2Ki 16 | XteSC | STEP | Remalya erdi deipu mi Pekahdi, nimi deiyo ngebo Raja kepra, Israel tara kurami nesala taleamnganen, keteng tamun tujuh belas (17) tahun konum kupkopda, aketeng tamun neitamaida, Yotamdi deipu mi, er si Ahaz, Yehuda tara kurami nesala tep nengeda, gonga kepra Raja tekudi talepu.

2 Kings 16

Raja Ahasda, Yehuda tara kurami nesala tep, nimi deiyo ngebo kepra taleamu upu

1 Remalya erdi deipu mi Pekahdi, nimi deiyo ngebo Raja kepra, Israel tara kurami nesala taleamnganen, keteng tamun tujuh belas (17) tahun konum kupkopda, aketeng tamun neitamaida, Yotamdi deipu mi, er si Ahaz, Yehuda tara kurami nesala tep nengeda, gonga kepra Raja tekudi talepu. 2 Raja Ahas er kuramu keteng tamunda, dua puluh (20) tahun kepu taru dipapu, gonga kepudi, nimi deiyo ngebo Raja kepra, Yerusalem mutu kuramudi, Yehuda tara kurami nesala tep taleamu. Amutu kurami nesala taleamu keteng tamun yumada, enam belas (16) tahun deiki di taleamu. Ahas er co puna ngebo, Raja Dauddi Israel nesala talepra telep pelpu doramu ngeda, Ahasdi men talepra kuramu dinin, Ahasda, Allah Yahwehdi, ‘Angeda mali kun keca,’ teneramunge, talepra kuramupa, Allahdi er tep telep kange men deiamu.

3 Ahas er kuramngada, menop taru Israel tara kurami nesala yuma talepra kurami Raja-Raja nengdi, sun mali keca talepra kuramitopu, Ahas er peda angepu kuramu. Ukuramudi, Ahas er mi sisa ton poprapudi, isok si eremna tep karepudi, uku dongopupa, uku di jepropu. Ukupka deiki di, ila mali keca kupu. Ada, menop taruda, Israel yala nesala Kanaan mutu wekoi taruda, sun Kanaan mutu kurami nesaladi, Allah tenena gum dipapu, pio mali pel doramipa, Allahdi anesala weneprapudi, amutu neitamai di enepra donokamo. Aenepra donokamu nesala pio mali pel doramitopu, Ahas peda, er pe mi popra, isok karepka deiki di kupu.

4 Angepu gum dinin, tonda, Ahasdi tali keca isok si eremna tep, yapi keca popra, uku dongombana cap, isok gispal dona tep, siltong telep keca uku dongombana capda, isok-isok si eremna tep, mutu deiki ketenepra deiami ati damai doupra baramu. Ada, ila-ila mutu deiki cap, tonda ila-ila co tekamnga deiyoi amutarapu, isok si eremna tep, ati doramyai, akeca doupra karerbaramudi, isokpu talepra sun si eremamudi, pio mali weik kuramu.

5 Ataru neitamaida, Siria mutu Raja kepra taleamu ila ngebo, er si Rezin cap, tonda, Israel tara kurami nesala tep, Raja kepra taleamu ngebo, er si Raja Pekah cap, yareidi ila ati arum domyai, kota Yerusalem mutu kurami nesala tep, ‘Popbisipkamep’ tenen, yana warekra poptereprei dinin, amutu taleamu ngebo Raja Ahasda, yana men popbisiprei. 6 Ataru dipu, Edom mutu taleamu Rajadi, mutu si Elat mutu kwamunge damai yana popbisipudi, amutu kurami nesala tep nengeda, enepra donokupa, sunda amutu tapra bura saka yukai bendopi. Ukupudi, akati arum cap, amutu tu capda, kange di tamupra erpu dopramu. Ukupkopda, Edom mutu kurami nesala yaidi, amutu yana taleprapidi, amutu kurami. Ayan talepra kurami nesalada, ukutaru peda tupa akununge.

7 Uda Raja Ahasdi Yehuda tara taleamu taru neitamai di, Asyur mutu nimi deiyo kepra taleamu ngebo, er si Tiglat-Pileser tep, Raja Ahasdi nimi ton wepra deipudi, aupu pepra deipupa perbei. Ada, “Neda kan pel donedi kan amutara kepnedi, kan upupu gekepra kunune. Atep nengeda, ne podan neng Raja Israel tara cap, Raja Siria mutu cap, sun jen talena neng capdi, ne damai yana mar ponmanerenga tep, ‘Kandi ne damai yatumdi, yana makupra lyepropnetum’ tenen, moropkene,” peipupa, er melimna nengdi Raja Asyur mutu tep lap perbei. 8 Aupu pepu dingeda, Raja Ahasdi Allah Yahweh er si eremna ati pumbon deiami kunumna weik keca, emas cap, perak cap, tonda Raja er pe ila ati neitamai deiamu kunumna weik keca yuma cap, doprapudi bul kemna tep karena kecada, Asyur mutu talepra kuramu Raja damai doproipu. Deiyoda, ‘Angebodi melipra lyepnetu’ tenen, kupu.

9 Ukupu pangeda, Ahasdi Asyur mutu taleamu ngebo, Raja Tiglat-Pileser tep, ‘Melipra lyepnetume,’ pepra, moropu ngeda gekepu. Ukupra gekepkopda, animi deiyo ngebodi, yana popbisipudi, Siria mutu taleamu ngebo Raja Rezin bisbisa kapudi poptapu. Tonda, Damasyik mutuda, bisbisa kapudi, Damasyik ati arum yuma cap, atara tu cap, dalupra dopropu. Ukupudi, amutu kurami nesalada, tomoprapudi, ateng koupdongopudi, ‘Anesalada, ne ikin pel dipnepa, ne pel tali donkamneng’ tenen, amutu nesala yuma doupra wenemna ati dinin, Kir mutu derirbeu.

10 Ange yuma konum kupkopda, Ahas adipapu Damasyik mutu beu ada, ‘Asyur mutu talerur ngebo Raja Tiglat-Piliter cap antapkunem’ tenen, beu. Amutu neitamai kuramu taru di, Asyur mutu nesaladi, sun tara isok karena tep, betaiamidi gam keca popra, uku dongorbaramyai, akeca, er si mesba, ange betaimaminge tep dirbeu. Dirbeudi, abetapra deiaminge yumada, moupra dipetepudi kunupra gambar sekropu. Ukupuopda, ‘Yerusalem mutu neitamai peda, autopungepu moupropkameng’ tenen, Raja Ahasdi, ‘Agambar cap, amesba donada, ukupra-ukupra donkamenge,’ pepra, lap pena upu cap sekrapudi, imam Uria damai dopra deipu.

11 Ukupu pangeda, imam Uriadi akunupetepra doroipmaunge utopu kupra betaipu. Ukupudi, Yerusalem mutu neitamai peda, autopu mesba kunai tep dopra deipu. Adopra deipu taruda, Raja Ahas Damasyik mutu di kapul tamupra Yerusalem mutu men yanmau taru di, ange yuma konum dopra gawal dakudi keteneipu. Ukupupa, Raja Ahasdi tamupra yau dingeda epu. 12 Ada, Raja Ahas Damasyik mutu di tapra, tamupra Yerusalem mutu yau dingeda, amesba imam Uriadi konum dopra deipmaunge yana epu dingeda, ange yuma moupra dipetepudi, kange deiprapudi, gam keca popkopda, amesba deiki di uku dongopu. 13 Yana konum epkopda, amesba deikida, Ahasdi, yapi keca popra duyaudi, uku dongopu. Tonda, roti kwaneng dana deiyo keca, gandum du doupra yaudi, yana uku dongopu. Tonda, er dipapu, ‘Allah cap, nimi cap, antapra kikiman telep kupra kunkamape’ tenena tep, yuk gam keca ton popra karepudi, akeca er yapi ton dopraprapudi, amesba deiki er buru di burupra gege pepupa, amesba deiki yapi palepdongopu. Tonda, akarepmau keca yala-yala yuma deikida, ‘Pio telep kupra gawal dakun’ tenen, anggur me gwepra, amesba deiki dikra deipu.

14 Raja Ahasdi, apel yuma konum kupuopda, menop taru Allahdi, “Ne si eremkamneruma tep, gat keca er si perunggu deiki di, gam keca popnedi uku dongonkamrumai tep, er si mesba ton betapra deipkamrume. Angeda, ne Allah Yahweh, ne si eremna ati bura tara dinin, urasinai deipkamrume,” pepra deiamu. Ange dopra keteneiami ngeda, Ahasdi peipupa, er melimna nengdi Allah er si eremna ati urasin tara deipyai di, gat keca er si perunggu di keteneipi mesba dopra, yukai deipi. Ada, perunggu deiki betapra deipidi, deiami mesbada, akati urasin tara dinin, akati wengbana tep buplan damai deiamyai di dopra, gisikraprumudi, akati buplan atara, ortarada ukupu betaipi mesba deiamyai kupupa, daneitamaipu dinin, arah utarada, aperunggu mesba dopra deipi. Konum derirbeidi, ukupu dopra deipmai ngepu, Allah Yahweh er si eremnai tep deipi.

15 Ange konum dopra deipi pangeda, Ahasdi imam Uria tep upepu, “Ukupu dopra deipmange ila mesba deiki di, adipapu ne Raja cap, amutu kunung nesala yuma capdi, Allah karena tep, ipna taru gam keca popra, kareryakankamep keca cap, tonda, sintara di, gandum du bulupra Allah karena tep karenup keca cap, tonda ne Raja dipapu gam keca popnedi, uku dongoramne keca cap, gandum du karenun keca cap, amutu nesaladi uku dongona tep gam keca popra karenung keca cap, gandum du karenungnge cap, anggur me gwepra karenung me cap, ange yumada acapu uku dongoryakankamrume. Tonda, ukupu betaipi mesba deikipu, gam keca popnedi, yapi ton doupra amesba deiki di gege pepmepepa, amesba deiki palepkamrure. Dinino, menop taru di, gat keca er si perunggu deiki di dopra, deiami mesbada, ne dipapu ne karenkamne keca doupra, amesba deiki derinkamrume. Angeda, yuk nesaladi karenkamenge ngeda, amesba deiki karena gume,” pepu. 16 Raja Ahasdi upepu pangeda, imam Uriadi, Raja pepu upu gekepudi, er peputopu kupu.

17 Allah si eremna ati neitamaida, perunggu deiki di kereta-kereta betapra deiamidi, me mokon gwena tep, ila me mau akereta deiki di deiami ngeda, akereta-kereta dana-dana tara, dela utopu keca dopra deiaminge yumada, Raja Ahasdi peipupa, er pel melimna nengdi, akeca dakra uruptapi. Tonda, erdi peipupa, sundi ila me mau, perunggu di betaiamidi, sapi bisam urasin utopu kupra, dua belas patung betaipinge, asapi bisam bali deiki deiami yangderin keca, ila me mau er si, “Ila Laut,” pepi kecada, ange doprapidi, gisikra tu deiki dinin, gel di yakra deipyai, akwamu gel deiki dipapu bena deipi. 18 Ukupudi, ‘Asyur mutu nesala tep deiyo kepra taleamu Raja ngebo teneretopu kupnepa, er kange deipkunerure,’ tenepudi Raja Ahasdi, Allah Yahweh er si eremna ati wengbana tep, bura tara di bon potokra buplan domidi, ‘Raja erpuda, abuplan di akati wengkamrure,’ pepra, domi ngeda, uruptapudi dekdongopu. Tonda, ila nimi deiyo Raja, er pe ati pumbon ila pala opkal kapkotemipa, Sabat tumi deiki di, ‘Raja ngebodi ange amutara pel donkamrure’ tenen, ketenepra deiaminge peda, urupra tapu.

19 Uda, Raja Ahasdi nimi deiyo ngebo kepra, Raja taleamu taru di kuramunge cap, upu peramunge cap, ange yumada, Yehuda mutu kurami nesala talepra kurami Raja-Raja neng, sun si sekra derirami buku neitamaipu sekra deipi. Abuku sida, ‘Sejara Raja-Raja Yehuda,’ perami. 20 Ahas dakuramnganen, er konum depu pangeda, menop taru Yerusalem mutu neitamai taleamu Raja Daud, er mutupu dinin, sun Raja-Raja neng depnepa, peirami mutupu bena peipi. Ukupyopda, Ahas er mi Hiskia, erdi er nai bo yo punupudi, Yehuda tara kurami nesala, sun deiyo ngebo kepra talepudi Raja kuramu.