2Ki 18 | XteSC | STEP | Israel nesala bokrapidi, yuk-yuk kurami taru neitamaida, tenpu ngebo er si Hoseadi Israel nesala dinin, itara mutu kurami nesala taleamudi sun Raja kuramu. Er nai boda Ela kuramu. Atarupu dinin, Hoseadi Israel nesala itara mutu nesala taleamnganen, keteng tamun weneri konum kupkopda, ataru di gonga kepra, Yehuda tara neitamai, utara mutu kurami nesala, sun ila nimi deiyo ngebo Raja Hiskia kuramu. Er nai boda Ahas kuramu. Er ninda, Zakaria er ner mi Abia kuramu.

2 Kings 18

Yehuda tara taleamu ngebo Raja Hiskia tep, seki upu

1 Israel nesala ^{▼▼Israel nesala – Buma di lap pen upu, kesimpulan ngeda ake. Pumun taruda, Israel nesala yumadi pedanmaiya cadi, neitamai bokrapidi, yuk-yuk wilipropidi, yuk-yuk kurami. Ton tara nengda, Yehuda tara neitamai, dutara mutu kurami. Ton tara nengda, Israel mutu neitamai itara mutu neitamai kurami. Atep nengeda, sun ila nimi deiyo neng buteneprei. Tonda, sun deiyo nengda butene cadi, aRaja neng sun ila ati arum kuramreiyaida, yuk-yuk kuramrei. Israel tara kurami neng, sun ila ati arum deiyoida, Yerusalem mutu kwamu. Yehuda tara kurami neng, sun ila ati arum deiyoida, utara mutu Samaria mutu kwamu.} bokrapidi, yuk-yuk kurami taru neitamaida, tenpu ngebo er si Hoseadi Israel nesala dinin, itara mutu kurami nesala taleamudi sun Raja kuramu. Er nai boda Ela kuramu. Atarupu dinin, Hoseadi Israel nesala itara mutu nesala taleamnganen, keteng tamun weneri konum kupkopda, ataru di gonga kepra, Yehuda tara neitamai, utara mutu kurami nesala, sun ila nimi deiyo ngebo Raja Hiskia kuramu. Er nai boda Ahas kuramu. Er ninda, Zakaria er ner mi Abia kuramu.

2 Yehuda tara nesala kurami mutu taleamu ngebo Hiskia, er umurda keteng tamun 25 tahun konum kupupa, ataru dipu erepra tekeipipa, gonga keprapudi, Yehuda tara kurami nesala sun ila nimi deiyo ngebo Raja Yehuda yala nesala kurami mutupu talepra kuramu. Sun deiyoida, ila ati arum sida Yerusalem mutu kuramudi denge weik 29 keteng tamun deiki di amutu nesala taleamu. Hiskia, er nin si ada, Abijah kuramu. Abijah er nai bo sisada, Zekaria kuramu. 3 Uda, Hiskiada, er apu bo Raja Daud kuramutopu, pio dumsisi ngebo kuramudi, Allah er si Yahwehdi, ‘Ange telepe,’ teneramunge yuma moupra taleramudi teleppu kuramupa, Allahdi er tep kange deiamu.

4 Hiskiadi telep kupra kuramu ngeda ake. Yehuda tara kurami nengdi, Allah er si eremna tep, mutu gon deiki ati domyai bena gam keca popra Allah er si eremna tep karerami dinin, akati tep ngeda Allah pumun taru di, ‘Angeda men kunkamrume, ukunada meme,’ pepra deiamu. ^{▼▼mutu gon deiki ati domi – Anengda, ‘Allah er si eremna tep, gam keca popmepedi, er tep karenkamepe’ tenen, mutu gon deiki akati domidi welepra karerbarami dinin, pumun taruda, Allahdi, “Ukuna meme. Angeda men kunkamrume. Nedi ‘Ace pua’ pepsene mutupu, ne si deipkamne mutupu yana ne gispal dona tep, karen keca karenkamnerumdi ne si eremkamnerume. Yukai gume,” konum peiamu. Atep nengeda, sundi akati-akati tupa welepra embarami ngeda, mali weik kurami.} Atep, akati-akati yumada, Hiskiadi urupra daktapu. Tonda, anesaladi, ‘Isok si eremkamep’ tenen, mambul gel dopra mawa deriraminge yumada, Hiskiadi taikrapudi, sikke bukra tapudi, gum kupra deipu. Tonda, ‘Isok ner er si Asyera si eremkamep’ tenen, lyom co ikra deiamidi isok si eremamyaida, alyom co yuma Hiskiadi, aco kweptapu.

Ton ngeda, pumun taru Israel nesalada, me cap, nimi cap pio men kuramu mutu, tali embarami taruda, yu baldi toramupa, nimi weik deramipane, Allahdi peipupa, Musadi gat keca er si tembaga doprapudi bal urasin utopu keca petupra deipudi, lyom co deiki deipu. ‘Akecada ila mambule,’ teneramya tep, gat keca doramidi, bal urasin utopu keca petupra deiya si eremamidi, akeca damai mororamya cadi, mali keca pio weik kurami. ^{▼▼bal – Pumun taru Israel nesala me cap, nimi cap men kwuamu mutu, katuai mutu tali embarami taruda, yu baldi si topipa, nimi weik deramipane, Allahdi peipupa, Musadi gat keca, er si tembaga doprapudi, bal urasin utopu keca petupra deipudi, lyom co deiki deipu. Deipupa, pu jeramu neng akeca dipra teka tenerami nengda, Allahdi kweteramu. ‘Akeca men epkupe’ tenen, men epi nesalada, sun derami. Dinino, Israel yala nengdi, akeca dopra, er si Nehustan peramidi, akeca tep si eremamidi, mororami ngeda, pio mali weik kurami. Amenda taru sun Israel neng cap, Yehuda yala neng capdi, gat keca dopra, bal urasin utopu keca petupra deriramidi, akeca damai er si erepra mororamya cadi, pio mali weik kurami. Angeda, Allahdi, ‘Ne pio songe,’ teneramu. Atep nengeda, Hiskiadi akeca utopu keca yuma dopra dakrou.} Ukuramya tep, sun Yehuda tara nengdi, gat keca dopra abal urasin utopunge ton petupra deriramidi, akeca si tep Nehustan pepra si peramidi, ‘Nun moronup kecada erdi gekepseredi, makunkamser’ tenen, nintong telep keca uku dongopra, akeca si eremamidi mororami. Ukuramya deiki di, pio mali kuramya tep, Raja Hiskiadi abal urasin utopu keca petupra derirami ngeda dopra daktapudi, gum kupra deipu. Ada, ‘Yehuda yala nesalada, kange di ton cap akeca si erepnung’ tenen, daktapudi gum kupra deipu.

5 Uda, Raja Hiskiadi atelep pel doramunge yuma deiyoda, ake. Ada, Raja Hiskiadi, Allah er si Yahweh tep pio teka teneramnga cadi apel doramu. Erdi, ‘Gume, Allah er si Yahwehdi, nun Israel nesala yuma pio kalekra melimamseu Allahda, er tenpua,’ teneramnga kupu. Yehuda tara kurami nesalada sun Raja neng weik ton akurami dinin, sun yuk-yuk Raja nengda er utopu gume. Hiskiada pio telep ngebo kuramu. Er kapul men deiami taru pe, er konum deipipa, nepudi Yehuda nesala taleramu taru dinin, amenda taru peda, er utopu ngebo ton men kurami. Pio telep ngeboda er tenpua.

6 Hiskiada, ‘Nun nai Allah er si Yahweh, er tenpu tepapu moupra talepnedi, er amutarapu pio kunkamne. Er tep tamna gum dipapu, Yahwehdi peiamseu upu moupra talepnedi, angepu kunkamne,’ teneramu. Tonda, ‘Allah er si Yahwehdi, Musa tep, “Angeda kunkamrume, angeda ton men kunkamrume,” pepra deiamu upu, angepu talepnedi dombankamne,’ teneramu.

7 Hiskiadi ukuramnga tep nengeda, Allahdi er tep pio melimamu. Ada, Allah er si Yahwehdi, Hiskia tep melimamnga deiki di, erdi ware yala pel do yuma, er pel doramunge yumada nong kuamupa, pio teleppu kuramu. Tonda, Asyur tara neng sun taleamu ngebodi, ‘Yehuda tara nesala popbisipnedi, aneng ne amutara pio kungedi, ne dipne pelpu tali pel donkamnenge,’ teneramu dinin, Hiskiadi, ‘Ange pio men kunkamne,’ tenepka cadi, Asyur mutu ila nimi deiyo ngebo er upu men gekeramudi, angebo tep yanirtamamudi, Raja Asyur mutu ngebo er pel men doramu.

8 Tonda, Hiskiadi, sun podan neng, Filistin neng tep popra bisbisa kamamu. Ware mutu do yuma, er taleamu tara neitamai tali wai dam kalengna tep lyom ati wiaminge damai do, ila ati arum domidi, ‘Mali neng tali lupra poryasenung’ tenen, lyom gel beilya ongopgenepra wiaminge damai di do, er taleamu mutu yuma neitamai dinin, ortara Gasa mutu pe, amutu damai peda, Filistin tara neng porbisiramu.

9 Uda, Hiskiada ila nimi deiyo ngebo Raja kuramudi, Yehuda yala nesala taleamnganen, anesala taleamu taruda, keteng tamun dumbaringe konum kupkopda, ataru dipu, Israel tara nesala sun ila nimi deiyo ngebo er si Hoseada, keteng tamun yoneitam bari deiki di Israel neng konum taleramu. Hosea er nai boda, pumun taru Israel nesala sun deiyo ngebo Ela kuramu.

Tonda atarupu Asyur mutu neng, sun nimi deiyo ngebo er si Salmaneser kuramu. Raja Asyur mutu ngebo Salmaneser kuramudi, er nyapsilip yuma buluprapidi, Raja Hosea kuramngai Samaria mutu warengbei. Amutu damai yai dingeda, ‘Israel nesala sun ati arum di bura tara jen kirbenung do, bura saka benung do?’ tenen, ongopgenepra deipra kupmai. Ukurami di, dapio tupa kunmaipa, Yehuda yala nesala yukai men benmanto kurami.

10 Ukupra dakunmaiyane, pio dakunmaipane, keteng tamun weneri konum kupkopda, sun Asyur mutu jen nengdi, Samaria ati arum yuma popbisipidi dopropi. Ange tep nengeda, Yehuda tara taleramu ngebo Raja Hiskia er tara neng taleramu keteng tamun ngantan bari konum kupu pangeda, atarupu dinin sun Asyur nengdi Samaria mutu yuma popbisipi. Aketeng tamunpuda, Israel tara taleamu ngebo Raja Hoseada, er tara neng taleramudi keteng tamun 9 tahun konum kupu taru ake. Aketeng tamun tenpu dinin, Hiskiada Raja ngantan bari tahun deiki di kuramu. Tonda, Hoseada Raja 9 tahun deiki di kuramu.

11 Ataruda Asyur mutu ila nimi deiyo ngebo peipupa, er nyapsilipdi, Israel nesala tomoprapidi ateng kouprapidi, pio karen mutu sun Asyur neng kurami mutu dubena deipi. Israel neng dubei ngeda, bokrapidi, ton tara nengda, mutu si Gosan mutu dinin, ila me Habor me damai dubena deipipa dakurami. Ton nengda, ati arum sida Halah mutu dubena deipipa dakurami. Ton tara neng bokra, dubenapidi Madai yala neng kurami tara neitamai ati arum yuk-yuk derirbeipa yuk-yuk dakurami.

12 Uda sun Asyur mutu nengdi, Samaria mutu popra bisbisa kapidi, Israel tara neng dubeidi karen mutu deipinge deiyoda ake. Sun Israel nesalapu Allah er si Yahwehdi, ‘Angeda kunkamrume, angeda men kunkamrume,’ peiamu upu moupra men taleamidi, apu men kuramidi, tamamya tepa. Tonda, Allah er si Yahwehdi Musa tep ‘Ukunkamrume, ukupmumnyopda, nedi ukupra makunkamsene,’ pepra, pedina upu pepra deiamu upu yumada, ‘Nun songe’ teneramidi yaniptamya tepa. Aupu yumada gekepra bouna di men kuramidi, tonda aupu moupra men dombarami. Tamnapu kuramya tep, Allahdi karepupa, sun Asyur mutu nengdi, Israel nesala popbisipidi, Israel nesala weika di ateng koupra karen mutu dubena deipipa dakurami.

Asyur mutu ila deiyo ngebo, er si Sanheribdi, ‘Yehuda mutu neng popkun’ tenen, beu upu

13 Uda Raja Hiskia Yehuda tara taleamnganen, empat belas keteng tamun konum kupkopda, Asyur mutu deiyo ngebo, er sida Sanherib, erdi Yehuda tara neitamai kurami ati arum puto weik ngeda, ‘Poptapkun’ tenen, beudi, akati-akati yuma popbisipudi, sun ati yuma dalupra dopropudi, aneng yuma ateng koupra tomopi.

14 Ukupi pangeda, Yehuda yala nesala talepra kuramu nimi deiyo ngebo Raja Hiskiadi, nimi ton wepra deipupa, upu doupra Asyur mutu taleamu nimi deiyo ngebo Sanherib damai Lakis mutu kuramngai perbei. Angeboda Lakis mutu kunmau taru aupu perbei. “Raja Hiskiadi aupu deiki pepkere. ‘Gume neda tek sisa mali kuramsi. Uo ne nai bo kandi konum popbisimaserum dinin, ka di nun tep tapsememdi, gopropmem pangeda, neda kandi pepkamneremtopu karepkamkene. Ada kandi, “Kunumna weik keca, ukupra-ukupra karepkamnerume,” peipmanereme utopu, angepu karepkamkene. Ikin keca nun deiki deipsetum dinino, ‘Kandi men poptapkamserum’ tenen, moropkene.’ Aupuda Raja Hiskiadi upepkere,” pepi.

Upepra moropi pangeda, Asyur mutu ila deiyo ngebo Sanherib gekepudi, amenda taruda aupu pepu. “Uda amoropnemum ngeda gekepkene. Atep, ataruda, kunumna weik keca er si uang perakda, er ikinda pio men nukmanto, 5 ribu kilogram nukra perameng ngeda karepkamnerume. Tonda kunumna weik keca er si uang emasda, weike 454 kilogram nukra perameng ngeda karepkamnerume,” pepu. Upepka tep, Hiskia Yehuda yala neng sun ila nimi deiyo ngebodi, Sanherib peputopu karepu.

15 Ange tep nengeda, Hiskiadi ‘Perak weika di keteneipkamne’ tenen, Allah Yahweh, er si eremna ati pumbon deiamipa kwamu perak yuma cap, tonda Hiskia er ila ngebo kuramu ati pumbon kwamunge cap yumada, Hiskiadi doprapudi, Asyur mutu ila deiyo ngebo Sanherib tep karepu. 16 Tonda, emas keca weik karena tep nengeda, ataruda Yehuda tara taleamu ngebo Hiskiadi Allah Yahweh, ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} er si eremna ati buplan deiki palepra deipinge cap, tonda buplan dam dana-dana tara yuma palepra deipidi domi emasnge yumada doprapudi, Asyur mutu taleamu nimi deiyo ngebo Sanherib tep karepu. Akarepunge deiyoda, ada ‘Sanheribdi popserur’ tenen, er namna tep karepu.

Asyur mutu ila nimi deiyo ngebo Senakaribdi, Yerusalem mutu nesala tep, ‘Popbisipkamsene’ pepu upu

17 Asyur mutu taleamu nimi deiyo ngebo Saheribdi Lakis mutu di er jen talena neng, sun ila deiyo ngebo cap, ila deiyo neng butene cap doproipupa, aneng weneri di, Lakis mutu di tapra, Yerusalem mutu bei. Erdi doproipu nengda ake. Ada er jen talena neng, sun ila deiyo ngebo cap, Raja er mambul ati pel dona deiyo ngebo cap, tonda, Raja er me jena taru tep kalengna deiyo ngebo cap, doproipu. Aneng yumada Asyur mutu upu bongdina deiyo neng kuramya tep, aneng dopra deipupa, sun anengdi gonga kepipa, Asyru mutu jen talena neng pio weika di tapakra Yerusalem mutu bei. Lakis mutu di Yerusalem mutu bei dingeda, Raja Israel nesala kurami tara taleamu ngebo er si Hiskia damai bei.

Wengbenapidi, sun bena dopropi goda, Yerusalem ati arum doramya deiki tara dinin, bura tara mokon deiamngaida, er sida Kolam Atas mutu bei. Aca di, me embaramupa, Yerusalem mutu me bena wengna tep, keteneipi keca damai bei. Akecada, opkal me kuna deiyo ngebo er pel doramngai ban bisi tep, Padang Tukang Pena Tu Bisi perami. Yerusalem ati arum doramyai me embana tep, keteneiami ngeda abisi damai kupu.

18 Ukupi dingeda, ‘Raja Hiskia yankur’ tenena tep, ila di kongpenmai. Kong penmaipane, Raja Hiskia er pel don neng weneri gupsaka yaipa epdai. Aweneri yai nengda ake. Raja ngebo, er ati deiyo ngebo, er si Hilkia, er mi Elyakim cap, Raja ngebo er mambul keca surat sengna deiyo ngebo Sebna cap, tonda, Raja ngebo er co bo cap, kunumna weik keca cap nukra buku neitamai sengamnga deiyo ngebo bendahara Asaf, er mi Yoha cap yai.

19 Ataru dipapu Asyur Mutu jen talen neng, sun deiyo ngebodi, aweneri neng tep pepu. Sun deiyo ngebo Raja Hiskia tep apepkusen upu lap perberume. Ada, ukutaruda ila puto weik ngebo, Asyur mutu ila nimi deiyo ngebo Senakaribdi peipmar upu pepkusene. Erdi upeipmasere, “Sunda telep kange doupra, ikin gum dipapu, ‘Asyur mutu ila ngebo yanipmepedi, ange ukuptepe, ange ton ukuptepe,’ tenerumada, ware keca deiyo tep, ange tenerumudi do?

20 Raja Hiskia, kandi tenememyada, ‘Gume, nun jen talen neng weik akununga cadi, puto weik neng kunupe. Tonda, nun ila kael kemna deiki di, nimi porbana tep, ukupra kunkamepe,’ tenepra perum dinin, ange upu puto deiki dipapu teka tenepra, ‘Nimi poptepe,’ tenerumudi do? Ange tenepra perumu ngeda, tali upu pua. Sunda puto weik neng guma. Ukutaru ware ngebodi ton melipketupa, nun Asyur mutu neng popbisipsetum do? Ware ngebo melipketupa, ne tep yanipnetum do? Gume, ange men kupmanto. Neda ila puto weik ngebo tepa.”

21 “Sunda, ‘Mesir mutu nengdi melipsenga deiki di, Asyur mutu ila ngebo taleseryada tapra, er tep bisbisa kapra yaniptepe,’ tenerum dinin, tek sisa pepsene, Mesir mutu ila ngebo cap, er tara neng capdi, melipsetenga peda, ne tep yanipra men popbisipnetume. Ukupmanto ngeda pepkusene. Nimi bankunge taru maca pupdipra banmangepa, amaca neitamai gakredi, er serenge di adoupmare ngebo er pe buru pu lungamreto, sun Mesir neng peda ukunkamsenge. ‘Mesir mutu nesaladi lyepkamsenge’ tenen, sun tara kepromumdi upu sisikmumnyopda, ikin weik kupkamsere. Ada, lai takke deiki di podaramrumtopu, kupkamsere, pepne. Ange utopu, ware mutu neng do yuma, ‘Mesir mutu ila nimi deiyo ngebo Firaundi melipra lyepsetue’ tenen, er deikipu sun kange deipmengedi, er tepapu tenepmengopda, amenda taru ikin weik kunkamenge.”

22 “Ange utopu, balila deiprapmemdi, ‘Gume, nun nai Allah er si Yahwehdi melipserya deiki, Asyur mutu deiyo ngebo bisbisa kapra yaniptepe. Atep Allah er deikipu nun kange derinkamepe,’ tenepmumdi, ange pepnetumtoda, pio telepe tenepne dinin, ange ton pepkusene. Allah peda erdi ton men melipsetue pepsene. Sun tenipetepso. Sundi si eremrum Allah er si Yahwehda, er si eremna tep mutu deiki ati domidi, ‘Gam keca popra er gispal dona tep karenkamepe’ tenen, pala gel taplakra yakra derirami dinin, nimi si Hiskiadi asi eremna ati, talinge yuma uruptapudi, apala gel taplakra yakra deiaminge yuma uruptapudi, gum kupra deipu.

Ukupudi, sun Yehuda tara kurumu neng yala-yala yuma cap, kota Yerusalem neitamai kurumu neng cap tep upeipseu. ‘Gume ukutaruda, yuk-yukai yumada, Allah er si erepra gam keca popra er gispal dona tep men kareryankamrume. Yerusalem mutu neitamaipu, pala gel taplakra yakeiamrumai, acapu gam keca popra Allah tep kareryakankamrume,’ pepra deipu. Atep nengeda, sun balila kupra, ‘Allah tep moropmepepa, Allahdi melipkamser ja,’ tenepmumnyopda, Allah tep pena telep do? Gume, Allah er peda men melipsetue, pepsene. Raja Hiskiadi peipmasere.

Upepra ataruda Asyur mutu ila nimi deiyo ngebodi sun Yehuda mutu neitamai kurumu nesala yala-yala yuma cap, Yerusalem mutu neitamai kurumu nesala cap yuma tep peipmasere.” Asyur mutu jen talena neng sun ila deiyo ngebodi pepu.

23 Asyur mutu jen talena deiyo ngebo upepudi, aupu ton dukdongopra pepu. “Ange tep nengeda, ukutaruda ne deiyo ngebo Asyur mutu ila nimi deiyo ngebo, Raja Hiskia, er si deiki balila di aupu pepra deipne. Sun cap, er cap upu sisikdankamrume. Erdi denge weik, dua ribu kuda bisam karepsetuopda, sun tara neng kan-kan di, dua ribu jen neng wepra deiptumpa, akuda bisam deiki bukra, nimi porbetenge do? Ne kangeda, sun jen neng suktalepsetua tep, kuda bisam karepsetua peda, sundi jen neng denge weik men wepra deiptume.

24 Tonda sundi, ‘Ware kupkamap do?’ tenenmarum do? Sunda Mesir mutu jen nengdi, nun makuna tep, jen neng dinin, kuda bisam bali deiki bukra embarameng neng cap, kuda bisamdi gipra tu deiki embaramre keca, er si kereta kuda cap, yana melipsengepa, sun Asyur mutu neng podana tep, makupsetengopda, ‘Asyur neng popra bisbisa kaptepe,’ tenerume. Dinino, Mesir nengdi sun tep, akeca yuma kareptenga peda, nun Asyur mutu neng tep popra men bisbisa kapsetume. Ne deiyo ngebo Asyur mutu ila nimi deiyo ngebo, er amutara pel dona deiyo neng kan-kan, tenpu puto boun kuprenge peda, sundi men popra bisbisa kaptume. Sundi nun tara neng ton, ‘Popra gisikropkup,’ tenepmaserem do? Angeda pio men kuptume.”

25 “Angepu gume. Tonda, sundi nun tep, ‘Gume sun Asyur mutu neng cap, sun ila deiyo ngebo capdi, nun Yehuda tara kunup neng cap, kota Yerusalem neitamai kunup neng cap tep, poryanmasengada, sun kange dipapu kununge,’ tenepserum do? Angeda gume pepsene. Allah er si Yahwehdi, Asyur mutu deiyo ngebo tep, ‘Israel nesala porberume,’ men peipmemetuopda, er dipapu tali lupra sun tep poryasetu do? Gume, Allah er si Yahwehdi, er pedi nun deiyo ngebo tep upepue. ‘Yehuda tara kunge nesala cap, kota Yerusalem kunge nesala cap tep, porberume,’ peipmemeua deiki di, yan poryasepe.

Nun kange deiki dipapu gume. Allahdi, ‘Telepe,’ men tenerur keca kunup do? Gume. Allahdi nun deiyo ngebo peipmemeupa, sun mutu nesala yuma tep popra gum kupra deipkamep ja.” Aupu yumada, Asyur mutu ila deiyo ngebo, er jen talena neng, sun deiyo ngebodi, sun Yehuda tara kurami nengda, nimi si ton, Elyakim cap, Sebna cap, Yoha cap tep pepu.

26 Upepu pangeda, Hilkia er mi Elyakim cap, Sebna cap, Yoha cap, sun yumadi, Asyru mutu deiyo ngebo, er jen talena neng deiyo ngebo tep pepi. “Angeda telepe. Dapenmaseo. Dinino, sun amutara utopu neng, nun tep, Aram upu deiki di pepsemempa, nun yuma gekeptepedi kael kepkupe. Dinino, Ibrani upu deiki di pepsemem pangeda, nun damai kunge nesala, gel beilya deiki tara kunmangada, gekepsenunga tep, Ibrani upu pena gume,” pepra moropi.

27 Upepra moropi dinin, ajen talena deiyo ngebodi tamupra pepu. “Gume, ne deiyo ngebodi doproipneupa, sun damai yan pesenada, sun weneri cap, sun deiyo ngebo cap tepapu, dokotepneupa aupu pepsene do? Gume, Apesene upu yumada, sun gel beilya deiki bulupmengedi gekenmaseng neng peda, sun gekena atep pu dokotepneupa aupu pepsene. Abeilya deiki bukmang nengda, sun jen keca yala-yala yuma gum kuprepa, pio jen putanapu kunkamra cadi, sun pe lin cap, sun pe dei cap jepra kunkameng neng peda, ‘Sun gekenkameng’ tenen, pepsene. Tonda, sun 3 neng peda utopu kunkamrume. Sun tonpa kuruma cadi, nun mutu nengdi sun tep popra bisbisa kapsepyopda, sun jen keca yala-yala yuma pio gum kuprepa, jen putanapu kupnyopda, sun yumadi angepu kunkamrume,” pepu.

28 Asyur mutu jen talena neng, sun ila deiyo ngebodi aupu pepu dingeda, ‘Awekmange nesala yuma gekepkunge’ tenen, atekrapudi Ibrani upu deiki ila di pepu.

Sun yuma betapra gekepneso. Asyur mutu ila nimi deiyo ngebodi peipseu upuda gekepkurume. Yuk nimi deiyo neng mutu-mutu yuma talepra dakunung dinin, er puda ila puto ngebo cadi, sun deiki tara kurure. 29 Erdi peipseu upuda ake! Sun Yehuda tara talerur ila nimi deiyo ngebo Hiskiadi, ‘Sun lyepropsetene,’ pepsetua peda, er upu gekena gume. Hiskiada, er puto gum cadi, ne tep men popbisipnetue. Nedi, ‘Anesala popnedi, gawal dakamne,’ tenepsisi ada, erdi upu men seknetue. Erda puto boun ngebo kurura tepa. 30 Ange utopu, Hiskiadi sun tep, ‘Gume, nun nai bo Allah er si Yahwehdi tek sisi lyepropkamsera cadi, nun kunup mutu kota Yerusalemda, Allahdi nun mutu doupra angebo tep men karepkamre. Atep, Asyur mutu ila deiyo ngebodi men popbisipkamsere.’ Hiskiadi, aupu pepserya peda, er upu tep, ‘Teka’ tenen, men gekenkamrume.

31 Ange tep nengeda, Hiskia er upupu pio men gekenkamrume. Asyur mutu ila nimi deiyo ngebodi pepsere upuda ake. ‘Angebodi popra gawal dakamser’ tenen, ‘Er amutara telep kupra kunkamep’ tenen, ‘Yerusalem mutu tapra bura tara bepedi, er cap telep pedina upu pedidankamepe,’ tenenkamrume. Ukupra pepdapedi, ne tara kepromum pangeda, teleppu kunkamrume. Ada, nedi sun tep men popnyopda, amenda taruda sun pe wai dam yuk-yuk di anggur tapu du dakrap, me purupmumdi, anggur me jenkamrume. Ange utopu sun wai dam yuk-yuk tekamre ara co du dakrap jepmumdi, sun me mokon yuk-yuk paliamumnge neitamaipu me gwepra jenkamrume.

32 Ukuramumpane, ne amenda taru yane dingeda, sun doupra yuk karen mutu dubesenepa, sun pe mutu utopu mutu neitamai deipsenepa kunkamrume. Ada nedi karen mutu dubenkamsen dinin, akurumutopu bena kunkamrume. Akunkamrum mutuda, akeca-keca yala-yala yuma weika di kurure. Jakung wa cap, gandum wa cap, anggur tapu du wa cap, anggur me ukupunge cap, roti kwaneng cap, zaitun minyak me ketenemna tep, zaitun co du mouramre co cap, tonda, mong mokon cap yuma weik kurepa, akeca-keca yuma doropmumdi jepra, teleppu kunkamrume.

Ange tep nengeda, ‘Nunda gampu kunkamep do? Depkamep do?’ tenepmumdi wepkurume. Ne tara kepromumnyopda, posenepa men depkamrume. Pio gam kunkamrume. Gum dingeda, nedi sun tep popra gawal daksenepa pio depkamrume. Ange tep nengeda, Hiskiadi penmaser upu men gekepkamrume. Erdi tali pertamserura cadi, erdi, ‘Nun nai bo Allah er si Yahwehdi lyepkamsere,’ pepseryopda, aupuda gekena gume. Allah er si Yahwehdi men lyepkamsere.

33 Sunda moupra tenipetepso. Ware mutu nengdi, ‘Nun si eremkameng atep, melipserepa Asyur mutu ila nimi deiyo ngebodi, men popbisipsetue,’ teneramipa, nedi sun tep men popbisipsi do? Gume, amutu-mutu yuma kunge nesala tep konum popbisipsi. Sun si eremami isokdi, ne tep upu men seknei.

34 Tonda ange utopu, dan mutu do yuma, Hamat mutu nengdi isok si eremami ngeda, ukutaru dan tara kurur do? Tonda Arpad mutu nengdi si eremami isokda, ukutaru dan tara kurur do? Tonda, sun Safarwaim neng cap, Hena mutu neng cap, Iwa mutu neng capdi, si eremami isok-isokda, ukutaru dan tara kunung do? Ukuramipane, nedi, ‘Samaria mutu popbisipnedi dalupra dopropkamne,’ teneramsi ngeda, upu seknei do? Gume, amutu-amutu yuma konum popbisipsidi dalupra dopropsi. Ne buru deiki aneng taleamsidi Samaria tara yuma taleamsipane, sun isok-isokdi bisbisa kapneidi sun taleami nesala loptapi do? Gume.

35 Ange utopu, dan mutu do yumada, isokdi taleamipa kuramipane, nedi poryasidi, bisbisa kapsidi amutu nesala tomopra talepsi pangeda, sun isok-isokdi sun taleami nesala ne buru neitamai di loptapipa bendopi do? Isok pe, yuk si eremamenge nge peda, nedi popnedi taleamsi mutu, ne buru neitamai di lyeprami do? Gume, pio men kupmanto kurami. Ange tep nengeda, nedi tek pepsene. Yerusalem mutu peda, Allah er si Yahwehdi ne tep bisbisa kapneredi, men loptapra lyepkamsere. Asyru mutu deiyo ngebo, er jen talena deiyo ngebodi upepu.

36 Upepu dinin, sun Yerusalem mutu kurami nesaladi upu tenpunge pe ton tapakrap men pepi. Dim pepra gekenapu kunmai. Angeda musum di gume. Deiyoda, sun nai bo Raja Hiskiadi, “Upu tapongna gume,” konum pemua tep, aneng yumadi tali dimpepnapu kupi.

37 Ange yuma konum kupu pangeda, sun gekenmai neng, Hilkia er mi Elyakim, erda ila nimi deiyo ngebo er kuramu ati, pel dona deiyo ngebo kuramu ngebo cap, tonda Raja ngebo er mambul keca surat sengamnga deiyo ngebo Sebna cap, tonda Raja ngebo er co bo cap, kunumna weik keca cap nukra buku neitamai sengamnga deiyo ngebo cap, nimi si Asafdi deiamu ngebo, bendahara Yoha cap, sun yuma pio mambul kange doupmai. Mambul kange doupmaidi, sun yumadi sun opkal kwiripra terak taprapidi, Asyur mutu jen talena neng, sun ila deiyo ngebodi pepmaupa, gekepmai upu tep, Yehuda tara ila nimi deiyo ngebo Raja Hiskia damai lape perbei.