2Ki 23 | XteSC | STEP | Uda, Yehuda yala tara nesala taleamu ngebo Raja Yosiadi, doproipu neng tamupra yaidi, Allah peipu upu lap pepi pangeda, konum gekepu. Gekepu dingeda, Yehuda yala nesala kurami tara deiyo nengda, Yerusalem mutu ton talepra kurami wisi neng yuma tep, ‘Bulupso,’ pepupa, sun yuma bulupi.

2 Kings 23

Allahdi Israel nesala tep, ‘Angeda kunkamrume, angeda pio men kunkamrume. Nedi pepsenetopu tek sisi kupmumnyopda, nedi melimkamsene,’ pepra deamu upu

1 Uda, Yehuda yala tara nesala taleamu ngebo Raja Yosiadi, doproipu neng tamupra yaidi, Allah peipu upu lap pepi pangeda, konum gekepu. Gekepu dingeda, Yehuda yala nesala kurami tara deiyo nengda, Yerusalem mutu ton talepra kurami wisi neng yuma tep, ‘Bulupso,’ pepupa, sun yuma bulupi. 2 Konum bulupi pangeda, er Yosia cap, Yehuda yala deiyo neng, wisi neng cap, Allah er si eremna ati pumbon pel dona deiyo neng, imam neng cap, Allah er upu lap pena deiyo neng, nabi-nabi neng cap, tonda Yerusalem mutu kurami nesala, ila neng pe, tali neng peda, sun yuma capdi, Allah er si eremna ati damai kikiman wengbei.

Benapidi weka gekenmaipane, Yosiada, Allahdi Israel nesala tep, ‘Ange kunkamrume, ukupmumnyopda, ne tek sisi kalekra melimkamsene,’ pepra deiamu upu, abuku neitamai kwamu upu yuma nukupa, abulupmai nesala yuma gekenmai. Ukunmaiya tep, erdi pepu upuda, yuk upu gume, ada, Allah er si eremna ati pumbon deiamipa, wangapu dinin, ukupu epidi karepi buku nungmaupa gekenmai.

3 Yehuda yala nesala sun ila nimi deiyo ngebo Raja Yosiadi abuku yuma konum nuku dingeda, ukupu. Erdi, Allah er si eremna ati pumbon dinin, ila lyom ayumnya co tekra deiamyai damai bena tekudi upepu. “Ne nai Allahdi peramutopu, tek sisi nedi aupu moupra gekepnedi, pio talepra dombankamne,” pepu. ARaja ngebodi akati ayumnya damai bena tekmaua damaida, ada Allah er damai utopu tekudi aupu pepu. “Naio kandi, ‘Angeda kunkamrume, angeda ton men kunkamrume,’ pepra deipsemum mem upu yuma, ne kange cap, dipru cap dukdongopra tenpu kange doupra, Allah kan upu buku neitamai pepra sekeipsemum utopu kunkamne,” pepu.

Upepka deiki di, ada ‘Allah er tek sisi upuda tek sisi talepra kunkamne,’ pena utopu tep aupu pepu. Upepkopda, aca bulupra wekmai nesala yuma, sun Israel nesala yumadi, “Nun peda tek sisa Allah er upu yuma moupra gekepmepedi, angepu talepra kunkamepe,” pepi.

4 Uda, ange yuma konum kupi pangeda, Raja Yosiadi, ‘Ukupkurume,’ peipupa, Allah er si eremna ati pumbon pel dona deiyo neng, sun ila deiyo ngebo, imam besar Hilkia cap, er amutara pel don neng, yuk imam neng cap, tonda Allah er si eremna ati buplan dam tekra kalengna neng capdi, Allah er si eremna ati pumbon wekra dipetepidi, isok si eremna keca yuma douprapidi, bura tara duyai. Ada, isok-isok sun si Bahal ^{▼▼Bahal sekmepu ngeda, yuk Alkitab neitamai Bahal sengnunge. Bahal sekmupka deiyoda, ‘Baal pepmengepa, walwal di bal sisa tenepnung’ tenen, Bahal sekmupke. Si yuk sekmepu dinino er tenpua.} cap, Asyera cap, si eremna tep, nimi buru deiki di betapra deiamidi, akati pumbon deiami keca cap, tonda, im deiki tara kure keca tep si eremami keca cap, akeca doprapidi akati pumbon di bura tara duyai. Duyai dingeda, kota Yerusalem mutu bura tara dinin, me si Kidron me damai dubeidi, uku dongopipa, uku jepropu. Akeca-keca yuma uku konum jepropudi, sikke yopu tapu ngeda dopropidi, mutu si Betel mutu dubena donoktapi.

5 Tonda pumun taru Israel nesala taleamya deiyo neng, Raja nengdi wepra deiamipa, isok si eremna tep wepra deiamya deiyo neng, mali imam neng yumada, Raja Yosiadi tapu. Amali imam nengdi, pumun taru dipra ataruda, sun isok si eremna tep, Yerusalem mutu dana-dana tara cap, Yehuda tara neitamai dinin, yuk nimi ati domi mutu damai cap, mutu buma deiki welepra embaramidi, nintong telep keca dopra uku dongoramidi, isok si eremami. Isok si eremami ngeda, Bahal si cap, tonda isok si pepra keteng cap, war cap, kuru cap, tonda im deiki tara kure keca tep, ‘Nun nai yape,’ tenen, akeca yuma tep si eremami. Atep, sun mali imam nengdi isok si eremami neng yumada, Raja Yosiadi aneng yuma gum kupra deipu.

6 Tonda, Allah Yahweh, er si eremna ati neitamai, lyom co ikra deiamidi isok si eremami co kweneprapudi, bura tara dubeu. Alyom coda, isok si Asyera pepra si eremaminge cadi, alyom co ton dopra bura tara dokoteprapudi, Yerusalem mutu bura tara Kidron me damai benapidi uku dongopi. Dongopipa uku jepropu pangeda, uku jenmaudi sikke buktapmau ngeda, buluprapudi, tali nimi tu palirbaramyai bena yamuptapu.

7 Ange utopu, yuk mali kurami ati ton uruptapu. Ada, Allah er si eremna ati damai dinin, isok si eremna ati neitamai dopra wiliami ati daktapu. Akatida sun mali kurami nengdi, nimidi yuk nimipu tali nyangdarami. Amali keca kurami neng, sun kurami ati yuma daktapu. Tonda, isok si Asyera si eremna tep, nerapudi opkal wirami. Aopkal wirami nerapu kuramyai uku bulung ati yuma peda, Yosiadi daktapra uruptapu.

8 Yehuda yala neng kuramyai di amutu-mutu neitamai yumada, Raja Yosiadi peipupa, Allah er ati pumbon pel dona deiyo neng, imam neng yuma bulupra yai dingeda, yuk nengdi isok si eremna do, Allah er si eremna tep do, tali nengdi sun kange dipapu si eremna ati dominge yuma uruptapidi mali-mali kupra deipi. Deiyoda, ‘Akati tupa men wengkameng’ tenen, akati yuma uruptapi. Ukupi ngeda, ada mutu si Geba mutu di dipra adinen, Bersyeba mutu cap, aneitamai mutu cap yuma, ‘Allah si erepkamep’ tenen, nintong telep keca dopra uku dongona tep, domi ati cap, pala gel taplakra yakeiaminge yuma cap urupra daktapi. Tonda, Yosiadi peipupa, sun imam-imam neng yuma Yerusalem mutu bulupra yai.

Yai dingeda, isok si eremna tep, mali nengdi derirami keca uruptapi. Ada Yerusalem mutu dana-dana lyom gel beilya wipra buplan wengna tep, potokami buplan damai, isok si eremna tep domi keca uruptapi. Tenpu ila buplan er sida, Yosua buplan. Ton ngeda, Yerusalem mutu wengbana tep, abuplan damai dinin, tebalal tara potoki buplanda, abuplan er sida Yosua perami. Deiyoda, amutu Gubenur er si peda Yosua perami. Abuplan butene damaida, isok si eremna tep dopra derirami keca yuma uruptapi.

9 Ataru neitamaida, Allah er si eremna tep dinin, tali-tali mutu deiki welepra, gam keca dopra uku dongorbarami imam neng yumada, Yerusalem mutu neitamai domi ati, Allah Yahweh er si eremna ati tek sisinge damai pala gel taplakra yakeiamyai bena gam keca popra men karerami. ^{▼▼Allah tep karena – Anengda, ‘Allah er si eremna tep, gam keca popmepedi, er tep karenkamepe’ tenen, mutu gon deiki si eremna ati domidi akati welepra Allah tep karerbarami dinin, pumun taruda, Allahdi, “Ukuna meme. Angeda men kunkamrume. Nedi ‘Ace pua’ pepsene mutupu, ne si deipkamne mutupu bena ne gispal dona tep, karen keca karenkamnerumdi, ne si eremkamnerume. Yukai pio meme,” konum peiamu. Atep nengeda, sundi akati-akati tupa welepra embarami ngeda, mali weik kurami.} Yerusalem mutu neitamai, telep imam nengdi, Allah Yahweh, er si eremna tep, gam keca popra kareryakaramyai tek sisi ngeda, sun mali imam nengdi men yana karerami. Akati pumbon men wengami dinin, amali imam neng cap, tek sisi telep kuna imam neng capdi, roti kwaneng, nena gumnge dopra, kikiman jerami.

10 Tonda Raja Yosiadi kupunge ton ake. Erdi, isok si Molok, er si eremna tep, dorami keca peda, uruptapudi mali-mali kupra deipu. Ukupka deiyoda, ‘Nimidi derirami nyapu yuma dopra, uku dongoramipa, uku jepramu. Ukuna deiki di isok Molok, er si eremami ngeda, yapkameng’ tenen, kupu. Ada, ‘Amali kun keca yuma cap, aketeneipi mutu cap, gum kupkamre’ tenen, akeca ton uruptapu. Amutu sida, Tofet dinin, mutu si ton Ben-Hinom mutu damai di kupu. Amutuda isok Molok, er si eremna tep domi keca tep uruptapudi mali-mali kupra deipu.

11 Tonda, Yosiadi apel ton dopu. Ada, pumun taru Yehuda yala nimi deiyo nengdi, sun bali deiki bukrap embarami bisam, er sida kuda, akeca ton dopra Allah er ati buplan damai deiami. Ukuramya deiyoda, ada keteng tep, ‘Nun nai,’ tenen, keteng si eremna tep, kuda bisam ton dopra derirami. Akuda bisam deriramyaida, Allah er si eremna ati wengban buplan damai derirami. Akuda bisamda, tenpu deiyo ngebo er si Natan-Melek, er kuramu ati damai derirami.

Dinino, Yosiadi peipupa, akuda bisam doprapidi, yukai derirbei. Ukuramya tep, Yosiadi peipupa, kuda bisam gipra tu deiki embarami keca, er sida kereta kuda, akeca peda dopra uku dongopu. Akereta bisam peda, sun mali nengdi, keteng tep teneramidi, ‘Nun nai,’ pepra akereta bisam dopra karerami. Ukuramya tep nengeda, Yosiadi akereta yuma dopra uku dongopupa jepropu.

12 Tonda, pumun taruda, yuk nimi deiyo nengdi, Yehuda tara taleami neng Raja-Raja yuknge, Allah er si eremna tep, gam keca popra karenai tep, pala gel taplakra yakeipidi keteneiami. Ton ngeda, nimi si Ahas er alau ati damai dinin, gat aruma dominge deiki di, pala gel taplakra yakeipi. Ukuramipa, Raja Yosiadi uruptapu. Ton ngeda, pumun taru, Yehuda yala neng, sun nimi deiyo ngebo er si Manase, gam keca popra, Allah er karenai tep, erdi peipupa, pala gel taplakra yakeipidi, butene deipidi keteneiami. Apala gel taplakra yakra deipi ngeda, Allah Yahweh, er si eremna ati bura tara pirman deipi. Apala gel taplakra yakeipidi keteneiaminge buteneda, Raja Yosiadi, urupra yawa poptapu. Ukupra sikke buktapu dingeda, Kidron me damai dokotepu.

13 Ange utopu nimi sun kange dipapu, Yerusalem mutu dinin, keteng yakan tara isok si eremna ati dorami ngeda, uruptapudi mali-mali kupra deipu. Angeda Yerusalem mutu yambul itara dinin, mutu sida, ‘Pio Mali Kuna mutu,’ pepra si perami. Amutu deiki, isok si eremna tep dorami ati uruptapu. Angeda, pumun taru ila nimi deiyo ngebo Salomodi, sun Sidon tara kurami nesala talepra si eremami isok si Asytoret, er si eremna tep domu ngeda uruptapu. Tonda, sun Moab tara kurami nesala talepra si eremami isok si Kemos, er si eremna tep domu ngeda uruptapu. Tonda, sun Amon tara kurami nesala talepra si eremami isok si Molek, er si eremna tep domu ngeda uruptapu. Aisok-isok yumada, pio mali weik kuramya tep, Allah er kangeda, ‘Aisok yumada ne pio songe,’ teneramu.

14 Tonda Raja Yosiadi ukuramu. Amutu yuma isok si eremami keca uruptaprapudi, isok si Asyera si eremna tep, ikami lyom co yuma kweptapu. Tonda, sun isok si eremami nengdi taleramidi agel yumada sun buru di talepra, isok si pepra, si eremaminge yuma Yosiadi dopra taiktapu. Ukupra sikke buktapu. Akeca-keca si eremamyai yumada, nimi yopu wekamudi weika di dinikamo. Ukuamudi nimi yopu eremu. Deiyoda, ‘Amutu-amutu yumada, kange di ton cap, nimidi isok si men eremkamenge’ tenen, kupu.

15 Pumun taru nimi ton Nebat er mi Yerobeamda, Yehuda yala neng, sun nimi deiyo ngebo kuramu. Yerobeamdi mali weik kuramnga deiki di, Yehuda tara nesala diramidi, sun peda weika di mali kurami. Ataru dipapu Yerobeam, erda nimi deiyo ngebo Raja kuramu taruda, Betel mutu bena, mutu buma deiki welepudi, Allah er si eremna tep, pala gel taplakra yakeiamu. Apala gel taplakra yakeiamu ngeda, ada ‘Gam keca popnedi, Allah karenkamep’ tenen, deipu. Amutu buma deiki, pala gel taplakra yakeipunge pe, Allah si eremna tep domu ati peda, Yosiadi urupra yamuptapu. Nimi deiyo ngebo Yosiadi Allah si eremna tep Betel mutu deiki domi atida, urupra yamuptapudi, sikke buktapupa, buit utopu kupu. Tonda, isok ner si Asyera, er si eremna tep, lyom ayumnya co ikra deiaminge peda, Yosiadi kweprapudi uku dongopu.

16 Yosiadi ange konum kupu dingeda, ka di tamupra, amutu damai dinin, nimi peirami mutu tara yuma dipetepudi, er nyapu tep upepu. “Ukuda ortara nimi tu paliramidi, gel ikra deiamyai yuma bemumdi, tu palipra, konum peirami neng sun yo yuma lukmumdi, ayo dopra duyamumdi uku dongopkurume,” peipupa ukupi.

Ange ukupi ngeda, isok si eremna tep pala gel taplakra yakeiamya deiki di, uku dongopka cadi, akupka deiki di, aisok si eremamyai yuma mali kweipu. Akupunge yumada, Allah er upu deiki di, “Ukupkamrume,” peiamutopu, Allah er upu lap pena deiyo ngebo, nabi ngebodi dukdongopra peiamutopu kupu. Akeca yuma Yosiadi kapul men kupu taruda, anabi ngebodi, ‘Ukupkamre ja,’ pepra konum lap pepu. Apeiamutopu, ataruda Yosiadi kupu.

17 Ukupu dingeda, Yosiadi atara yuma dipetepudi, sun amutu kurami neng tep asipetepu. “Ortarada nimi tu palipinge damai gel ikra deipi ngeda, ware ngebo tu paliramidi, agelda deipi do?” pepu. Upepu pangeda, sun Betel mutu kurami nengdi tamupra pepi. “Gume, ada Allah er upu lap peramu ngebo, nabi tenpu ngebodi Yehuda tara di, nun mutu yana upu peiamseu ngebo peipyai tep epremdi penmarema dano.

Angeboda, Allah cap dukdongopra kikiman kuramudi, Allah er upu lap peramu ngebo. Kandi Betel mutu pala gel taplakra yakeiamyai, urupra yamuptapmarem ngeda, kapul men kwamu taruda, angebodi, ‘Ukupkamre, ukupkamre,’ pepra, konum lap peramseue. Kapul men kwamu taruda, angebodi, ‘Ukupkamre ja,’ pepra, lap peramutopu ukutaruda kandi konum kupmareme. Angeboda, er depupa er nongda acapu peiami,” pepi. 18 Upepi pangeda, Raja Yosiadi tamupra pepu.

Konum peipi ngebo adano. ‘Yuk nengdi, angebo er yo dopra yukai deipnung’ tenen, sundi kalengkamrume. Upepka tep nengeda, amutu nengdi, angebo er yo cap, tonda Allah er upu lap pena deiyo ngebo, Samaria mutu di yanamu ngebo, er yo dopra menop taru palipyaida, ka di ton cap palipra men dopropi. Acapu tapi.

19 Uda, Raja Yosiadi, Betel mutu kuputopu, Samaria tara neitamai ati arum doramyai yuma, mutu deiki di, Allah er si eremna tep, nimi sun pe kange dipu peirdoramyai uruptapudi mali-mali kupra deipudi, yamuptapu. Ada, pumun taru Israel nesala talepra ila nimi deiyo kepra kurami neng, Raja nengdi, Allah si eremna tep, domi ati cap, mutu deiki keteneiaminge cap, urupra yamuptapu. Akeca yuma tep nengeda, pumun taruda, Allah er si Yahwehdi diramudi, er kange tulum weik kuramu. ‘Ne si eremnada, nedi pepsisi mutupu bena ne si eremkamnerume. Yukai meme. Atep, sun dipapu doamum ngeda, ayumada, ne songe,’ teneramu. Yosiadi akeca yuma urupra yamuptapu.

20 Sun amutu yuma, Allah er si eremna tep domi atida, akati-akati talepra pel dorami neng, sun mali imam neng yumada, Raja Yosiadi poptaprapudi, sun nong dopra apala gel taplakra yakeiamyai deiki deipudi, uku dongopu. Nimi yo dopra agel tun yakra deiamyai deiki deipudi uku sekua tep, ukupka deiki di akeca yuma mali kweipu. Ada, ‘Allah er si eremna tep, ka di ton cap, apala gel deiki gam keca popra men kareryakankamenge’ tenen, kupu. ^{▼▼Anengda, Allah er si eremna tep, mutu gon deiki akati domidi welepra Allah tep karerbarami dinin, pumun taruda, Allahdi, “Ukuna meme. Angeda men kunkamrume,” konum peiamu. Atep nengeda, sun kange dipu akati-akati tupa welepra embarami ngeda, mali weik kurami. ‘Tupa mali kupnung’ tenen, Raja Yosiadi akeca yuma uruptapudi akati yuma mali kupra deipu.} Ange yuma konum kupu dingeda, tamupra Yerusalem mutu beu.

21 Yerusalem mutu tamupra beu dingeda, Yosiadi sun amutu kurami nesala yuma tep upepu. “Sun bulupmumdi, nun nai bo Allah, er si Yahweh, er si eremna tep, Kaplemna Kailya er si Paskah kalepkurume. Ada, nun apu yapu, Mesir mutu neitamai di benkupi taru, Allahdi sun weni nyapu men popudi, sun ati kaplepra bisipra benamnga tep, Kaplamna Kalemna peramep kailya kalepkurume. Ada mesum tep gume, Allahdi nun tep, ‘Ange kunkamrume, ange kupmumnyopda, tek sisi nedi kalekra makunkamsene,’ pepra deipseupa, buku neitamai sekeiamseipa, tupa peseretopu kupkurume,” Raja Yosiadi anesala tep pepu.

22 Pumun taru Allahdi, “Kaplemna Kailya kalemkamrume,” peiamunge akapu dinin, ataru daneitamai yumada, apel men doramidi, Kaplemna Kailya kalepra men jerami. Ada pumun taru sun Israel nesala, sun deiyo neng, upu bongdina deiyo nengdi aneng tep, ‘Ukupkamrume, ukupkamrume,’ perami neng kurami taru dipra, ataru dinin, Israel nesala talepra ila deiyo neng Raja neng cap, sun Yehuda tara nesala talepra kurami ila deiyo neng, sun Raja neng cap, aneng yuma kurami taru neitamai peda, aKaplemna Kailya utopu men kalepra jerami. Ataru neitamai yumada, Kaplemna Kailya konum tamami.

23 Dinino, ukutaruda, ila nimi deiyo ngebo, Raja Yosiadi Yehuda yala nesala talepra kuramudi, keteng tamun delapan belas tahun konum kupu pangeda, aketeng tamun deiki, Raja Yosiadi, “Akailya kalepkamepe,” pepupa, Yerusalem mutu neitamai di Allah Yahweh, er si eremna tep, Kaplemna Kailya kalepi.

24 Uda, Raja Yosiadi, gum kupra deipunge ton ake. Allah er upu wenemna buku neitamai di aupu yuma, ‘Ukupkamrume,’ pepra deiamupa sekeiami upu akaputopu kupu. Abukuda, Allah Yahweh, er si eremna ati pumbon deiami dinin, wangapupa, Allah er ati pumbon pel dona deiyo ngebo imam Hilkiadi epudi, abuku dopra Yosia tep karepu. Karepupa, abuku epra kael kepudi, isok si eremami neng yuma enepra dokotepropu.

Ada, ‘Ware kupkamep do? Ware kupkamser do?’ tenen, isok-isok tep mororamya deiyo neng cap, tonda konum derami neng, sun sambala asimpetena deiyo neng cap, ker dona deiyo neng cap, ‘Nun nai’ tenen, gat keca dopra petupra sun ati pumbon deriramidi si eremami keca yuma cap, enepra dokotepropudi, sun bung keca yuma cap, isok urasin utopu petupra derirami keca yuma cap, dopra uku dongopupa jepropudi gum kupu. Ukuramngaida, Yehuda yala nesala kurami mutu yuma cap, kota Yerusalem neitamai yuma cap, akeca yuma gum kupra deipudi, yamupra dokotepropu.

25 Uda Yosia ila nimi deiyo ngebodi, Allah cap dipru dukdongopra kuramutopu, yuk neng yumada, utopu men kurami. Erdi, ‘Uo, nun mali kuramepunge yuma tapra, Allah er tarapu kange di ton cap kepronkamepe,’ teneramudi, kuramunge yumada, yuk nengdi ange utopu men kurami. Er kapul gam kuramu taru pe, er depupa, amenda taru kurami Raja neng peda, Raja Yosia kuramutopu, yuk Raja neng ton utopu men kurami. Raja Yosia, er kange cap, dipru cap, nong cap, puto cap yumada, Allah er si Yahweh, er deiki deiputopu, yuk neng ton men kurami. Akuramunge yumada, Allahdi, ‘Ukupkamrume,’ peipupa, pumun taru Musa gekepudi, sekeiamseu utopu kuramu. Raja Yosia erda Allah er upu pio moupra gekeramudi, angepu kuramu. Er kuramu utopu ngebo ton men punupu.

26 Raja Yosiada, pio telep kupra dumsisipu kuramu dinino, ila nimi deiyo ngebo, er si Manase kuramu taruda, pio mali-mali weik kuramnga tep nengeda, sun Yehuda yala nesala tep, Allah er yu pio weik tupa kuramu. Allahdi sun Yehuda nesala tep yu kuramu ngeda, ila uku jeramrepa bupu weik kuramretopu, er yuda pio weik cadi, men gum kupmanto kuramnga tep, men tapu.

27 Ukuramnga tep nengeda, Allah er si Yahwehdi, sun Yehuda yala nesala tep upepu. “Israel yala nengdi pio mali weik kuramipa, tapsidi ne damai di dopra enepra dokotepsi topu, sun Yehuda yala nesala pe tep, wenepnedi, ne damai di enepra dokotepkamne ja. Tonda, ne pedi, Yerusalem mutu tep, ‘Amutu wepra deipne,’ peramsi dinin, amutu tapkamne ja. Ange utopu, ne pedi Yerusalem mutu neitamai domi ati tep nengeda, ‘Akatida, ne si dopra akati pumbon dongopkamne,’ peramsi dinin, ne si eremna ati peda, tapkamne ja,” pepu ada, Allahdi yu weik kupka tep, aupu pepu.

28 Uda, Raja Yosiadi er kuramu taru kupyakaramu keca yuma cap, Yehuda nesala talepra kuramu taru di kuramunge yuma capda, konum sekra deiami. Ange yumada, sun Yehuda tara nesala, sun ila nimi deiyo nengdi kurami keca, sengna buku neitamai konum sekra deirami. Atep, acada yuknge ton men sekupe.

Raja Yosia er pununa tep upu

29 Raja Yosiadi Yehuda yala nesala talepra kuramu taru neitamai di, Mesir mutu ila nimi deiyo ngebo, er si Firaun Nikodi utenepu. ‘Ne kabo Asyur mutu ila deiyo ngebo melipkamne’ tenen, er pe mutu damai di tapra, ila me si Efrat me damai beu. Beu pangeda, Raja Yosiadi, ‘Aneng porbenkamep’ tenen, er cap, er jen talena neng capdi, sun damai porbei. Porbei dinin, Firaun Nikodi, mutu si Megido mutu bena antapdarei taru dipu podanmaidi, Firaun Nikodi Raja Yosia poptapu. Popu pangeda, Raja Yosia er pel don nengdi er nong epi.

30 Epi dingeda, er pel don nengdi Yosia er nong doprapidi, kudadi gipra tu deiki embaramu keca, er si kereta kuda deiki deiprapidi, Megido mutu tapra, Yerusalem mutu duyai. Er nongda Yerusalem mutu ila nimi deiyo neng peina tep, konum keteneiami gel imir deipidi tu palipi. Anengdi Yosia er nong dopra gel imir pumbon deipi taruda, sun amutu kurami nesala yumadi, er mi Yoahas dopra yaidi, ‘Erpu Raja kunkamsere,’ tenepidi, minyak me dopra er giso deiki diktapidi, erpu tep erepra deipi. Ukupi pangeda, Yoahasda, er nai bo pununa tep, Yehuda tara nesala, sun ila nimi deiyo ngebo kuramudi, anesala talepra kuramu.

Raja Yoahasdi, Yehuda tara kurami nesala, sun nimi deiyo kepra taleamu upu

31 Yoahas er keteng tamun dua puluh tiga (23) tahun konum nemu taruda, nimi deiyo ngebo kepra, Yehuda tara kurami nesala tep, Raja kepra talepudi, Yerusalem mutu neitamai kuramu. Dinino, erdi amutu talepra kuramu taruda, denge weik gume. Ada, ware weneri deiki dipapu, erdi deiyo ngebo kepra talepmau. Yoahas er nin sida Hamutal. Aner Hamutal, erda Libna mutu ngebo Yeremiadi deiamu ner kuramu. 32 Yoahasda, er co puna nengdi mali kun kecapu talepra kuramitopu, er peda angepu talepra mali kuramu. Ada, Allah Yahwehdi, “Angeda pio mali kun keca,” peiamu ngeda, talepra kuramenga deiki di, Allah er damai mali kecapu talepra kuramu.

33 Yoahas erdi nimi deiyo ngebo kepra, talepmau taru dipapu, Mesir mutu ila nimi deiyo kepra taleamu ngebo, Firaun Nekho, erdi Yoahas tomoprapudi, Hamat mutu neitamai dinin, mutu si Ribla mutu neitamai bena, dopra wenemna ati pumbon deiamu. Ukupkopda, Mesir mutu nimi deiyo ngebo Firaundi, Yehuda mutu kurami nesala tep, “Sunda, ne gispal dona tep nengeda, sun kunumna weik keca weika di, ne tepapu karepkamnerume,” pepra deiamudi, sun deiki ikin peiamupa, sun amutu kurami nesala yumadi, ange kunumna tep, karepi keca dengeda, tiga ribu empat ratus (3.400) kilogram perak cap, tonda tiga puluh empat (34) kilogram emas cap, ange yuma dopra yana karepi.

34 Tonda, Mesir mutu nimi deiyo ngebo, er si Firaun Nekho, erdi Yosiadi deiamu mi yuk ngeboda, er sida Elyakim, ‘Erda Yehuda tara talenkamre’ tenen, nimi deiyo ngebo kuna tep, wepra deipu. Ukupupa, angebo erdi nimi deiyo ngebo kepra, Yehuda mutu kurami nesala yuma tep, taleamu dinin, Firaun er amutarapu kuramu. Firaun Nekhodi, Elyakim wepra deiyo ngebo kuna tep, deipu taruda, angebo er sida, Elyakim peramipane, Nekhodi, yuk si sipepu. Ada, “Ukutaru di dipra dorkunkamre taruda, angeboda er si tep, Yoyakim penkamepe,” pepra deipu. Ukupu dingeda, Nekhodi, Raja Yoahasda doupra, Mesir mutu tamupra derirbenamupa, bena wenemna ati pumbon dongomupa, dabena kuramunganen, Yoahasda acapu depu.

Yoyakimdi Yehuda tara kurami nesala deiyo kepra taleamu upu

35 Uda, Mesir mutu taleamu ila nimi deiyo ngebo, er si Firaun Nekhodi, Yehuda tara kurami nesala tep, “Ne gispal dona tep, kunumna keca weika di karepkamnerume,” pepra deipunge karena tep nengeda, Nekhodi wepra deipupa, Yehuda mutu nesala deiyo kepra talepu ngebo, Raja Yoyakimdi Yehuda nesala tep, “Sun yuk-yuk talepra kumum keca yuma akuretopu, kunumna keca er si pajakda, sun bung keca yuma akapseretopu, bupra duyamumdi, yana karepkunerume,” pepupa dopra yana karerami.

36 Yoyakim er kuramu taru keteng tamunda, dua puluh lima (25) tahun mamu. Ataruda, Yoyakimdi nimi deiyo ngebo kepra, Yehuda tara kurami nesala yuma taleamudi, ila ati arum kota Yerusalem mutu neitamai kuramudi, Raja kepra taleamu. Ataleamu keteng tamun yumada, sebelas (11) tahun deiki di taleamu. Yoyakim er nin sida, Zebuda. Aner Zebuda, erda Ruma mutu ngebo Pedayadi deiamu ner kuramu. 37 Yoyakimda, Yehuda tara taleamu dinin, er co puna nengdi, mali kun kecapu talepra kuramidi, Allah damai mali weik kuramitopu, er peda mali kecapu talepra, Allah damai mali kudiramu. Ada, Allah Yahwehdi, “Angeda pio mali kun keca,” peiamu ngeda, angebo Raja Yoyakimdi talepra kuramu.