2Ki 13 | XteSC | STEP | Keteng tamun dua puluh tiga (23) tahun deiki di, Ahazia er mi Yoas, erdi Yehuda tara kurami nesala tep, deiyo ngebo kepra Raja taleamu. Aketeng tamun 23 nge neitamai di, Yehu er mi Yoahasdi, Israel tara kurami nesala, Raja kemna tep, gonga keprapudi, Israel tara talepu. Erda, Samaria mutu neitamai kuramudi, keteng tamun tujuh belas (17) tahun deiki di deiyo ngebo kepra taleamudi, upu peramu.

2 Kings 13

Yoahasdi Israel nesala deiyo ngebo kepra taleamu upu

1 Keteng tamun dua puluh tiga (23) tahun deiki di, Ahazia er mi Yoas, erdi Yehuda tara kurami nesala tep, deiyo ngebo kepra Raja taleamu. Aketeng tamun 23 nge neitamai di, Yehu er mi Yoahasdi, Israel tara kurami nesala, Raja kemna tep, gonga keprapudi, Israel tara talepu. Erda, Samaria mutu neitamai kuramudi, keteng tamun tujuh belas (17) tahun deiki di deiyo ngebo kepra taleamudi, upu peramu. 2 Dinino, Raja Yoahas peda, mali keca weik talepra kuramu. Ada, nimi si Nebat, erdi deipu ngebo, Raja Yerobeamdi, Israel yala nesala deiyo ngebo kepra taleamudi, mali kecapu talepra kuramupa, sun Israel nesala epidi, sun peda malipu kuramitopu, Raja Yoahas peda, Israel yala nesala tep, deiyo ngebo kepra taleamudi, mali weik kuramu. Ada, Allah Yahweh er kangeda, ‘Angeda mali kecapu,’ teneramunge, Raja Yoahasdi ange talepra malipu kuramupa, sun Israel nesala peda malipu kurami. Amali kuna kecada, er peda tamna gum di, tupa pio malipu kuramu.

3 Atep nengeda, Allah Yahwehdi sun Israel tara kurami nesala yuma tep, yu kupupa, sun wenemna tep, erdi, ‘Konuma, Siria ^{▼▼Siria – Amutu si tep nengeda, yuk Allah upu buku neitamai di, amutu si tep ‘Aram’ seki. Amutu sida butene dinin, amutuda tenpua.} mutu taleamu nimi deiyo ngebo, Raja Hazael cap, tonda er mi Benhadad cap tep, sundi ‘Israel nesalada, ayana popretenge,’ tenepreipa, aketeng tamun neitamai yumada, sun anengdi ton taru ton, ton taru ton, Israel nesala damai yana tupa-tupa porbisinapu kuramrei.

4 Ukuramreipanen, amenda taru Raja Yoahasdi Allah Yahweh tep, “Uo, Allah Yahweh ne naio melipneo,” pepra moropu pangeda, Allah Yahwehdi gekepu. Allah Yahwehdi Yoahas moropunge konum gekepka deiyoda, Siria mutu nesala taleamu Raja Hazaeldi, Israel nesala sun deiki pio ikin keca weik deriramupa, kange mun kuramya tep, Allahdi sun tep bicau tenepudi, ‘Sun tep melipkamne,’ tenepu. 5 Atep nengeda, Allah Yahwehdi, nimi tenpu ngebo ton wepra deipu. Ada, Israel nesala sun tep, Siria mutu nimi deiyo kepra taleamu ngebodi, ikin keca weik, sun nong deiki deriramupa, kange mun kuramu ngeda, ‘Angebo wepra deipnedi melipnepa, erdi melipra lyeproprepa, sun yumada telep dipapu men taru dorkuramitopu kunkameng’ tenen, wepra deipu. Ukupupa, angebodi Israel nesala melipupa, men taru telep kuramitopu, kange di ton cap telep kurami.

6 Allahdi Israel nesala tep, melipupa telep kuramya peda, sun Israel nesaladi mali kurami kecada, pio men tami. Tupa mali kunapu kurami. Ada, Raja Yerobeam erdi taleamu taru di mali kupyakaramupa, sun peda mali kuramingepu, pio tupa angepu talepra mali kurami. Amali kunangepu, sundi taleamidi tali isok tep, ‘Nun nai’ tenen, tupa si erepyakarami. Adeiki di, isok er si Asyera, er si eremna tep, lyom co dopra, urasin telep kupra petupra deiamidi, ikami ngeda, tupa Samaria mutu neitamai akwamu.

7 Israel nesala sun jen talena neng yumada, Siria mutu taleamu nimi deiyo ngebodi, yana popra gawal dakbaramudi, jen talena neng weika di, gum kupra deiamu cadi, daneitamai taruda, Raja Yoahas er jen talepra, kuda bisam gipra bana tep, tu deiki sepra embana keca, er si kereta kuda deiki tekra barami jen nengda, lima puluh (50) nengpu tupa gam kurami. Tonda, nimi porbana taruda, tu bisi deiki bendi, nimi pona tep keca, er si kereta kuda perangda, sepuluhpu (10) tupa akwamu. Yuknge yumada, pio gum kwamu. Tonda, Raja Yoahas er jen talena neng dengeda, sepuluh ribu (10.000) nengpu tupa kurami. Sun yuk jen talena neng yumada, Samaria tara taleamu deiyo ngebo, Raja Hazaeldi popbisiamnga deiki di, nimidi tu buta yanirameng utopu kupra, popbisiramupa, Israel tara jen talena nengda, gum kupropnen baramya, metekanunpu tupa gam kurami.

8 Uda, Raja Yoahasdi, nimi deiyo ngebo kepra, taleamu taru di kuramu keca cap, pio pe deipra, ila puto di pel doramunge cap, upu peramunge cap yumada, Israel yala nesala tep, nimi deiyo kepra talerami Raja-Raja neng si sengdirami buku neitamaipu sekra deipi. Uda, Raja Yoahasdi Israel tara taleamu taru neitamai di, pel doramunge cap, upu peramunge cap, ange yuma konum kuramu ngeda, yuk nengdi buku sekra deipi. Abuku sida, ‘Sejara Raja-Raja Israel,’ peprapidi sekra deipi. 9 Raja Yoahas konum depu pangeda, Samaria mutu neitamai pu peipi. Peipyopda, Yoahas er pununa tep, Yoahasdi deiamu mi, er si Yoas, ^{▼▼Yoas – Angebo er sida Yoas dinino, Samaria mutu taleamu ngebo peda, er si ton Yoas perami. Sun yuk-yuk kuramrei dinino, ataruda, sun amutu kurami nesaladi, ‘Gume nun ukupu deipmepe mida, yuk mambul ngebo si utopungepu, si sipepkupe,’ teneramidi si perami. Dinino, angebo Yoasda, Israel tara taleamu. Tonda, yuk ngebo, er si Yoas ton, Yudea tara mutu taleamu. Sun yuk-yuk cadi, nimi tenpu gume.} er nai tep punupudi, nimi deiyo ngebo keprapudi, Israel tara mutu cap, atara neitamai kurami nesala cap tep taleamu.

Raja Yoasdi Israel tara taleamunge tep, seki upu

10 Angebo Raja Yoasda, er nai bo Raja Yoahas kuramu. Er nai Yoahas depupa, punupudi, keteng tamun enam belas tahun (16) deiki di, Israel tara kurami nesala talena tep, Samaria mutu neitamai kuramudi, nimi deiyo ngebo Raja kepra taleamu. Yoasdi gonga kepra, Raja teku taruda, Yehuda mutu neitamai kurami nesala taleamu ngebo, er si ton Yoas kuramnganen, keteng tamun tiga puluh tujuh (37) konum kupkopda, Israel tara talena deiyo ngebo, Raja Yoasdi nimi deiyo ngebo Raja kepra, Israel tara taleamu. 11 Dinino, Raja Yoas peda, mali keca pio weik kuramu. Ada, nimi si Nebat, erdi deipu ngebo, Raja Yerobeamdi Israel yala nesala deiyo ngebo kepra taleamudi, mali kecapu talepra kuramupa, sun Israel nesala epidi, sun peda malipu kuramitopu, Raja Yoas peda, Israel yala nesala tep deiyo ngebo kepra taleamudi, mali weik kuramu. Ada, Allah Yahweh er kangeda, ‘Angeda mali kecapu,’ tenereamunge, Raja Yoahasdi ange talepra malipu kuramupa, sun Israel nesala peda malipu kurami. Amali kurami kecada, er peda tamna gum di, tupa pio malipu kuramu.

12 Uda, Raja Yoasdi nimi deiyo ngebo kepra, Israel tara taleamu taru di kuramu kecapu, pio pe deipra, puto di pel doramunge cap, nimi deiyo upu peramunge cap, er Yoasdi Yehuda mutu kurami nesala talepra kuramu ngebo Raja Amazia tep, yana popbisiamunge cap, ange yumada, Israel yala nesala tep, nimi deiyo kepra talerami nengdi kurami keca tep, si sengdirami buku neitamaipu, yana sekra deipi. Abuku sida, ‘Sejara Raja-Raja Israel,’ pepi. 13 Yoas konum depu pangeda, Israel mutu kurami nesala deiyo kepra talerami Raja-Raja neng depnepa, bena peiramyaipu, bena peipi. Ukupyopda, Yoas er yo punupra Raja kuna tep nengeda, Yoasdi deipu ngebo, er si Yerobeam 2 ^{▼▼Yerobeam 2 – Angebo er sida, er apu bo Yerobeam ton dakuramnga cadi, angebo er sipu sipepi taruda, ‘Er apu bo si peramitopu, ami ton er si angepu pepkamepe,’ tenepidi, er si tep Yerobeam pepi. Dinino, erda amenda taru di deiamya cadi, mi butenenge utopu kupka cadi, er sida Yerobeam kedua, atau Yerobeam 2 si sipepra deipi.} tekrapudi, Raja kupudi, Israel tara kurami nesala tep taleamudi, Raja ila deiyo ngebo kuramu.

Elisa depkamu taru pepu upu

14 Elisa depkamnga tep, pu jenmau taruda, Israel nesala sun ila nimi deiyo ngebo Raja Yoas yaudi, “Naio, naio, kan depmemnyopda, nunda ware kupkamser do? Nun Israel jen nengdi nun podan neng porbana tep, kuda bisam bali tara bukra baramep neng cap, nun kuda bisamdi gipra tu deiki embaramre keca, kereta kuda capda, ware kupkamser do? Depmemnyopda, kandi men melipkamserema tep, nun mambul kupsere,” pepra yan engepu.

15 Upepupa, Elisadi Yoas tep, “Jen cap, mar cap, doropo,” pepupa Yoasdi doropu. 16 Israel sun deiyo ngebo Yoas tep, Elisadi pepu. “Kan mar doropkurume,” pepupa doropu. Doropupa, adipapu Elisa er buruda dopra, Raja Yoas er buru tang deiki deipu. 17 Ukupu dingeda, “Keteng yakan tara jendelada, pakra deipkurume,” pepupa, pakra deipu pangeda, Elisadi Yoas tep, “Amar dopra keteng yakan tara doprume,” pepupa dopra dopu. Dopu taruda, Elisadi pepu. “Amarda, nun nai Allah er si Yahwehdi, sun Aram mutu nesala popra bisbisakapkamra tep, amarda Allahdi peten keipkere. Allahdi melimkerepa, kandi Aram mutu nesala popmumdi, mutu si Afek mutu damaida, Aram mutu neng yuma tep, popra gawal dakamreme,” pepu.

18 Ange konum kupu pangeda, Elisadi Israel nesala sun deiyo ngebo tep aupu ton pepu. “Akupmar marda, dopra tu deiki kweipo,” pepupa, Raja Yoasdi ue weneri kali tu deiki kweipu. 19 Ukupupa, Allah er pel doramu ngebo, Elisa pio yu kupupa pepu. “Tek sisi ngeda, ue pamu bari utopu, ngantan bari utopu tuai kweiptumtoda, Aram mutu neng tep yuma popra, konum gawal daktumdi bisbisa kaptume. Dinino, ange men kuprema tep nengeda, ue weneri tumi bememdi, Aram nesala popkamarum dinin, gawal men dakamrume,” pepu.

Upeipu dingeda, dakuramyane, amenda taru Elisa kurum depupa doupra bena peipi.

Yuk mutu nengdi Israel nesala tep, poryakarami upu

20 Ataru neitamaida, Israel nesala sun podan neng, Moab mutu nengdi, ‘Israel neng popkup’ tenen, keteng tamun, keteng tamun yumada, nimidi ukupu wa pepra koun keca gonga kepra kourami taru neitamaida poryakarami. 21 Ukuramitopu, tenpu taruda, Israel nengdi sun kabo depmaupa, peirbei taruda, dato-dato di sun podan neng, Moab neng yakanmaipa, epidi kware kupupa, adipapu sun Israel nengdi adepmau ngebo er nong dopra, men di Elisa peiami gel imir pumbon dokotepidi sepdaro bendopi. Ukupipa depmau ngebo, er nongda Elisa yo bepu pangeda, adipapu adepmau ngebo, er nong dopra gel imir pumbon dokotepi ngebo, gam bukudi, tekra beu.

22 Aram mutu taleramu nimi deiyo ngebo er si Hazaeldi, sun Israel nesala tep, tupa-tupa poryakaramu. Ada, Israel nesala sun Raja ngebo, Yoahasdi taleamu taru neitamai yumada, sun podan neng taleamu ngebo Raja Hazael cap, er tara neng capdi, Israel neng tep pio poryakarami.

23 Ukurami dinin, Allah er si Yahwehdi, Israel nesala tep bicau teneramnga cadi, erdi meliamupane, sun Aram nesaladi ponapu kurami dinin, Israel nesala yuma men popra gawal daki. Ange utopu, ataru di dipra aneitam yakarami taru yumada, Allah er si Yahwehdi Israel nesala tep pio kalekra melimamnganen, aneng tep men tamupa, yuk mutu nengdi Israel nesala porami dinin, kapul men popra gawal dakami.

Ataruda tupa gam kununge, tonda Allahdi tupa melimrure. Deiyoda, menop taru Allahdi weamu neng, Israel sun co puna neng Abraham cap, Isak cap, Yakub cap tep, ‘Ukunkamrume, Ukupmumnyopda, nedi tupa kalekra melimkamsene,’ pedina upu pepra deiamu. Aupu pepra deiamu ngeda tupa akapka tep, Israel nesala pio men tamamu. Allahdi, ‘Anengda, ne damai tupa yakankamenge,’ tenerure.

24 Amenda taru Aram mutu neng taleamu ngebo Raja Hazael depu pangeda, er mi Benhadaddi er yo punupudi, Aram nesala taleamu. Raja Hazaeldi Aram nesala taleamu taru neitamaida, Israel nesala kurami mutu neitamai, yambul weika di popbisipudi, akati-akati cap, amutu-amutu cap weika di dororamu. Akati yuma dororamu taruda, Israel sun Raja ngebo Yoahas kuramu.

25 Dinino, Yehoas er mi Yoasdi er yo punupudi, Israel nesala taleamu. Yoasdi Israel taleamu taru neitamaida, Hazael er mi Benhadad tep, ue weneri taru kupupane, er damai bena popbisipu. Popbisipu dingeda, Benhadad menop di doramu ati-ati yumada, ka di ton cap, Yoasdi dopropu. Akati-akati yumada Israel nesala ati arum cadi, tamupra dopropu. Akati yumada, Yoas er nai Yoahas Israel nesala taleamu taru Aram mutu nengdi dororami dinin, Yoasdi Aram mutu neng popra bisbisa kapudi ka di ton dopropu.