2 Kings 22

Allahdi sun Israel nesala tep, ‘Ukunkamrume,’ pepra deiamu upu wangapupane, amenda taru Yosiadi epka tep, pepu upu

1Yosia er keteng tamunda, banbaripu kupu pangeda, Yehuda yala nesala sun ila nimi deiyo ngebo kemna tep, Yosia erepra deipipa, Yerusalem mutu talepra kuramu. Ada keteng tamun dengeda, tiga puluh cap, tenpunge ton cap deiki di (31) talepra kuramu. Er ner sida Yedida, aner er nai bo sida, Adaya. Tonda aner er mutu sisada, Bozkat. 2Yosia erda dumsisipu kuramu. Ada, Allah er si Yahwehdi, ‘Angeda kunkamrume, angeda ton men kunkamrume,’ pepra deiamu upu yuma moupra taleamnga tep, er cap, Allah cap dipru dukdongopra kuramrei. Pumun taru er apu bo Raja Daud peda, bouna di Allah peramu upu yuma talepra kuramutopu kuramu. Ukuramnga cadi, ukupmantoda, ‘Tebalal tara benkun do? Ange gum dumsisi tara benkun do?’ tenena gum dipapu, pio telep dumsisi bisipu tupa embaramengtopu, er kuramu kecada, dumsisipu kuramu, mali kun keca ton pio men kuramu.

3Ukuramupane, Yosiada Israel nesala taleramupane, keteng tamun delapan belas tahun konum kupu pangeda, ataruda er amutara pel doramu ngebo, amutu nimi si sengna tep deiyo ngebo, er sida Safan kuramu. Angeboda, aila mutu mambul upu sengna deiyo ngebo, Sekretaris Negara kuramu. Safan er nai boda, Azalya. Safan er apu boda, Mesulam. Uda, Raja Yosiadi peipupa, Safanda, Allah Yahweh, er si eremna ati damai dirbeu. Akati benkou taruda, Yosiadi Safan tep pepu.

4“Ukutaruda kan bememdi, Allah er ati pumbon pel dona deiyo neng, sun ila ngebo Hilkia tep pepkurume.

‘Kanda, Allah er si eremna ati dekarameng co bo bulupra keteneipkunerume. Ada, ‘Allah er si erepkup’ tenen, Israel nesaladi akati dekaramengepa, sun akati buplan dam kalengna deiyo nengdi, dororameng co bo tep pepkene. 5Aco bo bulupra deipmenge dingeda, auangda sundi Allah er si eremna ati ka di lepsisikrap dourameng neng, sun pel moupra dina tep deiyo neng, aneng tep aco bo bulupra karepkamenge. Karepmengepa, Allah Yahweh, er si eremna ati konum daksakunge lepsisikrap doramenge neng karepkamenge.

6Ada, akati lepsisikra dona nengda, sun co cangna neng cap, ati nong dona deiyo neng cap, gel deipmengepa, urasin telep ketenemna tep petumna deiyo neng cap, karepkamenge. Ada sun pel doraminge kunumna tep, aco bo karepkamenge. Tonda, aco bo neitamai di bokra, ton tara ngeda, pio telep gat co cap, urasin telep gel cap kunupmengepa, akeca di akati lepsisikra donkamenge. 7Apepmakentopu kupkameng dinin, sun apel dona tep kalengna deiyo nengda, pio tek sisa kunge nengpu kununga cadi, co bo dopropmengedi, karenkamenge ngeda, nimi si cap, karepkamenge co bo cap daftar kemna tep men sengkamenge. Akeca sekra men karenkamnenge. Anengda, mali kuna gum dipapu, pio dumsisipu kununga cadi, teka teneptepe.’ Aupuda, Hilkia tep pepkamrume,” Yosiadi pepu.

Raja Yosiadi, Sekretaris Negara, er sida Safan tep upeipupa, apeiputopu kupu.

8Safandi apeipmau upu yuma konum kupu pangeda, Allah er ati pumbon pel dona deiyo ngebo imam Hilkiadi apel dopu. Konum dopu dingeda, Hilkiadi Safan tep pepu. “Pumun taruda, Allah er si Yahwehdi nun apu yapu Israel nesala tep, ‘Angeda kunkamrume, angeda ton men kunkamrume,’ peiamupa, sekra deiami buku, wangapseu dinin, ukutaruda ne konum epmane. Ada abukuda, Allah er si eremna ati neitamaipu akapmaupa, epsi.” Hilkiadi upeprapudi, abuku doprapudi, Safan tep karepu. Karepu pangeda, Safandi abuku doprapudi, tepra nungmau.

9Safan Sekretaris Negara ngebodi abuku konum nuku dingeda, erdi ila nimi deiyo ngebo Raja Yosia er ati tamupra bena wekrapudi, Yosia damai beudi, bena lap pepu. “Naio, kandi peipnemumtopu, Yehuda yala nesaladi Allah Yahweh, er si eremna ati wengameng taru, deiami co boda, kan amutara pel dona deiyo nengdi konum bulupra deiamidi, auang doprapidi, Allah er ati lepsisikra dona tep, pel dona deiyo neng tep konum karepi pangeda, anengdi sun akati nong pel dona neng konum bokra karepi,” pepra lap pepu.

10Sekretaris Negara Safandi aupu konum lap pepu dingeda, aupu ton dukdongopra pepu. “Tonda naio, Allah er ati pumbon dinin, Allah karena tep pel dona deiyo ngebo imam Hilkiadi, mambul buku eprapudi, ne tep karepneue. Abukuda nedi duyanmakene,” pepu. Upepudi, abuku teprapudi, Raja Yosia er gekena tep nungmaupa, Yosiadi gekenmau.

11Pumun taru Allah er si Yahwehdi Israel nesala tep, ‘Angeda kunkamrume, angeda ton men kunkamrume,’ peramupa sekra derirami bukuda, Safandi, Yosia er gekena tep nukra deipmau pangeda, Yosia gekepu dingeda, mali kange douprapudi, ‘Uo, aupuda mambule’ tenen, ila nimi deiyo ngebo er deiki pio telep kenengamu lyom opkale kwiriprapudi, gwelepra tapu. 12Ukupu dingeda, ila nimi deiyo ngebo Raja Yosiadi, nimi pamu bari tep aupu pepra deipu. Ada, Allah er ati pumbon pel dona deiyo ngebo, imam Hilkia cap, Safan er mi Ahikam cap, Mika er mi Akbor cap, amutu nesala si sengamnga deiyo ngebo, Sekretaris Safan cap, tonda Raja Yosia er pel melipra doramu ngebo, er si Asaya cap tep aupu pepra deipu.

13“Anengo, ne mambul weik kupnere. ‘Allah er si Yahwehdi, ware pepkamser do?’ tenen, ne makuna tep nengeda, sun bemumdi Allahdi pere upu lap pena neng damai bena asipterepkurume. Ada, ukupu epmangdi karepmaneng bukuda, ukuda akwapmasera tep, ne cap, ne amutara kunge nesala cap, Yehuda yala nesala yuma capda, ‘Ware kunkamep do?’ tenen, bena asipetepkamrume. Deiyoda ake. Allah er ati pumbon pel dona deiyo ngebo Hilkiada, Allahdi peramu upu peipupa, sekra deiami buku, wangapseu dinin, ukupka epudi karepneue.

Tonda, Allahdi abuku neitamai peipseu upuda, nun apu yapu yumadi, moupra gekena gum di, aupu men talepra kurami. Mali weik kuramya tep, nun nai bo Allahdi derepseredi, ‘Er yuda uku bu jeramretopu kupra ila di wenepserur’ tenen, pepsene. Angeda musum tep gume. Pumun taru di dipra, ukutaru peda, nun apu yapuda, Allahdi nun Israel nesala tep, ‘Ukunkamrume,’ peiamseu upu utopunge ton men gekeramidi, talepra men dombarami. Atep nengeda, ‘Allahdi ware pepkamser do? Tonda, nun ware kupkamep do?’ tenen, Allah er upu lap pena deiyo neng damai bena asipetepkurume,” Raja Yosiadi er pel dona deiyo neng tep pepra deipu.

14Upepka tep, Allah er ati pumbon pel dona deiyo ngebo Hilkia cap, Ahikam cap, Akbor cap, Safan cap, Asaya cap, sun yumadi, Allah er upu lap pena ner tenpu, er damai bei. Anerda nabi kuramu. Er sida Hulda tep, anengdi, ‘Nun ware kupkamep do?’ tenen, “Allah tenere ngeda, aupu yuma jenek pepseo,” pepra bena moropi. Anerda er nenge sida Salum. Salum er nai bo sida Tikwa. Tikwa er nai bo sida Harhas. Harhas er pel doramu ngeda, amutu ila deiyo ngebo Raja, er kenengamngai opkal ketenem diramu ngebo kuramu. Tonda Hulda er kuramngaida, Yerusalem mutu neitamai dinin, distrik kedua peramyai kuramu. Anengdi aner damai bena asipetepipa, anerdi sun upu yuma gekenmau. 15Gekenmaupa, anerdi tamupra sun tep pepu.

Israel nesala kalekra melimrur Allah, er si Yahwehdi upepmasere. Sun dopra deipmaseu ngebo tep, bena peprume. 16Allah er si Yahwehdi peipmaser upuda ake.

Ne Allahdi tek sisa pepsene. Yerusalem mutu cap, amutu kunge nesala yuma cap tep nengeda, nedi piripnedi ila di wenepkamsene. Ila kange mun keca karepkamsene. Ada, pumun taru nedi peramsipa, buku neitamai sekra deiamipane, ukutaru Yehuda yala nesala talepra nimi deiyo ngebo Raja Yosiadi, ukupu epmaudi nukra pepmau upu, abuku neitamai peretopu, neda tek sisi kupkamsene.

17Ange yuma kupkamna deiyoda, mesum tep gume. Sun Israel nesaladi, ne tep, ‘Nun songe,’ tenen, tamamneidi, sun yumada isok si eremna tep, nintong telep keca dopra uku dongoramidi, isok si eremami. Ange utopu, sun pe buru di, gat keca dopra sun isok si eremna keca urasin utopunge petuprapidi, akeca tep, ‘Nun nai,’ pepra si eremami. Ukuramya tep nengeda, ne yu weik kunerure. Atep, ne yuda uku jeramretopu weik kupnere. Atep, sun Yehuda yala nesala cap, anesala kunge mutu cap tep, ila ikin keca sun nong deiki derinkamne. Ne yuda men tapkamne, pio tupa kunkamnera cadi, anesala tek sisi wenepkamne ja.

18Tonda, Yehuda yala nesala, sun ila nimi deiyo ngebo Raja Yosiadi sun tep, ‘Allah er si Yahwehdi ware upu pepkamser do?’ tenen, doproipseu ngebo tep, aupu ton perbenkurume. Allah er si Yahweh, Israel nesala pio kalekra melimrur Allah erdi pumun taru peramu upu wangamipane, ukupu epra karepkeipa, ukupu gekenmaumum upu tep nengeda, upepkene.

19“Pumun taru, Allah nedi Israel nesala tep, ‘Angeda kunkamrume, angeda men kunkamrume,’ pepsi. Tonda, upepsi. ‘Ne upu men gekepmumnyopda, ukupra-ukupra wenepsenedi, ikin keca sun nong deiki derinkamsene. Ukupsenedi, sun mutu cap, sun yuma capda, popra gawal dakamne,’ pepra deipsi. Kanda apemsi upu ukupka gekepmum taruda, dipru boun kupkeue. Ukupkeupa, kanda Yosiadi, ‘Uo, nun apu yapu cap, nun capda, tek sisi mali weik kuramupu,’ tenepmume.

Utenepmumdi, ‘Atep, nun nai Allah, er si Yahwehdi pepkamser upu moupra gekenkamepe’ tenen, dipru keteneipmumdi, mambul kange doupmumdi, kan nong deiki kenekmum opkal kwirip gweleptapmumdi, mali kange douprapmumdi, ne damai yana engepmumdi, ne tep moropnemume. Ange yumada, ne Allahdi konum epkesi. Ange yuma kupmuma tep nengeda, neda Allah, ne si Yahwehdi pepkene. Kandi moropnemum upuda konum gekepkene.”

20“Atep nengeda, ne Allahdi pepkene. Tek sisa Yehuda yala nesala wenepnedi, ikin keca sun nong deiki deipnedi, Yerusalem mutu gum kupra deipkamne taruda, kandi men epkamrume. Deiyoda, nedi peipnepa, kan depkamreme. Kange mun kange douna gum dipapu, tali kange doupra depmem pangeda, yuk nengdi, kan nong dopra, kan apu yapu peiramitopu, kan peda depmempa peipkamkenge. Neda Allah, ne si Yahwehdi upepkene.”

“Upepra, sun deiyo ngebo Yosia tep lap perberume,” aner Huldadi pepu. Upeipupa, er damai yanmai nengdi gekepi. Konum pepu pangeda, nimi deiyo ngebo Raja Yosiadi dopra deipmau neng yuma aupu gekepidi, doupra er damaipu tamupra lap perbei.