2Ki 14 | XteSC | STEP | Raja Yoahas erdi deipu mi Yoasda, er nai bo punupudi, nimi deiyo ngebo Raja kepra, Israel tara kurami nesala yuma taleamudi, dakuramnganen, keteng tamun butene deiki di, aketeng tamunpu, Yehuda tara kurami nesala tep taleamu deiyo ngebo, er si ton Yoas, erdi deipu mi, er si Amazia, erdi Yehuda tara nesala tep Raja kepra taleamu.

2 Kings 14

Raja Amaziadi Yehuda tara nesala sun deiyo ngebo kepra taleamu upu

1 Raja Yoahas erdi deipu mi Yoasda, er nai bo punupudi, nimi deiyo ngebo Raja kepra, Israel tara kurami nesala yuma taleamudi, dakuramnganen, keteng tamun butene deiki di, aketeng tamunpu, Yehuda tara kurami nesala tep taleamu deiyo ngebo, er si ton Yoas, erdi deipu mi, er si Amazia, erdi Yehuda tara nesala tep Raja kepra taleamu. 2 Pumun taru Yudea mutu taleamu ngebo Raja Yoas, er mi Amazia er kuramu keteng tamunda, dua puluh lima (25) tahun kepu taruda, gonga keprapudi, Yudea tara tep, Raja tekudi amutu talepu. Ukupu pangeda, nimi deiyo ngebo Raja kepra, Yerusalem mutu neitamai kuramu. Nimi deiyo ngebo Raja kepra, taleamu keteng tamun yumada, dua puluh sembilan (29) tahun deiki di taleamu. Raja Amazia er nin sida, Yoadan kuramu. Aner Yoadan erda, Yerusalem mutu nengdi deiamu ner kuramu.

3 Raja Amazia, er pel doramunge yumada, Allah Yahwehdi, ‘Ange telepe,’ teneramunge, telep ngepu kuramupa, Allah Yahwehdi er tep, kange pio deriramu. Ada, Amaziadi er co puna ngebo Raja Daud, pio telepngepu talepra kuramutopu men kuramu. Er Amaziada, er nai bo sisa, Raja Yoasdi yambul telepnge cap, tonda malinge cap, tapakra kuramutopu, er peda kuramu. 4 Amazia erdi, isok si eremna tep, dopra deiamidi, isok-isok si eremamyai yumada, urupra men tamu cadi, Yehuda tara kurami nesala sun yumadi, aisok si eremna tep, yapi keca popra karerbana cap, siltong telep keca uku dongona cap, tupa kurami. Ada, tali isok si eremna ati, adopra deiamyai di, akecapu kareramidi, isok si eremami.

5 Uda, Raja Amazia dakuramnganen, konum puto kupudi, Yehuda tara kurami nesala konum puto di talepu dingeda, er nai bo Raja Yoas pomi neng yumada, weneprapudi, kwang dakra popupa, depi. Ukupu dingeda, Amazia er nai popi deiyo neng yumada, popra gawal daku. 6 Dinino, Amaziadi, er nai bo pomi deiyo neng yumada popu dinin, sun adeiyo nengdi deiami nyapuda, pio men popu. Anyapu men popka deiyoda, Allah Yahwehdi Musa tep, “Angeda ukunkamrume, angeda pio men kunkamrume,” pepra, Musa deiki peiamudi, gel pala deiki sekeiamupa, lap peramu. Allahdi peiamu upuda, ake. “Sun nai yapu mali kuamenge nge tep, sundi deipbankameng nyapu tep, wenepra men ponkamrume. Tonda, ware neng do yuma, sundi deipmenge nyapu mali kuramenge nge tep, sun nai yapu tep men wenepra ponkamrume,” peiamu. Allahdi ange peiamutopu, Raja Amaziadi kupu. Ada, “Ware ngebo do yuma, er mali kupmare ngebopu, er dipapu mali kuprenge tep, wenepra ponkamrume. Tali nengda wenepra pona gume,” pepra, Allahdi pepra deiamu. Atep, Allahdi apeiamutopu Amaziadi kupka cadi, er nai bo pomi nengdi deiami nyapu yumada men poptapu.

7 Yuk dakuramu taru neitamai di, mar podanmaiya neitamaida, Raja Amaziadi, Edom mutu jen talena neng denge pio weik, sepuluh ribu (10.000) neng ton, Asin mutu banai beudi, ajen talena neng popra tapu. Ukupudi, Sela mutu ati arum dopra kurami mutuda, dalupra dopropu. Dopropudi, akati arum doramyaida, yuk si punupra si dopu. Ada, Yokteel ati arum pepu. Upepra si dopu ngeda, ukutaru peda amutu ati arum tep nengeda, asipu Yokteel mutupu penunge.

8 Ange ukupu dingeda, dakuramnganen, yuk taruda, Raja Amazia Yehuda tara taleamu ngebodi, er nyapu wepra deipudi, upu peipupa, Israel nesala taleamu ngebo, Raja Yoas er damai perbei. Ada, “Nedi kan tep poryankamakena cadi, yamemdi nimi podanai antapkamneme,” pepra lap peipupa, aupu doupra lap perbei. Uda, Raja Yoasda er nai bo sisa Yoahas kuramu. Tonda, er apuboda Yehu kuramu. 9 Dinino, Raja Yoas Israel tara taleamu ngebodi, tamupra Yehuda tara taleamu Raja Amazia tep, adomon upu peipu.

“Tenpu taruda, Libanon mutu neitamaida, mutu dam tarapu co mutu-muta di, metek takke kecadi, ila lyom cemara co tep, upu doproipudi, upepu. ‘Cemara co, kanda ne deipsi mi er dona tep, kandi deipmum kaber ner mipu, ne karepnemempa, ne midi aner dopkamre,’ pepra deipudi moropu. Moropu dinin, ataru dipapu, co mutmuta neitamaida, bura tara gam kurur kecadi, ametek takke keca deiki yanipdongopra taikudi, sikke utopu kuptaprapudi, tali embeue.”

10 “Ange utopu, kanda Amazia tep pepkene. Kanda tek sisi Edom mutu kurami jen talena neng yuma, konum pomumdi amutu neitamai yuma tep, bisbisa kapmume. Akumuma cadi, dipru eremna deiki di, sal nong-nong kunmareme. Ada, kandi ange kupmarema deiki di, ‘Konum kupmana,’ tenepmaremdi aupu pepmanerem do? Dinino, telep ngeda, kan adipapu dim pepra kan ati dampu kunkamrume. Ware deiyo keca tep, ikin keca ton cap, kan pe ngebo cap, tonda kandi talepmumpa kunung nesala cap, sun damaida ila kange mun keca yatupa, doproprumudi ikin weik kunkamrum do? Yuk mutu nesala tep mali upu tupa pepmemnya deiki di, ikin keca ton, sun nong deiki men yankamre do? Moupra teneprume,” pepra deipu.

11 Uda upepu dinino, Yehuda mutu tara kurami nesala talepra kuramu ngebo Raja Amaziadi, Israel mutu talepra kuramu ngebo, Yoasdi pepra deipu upuda, men gekepka cadi, yaniptapnapu kupu. Ukupu pangeda, adipu Raja Yoas, Israel tara taleamu ngebodi peipupa, er nyapu cap, er mutu jen talena neng cap, sun yuma buluprapidi, ‘Yehuda tara talerur ngebo mar porbenkup’ tenen keteneipidi, bisi benmai. Benmaiyanen, Yehuda mutu neitamai kwamu mutu, er si Bet-Semes mutu, Raja Amazia cap, Raja Yoas cap, sun jen talena neng yuma capdi, ‘Popdankup’ tenen, tenpu mutu bena antapdai. 12 Antapra mar podanmai. Podanmai panenda, Raja Yoas er jen talena nengdi, sun yuma beidi, puto di popdanmai. Ukunmaiya tep, Yehuda mutu jen talena neng weika di, bena popbisipipa, Yehuda tara jen talena nengdi bura saka sepdaro, sun atipu yuk-yuk bendopi.

13 Ataruda, Raja Yoasdi mutu si Bet-Semes mutu bena, Raja Amazia tomopu. Ukupkopda, Yoas cap er jen talena neng cap, adipapu Yerusalem mutu aila ati arum damai beidi, amutu nesala dana-dana tara, ongopgenepra ila lyom beilya wiami ngeda, dua ratus (200) meter nukra, bena dakra uruptapi. Yoas cap er nyapsilip capdi, alyom gel beilya uruptapi ngeda, “Efraim yala nesala, sun wengna tep buplanda ake,” pepra, potokeiamyai di dipra, benmaiyanen, beilya wiamyai atara di, adinor dortara wiamiyai, sirik buplan potokeiamyai, aneitamai wiami lyom gel beilya yumada, urupra tapi.

14 Ukupu dingeda, kunumna weik keca emas yuma cap, perak yuma cap, Allah Yahweh er si eremna ati neitamai deiamipa, dakuamu kunumna weik keca yuma cap, tonda akati pumbon pel dona tep, deiami bung keca telepnge yuma cap, dalupra dopropu. Tonda, nimi deiyo ngebo Raja er pe ila ati neitamai deiamupa, epi keca yuma cap dalupra dopropu. Tonda, pumun taru, Raja Yehudadi tomopra ateng kouprapudi, wenemna ati deiamudi, wenemamu neng yuma tep nengeda, lyepropupa, bura saka bendopi. Ange yuma konum kupkopda, Raja Israel Yoasdi, amambul keca yuma dalupra dopropudi, tamupra Samaria mutupu doupra beu.

15 Raja Yoasdi nimi deiyo ngebo kepra, taleamu taru di kuramu keca cap, pio pe deipra puto di pel doramunge cap, upu peramunge capda, Israel tara kurami nesala, sun Raja-Raja kurami keca sengna tep, buku neitamai konum seki. Tonda, er Yoasdi Yehuda tara talepra kuramu ngebo Amazia tep, bena ila puto di popbisiamunge cap, ange yuma peda, Israel yala nesala tep, nimi deiyo kepra talerami Raja-Raja neng, si sengdirami buku neitamaipu, ange yumada, sekra deiami. Abuku sida, ‘Sejara Raja-Raja Israel,’ pepi. 16 Raja Yoas konum depu pangeda, Samaria mutu kurami nesala deiyo kepra, talerami Raja-Raja neng yuma, peirbaramyaipu bena peipi. Ukupyopda, Yoas er yo punupra Raja kuna tep nengeda, erdi deipu mi, er si Yerobeam Kedua, punupra nimi deiyo ngebo kepra, Israel tara kurami nesala talepu.

Yehuda tara kurami nesala talepra kuramu ngebo Raja Amazia depu upu

17 Uda, Israel tara kurami nesala taleamu ngebo Raja Yoas konum depu taruda, Yehuda tara kurami nesala taleamu ngebo Raja Amaziada, tupa gam kuramu. Yoas depu taru di dipra dakuramnganen, keteng tamun lima belas (15) tahun ton cap deiki di tupa gam kuramu. 18 Raja Amaziadi nimi deiyo ngebo kepra, Yehuda tara kurami nesala taleamu taru di kuramu keca cap, puto di pel doramunge cap, upu peramunge cap yumada, Yehuda tara kurami nesala tep, nimi deiyo neng kepra, talerami Raja-Raja neng si sengdirami buku neitamaipu sekra deiami. Abuku sida, ‘Sejara Raja-Raja Yehuda,’ perami. 19 Dinino, Raja Amazia gam tupa kuramu taru neitamaida, Yerusalem mutu neitamai kurami nesaladi, “Angebo Raja Amaziada, popbisipkamepe,” pepra sisingami. Yuk nengdi, ange gekepidi, er tep lap pepipa, ange konum gekepu dingeda, Amazia adipapu bura saka sepra beudi, Lakis mutu bena kuramu. Dinino, ukuamnga peda, er tep yu tenerami nengdi peipipa, nimi pona yu neng doproipipa, sundi amenda dombeidi Amaziada, adipapu Lakis mutu bena popipa depu.

20 Depupa, er nongda kuda bisam bali deiki deipra Yerusalem mutupu doupra yaidi, er co puna neng peiramyaipu, nimi deiyo neng Raja-Raja depnepa, peiramyaida, Raja Daud er mutu neitamaipu yana peipi. 21 Ukupi pangeda, Yehuda tara kurami nesala yumadi, Amazia erdi deipu mi, er si Uzia tep, “Erpu nun nimi deiyo ngebo kunkamsere,” pepra weipipa, er angebodi, er nai yo punupudi, nimi deiyo ngebo kepra, Yehuda tara talepudi kuramu. Ataruda, Uzia er kuramu keteng tamunda, enam belas (16) tahun kepka neitamaida, nimi deiyo ngebo kemna tep gonga kepu. 22 Ukupu dingeda, Uzia er nai bo Amazia konum depu taru dinin, er mi Uzia dakuramnganen, erdi Elat mutu ati arum doramyaida, menop taru uruptamipa, walangapu kuramu dinin, amutu kange di doropudi, ka tamupra ati arum lepsisikra telep kupra dopudi, Yehuda tara neitamai ton kuramu.

Yerobeam butene ngebo deiki di, Israel mutu kurami nesala deiyo kepra taleamu upu

23 Uda, Raja Yoas er mi Amaziadi, nimi deiyo ngebo Raja kepra, Yehuda tara kurami nesala taleamudi, dakuramnganen, keteng tamun lima belas (15) konum kupupa, aketeng tamun neitamai dipapu, Israel tara kurami nesala yuma taleamu ngebo, er si Raja Yerobeam Kedua, ^{▼▼Yerobeam kedua – Aupu deiyoda, er apu bo peda, asipu Yerobeam si atem sipepra karepi. Atep, er angebo tep nengeda, Yerobeam kedua pepi. Tonda, asi sengna tep, ton taruda, ‘Yerobeam 2’ sengnunge. Ton taruda, ‘Yerobeam kedua’ sengnunge. Ton tarada, ‘Yerobeam butene ngebo’ sengnunge, dinino angebo er tenpua.} aketeng tamunpu gonga kepra nimi deiyo kupudi, Israel tara talepu. Raja Yerobeam kedua ngeboda, keteng tamun denge weik, empat puluh satu (41) tahun amutu taleamudi, Samaria mutu neitamai kuramu. 24 Yorebeam butene ngebodi, Raja kepra taleamu taruda, Allah Yahwehdi, ‘Angeda malipua,’ teneramunge, talepra mali keca weik kuramu. Ada, nimi si Nebat, erdi deipu mi Raja Yerobeam menmena ngebodi, Israel tara kurami nesala deiyo kepra taleamudi, mali kecapu talepra kuramupa, sun Israel nesala epidi, sun peda malipu kuramitopu, er Yerobeam Butene ngebo peda, er apu bo Yerobeam Satu ngebodi kupungepu, amali kun kecapu pio talepra kuramu.

25 Yerobeam Butene ngebodi, yambul telep kupu ngeda, ake. Ada, Israel tara kurami nesala, sun kurami mutu ada, utara dapu tara Hamat bisi bana di, dipdongopra benamnganen, iknapi dam tara, selatan tara ila laut mokon deiamu ngeda, alaut si tep, ‘Gam kuna gum laut mokon,’ ^{▼▼Gam kuna gum laut mokon – Amutu si sengna tep nengeda, ton buku neitamai di, Ibrani upu deiki di sengamitopu, ‘Laut Arabah’ sengnunge. Ton buku neitamaida, ‘Gam kuna gum laut mokon’ sengnunge. Dinin, aupu deiyoda, alaut mokon neitamaida, ua garam pio weik kwamnga cadi, mekina keca yala-yala yuma gam men kupmanto kurure. Atep amokon pumbonda, tali gopu kurure.} perami. Ame damai di bena sekromu. Ada, Israel nesala sun nai bo Allah Yahwehdi, er upu peipnepa, lap pena ngebo, er si Yunus deiki di peiputopu kupu. Yunusda, Gad-Hefer mutu ngebo, er si Amitaidi deipu mi kuramu. Pumun taruda, Allah Yahwehdi, nabi Yunus damai yaudi, “Dorkunkamre taruda, ukupkamenge,” pepra, dorkunkamre taru kupkamu upu tep, apeiamutopu, yuk mutu yu nengdi amutu bisbisakapidi, keana taru neitamai di taleami neng, Yerobeam butene ngebodi ton bisbisakapudi, kange di tamupra dopropudi, Israel tara neitamai ton lepsisikra dopudi deipu.

26 Allah Yahwehdi, sun Israel nesala yuma, sun ila kange mun keca deikipu kuraminge tep diramudi, sun tep bicau tenepu. Tonda, sun Israel tara kurami nesala kankan neitamaida, sun melipra lyepmanto nengda, pio men kurami. Ada, sun pe kange dipapu, pel doramidi, kurami neng pe, yuk nengdi co bo deiki di kunupra, ikin pel dimamipa, tali pelpu dorami neng peda, tenpunge peda sun Israel tara kurami nesala tep, ton pio men melipmanto kurami. 27 Tonda, Allah Yahwehdi, ‘Sun Israel nesala mali weik kupmengepa, nedi sun popra sikke bukra tapnedi, pio tep tapkamne,’ men teneramudi, ange ton men peramu. Atep nengeda, Allah Yahwehdi, angebo Raja Yerobeam butene ngebo dopnedi, er tep puto karepnepa, erdi Raja keamre taru di, ‘Sunda lyepropkamne,’ teneamutopu kupu. Ange teneamutopu, kupu.

28 Uda, Raja Yerobeam Butene ngebodi, nimi deiyo ngebo kepra, taleamu taru di kuramu keca cap, pio pe deipra, ila puto di pel doramunge cap, upu peramunge capda, Israel tara kurami nesala, sun Raja-Raja kurami keca sengna tep, buku neitamai konum seki. Tonda, er Yerobeam Keduadi, Yehuda tara talepra kuramu ngebo tep, bena ila puto di popbisipudi, amutu dalupra doromunge butene, Damsyik mutu cap, Hamat-Yehuda mutu cap dopra, kange di tamupra Israel tara deipunge cap, ange yumada, Israel yala nesala tep, nimi deiyo kepra talerami Raja-Raja neng sun si sekra derirami buku neitamaipu, sekra deiami. Abuku sida, ‘Sejara Raja-Raja Israel,’ pepi. 29 Raja Yerobeam kedua konum depu pangeda, Samaria mutu kurami nesala deiyo kepra talerami Raja-Raja neng yuma peirbaramyaipu, er nong ton doupra bena peipi. Ukupipa, Yerobeam kedua, er yo punupra Raja kuna tep nengeda, erdi deipu mi, er si Zakaria, erdi er nai bo yo punupra deiyo ngebo kepudi, Israel tara kurami nesala talepu.