2Ki 12 | XteSC | STEP | Israel mutu neitamai talepra kuramu nimi deiyo ngebo, Yehu erda, amutu neitamai talepra kuramnganen, keteng tamun tujuh tahun konum kupkopda, ataru neitamai di, Yehuda mutu talena tep, Yoas wepra ereipipa, tekra Raja gonga kepudi, Yehuda mutu talepu. Tonda, ila ati arum sida, Yerusalem mutu neitamai kuramu. Yoasdi sun Israel nesala yuma tep, upu peramu taruda, denge pio weik empat puluh keteng tamun deiki di talepra kuramudi upu peramu. Ukuramu ngebo Yoas, er nin sida Zibya. Zibya er derinada, Bersyeba mutu di deiami ner kuramu.

2 Kings 12

Yoasda, Yehuda mutu neitamai Raja kuna tep tekudi kuramu keca tep upu

1 Israel mutu neitamai talepra kuramu nimi deiyo ngebo, Yehu erda, amutu neitamai talepra kuramnganen, keteng tamun tujuh tahun konum kupkopda, ataru neitamai di, Yehuda mutu talena tep, Yoas wepra ereipipa, tekra Raja gonga kepudi, Yehuda mutu talepu. Tonda, ila ati arum sida, Yerusalem mutu neitamai kuramu. Yoasdi sun Israel nesala yuma tep, upu peramu taruda, denge pio weik empat puluh keteng tamun deiki di talepra kuramudi upu peramu. Ukuramu ngebo Yoas, er nin sida Zibya. Zibya er derinada, Bersyeba mutu di deiami ner kuramu. 2 Nimi deiyo ngebo Raja Yoasda, Israel tara taleamu keteng tamun yumada, telep kupra kuramu. Ada, Allah Yahweh, er kange di, ‘Angeda telepe,’ teneramu ngeda, imam Yoyadadi, Raja Yoas tep, moupra peteremamupa, kael keamudi, telep kuprappu kuramu. 3 Dinino, nimi deiyo ngebo Raja Yoas, er peda isok si eremna tep, yapi keca popra duyandi, uku dongopra eremami ati yumada, uruptapra gawal men daku. ‘Amali keca yuma gum kupra deipkamne,’ men teneramu cadi, sun Israel mutu neitamai kurami nesala yumadi, isok si eremna tep, tupa popnedi, ukupu dongopra kareryakana cap, ‘Isokdi nun morona upu gekenkamseng’ tenen, siltong telep keca uku dongona cap, tupa kareryakarami.

4 Raja Yoasdi, Israel mutu taleamu taru neitamaida, tenpu tumi deiki di, Yoasdi sun imam-imam neng yuma tep kong pepu. Ukupu dingeda, “Allah Yahweh er si eremne tep pio lengna telep ati duyakanung telep karen keca co bo do, kunumna weik gel uang do, angeda sundi doupra Allah tep kareyakanung co boda, moupra bulupmumdi derinkamrume,” pepu. “Ada, Allah Yahweh er si eremna ati wengbana tep, kunumna co bo, pajak perameng utopunge tep do, sun pe kange dipapu tali karerameng nge do, sundi, ‘Ne nai Allah tep ukupkamne ja,’ pepra, pedina upu deiki di kareramenge keca peda, bulupmemdi moupra derinkamrume,” pepu. 5 “Tonda, sun imam-imam neng yumada, nimidi duyasengedi karenkamsenge nge yuma, moupra doronkamrume. Ange yuma doupra duyakameng co bo, sun imam-imam nengdi moupra deiamumnya neitamai di, Allah Yahweh er si eremna ati neitamai urupra dakuamrepa, mali tupa kupmare ngeda, aco bo karepmumpa, aco bo deiki di, sun kael nengdi, akeca yuma lepsisikra donkamenge,” pepu.

6 Raja Yoasdi upepra deipu dinino, dakuramiyanen, Raja Yoasdi amutu taleamnganen, keteng tamun tahun dua puluh tiga (23) konum kupkopda, sun imam-imam nengdi, Allah Yahweh er ati neitamai lepsisikra dopmatu ngeda, tupa mali kuamtu ngeda, kapul men lepsisikra doptenge. 7 Ange tep nengeda, nimi deiyo ngebo Raja Yoasdi, Imam Yoyada cap, sun imam-imam yuk neng cap tep, kong pepudi, upepu, “Deiyo warya tep, Allah Yahweh er atida, men lepisikra dopmarum do? Atep atumi gonga kepmumdi, orkunkamre taruda, yuk nengdi co bo doupra, Allah tep kareryakankamang ngeda, ange ton cap tapakra dorona meme. Israel nesala adipapu Allah Yahweh er ati lepsisikra dona tep, karenkameng co bo yumada, sun pedipapu sun pe putan keca kunumna tep, men doronkamrume. Allah er si eremna ati lepsisikra dona teppu, doproprumudi, lepsisikra dona pel tep, kunupra punupkamrume,” pepu.

8 Upepka tep nengeda, sun imam-imam neng yumadi, upu talepidi, “Yo telepe. Amutu neitamai kunung nesala yumadi, Allah karena tep co boda bulupra derinkamenge nge neitamai di, nun ton bokra men doronkamepe,” pepi. “Tonda nun imam-imam neng dipapu Allah Yahweh er si eremna ati neitamai urupmanto kupmare ngeda, lepsikra men dopmanto kupkamepe. Yuk neng dipapu apelda donkamenge,” pepi. 9 Atep, imam Yoyada, erdi tenpu co bekin dopropudi, aco bekin er buplan deiki tarada, yambul bon potokra deipu. Ukupu dingeda, Allah Yahweh, er eremna ati wengbana tep, bisi buplan urasin tara dinin, Allah karena tep pala gel taplakra deipyai, er si mesba damai, dumsisi tara deipu. Ukupka tep, Israel tara kurami nesala yumadi, Allah karena tep co bo doupra duyakaramipa, sun akati kalengna imam-imam nengdi aco bo yumada, dororamidi, adipapu aco bekin dopra deipka pumbonaipu dongorami.

10 Ukupra kupbaramiyanen, tumi-tumi yumada, aco bekin pumbon neitamai dongoramipanen, aco bo pio weik kupkopda, nimi deiyo ngebo Raja, er melimna tep, sengna deiyo ngebo sekretaris cap, imam-imam neng, sun ila deiyo ngebo cap, yakaramreidi, adipapu kikiman aco bo nungamrei. Nukne dingeda, adipapu aco bo yuma moupra geteprapreidi, kin keca, er si karong pumbon ton deriramrei.

11 Ukupra dakuramreianen, amenda taruda, upu pena deiyo ngebodi, Allah er si eremna ati lepsisikra dona tep, pel dona deiyo-deiyo nengpu kareramu. Kareramupa, sun adeiyo-deiyo nengdi, sun tali pel dona neng tep, bokra yuk-yuk karerami. Ada, sun co cangne neng cap, co dopra ati dela cap, ati nong cap dorami pel dona neng cap, urasin telep gel ketenemna petupra pel dona neng cap, tonda agel-agel yuma dukdongopra, lelepra derina pel dona neng cap tep, karerami. 12 Tonda, ange yuma sun imam-imam neng, sun ila deiyo ngebo cap, Raja melimna tep surat sengna tep deiyo ngebo sekretaris capdi, aco bo yuma nukra sekroprengopda, sun adipapu akati dona tep, co cakra deipinge cap, urasin telep gel ketenepra deipinge cap tep, kunuamrei. Tonda, akati pumbon mali kupkunge tep, ware pel lepsisikra dona tep do yuma, abutene nengdi, abulupra derirami co bo bokrapreidi, Allah er si eremna ati lepsisikra dona pel kunumna tep, apel-apel deiyo neng tep, kareramrei.

13 Dinino, sun Israel nesaladi, Allah er si eremna ati damai duyanapidi, aco bekin pumbon deriryakarami co boda, akati lepsisikra pel dona teppu kareramrei. Yuk keca weikanun ton kunumami dinin, aco bo deiki di men kunuamrei. Atep, Allah Yahweh er si eremna ati pumbon kwamu keca, ware keca do yumada, aco bo deiki di men kunumamrei. Ada, me mau utopunge cangkir perak penunge cap, weica una tep keteneipi keca cap, buru me kuna tep keteneipi me mau loyang utopunge cap, nimi kongpena tep, lelim pena keca, er si terompet cap, tonda, akeca-keca yuma, kunumna weik keca emas do, perak do, ange di petupra derirami keca yala-yala yuma capda, aco bo deiki di men kunumamrei. 14 Allah er si eremna ati damai co bekin pumbon dongorami co bo yumada, adipapu sun Allah er ati lepsisikra dona tep, pel deiyo-deiyo nengpu sun menengada, kareramrei. Tonda, akati dona tep, deiyo-deiyo nengdi, akati dona tep putapne kecapu kunuami. Yuk tali keca ton pio gume.

15 Allah er si eremna ati lepsisikra pel dona tep, upu perami deiyo-deiyo nengda, sun pio telep deiki dipapu pel doramya tep, yuk deiyo nengdi, “Ukupkurume,” pepra, lap pena upu ton men sekra karerami. Deiyoda, apel dona tep, deiyo-deiyo nengdi, pio dumsisipu pel doramidi, sundi, ‘Ukupkamepe,’ peramitopu, angepu kupbaramya cadi, yuk deiyo nengdi, “Aco bo dopra akeca-keca yuma kunumrum ngeda, lelepra surat sekrumudi, nun tep karepsemumdi, lap penkamserume,” men perami. Ato kecada, pio men mororami. 16 Dinino, sun Israel nesala yumadi, ‘Allahdi nun mali kupmupu keca yumada, daemna cap, yo pununa cap tep, kaukepseredi, telep kweipkamser’ tenen, kareramipa, sun imam-imam nengdi, nimi yapi keca popra, uku dongona tep yo punupra dongorami co bo cap, tonda nimi sun mali kupmange nge tep, ‘Allahdi kaukepseredi, gum kupra deipkamser’ tenen, yana gam keca popra uku dongomne taru di, dongopmange co bo capda, aco bekin pumbon pio men dongorami. Amambul pel butene tep kareryakarami co bo yumada, kareramipa, sun imam-imam neng dipapu, sun pe putana keca kunumna tep dororami.

Raja Yoasda, Israel tara mutu talena tep, seng pepu taru tep upu

17 Uda, sun imam-imam nengdi, apel yuma dorami taru neitamaida, Siria mutu taleamu ngebo Raja Hazaeldi, ‘Angebo popbisipnedi, amutu dopropkamne’ tenen, er porbana tep, Gat mutu neitamaida mar porbeu. Beu dingeda, sun Israel mutu neitamai dinin, Gat mutu popbisipudi, amutu neitamai kwamu keca yuma dalupra dopropu. Ukupu dingeda, adipapu tamupra, ‘Yerusalem ila ati arum, kota yumada, popbisipkamne,’ tenen ketenepra beu. 18 Ukupu pangeda, Israel tara taleamu ngebo Raja Yoas ange gekepu dingeda, menmena apel dopu. Ada, nimi deiyo ngebo Raja Yoasdi, sun menop taru kurami Raja-Raja nengdi, Raja Yosafat cap, Raja Yehoram cap, Raja Ahazia cap, sun amutu talerami Raja nengdi mawa derirami keca yana buluprapudi dopropu.

Ada, aRaja-Raja nengdi, ‘Amambul kunumna weik kecada, nun nai Allah, er ngepu kunkamre’ tenen, mawa deriraminge yuma bulupra deipu. Tonda, er peda Raja Yoasdi, ‘Allah er ngepu,’ tenemudi, mawa tep deriramunge peda, dopropu. Tonda, Allah Yahweh er si eremna ati cap, amutu Raja ati cap, akati butene pumbon derirami kunumna weik keca, emas, Raja Yoasdi akeca yuma bulupra dopropudi deipu. Ukupu dingeda, Yoasdi buluamu keca yuma, Raja Hazael er namna tep dokotepu. Dokotepupa, Raja Hazaeldi ange yuma epu dingeda, ‘Yerusalem mutu neitamai kunung nesala yumada, men porbenkamne,’ tenepudi yaprou. Atep, Yerusalem mutu men porbei.

19 Uda, Raja Yoasdi Israel tara taleamu taru neitamai di pel doramunge cap, upu peramunge cap, ange yuma konum kuramu ngeda, yuk nengdi buku sekra deipi. Abuku sida, ‘Sejara Raja-Raja Yehuda,’ peprapidi, sekra deipi. 20 Tonda, nimi deiyo ngebo Raja Yoas, er amutara jen talena deiyo neng yumadi, “Nun deiyo ngebo Yoas perur upu ton, men gekenkamepe. Er tep popbisipkamepe,” pepra, upu sisiki. Ada, mutu si Bet-Milo damai di popi. Angeda, Sila mutu kwerebana tep abisi neitamai di popi. 21 Raja Yoas tep poptaprei nengda, Raja Yoas, er upu melimna neng kuramreipa, Yoasda, ‘Aneng buteneda, telep neng kurerunge,’ teneramu dinino, sun Simeat er mi Yozakar cap, tonda Somer er mi Yozabad capdi, Raja Yoas poptaprei.

Ila nimi deiyo ngebo Raja Yoas konum poprei pangeda, sun galema dopropidi, nimi deiyo ngebo Raja Yoas tu palina tep nengeda, er co puna neng tu paliramiyaipu, Raja Daud er mutu neitamai dinin, nimi deiyo neng sun Raja-Raja neng depnepa, doupra paliramyaipu, Yoas peda palipi. Ukupi pangeda, Yoas er mi Amaziapu, er nai bo pununa tep, wepra ereipipa, er Amaziadi nimi deiyo ngebo Raja kemna tep, tekrapudi, gonga kepra amutu talepu.