2Ki 10 | XteSC | STEP | Nimi deiyo ngebo Raja Ahabdi deipu nyapuda, denge pio weik tujuh puluh (70) neng deiamupa, Samaria mutu neitamai kurami. Ange tep nengeda, Yehudi sengna keca surat sekrapudi, Samaria mutu neng tep dokotepu. Ada, amutu neitamai taleamidi, ‘Angeda ukupkamrume, angeda men kupkamrume,” pepra upu karena deiyo neng cap, Samaria mutu neitamai talepra deiyo-deiyo neng, sundi mambul upu perami neng cap, tonda Ahabdi deipu midi deiamu nyapu kalengami neng cap tep, asurat sekra dokotepu. Asurat neitamai di sekra deipu upuda ake.

2 Kings 10

Raja Ahabdi deipupa, dadeipdanen barami nesala yumada, Yehudi popu upu

1 Nimi deiyo ngebo Raja Ahabdi deipu nyapuda, denge pio weik tujuh puluh (70) neng deiamupa, Samaria mutu neitamai kurami. Ange tep nengeda, Yehudi sengna keca surat sekrapudi, Samaria mutu neng tep dokotepu. Ada, amutu neitamai taleamidi, ‘Angeda ukupkamrume, angeda men kupkamrume,” pepra upu karena deiyo neng cap, Samaria mutu neitamai talepra deiyo-deiyo neng, sundi mambul upu perami neng cap, tonda Ahabdi deipu midi deiamu nyapu kalengami neng cap tep, asurat sekra dokotepu. Asurat neitamai di sekra deipu upuda ake.

2 Sunda, Ahabdi deiamu nyapu yumada, sunda moupra kalengna deiyo neng kuruma cadi, Ahab erdi yu neng tep mar podarbana keca yala-yala yumada, kereta kuda cap, kuda bisam cap, nimi pon jen cap, lyom parang ya cap, sun damai akapmare. Tonda, ila lyom gel deiki deipra doprumdi, ongopgenepra wiamum gel beilya neitamaida, sun ati weik doramrumdi, yu nengdi tali lupra men wekmantoi kurume. Atep nengeda, asekra deipman lap pena upu dopropmumnyopda, ukupkurume. 3 Asurat sun adipapu eprumu dingeda, Ahabdi deiamu nyapu weik akunung dinin, sun kankandi, tenpu pio telep ngebo ton wepra deipkamrume. Sundi wepra deipmum pio telep kupra kure mida, er nai bo pununa tep, nimi deiyo ngebo Raja kepra deipkurume. Ukupmum dingeda, er melimna tep, sun pio pe deipra pirinkamrume. Ada, er nai bo Raja Ahabdi pel doramunge cap, er nyapsilip dakuramenge nesala yuma cap, ‘Gum kupbenung’ tenen, puto di pe deipra piripetepkamrume.

4 Upepu dinin, sun Samaria mutu neitamai nimi deiyo talepra kurami neng yumada, kware pio weik kupupa, sundi men kupmanto keca kunmai. Ukunmaipa sundi pepi, “Uo, nimi deiyo ngebo Raja Yoram cap, Raja Ahab capda, er Yehu tep pio men bisipmanto kuramrei. Atep nun peda, ware kuptepya guma! Yehudi pere upu, men yaniptepe! 5 Ange tep nengeda, amutu neitamai, ila deiki tara nimi deiyo kepra taleami neng cap, akati arum tep, upu bongdina deiyo neng cap, Raja kuramu ati kalengna deiyo neng cap, tonda amutu kuramidi, Ahab erdi deiamu nyapu kalengami neng cap, sun yumadi aupu sekra Yehu tep dokotepi. “Naio, nunda kan amutara tali pel melipra dona neng utopu kunupe. Kanda Yehu nun tep, ‘Ukupso,’ pepseremtopu, nundi angepu kupkamape,” pepi. Dinino, nundi nimi deiyo ngebo Raja kemna tep nengeda, tenpu ngebo ton wepra, men erepra deipkamape. Telep ngeda, kan pedi, ‘Ange telepe,’ tenepmemtopu, angepu kupkamrume. Nunda tali gekenapu kupkamepe,” pepi.

6 Angepu pepya tep nengeda, Yehudi ton cap sengna keca surat ton sekra, sun damai kange di ue butenenge dokotepu. Asurat neitamaida, aupu peipu.

“Sunda ne tara kepkumumdi, nedi, ‘Angeda kupkurume, angeda pio men kupkurume,’ pepra, deipne upu tep, gekenkameng neng tek sisi kupkurum dingeda, ange adipapu ukupkurume. Ada, Ahabdi deiamu nyapu yumada, popnapu kupkurume. Tonda, atumi akunmap keteng utopu, alukunda damapmamumnya, berekyopda, ambutumi aketeng utopu tarupu, sun Ahabdi deiamu nyapu yumada, sun giso yumada sektaprumudi, doupra Yizreel mutupu duyankamanerume,” pepu.

Uda, ataruda, Ahab erdi deiamu nyapu, sun denge weik tujuh puluh nengda, Samaria mutu nimi deiyo-deiyo nengdi kalengami. Ada, sun 70 nyapu deiami taru di dipra, sun nena keteng tamun yuma, adeiyo neng dipapu, anyapu yuma kalengamidi, peirami.

7 Dinino, sun amutu neitamai nimi deiyo-deiyo neng yuma cap, ila-ila neng cap, tonda anyapu kalengna deiyo neng cap, sun yumadi, Yehu erdi sekra deipmau surat, ue butenenge dopropidi epyopda, konuma, Yehudi, “Ange kupkamrume,” pepra deipu upupu, ange yuma konum kupi dingeda, sun tujuh puluh (70) nyapu, Ahabdi deiamu nyapu poptapidi, sun giso yumada seki. Ukupi dingeda, agiso tujuh puluh yumada, alen utopu keca er si keranjang di kiprapidi, Yehu Yizreel mutu kuramngai dokotepi.

8 Akeranjang yuma Yizreel mutu yana deipi pangeda, Yehu tara nengdi ange epidi, Yehu tep bena lap pepi. “Naio, Ahabdi deiamu nyapu, sun giso sektaprapidi, kerangjang pumbon kipra deipmang ngeda, konum akapmare,” pepra lap pepipa, Yehu gekepudi pepu. “Uda akonuma, Ahabdi deiamu nyapu, sun sektapi giso yumada, doupra butene kepra bokrumudi, amutu akati arum wengna tep, ila bisi buplan damai ketenepra deipkurume. Acapu deipra mapmapya berekyopda, yuk upu ton pepkamasene,” pepu. 9 Atumi ipna berengyan taru, Yehu adipapu akati arum bisi buplan damai yana tengyau. Tengyau dingeda, sun ayana bulupra wekmai nesala yuma tep pepu. “Nimi deiyo ngebo Raja Yoramda, nedi upu gonga kepra talepsidi popsi. Angeda, sun yuma mali men kuprume. Dinino, Raja Ahabdi deiamu nyapu yuma, sundi yuk neng sun giso sektaprapidi, acei deipmai ngeda, aneng yuma, nedi men popsi.

10 Dinino, ange tek sisi pepsene. Sun agekenmarum nesala yumadi kael kepkurume. Ada, Allah Yahwehdi deipu ngebo, nimi deiyo ngebo Raja Ahab tep, pumun taru nabi Elia deiki di, ‘Ukupkamre,’ pepra lap peiamu upu ton, men gum kupmanto kurure. Allah Yahwehdi peiamu upu tek sisi nong konum kupmar adano. Allah Yahwehdi, nabi Elia deiki di, ‘Amenda taru Ahab tep nengeda, ila di wenepnedi, er tara neng yuma, gum kupra deipkamne ja,’ peiamu ngeda, tali men peptamu. Ukuamunge yumada, Allah Yahwehdi ange yuma tep, nong konum kupmar adano.” Yehudi pepu. 11 Ange yuma konum kupu dingeda, Yehudi peipupa, er jen talena nengdi, Yizreel mutu kurami neng, ada Ahab er yuk nyapsilip yuma cap, erdi deipnepa, deipgerekdanen barami neng cap, yuma popi. Tonda, Ahab er pel melipra doramidi, er tara deiyo-deiyo neng cap, er kayapu neng sisa cap, er pel don neng, sun Siria mutu imam-imam neng cap yumada, tenpu ngebo peda ton men tapu. Aneng yuma poptapnapu kupipa, Raja Ahab er nyapsilip nesala yumada, gawal dakra, gum kupra deipi.

Raja Yehudi, Ahazia er kayapu neng yuma popu upu

12 Yehu Yizreel mutu di tapra, utara apu tara, Samaria mutu beu taru bisi neitamaida, mutu si tep Bet-Eked perami. Sun Ibrani upu deiki di ada, ‘Domba bisam peina neng kun mutu,’ tenena tep, upepra asi perami mutu beu. 13 Yehudi amutu beu taruda, er adipapu Raja Ahazia, ada Yehuda mutu neitamai Raja kepra taleamu ngebo, er yala neng ton antaprei. Antapidi, Yehu adipapu asipetepu, “Sunda ware nengdi deiamseipa kurum do?” pepra asipetepu. Sun anengdi tamupra pepi, “Nunda ila nyapsilip, Raja Ahazia er yala nesala kunupe. Atep, nunda Yizreel mutu neitamai kuredi, nimi deiyo ner Ratu Izebel cap, Raja Ahazia capdi deiamrei nyapu tep bisi banmape. ‘Raja Ahab er nyapu cap, er ner Izebel cap tep, antapkamep’ tenen, embankamepa tepa,” pepi.

14 Upepipa, Yehu gekepudi, er melimna neng tep, “Sun anesala yumada, pona gum dipapu, gam kepman tomopso!” pepu. Upepupa, sun aneng adipapu, Ahab tara neng bisi banmai neng yuma tomopi. Tomopi dingeda, adipapu Bet-Eket mutu neitamai bena popi. Sun popyaida, amutu nengdi, me gelal seproprepa, ‘Me gwepra jenkamep’ tenen, tu pumbon paliamipa, tu pumbon di me yakaramudi mokon deiamngai bena popi. Apopi nesala yumada, denge pio weik, empat puluh dua (42) neng popi. Sun aneng yumada, tenpu ngebo peda, ton tapipa, gam men kupi. Yuma gawal dakra poptapi.

Ahab er kayapu nengdi deiami nyapu yumada popi upu

15 Yehudi amutu tapra tupa bisi banmau. Abanmau taru bisi neitamaida, tenpu ngebo ton, ada nimi si Rekhab, erdi deipu mi Yonadabdi, ‘Yehu dirbenkamne,’ tenepudi, abisi neitamaipu banmaupa, bisi neitamai di antapdarei. Ukuprei dingeda, Yehudi Yonadab tep, “Telepe,” pepudi aupu ton pepu. “Nunda kange tenpu doupkunem do, gum do? Nedi kan tep, ‘Angebo cap telep kupra kikiman kunkamne, pio men tapkamne,’ tenepkenetopu, kan peda ne tep utopu tenenerum do, gum do?” Upepupa, Yonadabdi tamupra Yehu tep, “Teka, kandi tenenerumtopu, nedi kan tep tenekenuna cadi, nun butene kange tenpu kunume,” pepu. Upepupa, Yehudi, “Atep nengeda, nun burupu talepdankuneme,” pepupa, Yonadabdi er buru bepekra Yehu karepu taruda, adipapu sun buru talepdarei. Tonda Yehudi Yonadab tep naprapudi, Yonadab erdi, Yehu er kereta kuda pumbon welepudi, sun kikiman berei. 16 Uda Yehu di pepu, “Yonadab kanda ne melipnememdi dimempa, ne Allah Yahweh tep, ne kange pio deipnedi, kupkun keca epkureme,” pepu. Upepudi Yehudi Yonadab doupra, er kereta pumbon dongopra, sun kikiman Samaria mutu berei.

17 Bisi banmareiyanen, amenda taru Samaria mutu konum berei dingeda, Yehudi konum deamu ngebo Raja Ahab, erdi deiamupa, dadeipdanen, barami nengdi deipmai nyapu, Ahab tara neng yuma popu. Tenpu ngebo peda, ton pio men tapu. Ange ukupunge yumada, Allah Yahwehdi konum pepra deipupa, nabi Elia gekepudi, erdi, ‘Ukupkamre,’ konum pepra deiputopu, kupu.

Yehudi, Bahal isok si eremna deiyo neng, imam-imam Bahal neng yuma tep, popu upu

18 Yehudi Samaria mutu neitamai kurami nesala yuma tep, “Bulupkurume,” pepupa, bupra weki pangeda, upepu, “Raja Ahab erda, Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupka deiyoda, ‘Baal pepetepmengepa, walwaldi bal sisa tenepnung’ tenen, nundi Bahal sekmupke. Si yuk sekmepu dinino aisokda tenpua.} isok si eremna tep nengeda, yambula dipapu, kange deipra eremamu. Dinino, ne Yehu puda, pio kange deipra, Bahal isok sida, ila puto di eremkamne. 19 Ange tep nengeda, Bahal isok er si eremne nabi neng cap, tali dakunge nesala dinin, Bahal isok er si eremenge neng cap, Bahal si eremna tep, er imam-imam neng cap yumada, adipapu bulupra wekununge. Tenpu ngebo peda ton men tapkamrume. Ne Yehudi Bahal isok si eremne keca, pio weika di popra, uku dongopkamne. Angeda, sundi epkamrume. Akupkamnai men yankamare ngeboda, ikin keca, er nong deiki deipra popnepa, depkamre. Dinino, Yehudi aupu pepka yumada, talipu pepu. Tek sisi er dipru neitamai tenepu ngeda, ‘Aisok Bahal, er si eremenge nesala yumada, poptapnedi gawal dakamne,’ teneramudi aupuda, tali peptapudi, anesala tep napropu.

20 Ukupu dingeda, Yehudi, “Uda, Bahal isok, er si eremkamnupa cadi, ‘Angeda kunkamrume, angeda pio men kunkamrume,’ penange karepu. Ada tenpu ila mambul tumi deiki di, Bahal er si kikiman eremkamepe, atep keteneipkamarume! Ukupmumpa, nimi yumadi, ‘Atumida ake’ tenen, ketenepra deipkamenge,” pepu. Yehudi pepra deiputopu kupi. 21 Tonda, Yehudi upu peipupa, er melimna nengdi, sun Israel yala nesala kurami mutu-mutu yuma tep, ‘Atumi deiki di yankurume. Ataruda, Bahal isok si eremna tep, sun yuma bupra yamumdi, er si eremkamepe,” pepra lap perbei.

Upepya tep, ataruda tenpu ngebo peda pio tamna gume. Bahal isok si eremami nesala yumada, yanapidi Bahal isok si eremna tep upu wengne taruda, wengnapu kunmaidi, Bahal isok sipu eremna ati uarsin damai tara di dipra, bura tara yumada, dek pepnapu kupu. 22 Tonda, Yehudi pepupa, awengnai kenengna tep, “Opkal wipkurume,” pepra deipupa, opkal ketenemna deiyo ngebodi kupu. Konum keteneipupa, Yehudi angebo tep, “Ukupkurume,” pepra deiputopu, opkal ketenemna deiyo ngebodi, Bahal isok si eremna tep gekeryakanmai neng yuma tep, aopkal karepupa, sun yumadi aopkalpu kenekrapidi, Bahal si eremna ati wengmai.

23 Wekmai pangeda, Yehu cap, Rekhab er mi Yonadab cap, Bahal isok si eremna tep ketenepra deiami ati wekrei. Wekreidi, Yehudi akati neitamai kunmai nesala yuma tep pepu, “Uda ne kayapu, moupra dipetepmumnyoda awekmarumaida, isok Bahal er si eremna nengpu aceida kupkurume. Sunpu akati wengkurume. Tonda acei neitamaida, Allah Yahweh er si eremna neng ton pio men wektenge. Isok Bahal er si eremrum nengpu akati wengna telepe,” pepu. 24 Upepka tep nengeda, Bahal isok si eremami nengdi, ‘Uda, nun nai Bahal tep, gam keca yala-yala yuma, popmepedi, er gispal dona tep, uku dongopkamepe. Tonda, er gispal dona tep, telep keca ton tali karenkamepe’ tenen, keteneipi.

Uda, Bahal si eremna neng, akati neitamai kapul men wekmai taruda, Yehudi er jen talena neng, ‘Akati di tapra, anengdi bura saka sepdaro benung cadi, ajen nengdi akati kalengkameng’ tenen, delapan puluh (80) kalengna neng dopra, akati bura tara dana-dana yuma ongopgenepra deipu. Ukupudi, Yehu adipapu peipu. “Sun yuma gekepneso! Sundi tapmumpa, akati neitamai di, isok Bahal si eremenge neng, sepra bendopmengopda, sun pununa tep nengeda, nedi tamupra sun akalekmarum jen nengpu poptapkamasene. Atep, moupra kalekamarume,” pepu.

25 Upeipupa, konum ketenepya cadi, Yehudi, akati wekrapudi, menmena konum agam keca ton popra uku dongopu pangeda, er adipapu kange di ton cap gupra bura tara yaudi, er jen talena neng cap, er amutara pel dona tep kalengna neng cap tep pepu, “Ukuda, sun adipapu akati wekmumdi, Bahal isok si eremnung nesala yumada, popnapu kuprume. Tenpu ngebo peda ton tapmumpa, men benkamnunge!” pepu. Upepka tep, sun jen neng cap, er pel dona tep deiyo neng cap, sun kalengna neng cap, yu weik lyom parang ya doupidi, akati wekra acei neitamaipu, sun Bahal si eremang neng yuma, poptapnapu kupi. Yuma popra seng pepkopda, Yehu er jen nengdi sun apoptamangu nesala, sun gemna yumada dopra, akati pumbon di tapra bura tara gipra deipra tapu. 26 Ukupi dingeda, Yehu er melimna nengdi, isok Bahal er si eremna ati pumbon dinin, pio neitamai kwamu ati wekrapidi, Bahal si eremna tep, ila lyom gat keca patungda, doupra, bura tara dubeidi uku dongopi.

27 Bahal si eremami keca, er si patung cap, Bahal si eremna tep domi ati cap yumada, Yehu er jen talen neng cap, er kalengna neng capdi, urupra tapidi, gum kupra deipi. Ukupi dingeda, Bahal isok si eremamyaida, deibar damai utopu kupra deipi. Ataru di dipra ukutaru peda, akati kwamngaida, nimidi deibar banunge. Pio mali mutu kupu. 28 Yehudi, ange yuma kupka deiki di, konuma sun Israel yala nesaladi, pumun taru isok Bahal er si eremaminge yumada, gum kupra seng pepra deipu. Tenpunge peda, tupa men kurure. 29 Dinino, Yehudi, sapi bisam mi urasin utopu petupra deiami patungda, gum kupra men deipu. Angeda, mutu si Betel cap, Dan mutu cap kwamu. Aisok patungda, pumun taru tenpu ngebo, er si Nebat erdi deipu mi Yerobeamdi, gonga keprapudi, mali kuramnga deiki di, Israel nesala tep, mali kupra deriramupa, sundi abisam mi urasin utopu, patung petupra deipidi, ‘Nun nai ake’ tenen, apatung epra, isok si eremami. Yehudi amali keca yumada, gum kupra deipmatu dinin, ange men kupu.

30 Ange tenpu men kuramu dipunen, Allah Yahwehdi Yehu tep pepu, “Kanda konum telep kupmume. Ada, ne damai kupmum ngeda, epkenedi, ‘Er pio telepe,’ tenepkene. Deiyoda, Yehu kandi Raja Ahab er nyapsilip yumada, nedi teneamsitopu, konum poptamumdi gawal dakmumyopda, er cap, er yala neng yuma cap, konum gum kupmange. Ange tep nengeda, kandi deipmempa, dadeipdanen bankameng neng, kan nyapu sisada, Israel tara nesala tep, nimi deiyo Raja kepmengedi, upu penkamenge. Ukupmengedi, nimi deiyo Raja kemna tep, bungna pio telep ngongne keca, er si tahkta deiki bukmengedi, Israel nesala talenkamenge. Ukupbaramenganen, kandi deipmempa, dadeipdanen, bankameng nyapuda, sun dumbare nengdi deipmengepa, dadeipdanen bankameng nengdi deipkameng nyapu dumbare nengda, akeca deiki bukmengedi Raja kepkamenge,” pepu.

31 Allahdi Yehu tep, “Ange kupkamre,” pepra deipu dinino, Yehu erda tupa mali keca weik kupbaramu. Ada, Allah Yahwehdi, “Angeda kunkamrume, angeda pio men kunkamrume,” pepra deipi ngeda, pio moupra men taleamudi, ange yuma men dombaramu. Pumun taru kuramu ngebo, Raja Yerobeamdi, gonga kepudi, mali weik kupbaramnga deiki di, Israel tara nesala mali kweipu. Ukupka cadi, sun Israel yala nesaladi, er mali kuramnge diramidi, ‘E, nun deiyo ngebo Raja mali kuretopu, angepu talepra kunkamepe,’ teneramidi, mali weik kurami. Amali ngeda, Yehu peda utopu mali kupbaramu. Ange mali kun kecada, Yehudi men tapka cadi, adeiki di mali tupa kuramu.

Yehu depu upu

32 Ataru neitamaida, Allah Yahwehdi gonga kepra, Israel nesala sun kurami mutu neitamai tep, yambul kupra deipbaramu. Allahdi go karepka cadi, Siria mutu taleamu deiyo ngebo, Raja Hazael, erdi Israel mutu tara nesala ton, popbisipudi, sun tu wiliprapudi, dalupra dopropu. 33 Raja Hazaeldi dopropu mutuda ake. Tenpu ngeda, Yordan me goupra, ortara keteng yakan tara di dipdongopra, Gilead mutu cap, Gad yala nesala kurami mutu cap, Ruben yala nesala kurami mutu cap, Mansye yala nesala kurami mutu cap yumada, bisbisa kapudi, amutu yuma dalupra dopropu. Ton ngeda, ati arum si, Aroer mutu damai di dipdongopra iknapi dam Arnon me popra embaramu tara, aneitamai yuma ton, bisbisa kaprapudi, atu ton dalupra dopropu. Angeda, Israel nesala sun mutuda Gilead tara dinin, Basan mutu peda tamangdona pua. 34 Nimi deiyo ngebo Raja Yehu erdi talepra kuramu taru di, yuk upu peramunge yuma cap, erdi pel doramunge capda, sun amutu nengdi sekra derirami buku neitamai seki. Abuku ^{▼▼buku – Abuku sida, Indonesia upu deiki di, ‘Sejara Kelakuan Semua Raja Israel’ penunge.} Er sida, ‘Israel yala nesala sundi talepra ila nimi deiyo neng, Raja-Rajadi, pumun taru kuraminge,’ pepra, seki ngeda, ‘Sejara Raja-Raja Israel neng kuraminge,’ pepra sekeipi.

35 Yehu keteng tamun weik dakuramnganen, konum depu pangeda, er peina tep Samaria mutupu bena peipi. Konum depupa, tu palipi pangeda, er yo pununa tep nengeda, er mi Yoahaspu Israel mutu neitamai nimi deiyo Raja ngebo kepra deipipa, er dipapu Israel tara taleamudi Raja keamu. 36 Yehu erda, Israel mutu neitamai taleamudi, Raja kuramudi upu peramu keteng tamunda, denge weik, dua puluh delapan (28) tahun deiki di upu peramu.