kunkamre. Raja Ahazia erda, amapmareyaipu depnapu kupkamre!” pepra, sun anengdi, Raja Ahazia tep lap pepi.

7 Upepipa, Raja Ahazia adipapu awepra deipmau neng yuma tep asipetepu, “Bisi neitamai di antapdanmarum ngebo, er urasinda, wareto kupmau do? Tonda, sun tenepmarumada, erda wareto ngebo kupmau do?” pepra, Raja Ahaziadi asipetepu. 8 Upepra asipetepupa, awepra deipmaupa, bisi neitamai di, nabi Elia antapmai nengdi tamupra pepi, “Angebo er opkal cap, er deiyo teng cap, kepkamunge yumada, bura tara gam kuramre keca, er bol kopromengedi, er opkal wipudi, keamu ngebodi pepmaseu,” pepi. Upepipa, Raja Ahaziadi pepu, “Uo, ne kaele, angeboda nabi Elia kurure. Erda Tisbe mutu ngebodi peipmaseu!” pepra, Raja Ahaziadi upepu.

9 Raja Ahaziadi upepu dingeda, kwar tenena gum di, ‘Angebo Elia tomopkun’ tenen, ila jen talena deiyo ngebo tenpu cap, er amutara jen talena neng, lima puluh (50) neng cap, wepra deipupa, bena Elia damai bei. Akware tenena gum ngebo cap, er jen talena neng cap, Elia tenpu mutu deiki bena bukmauai beidi, ajen talena deiyo ngebodi Elia epu. Epu dingeda upepu. “Wei, kanda Allah er pel dona ngebo, nabi kurum ngeboda, nun mutu ila nimi deiyo ngebo Raja Ahaziadi kan tep, ‘Adipapu ne jen talena neng cap, bisi bemumdi, ne damai akwerepkurume!’ peipmakere,” pepu. 10 Upepu dinin, Eliadi ajen talena deiyo ngebo tep tamupra pepu, “Teka neda Allah er pel don ngebo, nabi kunune. Ange kael kepkuruma tep nengeda, kan cap, kan nyapu cap yumada, ukutaru uku bu im deiki di kwerepredi, sun yuma jepra gawal dakusere,” pepu. Eliadi upeputopu, ataru dipapu uku buda, im deiki di kwerepudi, ajen talena deiyo ngebo cap, er nyapu lima puluh (50) jen talena neng yuma capda, uku bodi jepra gawal daku.

11 Ukupupa, kael kepi dinin, amenda taruda, Raja Ahaziadi yuk jen talena deiyo ngebo cap, er nyapu lima puluh (50) jen talena neng cap ton wepra deipu. Wepra deipupa, Elia er damai beidi upepi, “Uo, kanda Allah er pel don ngebo nabi, nun ila nimi deiyo ngebo Raja Ahaziadi, ‘Ukutaru adipapu, menmena ne damai kwerepkurume,’ pepkere,” puto di pepi. 12 Upepi pangeda, nabi Eliadi ajen talena deiyo ngebo tep, tamupra pepu, “Neda tek sisi Allah er pel don ngebo nabi kunune. Atep, kan cap, kan nyapu cap yumada, ange kael kepkuruma tep nengeda, ukutaru uku bu im deiki di kwerepredi, sun yuma jepra gawal dakusere,” pepu. Eliadi upeputopu, ataru dipapu, Allahdi uku bu dokotepupa, ukuda im deiki di kwerepudi, ajen talena deiyo ngebo cap, er nyapu lima puluh (50) jen talena neng yuma capda, uku bodi, adipapu jepra gawal daku.

13 Ukupu dinino, tenpu taru ton cap, ange utopu nimi deiyo ngebo Raja Ahaziadi, yuk jen talena deiyo ngebo cap, er nyapu lima puluh jen talena neng cap, wepra deipu. Ajen talena deiyo ngeboda, mutu dupai welerbanmauanen, Elia er ngokmauai beu dingeda, ajen talena deiyo ngebo er gutam tu dipdongoprapudi, ‘Nabi Eliadi ne tep bicau tenepnetue’ tenen, bena bouna di moropu. Ajen talena deiyo ngebodi upepu, “Teka ne kange di tenepne. Kandi nun tep kaukepsemdi, adipapu men poptapkusereme. Nun yumada, kan amutara pel dona melimna nengpu kunupe. Nabi Elia, kan Allah er pel domem ngebo nabi kurume! Ne cap ne nyapu cap, nun yuma tep, bicau tenepsememdi, nun ponada pio gume naio.

14 Ne kaele naio, arup taru ue butene deiki di, ila jen talena deiyo neng butene cap, sun nyapu jen talena neng seratus (100) neng yuma capda, uku bu im deiki di konum dokotepra popmamua cadi, ne tek sisi nabi Elia, kan tep moropkene. Nun tep pio bicau tenepseo. Nun ponada gume naio,” pepra, bouna di bena moropu. 15 Upepu pangeda, Allah Yahweh er pel don ngebo, malaikatdi Elia tep pepu, “Kan kwar dangna gume! Apenmakertopu gekepra, amutu dupai di tali lupra kwerepmemdi, Raja Ahazia damai benkurume.” Upepu pangeda, Elia adipapu kwerepupa, ajen talena deiyo ngebo, ue weneri deiki di yau ngebo cap, kikiman wisipra nimi deiyo ngebo Raja Ahazia er damai berei.

16 Wisipra berei dingeda, nabi Eliadi Raja Ahazia tep pepu. “Allah Yahwehdi kan tep pepkere, ‘Kanda nimi ukupkurume pena, upu lap pena tep pepmempa, isok si Bahal-Zebubda, Ekron mutu isok si pepra morona tep, wepra deipmempa bange ngeda, ware deiyo keca tep pepmum do? Israel mutu neitamaida, sun melimna ngebo Allah ton, men kurura tep, tali isok tep asimbenami do? Kandi pepmumpa, anengda Ekron mutu isok tep mororbenamya tep nengeda, kan pu jekere ngeda, pio men kwetepkamkere. Kan pu jenmarepa amapmaremai di men bukamrume. Acapu adipapu depnapu kupkamrume!” pepu.

17 Upeputopu, nimi deiyo ngebo Raja Ahaziada, Allah Yahwehdi nabi Elia tep peipmaupa, ange lap peiputopu, Ahaziada adipapu depu. Ange tep nengeda, Raja Ahazia erdi deipu nyapu sisa ton pio gume. Atep Ahazia, er kabo sisa Yorampu Raja yo punupra teku. Ange ukupu keteng tamunda, keteng tamun butene deiki di Yosafat er mi Yehoramdi, Yehuda mutu neitamai yuma tep, ila nimi deiyo ngebo kepra kuramu. 18 Nimi deiyo ngebo Raja Ahazia, erdi talepra kuramu taru di, yuk upu peramunge yuma cap, erdi pel doramunge capda, sun amutu nengdi sekra derirami buku neitamai seki. Abuku ^{▼▼buku – Abuku sida, Indonesia upu deiki di, ‘Sejara Kelakuan Semua Raja Israel’ penunge.} er sida, ‘Israel yala nesala yuma tep talepra ila nimi deiyo nengdi, pumun taru kuraminge’ pepi.