2Ki 11 | XteSC | STEP | Ataruda, Raja Ahazia, Yehuda tara taleamu ngebo depupa, er nin sisa, er si Atalya konum gekepudi kael kepu. Kael kepu dingeda, aner Atalyadi peipupa, er melimna nengdi, Atalya er tara nesala cap, er nyapsilip cap, Raja Ahasiadi deipupa, deiami nesala yuma cap, gonga kepra popi.

2 Kings 11

Nimi deiyo ner, Ratu Atalyadi Yehuda mutu taleamu upu

1 Ataruda, Raja Ahazia, Yehuda tara taleamu ngebo depupa, er nin sisa, er si Atalya konum gekepudi kael kepu. Kael kepu dingeda, aner Atalyadi peipupa, er melimna nengdi, Atalya er tara nesala cap, er nyapsilip cap, Raja Ahasiadi deipupa, deiami nesala yuma cap, gonga kepra popi. 2 Dinino, nimi deiyo ngebo Raja Ahazia, er mal ner, er si Yoseba, erda Raja Yoram er ner mi kuramu. Atep, aner Yosebadi, er dubo Raja Ahazia, erdi ukupu deipu milo mi, er si Yoas dopropudi iniprapu. Ada, yuk neng tep, upu pena gum deiki di, dim pepra Raja Ahazia er nyapu kuramya neitamai di dopropu. Deiyoda, Ratu Atalyadi peipupa, nimi yuk nengdi, ‘Raja Ahazia, erdi deiamu nyapu yuma popra, gawal dakamepe’ tenen, konum keteneipya tepa. Cadi, aner Yosebadi, ametek mi Yoas damai dubena lyeprapudi, ami cap, ami kalengna tep melimna ner tenpu cap doupra, er pe ati pumbon dinin, tenpu man ati pumbon inipra dongopu. Ukupka tep nengeda, Atalya er melimna nengdi, ametek mi Yoas men poptapi. Amenda taruda, Yosebadi, ami doprapudi, Allah er si eremna ati dinin, akati pumbon inipra dongopupa, akati pumbonpu, keteng tamun denge weik, enam tahun deiki di dakuramu. Ataru neitamai yumada, Ratu Atalya, Israel tara nesala kurami mutu taleamudi, upu peramu.

3 Ukupra inipya tep, Yosebadi Yoas er mi tep, keteng tamunda, enam tahun keteng tamun deiki di, Allah Yahweh er si eremna ati neitamai deipupa, dakuramnganen, er melimna nengdi, jen karerami. Ataruda, Atalya erdi Yehuda mutu neitamai taleamudi, nimi deiyo ner kupra kuramu.

Yuk nengdi, ‘Ratu Atalyada, popra bisbisa kapkamepe,’ teneraminge tep, seku upu

4 Ratu Atalyadi, Yehuda mutu yuma taleramudi, dakuramnganen, keteng tamun denge yoneitam bari (7) konum kupkopda, imam Yoyadadi amutu kalengna tep, jen talena neng, sun deiyo-deiyo neng cap, Kari neng sun deiyo neng cap, kong pepudi upepu. “Sunda, Allah Yahweh er si eremna ati damai antamdana tep, yankurume,” pepra, kong pepupa yai. Yai pangeda, erdi sun yuma tep pepu. “Ukutaruda, sun cap, ne cap, ila mambul pedina upu pedankamepe. Nun yuma kikimanpu melipdankamepe.

Tonda, nun ila nimi deiyo tep, Raja kepra kunkamser ngeboda, Raja Ahazia er mi Yoas pua. Yuk deiyo neng tekamenga peda, sun upu men gekenkamepe. Ukupra pepkup dinin, ange tek sisi men kupmepedi, yuk ngebo tara kepropmepyopda, Allahdi nun wenemna tep, poptapkamsere. Nun yuma tenpu kange deiki di, angepu kikiman pepkupe,” pepu. Upepupa, sun yumadi, “Dyo, apepmaseremtopu, angepu kupkamep ja, yuk ton gume,” pepra, pedina upu pepdai.

5 Ataru dipapu, imam Yoyadadi ajen talena neng cap, sun kalengna neng cap tep, “Ukupkurume,” pepu. “Ada, angepu ukupkamrume. Sun yuma, Allah er gispal dona tep, pel dona gum tumi, Sabat tumi neitamai kalengrum neng yuma dinin, sun pe kankan neitamai bokdarumudi, gung weneri keteneipkurume. Gung tenpuda, ila nimi deiyo ner ratu Atalya, er ati sisa damai kalengkamnunge. 6 Gung butene ngeda, amutu dana-dana tara yuma, ongopgenepra ila lyom gel beilya wiamepunge dinin, tenpu wengna bisi tep, abuplan sida Sur, abisi wengbanungai kalengkamnunge. Tonda, gung weneri nengda, ila deiyo ner, ratu kure ati sisa kalengna neng damai dinin, akalengna neng sun amnyo tara tekrumudi, kalengkamnunge. Sun agung weneri ngeda, ila deiyo ner kure ati, er si istana Raja ati tep, kalengkamnunge.

7 Tonda, gung butene ton ngeda, sun Sabat tumi deiki di, pel ton men dorum nengda, sun adipapu, ‘Yu nengdi nun deiyo ngebo Raja popnung’ tenen, Allah Yahweh er si eremna ati damaipu kalengkamrume. 8 Akati damai kalengkamrumu taruda, sun nimi pona tep, yu keca tema cap, lyom parang capda doupkurume. Akecada, keana taru peda, men deiptapkurume. Akeca sun buru di pio taleprumudi, amenda taru kupkamser nimi deiyo ngebo, Raja Yoas, er dana-dana tara kalengkamrume. Sun adipapu er dan mutu benkurya peda, sun cap melipra bankamrume. Er damai tapra yukai bana meme. Ukunkamrum taru yumada, ware ngebo do, sun damai yaredi kurpetenkamser ngeboda, adipapu ponapu kunkamrume,” pepra imam Yoyadadi pepu.

9 Imam Yoyadadi, “Ukupkurume,” pepra deiputopu, sun kalengna nengdi ukupi. Uda, akalengna tep deiyo-deiyo nengdi, Sabat tumi kupu taruda, ‘Allah er si eremna ati damai cap, ati pumbon cap, pel donkamepe’ tenen, akati damai yanmai neng yuma tep nengeda, sun akalengna nengdi, moupra kalengmai. Ange utopu, Sabat tumi deiki dipapu dinin, ‘Allah er si eremna ati konum pel dopseng pepra, nun pe ati tamupra benkuiya ngeda, akati damai kalengna nengdi, moupra kalengmai. Sun yumadi, imam Yoyada pepu ngepu moupra gekepi. Ukupidi, ware pel don neng do yuma, ‘Sabat tumi neitamai akati yana pel dopkup’ tenenmai neng pe, ‘Akati pel konum dopmapa cadi, nun pe ati tamupra benkup’ tenenmai neng peda, sun yuma doupra, imam Yoyada damaipu duyai.

10 Apel dona neng yuma, imam Yoyada damai duyai pangeda, er adipapu sun kalengna neng yuma tep, nimi pona tep keca yu tema cap, tongkat cap, tonda ‘Mar popserur’ tenen, sun nong taram damai talen keca, er si perisai, sun nong lelimna tep gat keca ton, bokra karepupa dopropi. Akecada, pumun taru nimi deiyo ngebo Raja Dauddi deiamu keca kuramu. Apodan kecada, pumun taru di, Allah Yahweh er si eremna ati pumbon moupra deiamya di, imam Yoyadadi dopra akalengna neng tep karepu. 11 Tonda, imam Yoyada peiputopu, ila nimi deiyo ngebo er ati damai kalengna neng yuma, nimi deiyo ngebo Raja er melimna tep, tebalal tara cap, dumsisi tara cap, ongopgenepra warekra kalekmai. Ange kunmai taru yumada, sun yu tema cap, nimi pon keca yuknge cap, sun buru deiki doupidi, keteneipi. Sundi, tenpu baris dinin, lelepra tekidi, itara di dipdongopra, utara yumada, Allah er si eremna ati ongopgenepra warekra kalengmai. Tonda, Allah karena tep gam keca popnedi, uku dongoramyai dana-dana tara ton, ongopgenepra tengmaidi, pio moupra kalengmai.

12 Uda, ange yuma konum kupidi keteneipi pangeda, imam Yoyada, erdi Raja Ahazia, er mi Yoas doupra, akati pumbon di tapra, bura tara duyau. Yoas doupra yau dingeda, Yoyada erdi, ‘Angebo nun deiyo ngebo Raja kepkamser’ tenen, pio urasin telep keca, sun Raja-Raja nengdi giso deiki kenengnung keca, er si mahkota doupra, Yoas er giso deiki deipu. Ukupu dingeda, adipapu Allahdi, “Angeda ukunkamrume, angeda pio men kunkamrume,” pepra peteremna tep upu, sekami buku dopra, Yoas tep karepu. Ukupudi, ‘Yoasda, nun nimi deiyo ngebo Raja kunkamser’ tenen, petenkemna tep, minyak mokon ton metekanun doupra, er giso deiki dikra deipka deiki di, Yoasda Raja tekra deipudi, “Ukutaruda, angebo Yoas, erda nun ila nimi deiyo ngebo Raja kurure,” pepra deipu. Ukupu pangeda, akupunge tep, amutu neitamai bulupra wekmai nesala yuma gekepidi, ‘E, angeda pio telepe’ tenen, sun buru bongoprapidi, kange pio deipi. Anesala yumadi, buru tang bongopra kange pio deipidi, sun yuma tenpu kange doupra, “Nun deiyo ngebo Rajada, keteng tamun denge weik, gam pio kunkamre,” pepi.

Ratu Atalya depu upu

13 Aneng yumadi, ila upu deiki di penmaidi, buru bongopi taruda, lelim weik kupupa, nimi deiyo ner ratu Atalya ange gekepudi, ‘Uo, alelimda, ware kupmangpa, ila lelim gekenman do?’ tenen, sepdaro er ati tapra, Allah Yahweh, er si eremna ati damai dirbeu. Ukunmaiyada, adipapu menmena Allah Yahweh er ati beu dingeda, acei neitamai nimi pio weik kunmaiya antapu. 14 Ataruda, nimi deiyo ner, ratu Atalyadi dinamupa, ukupu wepra deipmai nimi deiyo ngebo Raja Yoas, Allah Yahweh er ati bisi buplan damai wengbana tep, ila lyom co tekamngai, tekmaupa epu. Pumun taruda, Raja-Raja neng tekra deiami taruda, ila nimi deiyo neng, alyom co damai tengamipa, sun mutu nengdi gispal dorami. Ukuramitopu kunmaipa, ratu Atalya epu. Ataruda, Yehuda mutu neitamai kurami jen talen neng, sun deiyo neng cap, lelim pena tep keca, er si terompet, mut penmai neng cap yumada, Raja Yoas tekmauai ongopra tekmaidi, ila upu deiki di gisal donmai. Ange utopu, amutu neitamai kurami nesala weika di, pio kange deipra, terompet lelim pena cap, ila upu deiki di gispal dona cap kunmaipa, ratu Atalya epu. Konum epu dingeda, ‘Uo, angeda ware keca deiyo tep kunmang do? Angeda bamur weike,’ tenepudi, ila upu di, “Khianat, Khianat,” ^{▼▼Khianat – Sun upu deiki di pepu dinin, Indonesia buku neitamaida, aupu deiyo tep, “Khianat,” penunga cadi, angepu seki. Dinino, nunda, ‘Aupu deiyonge ton kael kepkurum’ tenen, ange katuai di sekmepu.} pepu. “Uo, neda ila deiyo ner ratu kunun dinin, sundi ne tep yaniptapmanengdi, konum popbisipterepkamneng gum daca!” pepra, ngokrapudi, er pe kenekamu opkalpu teraktapu.

15 Ukupmaupa, imam Yoyada erdi, sun jen talen neng, sun deiyo-deiyo neng tep peipu. “Sunda, adeiyo ner ratu Atalya tomoprumudi, Allah Yahweh er ati damai dinin, akati urasin tara duberume. Tonda, ware neng do yuma, ‘Aner lyepkupe’ tenen, yana piripetepmenge neng ton yangopda, sun aneng peda, adipapu poptapkurume. Aupu pepka deiyoda, ake. Yuk taruda, imam ngebodi, “Adeiyo nerda Allah er si eremna ati pumbon, men poptaptepe. Angeda meme,” konum pepra deipka tep, “Aner doupra, akati bura tara dinin, urasin tarapu dubenkurume,” pepu. 16 Upepka tep nengeda, sun jen talena neng gekepi dingeda, adipapu nimi deiyo ner ratu Atalya tomoprapidi, ateng koupidi doupra, nimi deiyo ngebo, er ati damai dinin, bura tara dubei. Ada, ila deiyo ngebo Raja ati damai dinin, bura tara kuda bisam wengyakarami buplan bisi damaipu bena, ratu Atalya poptapi.

Imam Yoyadadi, pedina upu ukupunge, kupka tep upu

17 Imam Yoyadadi, pedina upu ukupunge tep, “Ukunkamepe,” pepra deipu. Ada, erdi nimi deiyo ngebo Raja Yoas cap, tonda amutu neitamai kurami nesala yuma cap, Allah Yahweh cap tep, “Nun yumada, tenpu kange doupra, nun nai Allah Yahweh cap, pio telep kupra kikiman kunkamepe. Er mawa nesalapu kupedi, er upupu pio moupra talepedi, dombankamnupe. Tonda, Allah Yahweh er nyapu sisa kepra deipkamsere,’ pepra, pedina upu deiki di pepu. Upepu pangeda, sun awekmai nesala yumadi, “Dyo, nun peda angepu putapserura cadi, angepu kunkamepe,” pepi. Tonda, ange utopu, Yoyada erdi sun amutu neitamai kurami nesala yuma cap, ila nimi deiyo ngebo Raja Yoas cap tep, “Nun yuma tenpu kange doupra, telep kupra kikiman kunkamepe. Er Yoasdi tekra upu peserepa, er upupu gekenkamepe,” pepra deipupa, sun awekmai nesala yumadi, “Dyo, angepu kunkamepe,” pepra, pedina upu deiki di pepi.

18 Ange yuma konum kupi dingeda, Yehuda mutu neitamai kurami nesala yumadi, isok Bahal, er si eremami ati damai bena, uruptaprapidi, sikke bukra tapi. Ukupidi, Bahal gisal dona tep, sun gel taplakra yakeiamyaidi, gam keca popra, uku dongonai, er si mesba cap, tonda, isok si eremna tep, petupra deiami keca, patung-patung cap yumada, sikke bukra tapi. Ukupi dingeda, nimi si Matan poptapi. Angeboda, isok Bahal si eremna tep, imam utopu pel doramu. Atep nengeda, angebo tomopidi, Bahal er si eremna tep, gam keca popnedi, uku dongonai keca, er si mesba damaipu dubena, angebo poptapi. Ange yuma konum kupyopda, imam Yoyadadi sun jen talena neng doupra, Allah Yahweh er si eremna ati damai deipudi, “Sunda, akati moupra kalengkamrume,” pepra deipupa, angepu talepra kurami.

19 Ange yuma konum kupyopda, sun nimi denge seratus jen talena neng, sun deiyo neng cap, Sun Karit yala neng cap, Raja ngebo kuramu ati dam tep, sun kalengami jen neng cap, tonda sun Yehuda mutu neitamai kurami nesala cap, sun yumadi, ‘Angeboda, nun ila nimi deiyo ngebo, Raja kepredi, talenkamsere’ tenen, Yoas doupra, Allah Yahweh er si eremna tep ati damai di tapra, ila nimi deiyo ngebo ati, ongopgenepra wiami lyom gel beilya neitamai, akati neitamai kalengna jen talena nengdi, wengbarami ila bisi buplan damai bena, kikiman wekidi, adipapu nimi deiyo ngebo Raja, er ila telep ati, er si istana Raja weki. Doupra weki pangeda, Yoasdi, ‘Ila nimi deiyo ngebo kepnedi, amutu talepra Raja kunkamna cadi, sun yuma epnengedi, kael kepkameng’ tenen, Raja-Raja neng bungameng keca, er si tahkta deiki buku.

20 Ukupka tep nengeda, amutu neitamai kurami nesala yuma epidi, ila di pingping kange deipra kunmai. Ada, pumun taru amutu taleamu nimi deiyo ner, ratu Atalyada, er ati damai di, konum poptapi pangeda, ange deiki di, sun Yehuda mutu neitamai kurami nesala yumada, ila di kange deipra, bouna di teleppu kurami. 21 Yoas er nimi deiyo ngebo Raja kemna tep, gonga kepra tekeipi taruda, er nena keteng tamunda, denge weik gume. Er kuramu taru keteng tamun dengeda, yoneitam baripu (7) tujuh tahun deiki di Yehuda mutu neitamai talepra kuramu.