2Ki 24 | XteSC | STEP | Uda, Raja Yoyakimdi nimi deiyo ngebo kepra, Yehuda mutu tara taleamu taruda, nimi si Nebukadnezarda, Babel mutu ila nimi deiyo kepra taleamu ngebodi, Yehuda tara neitamai yanamudi, amutu kurami nesala tep popbisipudi, amutu peda dalupra dopropu. Ukupkopda, Raja Yehuda, er si Yoyakim, erda, ‘Uo, ware kuptene do, guma,’ tenepudi, Babel mutu ila nimi deiyo ngebo, Raja Nebukadnezar er amutarapu kuramu. Er amutara kuramu keteng tamunda, weneri keteng tamun mamu. Aketeng tamun weneri deiki di, Raja Nebukadnezar er gispal dona tep nengeda, Yoyakimdi, kunumna weik keca bulupra duyakaramudi kareramu. Dinino, aketeng tamun weneri konum kupupa amenda taruda, Yoyakimdi, ‘Nebukadnezar erdi pere upu ton pio men gekenkamne,’ tenepudi, er peiamu upuda bisbisa kapudi yanirtamamu.

2 Kings 24

Raja Nebukadnezardi, ‘Yehuda mutu nesala popbisipkamne,’ tenepu upu

1 Uda, Raja Yoyakimdi nimi deiyo ngebo kepra, Yehuda mutu tara taleamu taruda, nimi si Nebukadnezarda, Babel mutu ila nimi deiyo kepra taleamu ngebodi, Yehuda tara neitamai yanamudi, amutu kurami nesala tep popbisipudi, amutu peda dalupra dopropu. Ukupkopda, Raja Yehuda, er si Yoyakim, erda, ‘Uo, ware kuptene do, guma,’ tenepudi, Babel mutu ila nimi deiyo ngebo, Raja Nebukadnezar er amutarapu kuramu. Er amutara kuramu keteng tamunda, weneri keteng tamun mamu. Aketeng tamun weneri deiki di, Raja Nebukadnezar er gispal dona tep nengeda, Yoyakimdi, kunumna weik keca bulupra duyakaramudi kareramu. Dinino, aketeng tamun weneri konum kupupa amenda taruda, Yoyakimdi, ‘Nebukadnezar erdi pere upu ton pio men gekenkamne,’ tenepudi, er peiamu upuda bisbisa kapudi yanirtamamu.

2 Ukupu pangeda, Allahdi Babel mutu neitamai cap, Siria mutu neitamai cap, Moab mutu neitamai cap, tonda Amon mutu neitamai cap kuramidi, jen talepra, nimi tali-tali porami neng yumada, doproipupa Yoyakim tep bisbisa kaprapidi, Yehuda mutu neitamai kurami nesala yuma, yana popra gawal dakmanto kupi. Ada, tali tep guma. Deiyoda, Allah er upu peipnepa, lap pena deiyo neng, sun nabi-nabi neng, sun kori peiamupa, sundi Yehuda mutu nesala gekenai, “Allahdi nun wenemna tep, go karepserepa, yuk karen mutu nengdi, ukupkamsenge,” pepra, lap peiamitopu kupi.

3 “Tek sisi angeda ukupkamsenge,” pepra, Allah Yahweh erdi konum peiamnga cadi, ange utopu kupi. Ada, Yehuda tara kurami nesala sun mali kuna tep, Allah Yahwehdi, “Nedi wenemna tep, go karepnepa, karen mutu yu nengdi yana, Yehuda tara kunkameng nesala yumada, sun tep kareamsi mutu neitamai di yana enepra donokamenge. Ukupkamenga deiyoda, Raja Manasye ngebodi, nimi deiyo kepra taleamu taru di, mali-mali keca pio weik kuramnga tep, Yehuda tara kunkameng nesala tep, yana enepra dokotepkamenge,” pepra deiamutopu kupi. 4 Tonda, Raja Manasyedi ila mali kwamu ngeda, sun mali men kuramidi, tali kange doupra kurami nesala, Yerusalem mutu neitamai dakurami nesala, weika di popra tamunge, menenga tep nengeda, Allahdi go karepupa, sun karen mutu yu nengdi yana, Yehuda tara kurami nesala enepra dokotepi. Allah Yahwehdi, Raja Manasye ngebodi, Raja keamu taru neitamai di, mali kuramu ngeda, ‘Kau kepnedi, men lyepropkamne,’ tenepka tep, Yehuda tara kurami nesala yumada adipapu tapu.

5 Uda, Raja Yoyakim nimi deiyo ngebo kepra taleamudi, pel domunge cap, upu peramunge cap, dakurumunge cap, ton yuknge yuma capda, Yehuda mutu kurami nesala, deiyo kepra talepra kurami neng, sun si sengami buku neitamai sekra deiami. Abuku sida, ‘Sejara Raja-Raja Yehuda,’ pepi. 6 Raja Yoyakim konum depu pangeda, er yo punupra Raja kemna tep, erdi deipu mi, er si Yoyakin, erdi Raja kepra, Yehuda tara kurami nesala talepra kuramu. 7 Uda, ataru neitamai di, Babel mutu ila nimi deiyo ngebo, Raja Babeldi, metek me sida, Mesir me, acei di dipra, Efrat me kin dam tara dinin, daneitamai kwamu mutu yumada, benamnganen, dalupra dopropu. Angeda, utara dapu tara mutuda, menop taru Raja Mesir, erdi taleamu mutu tara tu wilimdonai yumada, Raja Babel dipapu, bisbisa kapudi taleamu. Atep, Mesir mutu nesala talepra kuramu ngebodi, amutu neitamai ton bena pio men porbaramu. Er pe mutu neitamaipu kuramu.

8 Uda tenpu ngebo er si Yoyakinda er keteng tamun dengda delapan belas tahun kuramu taruda, Yehuda yala nesala, sun ila nimi deiyo ngebo gonga kepu. Erdi Yehuda tara taleamu taruda ware weik gume. Weneri war deiki dipu, Yehuda yala nesala sun ila nimi deiyo ngebo kuramudi, Yerusalem mutu neitamai kuramu. Er nin sida Nehusta. Anerda Yerusalem mutu ner kuramudi, er nai boda Elnatan kuramu. 9 Yoyakin er nai boda, Allah er si Yahwehdi, ‘Akun kecada ne songe. Angeda mali,’ teneramu kecapu kuramutopu, er mi Yoyakin peda akeca utopu kuramu.

10 Ataru neitamaida Yoyakindi Yehuda yala nesala talepra kuramu taruda, Babel mutu ila nimi deiyo ngebo Nebukadnezardi, er jen talen neng tep peipupa, Yerusalem mutu yana wareki. ^{▼▼wareki – Sun Babel mutu nengdi Yerusalem mutu warengami ngeda, ake. Amutu dana-dana yuma ila lyom gel beilya welepra wiramyada, ‘Agel beilya welepra bisipmepedi, tali lupra Yerusalem wengkamep’ tenen, tu weika di palipra agel beilya damai derirami. Tonda, Yerusalem mutu nengdi, Yerusalem ati arum neitamai di tapra bura tara men benmanto kuramya tep, sun jen keca men kirbenmanto kurami. Tonda, sun jen me peda men gwerbenmanto kuramipa, jen putana weik kuramupa, ikin weik kurami.} Warekidi, Yerusalem mutu yuma ongopgenepra kunmaidi warengamya tep, sun Yerusalem mutu neitamai kurami nengda, amutu tapra sun wai dam men benmanto kurami. Tonda, yuk nengdi bura tara di Yerusalem mutu neng melimna tep men wekmanto kuramya cadi, Yerusalem mutu kurami nesalada, kware weik cap, jen putana weik cap kurami.

11 Uda, ataru neitamaida, Babel mutu ila nimi deiyo ngebo Nebukadnezardi, Yerusalem mutu damai diryau. Diryau taruda, er amutara jen talena deiyo nengdi, ‘Yerusalem mutu wekamep’ tenen, amutu dana-dana wirami gel beilya damai tu palipra derinmaipa epu. Ataruda, er jen talen nengdi, amutu yuma yana warekrap ongopdongopipa, ange ton epu.

12 Yan wareki pangeda, Raja Yehuda Yoyakin perami ngebo cap, er nin cap, er amutara dinin, ila deiyo neng cap, tonda er putaramu pel dona deiyo neng cap, ‘Babel nengdi poptapsenung’ tenen, sun nimi pon keca yuma deiptapidi, ‘Nun konuma,’ pepi pangeda, Raja Babeldi amutu neng yuma bisbisa kapudi, tomopu. Ukupka cadi, Raja Babel mutu ngebodi, er pe mutu Babel taleamnganen, keteng tamun delapan ngeda konum kupu taruda, Raja Yehuda er si Yoyakin bisbisa kapudi tomoprapudi, ateng koupdara dubeu.

13 Aneng yuma tomopu dingeda, pumun taru Raja Salomodi Allah Yahweh, er si eremna ati domudi, akati pumbon deiamu kunumna weik keca yumada upula dopropu. Ada, akati pumbon cap, tonda Raja Salomo er pe ati pumbon cap, kunumna weik keca, men nukmanto weike dongoramu keca yala-yala yuma upula dopropu. Tonda, Raja Salomodi, Allah er si eremna ati pumbon pel dona tep, kunumna weik keca er si emas dopra, apel don keca weika di keteneiamudi, akati pumbon deriramupane, akwamunge yumada, Nebukadnezardi upula dopropudi, akeca-keca yuma metek, meteka dipu sekra deipudi, kipra dubeu. Akati butene neitamai kwamu gat keca yumada, doprapidi, Babel mutu dubei. Babel nimi deiyo ngebodi, akupunge yumada, Allah er si Yahweh menmena taru di, ‘Ukupkamre,’ pepra konum peiamutopu kupu.

14 Ange utopu Yerusalem mutu kurami neng weik tara ngeda, ateng kouprapudi, Babel mutu dubeu. Ada, Raja Yoyakin cap, er amutara ila deiyo neng cap, er jen talena tep deiyo neng cap, tali jen talepra kika deipra podana neng cap, akeca-keca yala-yala yuma ketenem dina deiyo neng cap, mambul keca, urasin telep keca pel dona deiyo neng cap, tomopra dubei. Aneng yumada, nimida denge weik, sepuluh ribu neng ateng kouprapidi dubei. Aneng, sun isomka neng cap, mambul pel dona deiyo neng yuma cap, ati dona kael neng cap yuma Babel mutu doupra bei. Ukupra tapidi, men dubei nengda, puto boun nesala cap, tali kan-kan nesala cap, men dubei. Anengda Yerusalem mutu neitamaipu tapipa dakunmai.

15 Ange tep nengeda, Babel mutu ila deiyo ngebo Nebukadnezardi, Yehuda tara nesala yuma bisbisa kapudi, sun deiyo ngebo Yoyakin ateng kouprapudi, Babel mutu dubeu. Ange utopu, Yoyakin tomoprapidi, er nin cap, er nerapu cap, er amutara pel dona deiyo neng cap, tonda, Yehuda tara deiyo-deiyo neng yuma cap doupdara Babel mutu derirbei. 16 Ange utopu nimi ila puto di balila kupra kurami neng, sun jen talen neng dubei. Anengda yuk mutu neng porbenmanto nengda, ateng koupra denge weik tujuh ribu neng cap, ati dona kael neng cap, akeca-keca, urasin telep keca yuma ila kael keca ketenem dina deiyo neng cap, denge weik seribu neng ateng koupra Babel mutu dubei.

17 Ukupi taruda, Babel mutu ila nimi deiyo ngebo Nebukadnezardi, Yoyakin er yo pununa tep, er mam bo Matanya wepra deipupa, angebodi Yehuda yala nesala tupa tapinge cap, Yerusalem mutu cap tep taleamu. Angebo er ukupu si pena tep nengeda, Nebukadnezardi, angebo tep, ‘Pumun taruda, kan si Matanya peramkei dinin, kan ukupu sida, Sedekia pepra si pepmakene,’ pepra si pepu.

Sedekiadi Yehuda yala nesala sun deiyo ngebo kepu upu

18 Uda, Sedekia erda keteng tamun dengeda dua puluh satu tahun kepu taruda, Yehuda yala nesala sun ila nimi deiyo ngebo gonga kepra kuramu. Erda keteng tamun sebelas tahun deiki di Yerusalem mutu neitamai kuramudi, Yehuda yala nesala taleamu. Er nin, er sida Hamutal. Anerda er nai boda Yeremia kuramu. Aner er mutu sisada, Libna mutu ner kuramu. 19 Angebo Sedekia peda, Raja Yoyakim men di mali-mali weik kuramutopu kuramu. Ila nimi deiyo ngebo Raja Yoyakin kuramu taruda, mali weik kuramutopu, er mam bo Sedekia peda utopu mali weik kuramu. Ukuramupane, Allah diramudi, ‘Angeda pio mali,’ teneramu.

20 Uda, aila kange mun keca yumada, Yehuda yala nesala nong deiki kwamu ngeda mesum tep gume. Deiyoda, sun Yehuda yala nesala mali weik kuramya tep nengeda, Allah er si Yahwehdi, sun Yehuda yala nesala cap, Yerusalem mutu kurami neng yuma cap tep, wenepra derepudi tapu.

Tapu ngeda, er dabal kupka tep, Yehuda yala nesala tapudi, ‘Amutu kurameng nesalada, wenemkamne’ tenen, er damai di sun tep enepra dokotepupa, Babel mutu nengdi anesala ateng kouprapidi, sun mutu dubei.

Uda, ataru dipapu gum dinin, amenda taruda, Raja Sedekiadi, ‘Babel mutu ila nimi deiyo ngebo, yanipra tapkamepe,’ tenen, piripetepu.