2 Kings 20

Nimi deiyo ngebo Raja Hiskiada, pu jenmauanen, tamupra telep kupu upu

1Ataru neitamaida, Israel tara taleamu deiyo ngebo Raja Hiskia, er nong deiki toro deipudi, pu weik jenmanka depmanto kupu. Depmanto kupu taruda, Amos er mi nabi Yesayadi, Hiskia damai yaudi aupu pepu, “Allah Yahwehdi, kanda nimi deiyo ngebo Raja tep, upepkere. ‘Kan pel dopmantonge yumada, adipapu dopra gawal dakurure. Akeca-keca yuma lelepra deipkurume. Deiyoda, kan pu jekerur ngeda, men gum kupkamakere. Tonda, kanda sik men kunkamreme. Adipapu depkamareme,’ peipmakere,” pepra, nabi Yesayadi yana lap pepu. 2Aupu yana pepupa, Raja Hiskia gekepkopda, adipapu tamupra, er pe ati pumbon ason deiki mapmauai di, er nong tamupmaudi, akati dela dam tara pio dinmaudi, engeprapudi, Allah Yahweh tep moropu.

3Raja Hiskia engeplulup pena deiki di, upepudi Allah tep moropu, “Ne nai Allah Yahweh, kandi ne tep tenepnemume. Ne bouna di, dipru amutara kepra kunedi, kan tepapu tupa talekenune. Yuk tali keca tep, si pio men eremamsi. Tonda, kandi pepra deipsemum upupu, moupra talepsidi, kan pelpu konum donune. Tonda, ne nai Allah, yuk keca tenena gum dipapu, kan tenemem pelpu, pio pe deipra donune,” pepra, moropudi engenmau. 4Ataru Yesayada, Raja Hiskia damai di tapra, nimi deiyo ngebo, er ila ati dam bisi neitamai baupapu, Allah Yahwehdi tamupra yana, er Yesaya tep aupu ton peipu.

5“Kan adipapu tamupra, ne nyapu Israel nesala, sun deiyo ngebo Raja Hiskia er damai bememdi, apepken upuda, bena lap pepkurume. Ada, “Neda Allah Yahweh, kan apu bo Raja Dauddi, si eremamneu ngebo kununa cadi, kan tenepmaremdi, asi me deiki di, ne tep moropmanerem ngeda konum gekepmakene. Atep, nedi kan pu jekere ngeda konum kwetepra deipkamakene. Atep, mapmamemnya berekrepa, dakunmamemnyanen, ue weneri tumi ton konum kupyopda, nedi kwetepkamkene. Kweteipkene pangeda, kan adipapu ne Allah Yahweh si eremna ati damai benkamarume.

6Tonda, nedi kan kunkamrem keteng tamunda, go ton cap tapakra karepkenepa, gam pio kunkamreme. Ada, lima belas (15) tahun ton cap mapkamreme. Kan cap, Yerusalem mutu nesala capda, Raja Asyur tara, er Salmenesardi, sun yuma talepseu ngeda, lyepra dopnedi, gum kupra deipkamne. Ukupnedi amutu neitamaida, ne ila eremna ngebo, ne ila mambul si tep, amutu kunge nesaladi, ‘Uo, nun nai bo Allahda, tek sisi ila mambul weik, puto ngebo kurure,’ pepra, ne sipu eremengedi, kunkamenge. Tonda, ne amutara kuramudi, ne pelpu doramu ngebo, Raja Daud tep, pedina upu deiki di, ‘Ukunkamkene,’ peiamsa tep, nedi sun yuma lyepropnedi, kalengkamsene,” pepra, pedina deiki di pepu.

7Yesayadi, aupu konum lap pepu dingeda, erdi Hiskia er melimna neng tep, “Kwarang co du doupra, me purupramumdi, nimi deiyo ngebo Raja Hiskia er nong deiki, toro deiamnga deiki, palepra deipmumpa, dakunmaryanen, kweteipnepa, ange gum kupkamare,” peipu. Upepka tep, Hiskia er pel melimna nengdi, Yesaya peipmautopu kupidi, asusu lingna keca dopra, atoro deiamnga deiki palepra deipi pangeda, Hiskia kange di tamupra telep kupu.

8Nabi Yesayadi apeipunge utopu, kapul men kupi taruda, Raja Hiskiadi Yesaya tep asipetepu. “Mapmanyane, ue weneri tumi Allah Yahwehdi, ne pu jenerenge tep, kwetepra derina cap, tonda, Allah Yahweh er si eremna ati neitamai bena, er tep si eremkamne tumi cap tep nengeda, ware keca peten keipnetua deiki di, ‘E, kwetepmanerpa, Allah Yahweh er si eremna ati wekra, er si erepkamtene’ tenen, kael keptene do?” pepra, asipetepu.

9Upepra asipetepupa, nabi Yesayadi tamupra pepu. Nimi deiyo ngebo Raja, kan betapra kael kemna tep, Allah Yahwehdi petenkemna keca karepkamakere. Ada, Allahdi pedina upu deiki kan tep peipkeu ngeda, ‘Tek sisi kupkamre’ tenena tep nengeda, ukupkamakere. Atep ataruda, nimi deiyo ngebo Raja, kan dingeda, ‘Ware peten kemna keca, karepnetupa, betapra kael keptene,’ tenepmarem do? Tonda, Raja Ahas di doamu Allah si eremna ati urasin tara, akati welerbanai er sida tangga, keteng asuru kukia dina tep, peten kepra deipkuker ngeda, keteng dirin akeca deiki yaryopda, morokyo (10) baris deiki di udinin deiki tara welerbenkamre do? Agum dingeda, peten kemnange tep, morokyo bari deiki, utara kwerer yankamar do? Kandi, ‘Ukuptue’ tenen, wepra pepmempa, apepkumemtopu, Allahdi ukupkamakere. Ukupyopda, adeiki dipapu kael kepkamareme,” nabi Yesayadi pepu.

10Yesayadi upepupa, Raja Hiskiadi aupu pepu. “Gume, ne kangeda ake. Allahdi keteng kukiada, keteng dirine deipredi, keteng kupkaida, utara dipapu deiprepa, kange di ton cap, itara weleryatuopda, ange deiki di kael kepkamane. Tumi-tumi yuma, itara di, utara embaramrengeda, pio ukurura cadi, angeda, ikin gume, kanam pua. Dinino, utara di, kange di tamupra itara weleptu pangeda, men kupmanto keca cadi, keteng dirine deipredi, aketeng kupkaidi, peten kemnange tep, akati tangga morokyo (10) baris deiki, utarapu deipredi, itara weleryatuopda, angeda men kupmanto keca cadi, ange konum kuprepa epnyopda, ‘E, Allahdi peipneu ngeda, tek sisi nong kupkamrure’ tenen, kael keptene. Atep nengeda, angepu kuptue,’ pepra, Raja Hiskiadi moropu.

11Upepra moropupa, nabi Yesaya gekepudi, Allah Yahweh tep, lap pepudi, “Aketeng kupkaidi, utarapu deipredi, apeten kemnange tep morokyo (10) baris di tangga utara dipapu, kange di tamupra itara betuopda, nedi ange epne deiki di, ‘E, tek sisi Allah Yahwehdi, ne tep peipneu upuda, nong kupkamaner ja,’ tenepkamne,” pepu. “Apeten kemnangepu deipnetue,” pepra moropu. Moropupa, Allahdi Raja Hiskia moropmautopu, keteng asuru kukia dina tep, peten kepra deipupa, akati welerbanai morokyo di (10) baris, utara di itara welepupa, eprei.

Upu doupra peryakana tep, Babel mutu di wepra deiami nengda, Israel mutu yai upu

12Ataruda, Babel mutu neitamai taleamu ngebo, er si Raja Baladan, er mi Merodak-Baladan, erdi gekenmaupa, yuk nengdi, “Raja Hiskiada, pu jeramnyanen, atarupu gum kupmarpa, ukuda telep kunmare,” pepipa gekepu. Gekepu dingeda, Hiskia tep surat ton sekra deipudi, nimi wepra deipupa, asurat duyakai taruda, Hiskia er karena tep, telep bung keca ton doproipupa, doupra yai. 13Babel mutu deiyo ngebodi, bung keca doproipmaupa, duyakanmai neng yumada, Hiskiadi doupra, er ati dubeu. Ukupu dingeda, er talepra deriramu kunumna weik bung keca yala-yala yumada, sun Babel mutu di yakanmai neng tep benbenepu. Akecada ake. Ada, kunumna weik keca, emas cap, perak cap, nintong telep minyak me cap, tonda malilya deiki yuknepa, jen keca tau pena tep ketenem dinung keca, er si bumbu cap, tonda jen talena nengdi douna keca, deiamunge yuma capda, sun Babel mutu di yanami neng tep, akeca yumada peterepupa, epra kael kepi. Sun aneng tep, tenpu keca peda, ton men iniptapu dinin, Hiskia er taleamu ati neitamai deiamupa dakuamu keca yumada, peterepupa, epra kael kepidi, sun pe mutu tamupra bendopi.

14Ukupu pangeda, nabi Yesayadi Raja Hiskia damai yaudi, “Sun anengda, dan mutu neng do? Tonda, sun anengda, ware keca putana tep yanmaidi, kan tep ware pepmakeng do?” pepra yana asipu. Asipupa, Raja Hiskiadi tamupra upepu, “Gume, sunda Babel mutu, pio ila karen mutu neng yanmangua,” pepu. 15Upepu pangeda, Yesayadi aupu ton dukdongopra pepu. “Sun anengda, kan talepra kurum ati neitamaida, ware-ware keca diryanmangudi, epra kael kepmang do?” pepra asipu. Upepra asipupa, Hiskiadi tamupra pepu. “Gume, nedi deipsi keca yala-yala yumada, epmangdi kael kepmange. Tonda ne talenun ati neitamai deipi keca yala-yala yumada, tenpunge peda, ton men iniptapmane. Akeca yumada peterepmanpa, sun anengdi epra kael kepmange,” pepu.

16Upepupa nabi Yesayadi tamupra Raja Hiskia tep pepu, “Allah Yahwehdi kan tep upeipmakere,” pepu. 17“Doryankamre taru neitamaida, kan co puna neng, sun Raja-Raja neng yumadi, doupra kareryakaramipa, derirami kunumna weik bung keca yala-yala yuma cap, ukuda sun ataru kurumu nesaladi doupra kareryakangepa, derirumu bung keca yala-yala yuma capda, ila karen mutu kunge neng, sun Babel mutu nengdi doupra, benkamsenge. Tenpu peda ton men tapkamsenge. 18Tonda, angepu gum dinin, kan deipmum nyapu kankan di, sun tomopra dubangepa, Babel mutu ila nimi deiyo kepra Raja talerur ngebodi, er pel dona tep doupra bangepa, er pel melimna tep, er pe ila ati damaipu pel donkamenge,” pepra, lap peipmakere. Yesayadi pepu.

19Upepupa, Raja Hiskiadi tamupra pepu. “Allah Yahweh erdi peipmakerpa, kanda ne damai yana pepneremnge tep, telepe pepkene. Aupu pepkada, Hiskia erdi tenepu ngeda, ‘E, nedi nimi deiyo kepra talenkamne taru di, yuk mutu neng tep podana gumai di, tali kange doupra kunkamne. Allahdi peipmanernge kupkamra peda, neda pio telepepu kupra, gam kunkamne,’ tenepudi pepu.

Hiskiadi nimi deiyo kepra, taleamu taru konum gawal dakunge tep, pepu upu

20Hiskiadi nimi deiyo kepra taleamu taru di, yuk yala pel ton doramunge cap, er puto deiki di pe deipra, pel doramunge cap, upu peramunge cap, tonda er taleamu mutu neitamai ila me mokon paliamudi, er ati arum neitamai yakana tep, me emban bisi ketenepra deiamunge capda, Yehuda tara kurami nesala, deiyo kepra talerami neng, sun si sengdirami buku neitamaipu sekra deiami. Abuku sida, ‘Sejara Raja-Raja Yehuda,’ pepra sekeiami. 21Raja Hiskia konum depkopda, er mi Manasye, erdi er nai bo tep yo punupra tekudi, Yehuda mutu neitamai kurami nesala, sun deiyo ngebo kepra, tekudi anesala taleramu.