2Ki 19 | XteSC | STEP | ‘Asyur mutu deiyo ngebodi, Yerusalem mutu neng popnedi bisbisa kapkamne,’ peserure pepra, lap pepi pangeda, Yehuda tara kurami nesala sun nimi deiyo ngebo Raja Hiskia aupu gekepudi, mambul kange douprapudi, er opkal teraktaprapudi, mali opkal di er nong yuma pakupdongopra, ‘Angeda deiyo ton akapmarpa kupmare,’ tenena tep, Allah Yahweh, er si eremna ati pumbon bena weku.

2 Kings 19

Allah er si Yahwehdi, “Yerusalem mutu cap, amutu kunge nesala cap tep, lyepkamna tep, kware men kunkamrume,” pepu upu

1 ‘Asyur mutu deiyo ngebodi, Yerusalem mutu neng popnedi bisbisa kapkamne,’ peserure pepra, lap pepi pangeda, Yehuda tara kurami nesala sun nimi deiyo ngebo Raja Hiskia aupu gekepudi, mambul kange douprapudi, er opkal teraktaprapudi, mali opkal di er nong yuma pakupdongopra, ‘Angeda deiyo ton akapmarpa kupmare,’ tenena tep, Allah Yahweh, er si eremna ati pumbon bena weku. 2 Weku dingeda erdi ‘Sunda Allah er upu lap pena deiyo ngebo nabi Yesaya damai lap perberume,’ peprapudi, Elyakim, erda ila nimi deiyo ngebo kuramu ati, pel dona deiyo ngebo cap, tonda Raja ngebo er mambul keca surat sengna deiyo ngebo Sebna cap, tonda Allah er si eremna ati pum pel dona deiyo neng kankan, ila neng wepra deipudi, aneng tep pepra deipupa, sundi nabi Yesaya kure bei. Sun bei taruda, sun peda mambul kange douna tep, mali opkal kenekra bei. Amoz er mi nabi Yesaya damai bei.

3 Konum bei dingeda, Yesaya tep upepi. “Angeda, nimi deiyo ngebo Raja Hiskiadi upeipmare,” pepra, Yesaya tep lap pepi.

Atumida, nun ikin kange doupra kunkamape. Angeda musum tep gume. Deiyoda sun Asyru mutu nengdi nun popkamasenga tep, konum ketenepmanga damai kupmara tep pepne. Ange tep, ukupmanto ngeda, nerapudi mi deriramenga utopu kupre dinin, sun puto konum gum kuprepa, mi men deipmanto kurameng taruda, ali weik kuramretopu kupmasera tep pepne. Atep nengeda, nimidi yuk neng tep, ila di wenepmengepa, ali weik kuramretopu kupmasera tep, atumida, nun puto gum neng kunupa tep, nun ali weik kupmasere. Tonda, pio ikin kange dounmape.

4 Tonda, Asyur mutu ila nimi deiyo ngebodi jen talena deiyo ngebo tep pedinmaupa, peipmaser upu yumada, Allah er si Yahwehdi gekenkamre do, gum do? Allahda, gam pio kunkamre ngebo kurur dinin, Asyur mutu ila deiyo ngebodi, Allah er tep, pio mali upu pepra nyek-nyek pepmaue. Angeda Allah konum gekepmardi kael kepmar do? Ne kangeda, kandi er si erepra er pelpu dorume. Allahdi, amali upu gekeptuopda, ‘Tek sisi Asyur mutu talerura deiyo ngebo tep wenepkamre ja,’ tenepne. Ne walwal dinin, Allah er puda kaele.

Ange tep nengeda, ‘Allah er si Yahwehdi wenemna keca er nong deiki deipkamemere. Tonda angebodi bisbisa kapra popseryopda, Allah tep moropkamserum’ tenen, pepkene. Tonda, popserepa metekanun tupa gam kunkameng nesala tep, ‘Allahdi aneng makuptue’ tenen, ‘Nun nai Allah tep moropkamserume.’ Nun nai bo Hiskiadi aupu peipmarpa, nundi pepkepe, pepi.

5 Raja Hiskiadi dokotepu neng, nabi Yesaya damai bena aupu yuma konum lap pepi pangeda, nabi Yesaya gekepu. 6 Konum gekepu dingeda, Yesayadi aneng tep tamupra pepu. “Sundi sun deiyo ngebo tep, ‘Allah er si Yahwehdi upepmare,’ pepra lap perbenkurume. ‘Allah er si Yahwehdi upepre. Asyur mutu nimi deiyo ngebodi peipupa, er amutara pel melimna ngebodi pepmarnge tep, kware dangna pio gume. Angebodi, ne Allah tep, pio mali upu pepra ne deiki nalemna upu pepra deipmaner dinin, aupu tep kware kuna meme.

7 Tonda ne pepkusen upuda moupra gekepso. Ne Allahdi, Asyur mutu deiyo ngebo, er dipru neitamaida, er kange tamupra deipnedi pel dopnyopda, amenda taru kai upu pepmengepa, gekepyopda, er pe mutu tamupra benkamre. Konum tamupra beryopda, er pe mutu neitamai, nedi karepnepa, yuk nengdi parang ya doupra bengedi, angebo poptapkamenge. Allahdi upepmakere,’ pepra lap perbenkurume,” nabi Yesayadi pepu.

8 Amenda taru, yuk nengdi, Asyur mutu jen talena tep ila deiyo ngebo tep upepi.

Gume, kan nai bo, Asyur mutu ila deiyo ngebodi, ‘Lakis mutu konum bendopmare,’ pepra lap pepi pangeda, ajen talena deiyo ngebodi, Raja Hiskia er kuramu mutu damaida tapra bena dopu. Benmauanen, yuk mutu bena dipetepupa, Asyur mutu nimi deiyo ngebodi, yuk mutu neng, Libna neng tep, ‘Bisbisa kapkaman’ tenen, mar podanmaiyai bena epu.

9 Ataru neitamaida, Asyur mutu ila nimi deiyo ngebo, er si Sanheribdi gekenmaupa, yuk nengdi lap pepi. “Gume naio, Etiopia mutu ngebo dinin, erda Mesir mutu talepra ila nimi deiyo kurur ngebo, er si Tirhaka, erdi kan poryankukere,” pepi. Upepipa, aupu gekepka tep, ka di ton cap, nimi doproipupa, Raja Hiskia damai bena upu lap perbei. 10 Erdi peipu upuda ake.

Sunda Yehuda tara nimi deiyo ngebo, Raja Hiskia damai bemumdi upepkurume. Kanda tenipetepo. Kandi si eremrum Allahdi, pepkere upuda teka men tenenkamrume. Allahdi, ‘Yerusalem mutu cap, amutu kunge nesala capda, Raja Asyur tara ngebodi, popseredi men talepkamsere. Bisbisa kapra men poptapkamsere,’ pepra, upepsetua peda, angeda teka men tenenkamrume. Angeda mok upupu pepkera tep, angeda gekena gume.

11 Ange pepkenada musum tep gume. Pumun taru di dipra ukutaru peda, ne apu yapu, yuk Asyur mutu deiyo nengdi, yuk mutu neng weik popbisipidi, gum kupra derirami ngeda, tek sisa kan konum gekeramum do, gum do? ‘Konum gekepmume,’ tenepkene. Ware puto ngebodi, lyepketupa, kan cap, kan tara nesala cap ton men popbisiptepe do? ‘Gum,’ tenepne.

12 Ange utopu tenipetepo. Pumun taru di dipra ukutaru peda, nimi mutu-mutu yumadi, si eremami isokda akurami dinin, ne co puna nengdi, anesala yuma poprapidi, gawal dakra tapi. Sun si eremami keca yumada, tenpunge peda, anesala men lyepropi. Ukupmanto ngeda pepkukene. Sun Gosan mutu nesala cap, Haran mutu nesala cap, Resef mutu nesala cap, tonda Eden mutu nesala Telasar mutu kurami neng cap, sun ayala-ayala neng yumada tapmepu do? Gume, sun yumadi isok si eremamidi, ‘Uo makupseso,’ perami dinin, aisokdi aneng tep men lyepmanto kuramipa, nundi amutu-amutu neng yuma popra gawal dakmepu.

13 Ange utopu, Hamat mutu ila deiyo ngebo cap, Arpad mutu ila deiyo ngebo cap, tonda ila kota si Sefarwaim mutu ila deiyo ngebo cap, Hena mutu ila deiyo ngebo cap, Iwa mutu ila deiyo ngebo cap, sun yumada dan do? ARaja-Raja neng yumada, nundi konum poptapmepu. Atep, kan ton tali tapkamep do? Gume ange men kupmanto.

Asyur mutu ila deiyo ngebodi, Raja Hiskia tep aupu pepra surat sekeipudi, nimi dokotepupa, lap perbei.

Raja Hiskiadi Allah tep, “Nun nai lyepseo,” pepra moropu upu

14 Asyur mutu ila deiyo ngebodi, aupu peprapudi surat sekra deipupa, erdi peipu upu dopra deipmaipa, yuk nengdi Raja Hiskia damai dubei. Surat doupra banmai nengdi, asurat buru deiki doupmaidi, Raja Hiskia damai bena karepipa, Hiskiadi doprapudi nuku dingeda, adipapu asurat douprapudi Allah Yahweh, er si eremna ati damai wengbeu. Wengbeudi, Allah er damai asurat dopra tuai tepra deipudi, Allah tep moropu. 15 Asurat tuai tepra deipudi, Hiskiadi Allah er si Yahweh tep moropudi upepu.

Ne nai Allah kan si Yahweh, kanda Israel nesala pio makupra kalengserume. Kan dirineda, kan si eremna ati pumbon kurure. Pumun di petupra deipi keca, malaikat urasin utopu deipinge dana-dana tara tekrengedi, sun pol amutara daneitamaida kan akurume. Kanda akeca-keca deiki tara kuremdi akeca yuma talerume. Nimi tuai nengdi, amutu-amutu weik talengedi, ila deiyo neng akunung dinin, tek sisada, kan dipapu amutu yuma cap, adeiyo neng yuma cap, deiki tara kumemdi talerume. Ila puto weik ngeboda kan tenpua. Ne nai Allah kan dipapu im cap, im deiki cap, tuai cap ketekepmumdi, ila deiyo ngebo kurume.

16 Ange tep nengeda, ne nai Allah, kanda Yahweh, kan amol di betapra gekenkurume. Tonda, kan asuru di moupra dinkurume. ‘Nedi pepkuken upu gekepkunerem’ tenen, moropkene nai. Asyur mutu ila deiyo ngebo, er si Sanheribdi, ‘Allah er si yanipkamne’ tenen, pio mali upu pepra, kan deiki konum deipkere. Kanda pio gam kuna deiyo ngebo kurum dinin, angebodi ange teka tenena gum di, kan tep mali upu weik pepra derikenge ngeda, pio moupra gekepkurume.

17 Teka ne nai Allah, kan konum kael keamume. Sun Asyur mutu nimi deiyo neng yumada, yuk-yuk mutu neng yuma popra gum kupra deriramidi, tupa posenunge. Asyur nengdi, yuk neng sun mutu-mutu yuma tali lupra, upula doronunge, tonda yuk mutu nengdi pel doami keca cap, kouami keca cap, ati dominge cap yumada, mali kuprapmengedi, gum kupra derinunge.

18 Tonda, sun Asyur mutu nengdi yuk mutu neng popbisipmengedi, anengdi si eremenge isok-isok urasin utopu keca petupra deipinge yuma dopra, uku dongoramipa uku jepropu. Nun kaele, yuk mutu nengdi si eremenge kecada, tek sisa Allah gume. Akeca yumada, tali co cap, gel cap dopropmengedi petupra derinunge. Nimi buru deiki dipapu betamdinunge. Ange yumada, kanda Allah utopu gume.

19 Ange tep nengeda, ne nai Allah, kan si Yahweh tep moropkene. ‘Kandi, nun Yehuda tara kunup nesala tep lyepropsetum’ tenen, moropkene. Asyur mutu nimi deiyo ngebodi, nun pona tep konum keteneipmara tep, kandi lyepserume naio. Kan puto deiki di loptapsemempa, tuai mutu nesala ban-ban yuma neitamai di, betapra kael kepkamenge. Ada, ‘Uo tek sisi Allah er si Yahwehda, erda Allah tenpua. Yuk ton pio men kurure,’ tenepmengedi kael kepkamenge. Raja Hiskiadi Allah tep moropu taru di pepu.

Allah er si Yahwehdi, Asyur mutu nimi deiyo ngebo, Sanherib tep, pepu upu

20 Amos er mi nabi Yesayadi nimi doproipupa, Yehuda tara nimi deiyo ngebo Raja Hiskia tep lap perbei.

Israel nesala yuma pio kalekra melimrur Allah, er si Yahwehdi upepmakere. “Kandi, ‘Asyur mutu nimi deiyo ngebo Sanheribdi poryaserur’ tenen, angebo tep tenepmumdi, ‘Allah moropmum ngeda, ne Allahdi konum gekepkene.’ Allahdi upepmakere,” Yesayadi Hiskia tep pepu. 21 Upepu dingeda, aupu ton pepu. “Tonda, Allah er si Yahwehdi, ‘Asyur mutu deiyo ngebo Sanheribda, men popbisipkamkere. Ne Yahwehdi upu konum sekmamemene.’ Allahdi upepkere. Ada, er Sanherib tep aupu ton pepmaneu,” Yesayadi pepu.

Allahdi upepu. “Yerusalem ^{▼▼Yerusalem – Pumun taru sekami bukuda, mutu si Sion pepra sekami dinin, amutuda Yerusalem mutu pua. Tonda, domon upu deiki di, ‘kaber nerapu’ pepra seki dinin, aupu deiyoda, ‘Yerusalem mutu kurami neng yuma,’ tenena tep seki. Pumun taru Raja Dauddi amutu kuramu taruda, amutu si tep, Sion mutu perami dinin, amenda taruda, Yerusalem mutu peramyane, tupa penunge. Amutuda, tenpua.} mutu neitamai kunge nesaladi, kan Sanherib tep, autupra kamet pedikenunge. Kan tep nengeda, ‘Angebo nun songe,’ tenenunge. Ange utopu, amenda taru kware kupkerepa, kandi sepdara bendopkamrem taruda, Yerusalem mutu neitamai kunge nerapu yumada, kan tep, ‘Erda tali ngebo, dakwapye,’ tenenkamkenge.

22 Ne Allahdi pepkene. Kanda betapra tenepmemdi, kael kepmanerem do? Kandi pio minimna upu cap, nyek-nyek pepnemum upu cap, yuk mali upu pepra ne si deiki deipnemumnge cap, aupu peramum taruda, ware ngebo deiki di aupu pepra deipmum do? Tonda, kan dipru erepmumdi gemena deiki di, ila upu deiki mali upu pepmum taruda, ware ngebo deiki di aupu pepra deipmum do? Amali upu yuma peramumdi, ila upu deiki perumnge cap, kan dipru erepra gemena cap kupmemdi, mali upu perum taruda, ware ngebo tep perum do? Ada neda Allah, Pio Lekpu, kunune. Neda dumsisipu kunedi, Israel nesala melimnune. Ne deiki teppu amali upu penerume. Neda Allah, ne tenpu kununa tep, kandi mali upu peramum taruda, ne deiki teppu penerume. Ange betapra men kael keamum do?

23 Ange tep nengeda, kandi Raja Hiskia tep, mali upu pepra deipmumnge cap, surat sekra dokotepmumnge cap deiki di, tek sisa ne Allah tep, mali upu pepra deipnemume. Tonda, neda Allah, akeca-keca yuma talenedi, ila puto deiki di kunun dinin, kandi dipru eremna cap, gemena cap deiki di, aupu ton peramnemume. Ada, kan balila di peipnemum ngeda ake. Ada kandi, ‘Neda, ne kudadi gipra tu deiki embana keca deiki buksidi, ila mutu deiki welepsi. Libanon mutu neitamai peda, ila mutu dup welepsi. Libanon mutu neitamaida, ila lyom co, cemara co kwepsi. Tonda, sun pio urasin telep kupunge, sanobar co kwepsi. Angepu gum dinin, ‘Yuk mutu nengdi, nun mutu neitamai, pio karen mutu, men benmanto mutu,’ tenepi mutu peda, ne konum bena weksi. Tonda, Libanon mutu pio telep co palpal yumada, ne konum epra weksi,’ peipnemume.

24 Tonda, kandi, ‘Yuk nesaladi taleamidi kurami mutu amutu weike, bisbisa kapsidi, nedi ‘Me mokon deipkamre’ tenen, tu palipsipa, me mokon deipu pangeda me gwepra jepsi. Tonda, nedi Mesir mutu bisbisa kapsidi, sun matap bisi tu paliamipa, me embaramu me pirimanda, ne cap, ne jen neng weik cap, yaniramepu pangeda, tu sakupa ame yuma mali kupu, ton ngeda, cepropke,’ pepmume. Kanda Asyur mutu talena deiyo ngebodi peramum ngeda, ne Allahdi pepkene.” Allahdi pepu.

25 Upepudi, aupu ton dukdongopra pepu. “Balila kuramumdi, aupu yumada, gemena deiki di peramum dinin, neda Allahdi pepkene. Kan men gekepra kael keamum do? Pumun taru di gonga kepra, ‘Akeca yuma kupkamre,’ teneramsidi, konum keteneipsi. Ne Allah dipapu, ‘Asyur mutu deiyo ngebo deiki di, mambul pel weik dopkamre,’ tenepkesa tep, nedi kareramkesipa apel doramume. Pumun taru di, ‘Ukupra kupkamne, ukupra kupkamne,’ teneramsinge yumada, ukutaru neitamai di konum kupmane.

Ada, nedi deiyo keca kareramkesipa, amambul pel doramume. Kan dipapu gume. Atep nedi karepkesipa, ila kota weik, konum yana popbisipmume. Amutu-amutu yumada, ‘Mali neng wekra popsenung’ tenen, sun ati dan-dana tara lyom gel beilya yakra wiami dinin, agel beilya cap, akati-akati yuma capda, kandi uruptapmum pangeda, ataruda metek gelpu tupa kwapmare.

26 Ne Allahdi puto kareramkesipa, amutu-amutu nesala yuma popbisipmumpa, sunda, pio ali weik kununge. Sun puto boun kupupa, ‘Uo ware kuptepe do?’ tenen, kange mun kange donunge. Ange tep nengeda, sun amutu-amutu kunge nesala yumada, kware kupupa, tali wai dam paramre keca utopu, ukupra paramre keca utonun kununge. Sun puto gum cadi, nimi wengameng ati amnya bo deiki bolongamre keca yuma, keteng tengyarepa, bupu weik kupredi, teng-teng pepyopda, menmena di koludoramre. Puto di men bolokmanto kununge. Anesala peda ange utopu kununge.

27 Dinino, kan kumem keca yumada ne kaele. Ada, kandi, ‘Amutu kunkamne,’ tenemem mutu, ne kaele. Kandi, ‘Amutu tapra amutu benkamne,’ tenemem mutu cap, tonda, ‘Amutu tapra, yuk mutu benkamne. Amutu yankamne,’ tenememyai yumada, ne konum kael kemnune. Ange utopu, kandi ne tep, ‘Allahda ne songe,’ tenen, yu kukerepa, balila kepra gemena di mali upu weik ne tep penemem upu peda, ne konum kael kemnune.

28 Ange tep nengeda, ne pepkuken upu gekepneo. Kandi ne tep tenepra, derepmaneremdi, balila di mali upu weik penerem ngeda, ne konum kael kepkesiya tep, ila di wenepkamkene. Tonda, kandi tenepra gemena di mali upu peneremenge yumada, ne damai weleprepa, namul di konum gekepsiya tep, ila di wenepkamkene. Atep, ukupkamkene. Sapi bisam gipra dubana tep, gat keca sun u bon bisi dongopmengedi, tapu gipra dubaramengtopu, nedi kan wenemna tep, ange utopu kupkamkene.

Tonda, kuda bisam pein nengdi, ‘Akuda ne tenepne bisipu benkamar’ tenen, gat keca sun sipyal pumbon dongopmengedi, tapu gipra dubaramengtopu, nedi kan wenemna tep, ukupkamkene. Ange utopu, kan men tenepmaremngepu dinin, nedi peipnepa, ikin keca weik kan nong deiki kupkamkere. Tonda, kan embankamrem bisi yumada, ne dipapu dubenkamkene. Ukupkenepa, kan yamum bisipu tamupra dubenkamkene.” Allahdi Asyur mutu talena deiyo ngebo tep pepu.

29 Nabi Yesayadi aupu lap pepu dingeda, aupu ton dukdongopra Raja Hiskia tep pepu.

Raja Hiskia, kanda, ‘Allahdi kupkamre keca tek tenepkamrum’ tenen, peten kemna keca ukupkamker ngeda ake. Amenda kupkamne keca deiyoda, ada kandi, ‘Ange yumada, tek sisi kupkamre’ tenen, ‘Teka tenepra kael kepkamrem,’ tenena tep nengeda, nedi peten kemna keca karepkamkene.

Allahdi upepkere. “Apeipkuken upuda, kan deiki kupkamrenge tep, peten kemdina kecada ake. Ada aketeng tamunda, sun Yehuda tara nesaladi kouramrum keca gum dinin, er pedi tali bura tara paramre kecapu jenkamrume. Orketeng tamun butene ngeda, ange utonun dinin, tali paramre keca jenkamrume, Keteng tamun tenpunge er yal keca ton saka paramrepa du moupyopda, angepu jenkamrume. Ukupkamrum dinin, keteng tamun weneringe deikida, wa pepra kouamumpa, du moupyopda kipra jenkamrume. Tonda, anggur tapu du bolokmumpa, du moupre pangeda, weika di dakro jenkamrume.”

30 “Tonda domona upu ton pepkukene. Ada, nimidi kourameng keca, koupmengepa, akeca er yaten tu pumbon saka kwerepredi, nong teleppu nepra welepredi, amenda taru du telep kupra mouramretopu, Yehuda yala neng peda, weik poptapkameng dinin, yambulanunpu tupa gam kuramengepane, amenda taru ka di ton cap weik kupbankamenge.

31 Angeda tali tep men pepkene. Deiyoda, ange utopu Yerusalem mutu neitamaida, nimi weik poptapkameng dinin, metekanun ton tapmengepa, gam kunkamenge. Ada, Sion mutu gon neitamai di, men poptapmengepa, tupa gam kunkameng neng ton, yakankamenge. Ange yumada, Allah ne si Yahwehdi akeca yuma konum tenemsa cadi, ne puto deiki di ange yumada tek sisa kunupkamne ja. Neda Yahweh, akeca-keca deiki tara kunedi, ne puto deiki di, ange-ange yuma tek sisi kupkamne ja.”

Allahdi kanda Raja Hiskia tep, upepkere. Nabi Yesayadi pepu. 32 Ataru dipu, nabi Yesayadi, Hiskia tep pepu.

Allah er si Yahwehdi, Asyur mutu nimi deiyo ngebo tep, aupu pepkere. Allahdi pepu. “Tek sisi pepkene. Asyur mutu talena deiyo ngebodi, amutu Yerusalem pio men yana wekamre. Tonda er mar di ton amutu tep, tenpunge peda men dopetepkamre. Tonda nimi pon keca yuknge ton amutu damai men duyankamre. Tonda, amutu dan-dana lyom gel beilya welepnedi amutu neitamai wengna tep, tu palipra gel beilya damai pio men deipdongopredi, men welepra yana wekamre. 33 Asyur mutu nimi deiyo ngebo, er yanmare bisipu ka tamupra abisipu bendopkamre. Neda Allah, ne si Yahwehdi tek sisi pepkene. Amutu Yerusalemda, pio men wekamre.”

34 “Tonda ne Yahwehdi pepkene. Yerusalem mutuda ne akunkamna deiki di, sun cap, Yerusalem mutu cap tep, kaleknedi lelipra lyepropkamsene. Lyepsenepa, akati arum yuma akurepa, akunkamrume. Tonda, nedi apel donkamna deiyoda, ‘Akati men lyepropnyopda, yuk nengdi ne si mali penenung’ tenen, sun lyepkamne. Tonda, ne amutara pel doramneu ngebo Daud cap tep, pedina upu pepra deipsa tep, sun lyepkamne. Atep, ne si cap, Raja Daud cap tep, aupu pepra deipsene. Allah nedi, ‘Yerusalem mutu kaleknedi lyepkamne ja,’ pepsitopu tek sisi kupkamne. Allah er si Yahwehdi pepkere.” Yesayadi, Raja Hiskia tep pepu.

Uda, aupu yumada, Allah er upu peipupa, er upu lap pena deiyo ngebo, nabi Yesayadi gekepudi, surat sekra Israel nimi deiyo ngebo Hiskia tep dokotepupa, nukra kael kepu.

35 Yesayadi asurat sekra Hiskia damai dokotepupa, aupu yuma epra kael kepu taru dipu, atumi lukunda neitamaida, Allah er si Yahwehdi dokotepupa, er im deiki pel don ngebo malaikat yaue. Yaudi, Asyur mutu jen talen neng, sun opkal tenda ati pumbon mapmaipa, amalaikatdi, nimi denge pio weike, seratus delapan puluh lima ribu (185.000) neng yuma poptapu. Poptapupa, yuk neng ton mapmaiya bereku pangeda, ipna taruda, aneng denge pio weik depmaiya tep, sun nongda katuai kupupa amutu nengdi epi. 36 Ange ukupka tep nengeda, Asyur mutu ila nimi deiyo ngebo Sanherib epudi, kware kupka tep, er cap, er nyapu jen talena neng yuma capdi, aca taprapidi, er pe mutupu Niniwe mutu tamupra beudi acapu kuramu. (Ukupka tep, Allahdi, ‘Ukunkamre,’ peiputopu kupu).

37 Amutupu dapio kuramupane, tenpu tumi ton, er si eremamu isok, er si Niserok perami ngeda, aisok si eremna ati pumbon, beudi si eremau. Ukunmaupane, er nyapu Adramelek cap, Sarezer capdi, nimi pon ya dopra sun nai bo poptaprei. Sun nai poptapreidi, ‘Yuk nengdi wenepra nun popsenung’ tenen, kware kupupa, sun adipapu bura saka, Ararat mutu berei. Aneng butene konum berei pangeda, Asyur mutu talena deiyo ngebo, er pununa tep, er mi sisipu er si Esarhadon punupudi, amutu taleamu.