2Ki 21 | XteSC | STEP | Manasye er neramu taru keteng tamunda, dua belas (12) tahun konum kupu taruda, Manasyedi nimi deiyo ngebo kepra, Yehuda tara kurami nesala tep, nimi deiyo Raja kepra taleamudi, ila ati arumda, kota Yerusalem mutu kuramu. Amutu kuramudi, Yudea tara taleamu taruda, keteng tamun lima puluh lima (55) tahun mamu. Manasye er nin sida, Hefsibah kuramu.

2 Kings 21

Manasyedi Yehuda tara kurami nesala deiyo kepra, Raja tekudi taleamu upu

1 Manasye er neramu taru keteng tamunda, dua belas (12) tahun konum kupu taruda, Manasyedi nimi deiyo ngebo kepra, Yehuda tara kurami nesala tep, nimi deiyo Raja kepra taleamudi, ila ati arumda, kota Yerusalem mutu kuramu. Amutu kuramudi, Yudea tara taleamu taruda, keteng tamun lima puluh lima (55) tahun mamu. Manasye er nin sida, Hefsibah kuramu. 2 Manasyeda, Allah Yahwehdi, ‘Angeda pio mali kun keca,’ teneramu kecada, Manasyedi er amali kun kecapu talepra kuramu. Amali kuramu kecada ake. Sun Israel nesala amutu wekoi taruda, Kanaan mutu kurami nesaladi, Allah men kael keamya cadi, sundi mali kun keca weik kuramipa, amutu kurami nesala yumada, Allahdi enepra donokamo. Aenepra donokamu mutu nesaladi, mali kuramitopu, Manasye peda, amali kecapu talepra kuramudi, mali-mali pio weik kuramu. 3 Pumun taru, Yehuda tara kurami nesaladi, isok-isok si eremamyaida, Manasye er nai bo Raja Hiskiadi dakra tamudi, konum gum kupra deiamu. Ukuamu dinino, er mi Manasyedi Raja kemna tep tekrapudi, Bahal, aisok si eremna tep, kareryakanai mesbada, kange di tamupra dopudi keteneiamu. Tonda, isok si ton Asyera, aisok gispal dona tep, ila lyom co urasin telep kupra petuprapudi, ikupa, akeca damai isok si eremyakarami. Ada, Israel mutu neitamai Raja kepra taleamu ngebo Raja Ahabdi, dopra deiamudi, si eremamutopu kupra, Manasye peda ange deiamudi isok si eremamu. Tonda, Manasye erda, im deiki cap, im neitamai cap, gam kuramre puto keca ton, ‘Sunda pio ila mambule’ tenen, sun si eremamu.

4 Tonda, Allah Yahweh erdi Yerusalem mutu tep nengeda, erdi konum pepra deiamu ada, “Yerusalem mutuda, ne kunkamnai akurure. Tonda akati pumbonda ne mawa nesaladi ne si pio eremkamnenge,” pepra deiamu dinin, Allah er si eremna tep ati damai, Raja Manasyedi isok-isok si eremna tep, gam keca popnedi, dopra uku dongonai ton ketenepra deiamu. 5 Tonda, Allah Yahweh er si eremna tep, ketenem dinaida, akati damai dinin, bura tara butene wilipra keteneiamya neitamaida, Raja Manasye erdi tali im deiki cap, im neitamai cap, puto kuramre keca si eremna tep, yapi keca popnedi, deriryakanaida, er si mesba dopra keteneiamu.

6 Angepu gum dinin, ila mali weik kupu ngeda ake. Ada, mesba dopra keteneiamyaida, Manasyedi er pe mi sisa popra, isok si eremna tep, yana uku dongomu. Tonda, Manasye er dipapu doryankamre taru kupkamrenge tep, isok puto deiki di, akeca lap pena nesala wepra derina cap, apel donai tep, ketenemdina cap, tonda konum deamenge neng, sun sambala upu sisingna neng cap, uboda, er kuramre nimi pon keca tep, ker dona pel cap, “Dor taru kupkamrenge lap peipseo,” pepra, morona neng cap, amali kurami neng yuma tep, ‘Kikiman kupedi, ne ton kael kepkamne’ tenen, ketenepra deiamu. Ukuamudi, Manasye erda, Allah er damai pio mali kuramu. Adeiki di Allah Yahwehdi, er Manasye tep, ‘Ne damai men yatue,’ tenemudi, yu weik er deiki deriramu.

7 Asyera isok ner er kamo utopu kupra, dopra keteneiami ngeda, Allah er si eremna ati neitamai deiamu. Allah Yahwehdi Raja Daud cap, er mi Salomo cap tep, sun deiki upepra deiamu. “Amutu neitamaida, Yerusalem mutu tep, akati arum kota Yerusalem cap, amutu neitamai, ne si eremna ati dopkamrumai capda, ne Allah Yahweh, ne si acapu pio eremkamnenge. Uda, Israel yala nesala kunungaida, ati arum weik akapmar dinin, akati arum Yerusalempu wepra deipne. Sun dua belas (12) neng, yala-yala yuk kungedi, sun kunung mutu yuk-yuk akuamya peda, Yerusalem mutu tenpu tep nengeda, ne si eremna atida acapu dopkameng’ tenen, konum wepra anuamsi,” Allahdi peiamu.

8 Tonda, Allah Yahwehdi, sun Israel nesala tep, “Nedi, ‘Angeda kunkamrume, angeda pio men kunkamrume,’ peiamsidi, gel pala deiki sekeiamsipa, ne pel dona ngebo Musadi, aupu dopra deiamu upupu, sundi moupra taleprumudi, kupmumnyopda, nedi akati arum telep kweipnepa, aca neitamaipu pio akunkamrume. Ada, sun Israel yala nesala, sun co puna neng tep, “Karepkamsene,” peiamsi mutu neitamai di, acapu kurumupanen, yuk nesaladi, men enepra donoksetenge. Tonda yuk karen mutu yu nengdi, sun tep bisbisa kapmengedi, ateng koupdongopra, sun pe mutu tamupra men dubenkamsenge. Acapu kunkamrume,” peiamu. 9 Dinino, sun Yehuda yala nesaladi, Allah er peiamu upuda, moupra men talepi. Ada, Raja Manasyedi mali keca kuramnga deiki di, Yehuda tara kurami nesala sun deiki benepupa, sun yuma peda, akecapu talepra, ila mali kurami. Ada, men taru Kanaan mutu kurami nesala, Allah tep men kael keami nesaladi, pio mali keca kuramya tep, Allah Yahwehdi dopra sun Israel nesala karepkou atep, sun mali kurami nesala dopra enepra donokamo. Awalwal nesalada, yambul mali kurami dinin, sun Yehuda tara kurami nesalada, pio ila di, mali kurami.

10 Atep nengeda, Allahdi er pel dorami neng cap, tonda sunda dortaru kupkamrenge tep, upu peipnepa, lap pena neng, sun nabi-nabi neng tep, sun damai yana, upu pepra deiamupa, sundi Yehuda tara kurami nesala tep, lap peryakarami. 11 Allahdi peiamupa, sun anengdi, ayana pepra deiami upuda ake.

Raja Manasyeda, ila mali kurure. Ada, men taru Kanaan mutu neitamai kurami nesala, sun Amori mutu nesalada, yambul mali kurami dinin, Manasye erda, ila mali kuna deiyo ngebo kurure. Tonda, Manasye er dipapu, tali isok-isok si eremnai tep, ketenepra deipudi, aisok si eremamnga deiki di, sun Yehuda yala nesala peda, mali weik kununga cadi, erdi sun damaida, pio mali kupra deipu.

12 Atep nengeda, ne sun nai Bo Allah Yahwehdi, sunda ne mawa deiamsi nesala, yala-yala yumada, sun Yehuda tara kurum nesala pe, sun Israel tara kurum nesala peda, neda sundi ne si eremnerum ngebo, Yahwehdi pepsene. Ila ikin keca dopra, sun Yehuda yala nesala deiki cap, Yerusalem mutu kunge nesala cap tep, sun deiki deipkamne. Ukupnepa, ange epmenge nesaladi, yuk nesala tep epmengepa, gekepmengedi, kwar weik kuprepa, kange mun kange doupra kunkamnunge. 13 Ne Allahdi Yerusalem mutu kunge nesala yumada, sun wenemna tep nengeda, men taru Samaria mutu kurami nesala mali kuramipa, yu kupneupa, ila di wenepsidi ikin keca weik sun deiki deipsitopu, Yerusalem nesala peda, ila di wenepkamne. Tonda, Israel nesala talepra kuramu ngebo Raja Ahab, mali weik kuramnga tep, erdi deipupa, dadeipdanen barami neng tep, puto di wenepra pomsitopu kupra, sun Yerusalem nesala peda wenepkamne. Ada, Yerusalem mutu nesalada, yangdin keca piring moupra me kupmengedi, tamupra deriramengtopu kupra, deipnedi, sun tep gawal dakra gum kupra deipkamne ja.

14 Yerusalem mutu kunung nesala tep, ila di wenepnepanen, ton tupa akunkameng nesala tep, ne Allahdi sun tep kaukepronepa, sun podan nengdi, atupa kunkameng nengda, tapne pangeda, sun podan nengdi anengda tomopra, wenemna ati dubengedi, sun mutu yumada dalupra doropmengedi, araropkamenge. 15 ‘Ange yumada, ukupkamne ja,’ pepsenada, tali tep men pepne. Deiyoda, nedi ne nyapu sisa, Israel nesala tep wenepnedi, sun deiki ikin keca deipkamne ada, sundi ne damai mali kun kecapu pio talepra kununga tepa. Ada, sun Israel nesalada, sun co puna neng tep, Mesir mutu neitamai ikin weik kuramipa, nedi lyepra dubesi dinin, ataru di dipra, ukutaru peda, sun cap, sundi deipipa, dadeipdanen barami nesaladi, mali weik kungepa, ne damai tep, tulum keipyakaramneitopu, sun ataru kunung nesaladi tupa ne damaipu tupa tulum kepra derinenunge. Atep, sun damai di wenepra ila kange mun keca deipkamne.

16 Angepu gum dinin, tonda yuk ngebodi mali kun keca benemupa, Yehuda yala nesala yumadi, isok sipu eremamidi, sun nai bo Allah, ne damai mali kudiramnei. Utopu, tonda Raja Manasyedi, mali kun keca pio men kurami neng ton, weika di poramu pangeda, ila me embaramretopu, Yerusalem mutu neitamai yumada, nimi yapipu pio weika di kwamu. Atep, sun damai di wenepra, ila kange mun keca deipkamne.

Allahdi pepu.

17 Uda, Raja Manasyeda, nimi deiyo ngebo kepra taleamu taru di, mali kuramunge yuma cap, tonda pel doramunge cap, upu peramunge cap, yuk keca yuma kuramunge capda, Yehuda mutu kurami nesala talepra kurami Raja-Raja neng, sun si sekra derirami buku neitamaipu sekra deipi. Abuku sida, ‘Sejara Raja-Raja Yehuda,’ pepi. 18 Raja Manasye, er konum depu pangeda, urasin telep keca kouamyai, er sida taman indah, nimi si Uza, erdi deipunge neitamaida, Manasye er nong doupra bena peipi. Ukupyopda, Manasye er mi Amon, er nai bo yo punupra, nimi deiyo ngebo kepudi, Yehuda tara kurami nesala talepra kuramu.

Amondi Yehuda tara kurami nesala deiyo kepra, Raja tekudi talepu upu

19 Nimi tenpu, er si Amon, er keteng tamunda, dua puluh dua (22) tahun konum neramu taruda, Amondi nimi deiyo ngebo kepra, Yehuda tara kurami nesala tep Raja kepra taleamudi, mutu si, ila ati arum kota Yerusalem mutu kuramu. Ataleamngada, keteng tamun butene deiki di taleamu. Amon er nin sida, Mesulemet kuramu. Aner Mesulemet, er nai bo sida Harus. Erda Yotba mutu ngebodi Amon deiamu. 20 Uda, Amonda, er nai bo Raja Manasyeda, Allah Yahwehdi, ‘Angeda pio mali kun keca,’ teneamunge talepra, Allah er damai di mali kuramutopu, erdi deipu mi Amon peda, mali kecapu talepra kuramudi, malipu kuramu.

21 Ada Amon, er nai boda, pel doramunge cap, mali keca talepra mali kuramunge cap yumada, abisipu dombaramu. Tonda, Amon er nai bo Manasyedi, isok-isok sun sipu eremamutopu, er peda akecapu dukdongopra talepra si eremamu. 22 Ukuramnga deiki di, erda Allah Yahweh er tenenange ton, men talepra pel doramu. Ukuramnga deiki di, er apu yapu si eremami Allah er si Yahwehda, Amon tamudi, tali isok sipu eremamu. Ukuramudi, Allah Yahwehdi, “Angeda kunkamrume, angeda pio men kunkamrume,” pepra deiamu upu yumada, yaniptapra men dombaramudi, malipu kuramu.

23 Ukuramu pangeda, Raja Amon er amutara deiyo-deiyo talepra, pel dorami neng yumadi, ‘Uo, angebo nun song cadi, popkamepe,’ teneramidi, upu sisingamyanen, nimi deiyo ngebo Raja, er kuramu ati neitamai dipapu, poptapipa depu. 24 Ukupi dinino, Yehuda mutu kurami nesala yumadi, ange kael kepidi, Raja Amon tep, nimi pona upu sisingmai neng yuma buluprapidi, aneng yumada tamupra popi. Ukupyopda, Amon er mi Yosiapu, nimi deiyo ngebo Raja kuna tep, er nai bo yo pununa tep, wepra deipipa, er dipapu Yehuda tara yuma talepu.

25 Uda, Raja Amondi nimi deiyo ngebo kepra taleamu taru di, yuk keca dakuramunge cap, upu peramunge cap yumada, Yehuda mutu neitamai kurami nesala, talepra kurami Raja-Raja neng, sun si sekra derirami buku neitamaipu, sekra deipi. Abuku sida, ‘Sejara Raja-Raja Yehuda,’ pepi. 26 Amon er konum depu pangeda, Menasye peiamyaipu damai bena peipi. Ada, urasin telep kuna tep keca kouamyai, er sida Taman Indah Uza, Uzadi deipunge neitamaida, Amon er nong doupra bena peipi. Ukupyopda, Amon er mi Yosiadi, er nai bo yo punupra, nimi deiyo ngebo kepudi, Yehuda yala nesala talepra kuramu.