2Ki 2 | XteSC | STEP | Nabi Elia cap, Elisa cap, sun butene Gilgal mutu di bisi banmarei. Sun bisi banmarei taruda, Allah er si Yahwehdi ‘Ila kumanya karepnepa, akumanya di Elia dopra im deiki dubenkamre,’ tenemu taru konum damai kepu.

2 Kings 2

Nabi Elia, im deiki welepu upu

1 Nabi Elia cap, Elisa ^{▼▼Elisa – Ibrani upu deiki angebo er si Elijah perami dinin, Indonesia buku neitamaida angebo er si tep, Elisa seki. Atep, angeboda er si tep nengeda, Elisa sekmepu.} cap, sun butene Gilgal mutu di bisi banmarei. Sun bisi banmarei taruda, Allah er si Yahwehdi ‘Ila kumanya karepnepa, akumanya di Elia dopra im deiki dubenkamre,’ tenemu taru konum damai kepu. 2 Sun butene banmarei taruda, Eliadi Elisa tep, “Kanda akuyo. Neda Allah er si Yahwehdi ‘Betel mutu benkurume,’ pepmanera tepa,” pepu. Upepu dinin, Elisadi tamupra pepu. “Gume naio, tupa melipkamakene. Men tapkamakene. Angeda tali men pepkene. Allah er si Yahweh, ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} pio gam ngebo, er si deiki di pepkene. Tonda, Allahda pio tek sisa tupa gam kunkamre. Tonda, kan peda tupa gam kunmareme. Atep, adeiki di, ne tek sisi pepkene. Kan cap melipra benkamne,” pepu. Upepupa sun tonpa Betel mutu kwerepra berei. 3 Betel mutu berei taruda, Allah er upu lap pena neng, sun nabi-nabi neng Betel mutu kurami nengda, sundi ‘Elisa epkup’ tenen, yanmaipa bisi antapdaidi pepi. “Atumida, kan kael do? Allah er si Yahwehdi kan kabo Elia doupra im deiki dubenkure,” pepipa erdi tamupra sun tep pepu, “Ne kaele dinin, sundi aupu men pepkunerume. Sun dimpepso,” pepu.

4 Eliadi, Elisa tep pepu, “Neda Allah er si Yahwehdi, ‘Yeriko mutu beo,’ pepmanera tep, benkune. Dinino, kanda akuyo,” pepu. Upepu dinin, Elisadi tamupra pepu, “Kanda tupa gam kurume. Angeda tek sisi kuretopu, tek sisi upu pepkene. Tonda Allahda pio gam kure ngebo. Angeda tek kuretopu, tek sisi upu pepkene cadi, Allah er si deiki di pepkene. Kan tapra ne yukai men benkune. Ne melipkenepa tonpa Yeriko mutu benkamaneme,” pepupa, sun tonpa berei.

5 Atumipu Yeriko mutu damai bereipa, Allah er upu lap pena neng, sun nabi-nabi neng kunmaiyai bereipa, anengdi Elisa damai yanmaidi er tep pepi. “Kan konum kael kepmarem do? Ataru dipu, kan damaida, Allah er si Yahwehdi kan deiyo ngebo Elia dopra, im deiki welepkamare,” pepipa. Elisadi, “Angeda ne kaele dinin, sundi aupu men pepkunerume. Sun dimpepso,” pepu.

6 Upepupa, ataru dipu, Eliadi Elisa tep pepu. “Kanda akuyo. Neda, Allah er si Yahwehdi ‘Yordan mekin yankurume,’ pepmanera tep, benkune,” pepu. Upepupa, Elisadi tamupra pepu. “Kanda tupa gam kurume. Angeda tek kuretopu, tek sisi upu pepkene. Tonda Allahda pio gam kure ngebo. Angeda tek kuretopu, tek sisi upu pepkene cadi, Allah er si deiki di pepkene. Kan tapra ne yukai men benkune. Ne melipkenepa tonpa Yordan mekin benkamaneme,” pepupa sun tonpa berei.

7 Allah er upu lap pena deiyo neng sun dengeda lima puluh neng, Yeriko mutu di melipipa sun tonpa bei. Dinin, sunda yambul karenai di bena tekra dinmai. Ukupi taruda, sun dinmaiyaipu Elia cap, Elisa cap, sun butene Yordan mekin bena tekrei. 8 Ukuprei taruda, Elia er deiki kenekamu opkal kwiripra geteprapudi, me deiki bongopu. Ukupupa, Yordan me bokra, di kemne dutara kemne kepupa, aneitamaipu sun butene di, tu kalkal pepka deiki yanipra me men di embeuai goupreidi berei.

9 Konum me goupra ortara berei taruda, Eliadi Elisa tep, “Kanda ware keca ton putanmakerpa melipkuken do?” pepu. “Allahdi ne dopropneredi, kan damai di tapra kapul men dubenkuner taru di pepneo,” pepupa, Elisadi “Allah erdi melimkerepa, kan pel domem keca deiyongepu karepneo. Apel dona deiyo keca butene kepra karepnetume naio. Ukupnemempa, kan pel domemtopu ne peda utopu pel donkamne,” pepra Elisadi Elia tep moropu. 10 Upepupa, Eliadi tamupra pepu, “Kan moropmanerem ngeda, ila mambulnge, ikin keca moropmanerem dinin, Allahdi ne dopra im deiki dubenkamner taru, kan pe asuru di epnemem ngeda, kan moropmarem ngeda kwapkamkere. Dinin kan asuru di men epnemem ngeda, kandi moropmanerem kecada men akwapkamkere,” pepu.

11 Sun tupa bisi banmareidi aupu pepdanen banmarei taruda, dato-dato di ila mambul keca belepupa eprei. Ada kuda bisam gipra tu deiki embaramre keca, kereta kuda bisam perameng urasin utopu keca cap, tonda bali deiki bukra embarameng keca kuda bisam utopunge ton belepu. Dinino akeca butene sun urasinda uku bu jeramretopu kupupa eprei. Eprei dinin, akecada sun banmareiyai neitamai yaua deiki, sun yuk-yuk keproprei. Ukupupa, kum ila putonge yaudi, Elia erepdaro im deiki welepupa, Elisa epu. Ukupka cadi, Eliadi Elisa tapra im deiki welepu.

12 Ataruda, Elisa ange yuma epudi, ngolokra mali pepu. “Uo, ne nai, ne naio. Israel neng, sun kuda bisam deiki barameng neng cap, kudadi gipra tu deiki embaramre keca cap konum epne,” pepu. Ada Elisa cap tekmaryai di Elia dimpepupa, Elisadi angebo ton cap men epu. Men epka cadi, kange mun pio weik kupupa, Elisadi er kemamu opkal gwelepra butene kepu.

13 Ukupudi, er nai bo Elia kenengamu deiki opkal tapra beu ngeda, dopudi, tamupra Yordan me pirman yan teku. 14 Ayan teku taruda, Elia kemamu dinin, tapmau opkal doupmaua di ame deiki yan bongopudi pepu. “Allah er si Yahwehdi Elia pio meliamupa si eremamu Allahda dan do?” pepra, aopkal me deiki bongopupa, Yordan me bokra, di kemne ton, dutara kemne kepu pangeda, aneitamaida tu kalkal pepka deiki yanipudi goupra beu. Ukupka deiki di, Elisa adipapu me atara yau.

15 Yeriko mutu damai di yanmai neng, Allah er upu lap pena deiyo nengdi, tupa Elisa tep dinmaiyadi, pepi. “Uo, Elia mambul pel doramnga deiyo kecada, ukutaru Elisa deiki akunmare. Tupa kunkamre,” pepi dingeda, er damai yanmaidi, er gispal dona tep, er damai gutam tu dipdongopra yan moropi. 16 “Kan gekepsememdi kael kepo. Naio, nunda kan amutara pel dona neng utopu kunupe. Sun puto-puto nengda lima puluh neng akunmange. Atep nengeda, aneng tep upu pepmempa, kan nai bo Elia tep erbenkunge. Nun walwal dinin, ukupmantoda, Allah er si Yahweh, er Sambaladi Elia doupra banmanka mutu deiki do, uda yuk ban mutu do, dabena tapkamarura tep nengeda, erbenkunge,” pepra, Elisa tep pepi. Upepipane, Elisadi, “Gume, erbana tep, upu men peipkurume,” pepu.

17 Upepu dinin, sun dingeda, “Gume erbetenge, erbenkamenge,” pepra, tupa-tupa yan penmai. Upenmaiya tep, Elisa yambulanun ali kupupa, “Jo, dakwapye, erbana telepe,” pepupa, sundi upu peipmaipa, yuk neng lima puluh neng ton wepra deipipa, ue weneri deiki di bura mutu kuramidi erami dinin, Elia ton pio men epi. 18 Sun aneng eramya tapra, Elisa damai Yeriko mutupu tamupra yaipa, Elisadi sun aneng tep pepu. “Konuma, ne ware pemsisi do? ‘Elia tep erbana gume,’ peramsisi ngeda adano,” pepu.

Elisadi nimi men kupmantonge, mambul weik pel doramu upu

19 Yeriko mutu kurami nesaladi Elisa tep pepi. “Naio, amutu kamo diprepo. Nun mutuda pio telepe, dinin amutuda me puda pio mali cadi, nun kouramep keca nong men kurure. Tonda milo nyapuda pio weik denunge,” pepi. 20 Upepipa, Elisa gekepudi sun tep pepu. “Ukupu me mau dopra, garam apumbon yuk dongopra ne damai duyanerume,” pepu. Apeputopu kupra er damai duyai.

21 Duyaipa, ame mau doupra, sun me jeramyai ame bungna damai doupra beudi, adoupmau garam bena yamuptapudi pepu. “Allah er si Yahwehdi, sun tep upeserure. ‘Ameda telep kupra deipsene. Atep nengeda, ataru di dipra, doryankamre taru neitamai yumada, ame jepmumdi, kange di ton cap mali me tapakra jena deiki di men depkamrume. Tonda sun wa tuda telep kuprepa, sun kouramrumu keca nong keipkamre.’ Allahdi upepsere,” pepu. 22 Ukupupa, adipapu ame telep kupu. Atep nengeda, ameda ukutaru peda tupa pio telep kurure. Ada Eliadi, ‘Ukunkamre,’ peiputopu tek sisi telep kupra, tupa telep me embarure.

Betel mutu kaber nengdi Elisa tep, nalepi upu

23 Elisadi amutu tapra, dorbenamnganen, tamupra Betel mutu yankamaua tep, bisi yakanmaupa, amutu kaber neng epidi, “Delawe, delawe ayankamare. Dawelerbankurume,” pepra nalemaidi autunmai. 24 Nalemaipane, Elisa tamuprapudi, akaber neng dipetepudi, akaber neng tep, ‘Ware keca deiyo tep nalemaneng do? Allahdi aneng wenepra popkure,’ tenepudi, Allah Yahweh, er si deiki di mali upu pepra wipdongopu. Ukupka tep nengeda, adipapu bura tara ila yu keca, er sida beruang bisam butene, co palpal tara di belepra yareidi, akaber neng empat puluh neng yuma yan poprapreidi gawal dakmanto kuprei pangeda, akaber neng 42 depmanto kunmai.

25 Ataru peda Elisa bisi neitamai yakanmaua, Karmel mutu yau. Ukupu dingeda, tamupra Samaria mutu beu.