2Ki 17 | XteSC | STEP | Yehuda tara kurami nesala tep nengeda, Raja Ahasdi nimi deiyo ngebo kepra taleamnganen, keteng tamun dua belas (12) tahun deikida, Israel tara kurami nesala tep nengeda, nimi si Ela, erdi deipu mi Hoseadi, deiyo kepra, Raja gonga keap taleamu. Hoseada, Samaria mutu kuramudi, er Israel tara taleamu keteng tamunda, sembilan tahun (9) deiki di talepra kuramu.

2 Kings 17

Hoseadi Israel nesala deiyo ngebo Raja kepra taleamu upu

1 Yehuda tara kurami nesala tep nengeda, Raja Ahasdi nimi deiyo ngebo kepra taleamnganen, keteng tamun dua belas (12) tahun deikida, Israel tara kurami nesala tep nengeda, nimi si Ela, erdi deipu mi Hoseadi, deiyo kepra, Raja gonga keap taleamu. Hoseada, Samaria mutu kuramudi, er Israel tara taleamu keteng tamunda, sembilan tahun (9) deiki di talepra kuramu. 2 Raja Hoseada, Allah Yahwehdi, ‘Angeda mali kun keca,’ teneramu ngeda, talepra kuramu. Ukupra mali kuramu dinin, Israel tara kurami nesala men di talepra kurami Raja-Raja nengdi, ila mali kuramitopu, Raja Hosea peda pio men kuramu. Erda yambul malipu kuramu.

3 Uda Raja Hoseada, Israel tara taleamu taru neitamai di, Asyur mutu ila nimi deiyo kepra taleamu ngebo, er si Salmaneser, erdi Israel tara yana popbisipudi, Hosea taleamu mutu tep nengeda, Salmaneserdi, ‘Amutu dalupra dopropkune,’ tenepu. Utenepka tep, aketeng tamun, aketeng tamun yumada, Raja Hoseadi, er taleramu bung keca kankan di, kunumna telep keca weika di dopra, Asyur mutu deiyo ngebopu kareramu.

4 Dinino, amenda taru ton Hoseadi Raja Mesir er sida So tep, “Kandi ne melipnetumpa, Asyur mutu ila nimi deiyo ngebo, er amutara kunmanada, yaptenedi, er tep bisbisakapteneme,” pepra moropudi, sengna keca surat sekra deipudi, er nyapu wepra deipupa, doupra bei. Tonda, Raja Asyur, er si Salmaneser tep, kunumna weik keca doupra, keteng tamun denge pio weik deiki di kareamu ngeda yapra, ton cap men karepu. Asurat sekra deipupa, yuk neng kael kepidi, Asyur ila deiyo ngebo tep lap pepipa, kael kepkopda, er Salmaneserdi, Hosea tomopra wenemna ati neitamai bena dongopu.

Asyur mutu nengdi, Samaria mutu nesala popbisipi upu

5 Raja Salmaneserdi, Hosea tomopra wenemna ati pumbon dongopkopda, daneitamaipu kuramu taru yumada, Asyur mutu taleamu ngebo Salmaneserdi, Israel tara kurami nesala kurami mutu-mutu yuma bena, warekra popbisipu. Ukupudi amutu neitamaida, ila ati arum kota si Samaria ton, ‘Akota kunge nengda, aca tapra, yukai men benkamenge. Tonda, yuk mutu nengdi akati arum men wengyakankamenge,’ teneramudi, keteng tamun weneri deiki di, akota damai warekra ongopdongomudi kalekra kuramu.

6 Apio angepu kuramnganen, amenda taru kupu keteng tamunda, Samaria mutu kurami nesala tep bisbisakapu. Ada, Raja Hoseadi nimi deiyo ngebo kepra Israel tara taleamudi mapbaramnganen, keteng tamun toupnenge (9) kepka deiki di, Asyur mutu Rajadi, amutu neitamai bena dalupra dopropudi, er cap, er jen talen neng capdi, amutu kurami nesala yuma tomopi. Akati yuma dopropidi, Israel tara kurami nesala yuma tomopra, ateng koupra, sun pe mutu Asyur mutu dubei. Salmaneserdi peipupa, er jen talen nengdi, Asyur mutu neitamai dinin, Israel nesala bokrapidi, ton tara nesalada, wilipra Halah mutu neitamai derirbei. Ton tara nesalada, Gozan mutu neitamai dinin, embaramu me si, Habor mekin pirimanai derirbei. Ton tara nesalada, wiliprapidi Madai mutu ati arum dopra kurami mutu damai derirbei.

7 Uda, ila kange mun keca, sun Israel tara kurami nesala deiki yaua deiyoda, ake. Ada, Asyur mutu jen talen nengdi, Samaria mutu kurami nesala yana popbisipidi, amutu dalupra dopropidi, sun pe mutu Asyur mutu tamupra dubeiya deiyoda, tali tep guma. Ada, Israel tara kurami nesaladi, yuk tali keca, isok-isok tep, “Nun naida ake,” pepra, isok si eremamya tepa. Tonda, pumun taruda, Mesir mutu ila nimi deiyo ngebo, Firaundi sun Israel nesala yuma tep taleamudi, ikin keca weik sun nong deiki deriramupa, sun nai bo Allah Yahwehdi kuramnga cadi, erdi sun tep lyepramudi, Mesir mutu neitamai di doupra, telepai Kanaan mutu duyanamu. Dinino, sun Israel nesaladi, Allah Yahweh er damai mali kupra deriramidi, amali kurami ngeda, Allah er si men eremamidi, tali-tali keca tep, “Nun nai boda, aca,” pepra, isok sipu eremamya deiki tep, akange mun keca sun deiki kupu.

8 Tonda, Allahdi, ‘Pio telep mutu, Kanaan mutu yuma dopra ne mawa nesala karepkamne’ tenen, menop taru Kanaan mutu neitamai kurami nesala, Allah tep teka men teneramya cadi, amutu neitamai kurami dinin, Allah erdi, amutu kurami nesala enepra donokamodi, er mawa nesala tep, Israel nesala tep karepu. Ukupra Israel nesala tep pio telep kweipu dinin, sundi ange tenena gum dipapu, Kanaan mutu neitamai kurami nesaladi, tali keca talepra si eremami kecapu, sun Israel nesala peda, akecapu talepra si eremami. Tonda, Israel nesala, sun deiyo kepra talepyakarami Raja-Raja neng capdi, mali kun keca weik talepra mali kupbaramipa, sun Israel nesala peda, epidi, angepu talepra kupbarami. Ange-ange mali kuna keca weik akwapka cadi, Allahdi sun tep wenepudi, Asyur mutu neng tep go karepupa, anengdi Israel tara nesala popbisipidi, Asyur mutu dubena deipipa, kange mun kange doupra kurami.

9 Angepu gum dinin, sun Israel tara kurami nesaladi, sun nai bo Allah Yahwehdi, ‘Angeda telepe,’ men tenemunge, pio malingepu talepra, inipra kurami pangeda, Allahdi sun tep, kange men deriramu. Amali ngeda ake. Ada, Israel nesala sun kurami mutu neitamai yumada, tali isok si eremna cap, karena cap tep, “Nun deiyo ngebo aca,” pepra, isok si eremnai ketenepra deiamidi, acapu gam keca popnedi doupra, karebaramidi si eremami. Aisok si eremamyaida, ila ati arum dopra kuramyai pe, yambul ati arum dopra kuramyai peda, amutu-amutu neitamai yumada, isok si eremna tep, Israel tara nesaladi yuk-yuk ketenepra deiamidi, isok sipu eremami. 10 Tonda, amutu neitamai yumada, ila mutu dupai yuma cap, ila co tekamnga deiyo amutara yuma capda, isok si eremna tep, ila lyom ayumnya co utopu kupra, ikidi, dopra keteneiyami. Tonda, isok si, Asyera isok ner, gat keca dopra aisok er kamo utopu kupra petupra deipembenamidi, asipu eremami.

11 Menop taru, Kanaan tara neitamai kurami nesaladi, tali kecada, isok-isok talepra, sun si eremamipa, Allahdi amutu kurami nesala enepradonokamo. Aenepra donokamu nesala, sundi tali isok si eremna cap, karena cap tep, gam keca popnedi uku dongoramitopu, Israel nesala peda, tali isok si eremna cap, karena cap tep, gam keca popnedi uku dongorami. Ukuramya tep nengeda, Allah Yahwehdi, sun Israel nesala tep, pio yu kuramu. 12 Tek sisi, Allah Yahwehdi, sun Israel nesala tep, “Isok si eremna tep, ‘Nun nai boda ake,’ pepra, sun si men eremkamrume,” pepra deiamu. “Angeda pio meme,” peiamu ngeda, ue tenpu taru dipapu men peiamu dinin, ton taru, ton taru ton, tupa-tupa, “Angeda ukuna meme,” pepra deiamupane, sun Israel nesaladi, er peiamu upu gekena gum di, tali keca tep si eremamya deiki di, Allahdi sun tep, pio yu kuramu.

13 Tonda, Allah Yahwehdi wepra deriramu neng, sun amenda taru kupkamu keca dirami neng cap, tonda erdi peipnepa, er upu gekepra, lap pena deiyo neng, sun nabi-nabi neng cap, ton taru di, ton taru di, Israel tara kurami nesala sun damai doproiamu. Ange utopu, Yudea tara kurami nesala tep, sun damai ton aneng doproiamupa, Israel neng cap, Yehuda neng cap tep, “Sundi mali kupmaruma deiki di, Allahdi sun tep yu kupmara cadi, sundi mali kunmarum keca yumada, adipapu yapropso! Amalinge yuma taprumudi, Allahdi, ‘Angeda kunkamrume, angeda pio men kunkamrume,’ pepra deiamu upupu, gekeprumudi talepra dombankamrume. Sun co puna neng tep, aupupu peramsitopu, sun ataru kurum nesala peda, angepu talepra, teleppu kunkamrume. Nedi wepra deiamsi melimna neng cap, ne upu peipnepa, gekepra lap perbarameng nabi-nabi neng capdi, aupu dopra, sun damai lap peryakaramipanen, men gekerume,” pepra lap perbarami.

14 Allah Yahwehdi aupu peipupa, er pel don nengdi bena, lap perami dinin, sun Israel yala neng cap, Yehuda yala neng capdi aupu gekena gum di, yanitamnapu kurami. Ada, men taru Israel nesala, sun co puna neng di, Allah Yahweh erdi pepra deriramu upu tep, gekena gum dipapu, teka men teneramitopu, aneitamai taru kurami nesala, sun peda gekena gum dipapu, teka pio men tenerami.

15 Ada, Israel tara kurami nesala cap, Yehuda tara kurami nesala cap, sun yumada, Allahdi pepra deiamu upuda, moupra men talepi. Tonda, sun co puna neng tep, Allahdi, “Ange-ange yumada, talepra kunkamrum dinin, angeda pio men kunkamrume. Ne pepnetopu kupmumnyopda, neda pio melipra kalengkamsene. Sunda ne nyapu sisa kunkamrume,” pepra, pedina upu deiki di peiamunge pe, tonda, “Mali keca talepra kurumupanen, amenda taru ikin keca, sun nong deiki deipkamsene,” pepra, wenemna upu deiki di peiamunge peda, sundi apepra deiamu ngeda, pio gekena gum di, yanitamnapu kurami. Ukuramidi, sun anesala dipapu tamupra, pe deiamidi, tali deiyo ton gum isok keca tep, “Nun deiyo ngebo aca,” pepra, isok si tepapu eremami. Adeiki di, sun Israel nesala peda, tali deiyo ton gum keca utopu mali kupra deridarami. Tonda, Allah Yahwehdi, “Kanaan mutu neitamaida, sun dana-dana tara kunge nesaladi, mali keca weik talepra, malipu kuramengtopu, sun Israel yala nesala cap, Yehuda yala nesala capda, ange talepra pio men kunkamrume,” pepra deiamu dinin, ange peda gekena gum di, sun dana-dana tara mali kurami nesala kuramitopu, sun peda angepu talepra mali kupbarami.

16 Tonda, sun yumadi, sun nai bo Allah Yahwehdi, “Angeda kunkamrume, angeda pio men kunkamrume,” peiamu upu yumada, yaniptamidi, banapra sun kange dipapu gat keca er sida, perunggu di doropra, akeca si eremna tep, sapi bisam mi kamo utopu kupra, butene petupra deiamidi, akeca si eremami. Tonda isok si Asyera, aisok ner er gispal dona tep, ila lyom co ton ikrapidi, aisok si eremami. Utopu tonda, isok er si Bahal, ton eremami. Tonda, im deiki neitamai di, puto weik kure keca yuma tep nengeda, ‘Akecada, mambul weike,’ teneramidi, akeca si ton eremami.

17 Angeda mali weik kurami dinin, angepu gume. Ukuramidi, Israel tara nesala cap, Yehuda tara nesala cap, sun meneng sun pe nyapu ton popra, tali isok si eremna tep, doupra benapnedi, uku dongombarami. Tonda sun anengdi, asuru kwa neng perami upu cap, amenda kupkamu keca ake,’ pepra tali pertamna neng cap, perami upu cap, isok si eremna tep meri upupuda, ila di kael kemamidi, upu perami neng capdi, perami upu gekerami. Tonda, asuru kwa nengdi deamne nesala sun sambala cap, upu sisingna neng perami upu ton gekeramidi kurami. Tonda, ‘Nimi depkameng’ tenen, ker pel dopnedi, nimi porami. Sundi aila mali keca weik puto di talepra, tupa-tupa mali kuramya cadi, sun nai bo Allah Yahwehdi, sun tep kange men deiramudi, er yu weik kuramu.

18 Sundi amali keca weika di tupa pio kuramya, tep nengeda, Allah Yahwehdi sun tep yu ila di kuramupa, erdi sun tep, moupra men kalengamudi, tapnapu kwamu. Erda sun damai ton men yakaramu. Dabal kupupa yapromu. Adeiki di, sun Israel tara kurami nesala yumada, ‘Sunda atelep mutu kunkameng’ tenen, kareamu mutu neitamai di dopra, donokamo. Adeiki di, sun Asyur mutu nengdi bisbisakapidi, ateng koupra, sun mutu tamupra dubenami. Dinino, Kanaan mutu neitamai tupa dakurami nesalada, Yehuda tara kurami nesalapu tamupa, sunda acapu tupa kurami. 19 Ukuramu dinin, amenda taruda, Yehuda tara kurami nesala peda, sun nai bo Allah Yahwehdi, “Angeda kunkamrume, angeda pio men kunkamrume,” pepra deiamu upuda, moupra men talepra kurami. Sun peda aupu ton moupra men gekerami. Men gekeramidi, sun kayapu yuk Israel nesaladi mali keca talepra kurami ngepu, sun Yehuda tara nesala peda, amali keca tepapu talepra, si eremamidi dombarami.

20 Israel yala nesaladi, ila mali keca weik kuramya deiki di, Allah Yahwehdi sun Israel yala nesala yuma tep nengeda, ‘Sunda ne nyapu sisa kunkamenge,’ teneramunge yumada, taprapudi, ange ton tupa men teneramu. Utenepudi, sun Israel nesala yuma wenemna tep, Allahdi dopra, sun podana tep nengda, ila mali yu neng sun deiki deipu. Ukupudi, sun Israel nesala tep, Allahdi ton tamupra men dirbeu. Ukupudi, sun Israel nesala tep, ‘Abena kunkameng’ tenen, kareamu mutu neitamai di tamupra dopropudi, yuk mutu dadonokamopa, sunda er damai ton men kurami.

21 Uda, Israel yala nesaladi, gonga kepra mali weik kurami ngeda ake. Ada, Allahdi er nyapu sisa, Israel nesala yala-yala yuma, tonpa kurami dinin, mali weik kuramya deiki di, erdi sun dopra bokrapudi, wilipra yuk-yuk deiamu. Ukupu dingeda, Yehuda yala nesalada, sun yukai deipu. Tonda, sun Israel yala nesala kan-kan di, wepra dopdarapudi, sun Israel yala nesala ton yukai deiamu. Ukupupa, sun Israel yala nesaladi, ‘Nun ila nimi deiyo ngebo kepra, Raja tekredi, nun damai talepkamser’ tenen, wepra deipi ngeboda, nimi si Nebat, er mi Yerobeam wepra deipipa, erdi Israel mutu neitamai kurami nesala yuma taleamu. Ukupipa, Raja Yerobeamdi mali kun kecada, pio weika di, Israel nesala deiki benepupa, sun yumadi, Allah er si eremaminge tapidi, tali kecapu, isok sipu eremamya deiki di, pio ila mali kurami. 22 Sun ayumada, Raja Yerobeam erdi pel doramungepu epidi, angepu melipra pel dombaramidi kurami. Ukuramidi, Yorebeam er mali kuramungepu, sun peda talepra kuramidi amali kecapu kupbarami. Amali keca yumada, pio men tamami.

23 Ange tep nengeda, Allah Yahwehdi sun kunaida, pio moupra men kalengamudi, ‘Sunda ne damai ton men kunkamenge. Tapne pangeda, sun yukaipu kunkamenge,’ tenemudi, go kareamupa, sun Asyur tara nengdi, yana popbisipi. Ukupya deiki di, ‘Sun anesala atelep mutu kunkameng’ tenen, kareamu mutu neitamai di, doprapudi donokamo.

Ada, men taru Allah er upu peipnepa, gekepidi, er upu lap perbarami neng, sun nabi-nabi nengda, sun deiki wenemna upu pepra deiamupa, sundi Israel nesala damai yana, lap perami dinin, ange men gekeramipa, aupu peiamutopu kupu. Ada, “Israel nesala sundi ne peipsisi upu moupra men talepmum pangeda, menengada sun deiki ikin keca yarepa, doropkamrume,” peipupa, nabi nengdi lap peramitopu kupu. Atep, Israel mutu kurami nesalada, Asyur mutu ila yu nengdi, tomopra ateng koupdongopidi, sun pe mutu tamupra, wenemna ati dongona tep, Asyur mutu doupra derirbei. Adoupra derirbenamyaida, akuramitopu abuku sekmep taru peda, tupa akunmange.

Asyur mutu kurami nesalada Israel mutu wengyai upu

24 Israel nesalada, Raja Asyur di bisbisakapudi, tomopra er pe mutu tamupra, wenemna ati doupra derirbeudi, Israel yala nesala Samaria mutu neitamai kuramiyaipu, go kupka tep, sun yo punupra kuna tep nengeda, er tara nesala dopra, Kanaan tara mutu-mutupu yuma doproipu. Ada, Asyur tara di, Babel mutu cap, Kuta mutu cap, Awa mutu cap, Hamat mutu cap, tonda Sefarwaim mutu cap kurami nesala yuma tep, “Sunda Israel yala nesala kurami mutu neitamai, go weik kwapmaraida, wengbenkurume,” pepupa, Samaria mutu dorami ati-ati arum yumada, wengyaidi, aceipu kurami. 25 Dinino, Samaria mutu wengyakarami Asyur tara nesalada, Allah er nyapu sisa gum, yuk mutu yala nesala dakuramya cadi, Samaria mutu wengyai taruda, sundi Allah Yahweh tep, men kael keamiya tep, er si men eremamidi, er tep gispal men dorami. Ukuramya cadi, Allah Yahweh erdi, tali bura kuramre pus utopu kecada, ila yunge, er sida singa dopra deipupa, Samaria mutu bena kurami nesala dinin, ton tara neng weika di yana poramu.

26 Ukuraminge tep, Asyur mutu taleamu deiyo ngebo, er damai bena lap pepi. “Kandi, Samaria mutu kurami nesala tomopra, wenemnai derirbemumdi, kan pe tara neitamai di, yuk mutu kurami nesala dopra, Samaria mutu deririamumpa, dakunung nesala yumada, men di Samaria mutu kurami nesala tep, sun deiyo ngebo Allahdi, “Ne sida ukupra-ukupra eremkamnerume,” peiamupa, si eremamidi, pel dorami ngeda, kan tara nesaladi kapul men kael keami. Ada, yuk-yuk mutu di, Samaria mutu wengbei nesalada, autopunge telep kupra men kungepa, Israel nesala sun nai bodi Singa pus, ila yunge dopra deipupa, yangedi Samaria mutu neitamai bena kunung nesala weika di, yana ponunge,” pepra, Asyur tara ila nimi deiyo Raja tep peipi.

27 Upepi pangeda, Asyur mutu deiyo kepra taleamu Raja ngebodi aupu pepra deipu. “Uda, aupu pepmaneruma tep nengeda, Israel nesala, Samaria mutu kuramipa, tomopra Asyur mutu deriryanamepu nesala kan-kan di, tenpu ngebo imam pel don ngeboda, adipapu tamupra Samaria mutu doproipkurume. Sundi er angebo damai bemumdi, er tep, “Kanda tamupra Samaria mutu bememdi, ukutaruda, sun amutu kunung Asyur tara nesala yuma tep, sun si eremamrum Allah, erdi sun tep, ‘Ange-ange yumada, talepra kunkamrume. Ukupra ne si eremkamnerume,’ peiamseu upu yumada, kandi sun amutu kunkameng nesala tep, bena peteremkamrume,” pepra, Raja Asyurdi peipu.

28 Upepra deipupa, Israel yala nesala, men di Samaria mutu kurami dinin, Asyur mutu neitamai tomopra dubenamidi, wenemna ati derirbei nesala kan-kan di, imam pel doramu ngebo tenpu dopra, kange di tamupra, Samaria mutupu yaudi, Betel mutu yana kuramu. Amutu neitamai yana kuramudi, Samaria mutu neitamai kurami nimi bo nesala tep, “Nun Israel nesala si eremnup Allah, Allah si eremnada, ukupra-ukupra eremkamrume,” pepra peteremamu. 29 Imam ngebodi, ange yuma peteremamupa, sun Asyur tara di, yakarami nengdi, ange kael kemami dinino, sunda Samaria mutu yana kurami nesalada, men taru sun pe mutu kuramyai di, talepra si eremami isok kecapu, yana dopra deriramidi, atali keca tep, tupa si eremami. Tonda, sun isok-isok si eremna tep, patung keca petupra, deiaminge ton doupra, Samaria mutu yana kurami taruda, aisok urasin utopu patungda, isok si eremna ati domidi, akati-akati neitamaipu dopra derirbarami. Atep, Samaria mutu neitamai, ati arum yuk-yuk kurami dinin, sunda Asyur tara nesala yumada, isok si eremna keca peda, sun yuk-yukpu dopra derirbaramidi, akeca tep si eremami.

30 Ange yumada, ukupra dakuramya tep nengeda, sun Babel mutu kuramipa doupra benami. Samaria mutu neitamai bena kurami nesalada, sun isok er si Sukot-Benot, er kamo utopu kupra, patung dopra deiamidi, aisok si eremami. Ange utopu, tonda Kuta mutu kuramipanen, amutu derirbenamu nesalada, sun isok er si Nergal, er kamo utopu kupra, patung betaiamidi, aisok si eremami. Utopu tonda, Hamat mutu kuramyanen, Samaria mutu benami nesalada, sun isok er si Asima, aisok er kamo utopu kupra, patung dopra deiamidi, er si eremami. 31 Tonda, Awa mutu kuramipane doupra yanamu nesalada, sun isok-isok si Nibhas cap, Tartak cap, sun sipu eremami. Tonda Sefarwaim mutu kurami nesalada, sun isok-isok si Adramelek cap, Anamelek cap, sun si eremna tep, sun pe nyapu popra duyandi, yana uku dongomami.

32 Sun anesala yumadi, aisok-isok sun si eremami dipapu, Israel nesaladi tek sisi gam kurur Allah tep, er si peda eremami. Ukuramidi, sun Samaria tara neitamai yana kurami nesala, sunda Asyur tara dinin, yuk-yuk mutu di, yana kurami neng peda, wepra deriramipa, tali keca isok si eremna ati, doramyai neitamai ton, isok si eremna pel dorami. Tonda, yuk mem pel ton talepra dorami. 33 Anesala yumada, tek sisi Israel yala nesala sisa gume. Sunda nimi bo neng, yuk-yuk mutu di yana, Samaria mutu neitamai yana kuramya cadi, sun amutu kurami taruda, ton taruda, Allah Yahweh tep, er si eremananen, tapne dingeda, sun men di, mem pepra, tali keca isok-isok tep, si eremamidi, sun mutu sisa di, talepra kurami isok si eremananen kemami. Atep, tek sisi Allah cap, tali-tali isok si cap, tapakra si eremami.

34 Sun Asyur tara di Samaria mutu neitamai yana kurami nimi bo nengda, men di talepra si erepyakarami isok kecada, abuku sekmep taru peda, tupa talepra isok si eremnunge. Adeiki di, sunda Allah Yahweh tep, er si telep kupra men eremnunge. Ange gum dinin, sun men di isok si eremaminge, tupa talepra si eremnunge. Tonda, Allah Yahwehdi Yakub er si tep, “Kan sida, Yakub peramkei dinin, nedi kan ukupu si Israel karepkene,” pepra, pemu ngebo, er Yakubdi deipupa, dadeipdanen yakarami nesala tep, Allahdi, “Sunda, ange kunkamrume, angeda pio men kunkamrume,” pepra deiamu upu cap, “Ne gispal dona tep, pel donkamrum ngeda, angepu ukupra-ukupra apel donkamrume,” pepra deiamu upu cap yumada, sun Asyur tara di yana, Samaria mutu neitamai yana kurami nesaladi, ange yuma men talepra kununge.

35 Uda, Yakubdi deipupa, dadeipdanen yakarami nesala yuma tep nengeda, Allahdi peiamu. “Sunda ne mawa nesala, Israel yala nesala kuruma tep, ne cap, sun cap, kikiman telep kupra kuna tep nengeda, ukupra-ukupra kunkamrume,” pepra, pedina upu deiki di, konum pepra deiamu. Aupu pepka deiki di, ateng koudongomameng utopu upu pepra deipudi, koupdongomnga cadi, angeda men gum kupmanto. Apedina upu neitamaida upepke.

“Sun Israel yala nesalada, yuk tali-tali keca, isok si ton pio men eremkamrume. Tonda, sundi tali isok si eremna tep, gutam tu dipdongopra, si men eremkamrume. Autopu tonda, sundi tali isok gispal dona tep, isok-isokdi ‘Ukupkurume,’ penge upuda, gekepra pio men kunkamrume. Isok si eremna tep, mem pel yala-yala yuma, pio men donkamrume. Tonda tali isok-isok, sun si eremna tep, gam keca popnedi, doupra kareryamumdi, yana uku men dongonkamrume. 36 Ange-ange yuma pio gum dinin, sun Israel yala nesala yumadi, ne tepapu, Allah Yahweh ne sipu eremkamnerume. Men taru sunda Mesir mutu neitamai kuramrumpa, amutu ila ngebodi, ikin pel sun nong deiki deriramupa, kange mun kange doupra kuramrum dinin, ne ila buru puto deiki di doupra, atelep mutu duyanamsisi. Atep nengeda, ne sipu sundi eremnemumdi, ne damai gutam tu dipdongopra, ne sipu eremkamnerume. Tonda, ne gispal dona teppu, gam keca poprumudi, doupra kareryakaramnemumdi, uku dongonkamrume.

37 Tonda ne Allah Yahwehdi sun tep, “Angeda kunkamrume, angeda pio men kunkamrume,” pepra deiamsisidi, gel pala deiki di sekra deiamsi upu cap, uda nedi, “Ne cap, sun cap, kikiman telep kupra kuna tep nengeda, ukupra-ukupra kunkamrume,” pepra pedina upu deiki di pepsisi upu cap, tonda, “Ne gispal dona tep pel donkamrum ngeda, ukupra-ukupra apel donkamrume,” pepra, deiamsisi upu cap yumada, sundi moupra talepmumdi, angepu dukdongopra kunkamrume. Aupu yumada tamna gume. Yuk isok-isok si ton, pio men eremkamrume.

38 Tonda, Ne Allah Yahwehdi, sun Israel nesala tep, “Sunda ne mawa nesala, ne nyapu sisa kunkamruma cadi, ne cap, sun cap, kikiman telep kupra kuna tep nengeda, ukupra-ukupra kunkamrume,” pepra, pedina upu deiki di pepsidi, peipdanamupu upuda, pio men lumdongonkamrume. Moupra angepu talepra kunkamrume. Tonda, yuk isok-isok si ton, yuk mutu nengdi, ‘Nun nai bo ake,’ pepra, si eremnung keca tep, si pio men eremkamrume. 39 Neda, sun nai bo sisa, Allah Yahweh kununa cadi, sundi ne tepapu, moupra talepnemumdi, ne sipu eremkamnerume. Nepu talepra kunemum pangeda, sun podan nesala yuma, sun damai di lyepra dopropkamsene. Telep kupra kaleksenedi, pio teleppu kweipkamsene.

Allah Yahwehdi, Israel yala neng yuma tep, aupu yuma peipu.

40 Allah Yahwehdi, sun Israel yala nesala tep, aupu yuma peiamu dinino, sundi er peiamu upu moupra gekena gum di, yanitamnapu kuramidi, mali weik kurami. Sun menop taru di amutu kuramidi, tali-tali keca talepra, si eremami kecapu, tupa taleramidi, si eremamitopu, mali mem pel tupa dorami. 41 Tonda, Asyur tara di, Israel nesala kurami mutu neitamai yana, kurami nesalada, sundi ton taruda, Allah er si eremananen, tapnedi, ton taruda tali-tali isok sun men di si eremami kecapu pio si eremami. Ukuramitopu, sundi nyapu deiamipa, dadeipdanen yakanung nesala peda, ataru peda, tupa mali kecapu talepra, si eremamitopu, atumi peda tupa talepra angepu kunmange.