2Ki 25 | XteSC | STEP | Yehuda yala nesala, sun deiyo ngebo Sedekiadi amutu taleamu taru neitamai dinin, keteng tamun topnebari deiki dinin, warda morokyo war. Tonda awar neitamaida morokyo tumi deiki di, Babel mutu ila nimi deiyo ngebodi Yerusalem mutu poryau. Babel mutu ila deiyo ngebo, er si Nebukadnezar cap, er jen talen neng yuma capdi, ‘Yerusalem mutu neng popkamep’ tenen, yaidi Yerusalem mutu yan wareki. Warekidi, Nebukadnezar cap, er nyapu cap yumadi, Yerusalem mutu damai dinin bura tara sun tenda opkal ati erepra deipidi akunmai. Tonda, amutu ati dana-dana yuma ila lyom gel beilya ongopgenepra wiraminge damai, tu weika di palipra abeilya dam tu welepra derinmai. Ukunmaiyada, ‘Agel beilya deiki welepmepedi, Yerusalem neitamai tali lupra wekamep’ tenen, kunmai.

2 Kings 25

Raja Babel cap, er jen talen neng capdi, Yerusalem mutu bisbisa kapya tep upu

1 Yehuda yala nesala, sun deiyo ngebo Sedekiadi amutu taleamu taru neitamai dinin, keteng tamun topnebari deiki dinin, warda morokyo war. Tonda awar neitamaida morokyo tumi deiki di, Babel mutu ila nimi deiyo ngebodi Yerusalem mutu poryau. Babel mutu ila deiyo ngebo, er si Nebukadnezar cap, er jen talen neng yuma capdi, ‘Yerusalem mutu neng popkamep’ tenen, yaidi Yerusalem mutu yan wareki. Warekidi, Nebukadnezar cap, er nyapu cap yumadi, Yerusalem mutu damai dinin bura tara sun tenda opkal ati erepra deipidi akunmai. Tonda, amutu ati dana-dana yuma ila lyom gel beilya ongopgenepra wiraminge damai, tu weika di palipra abeilya dam tu welepra derinmai. ^{▼▼tu welepra derinmai – Sun Babel mutu nengdi Yerusalem mutu warengami taruda, ukupi. Amutu dana-dana yuma ila lyom gel beilya welepra wiramyaida, ‘Agel beilya welepra bisipmepedi, tali lupra Yerusalem wengkamep’ tenen, tu weika di palipra agel beilya damai derirami. Tonda, Yerusalem mutu dan-dana taru yuma warengmaiya tep, Yerusalem nengdi, Yerusalem ati arum neitamai di tapra, bura tara men benmanto kuramya tep, sun jen keca men kirbenmanto kurami. Tonda, sun jen me peda men gwerbenmanto kuramipa, jen putana weik kuramupa, ikin weik kurami.} Ukunmaiyada, ‘Agel beilya deiki welepmepedi, Yerusalem neitamai tali lupra wekamep’ tenen, kunmai.

2 Ukupi dingeda, tupa warengnapu kurami. Ukuramyane, keteng tamun butene deiki peda ka di tupa wareng yakaramidi amutu tupa kurami. Sedekiadi Yehuda tara taleramu keteng tamun sembilan deiki adinen, keteng tamun sebelas nge neitamai tupa warengyakanapu kurami. Babel mutu nengdi, Yerusalem mutu warengami taru neitamaida, Yerusalem mutu nengdi tali lupra bura men benmanto kurami. Tonda, yuk neng bura tara di ati dam tara men wekmanto kurami. Atep nengeda, sun jen gum kupupa, jen bulungnapu kuramidi, ikin kange doupra kurami.

3 Ukuramya tep, war dumbaringe neitamai dinin, komuni topne baringe konum kupu pangeda, Yerusalem mutu neitamaida, jen pio gum kupka tep, amutu kurami nesala jen pio men jerami cadi, jen ila di putaramupa, kange mun weik kuramu.

4 Ukuramipane, ataruda, sun Babel mutu warengami nengdi, agel beilya neitamai bon potoki pangeda, alukundapu sun Yerusalem mutu jen talen neng yumadi amutu tapra bura saka bendopi. Sun bendopyaida, amutu nimi deiyo Raja ngebo er wa damai dinin, agel beilya bon potokidi buplan ketenepyai beilyada, dela butene neitamai di guptapra bendopidi bura saka bei. Sun jen talena nengdi, bendopi taruda, sun Babel mutu di yai jen talena nengda, Yerusalem mutu dana-dana yuma ongopgenepra tupa warengnapu kunmai dinin, Yerusalem mutu jen talena neng sepdara bendopipa, men epi. Yehuda yala jen talen neng yuma bura sakapidi sepdara Yordan me embaramu mutu ban bisi bei.

5 Yehuda yala jen talen neng cap, sun Raja ngebo cap, Yerusalem mutu tapra sepdara bura saka bendopi dinin, Babel mutu jen talen neng yumadi, ‘Angebo tomopkup’ tenen, er amenda tara sepdara dombanmaidi, Yeriko mutu banai neitamai di, Yehuda tara nimi deiyo ngebo Sedekia tomopi. Sedekia, er jen talen neng yumada, mali kange doupidi, er tapra yuk-yuk kepra bendopi pangeda, er tenpu sepdara, yukai bendopu. Ukupka cadi, sun Babel mutu jen talen nengdi, Raja Sedekia tomopi.

6 Yehuda nimi deiyo ngebo Raja Sedekia tomoprapidi, Babel mutu ila nimi deiyo ngebo kori, mutu si Ribla mutu kuramngai doupra bei. Ukupi pangeda, ‘Er wenemna tep, ware kupkamep do?’ tenen, upu sisingmaidi, er tep upu bokeipidi, ila ikin keca er nong deikipu deipi. 7 Ukupi dingeda, er adinmaupapu er nyapu yuma poptapi. Popi dingeda, Raja Sedekia er asuru lukropi. Ukupipa ila di mali penmaupane, gat keca er si tembaga di keteneipi tapu di, er buru ateng koup dongoprapidi, Babel mutu doupra bei.

Babel mutu nengdi, Allah er si eremna tep domi ati uruptapi upu

8 Uda, Babel mutu talena tep, ila nimi deiyo ngebo, er si Nebukadnezardi amutu taleramupane, keteng tamun sembilan belasnge konum kupu pangeda, tonda ware pamu bari dinin, tanggal 7 kupupa, er amutara pel doramu ila ngebo er si Nebusaradan doproipupa, Yerusalem mutu beu. Angeboda, Raja Babel er kalengna tep jen talen neng, sun deiyo ngebo kuramu.

9 Nebusaradandi Yerusalem mutu yaudi, Allah Yahweh, er si eremna ati domi ngeda, uku dongopu. Tonda, Yehuda tara ila nimi deiyo ngebo er pe ila ati ton uku dongopu. Ange utopu, Yerusalem mutu neitamai ati-ati doraminge yuma ton uku dongopupa, akati-akati yuma uku jepropupa gum kupu. Angepu gum dinin, Yerusalem mutu mambul ati-ati yuma uku dongopra seng pepi. Tenpunge peda, men tapi.

10 Ukupi dingeda, ataru dipapu, sun Babel mutu deiyo ngebo Raja, er kalengna tep jen talen neng, sun ila deiyo ngebo Nebusaradandi peipupa, er jen talena nengdi Yerusalem mutu ongopgenepra wipra welemi gel beilya yuma dakra uruptapi. Ukupi ngeda, Raja Nebukadnezar, er kalengna tep jen talena neng, sun deiyo ngebo Nebusaradandi, ‘Ukupkamrume’ peipupa, abeilya uruptapi.

11 Ukupi pangeda, Yerusalem mutu neitamai gawal tapmaipa, tupa kunmai nesala yuma ateng kouprapidi Babel mutu dubei. Ange peda, Nebusaradandi, ‘Ukupkurume,’ peipupa, Yerusalem mutu tupa kunmai nesala, tali nesala cap, tonda, ‘Babel mutu neng, sun tara kepropkamepe’ tenerami neng cap, ateng kouprapidi Babel mutu dubei. 12 Yerusalem mutu kurami neng weik tara ngeda, Babel mutu dubei dinin, ‘Amutu wa pepra kunkameng’ tenen, tali kankan kunge nesala wepra bokrapidi Raja Babel er kalengna tep jen talena deiyo ngebodi peipupa, aneng tapra acapu kuramidi, anggur tapu wa cap, yuk yala wa cap pepra kurami.

13 Babel mutu nengdi, Yerusalem mutu bisbisa kapi taruda, kunumna weik keca ton uruptapidi, akeca dopra sun pe mutu dubei. Angeda, Allah ati bo ayomnya gat keca tembaga di betaprapdi, butene deiaminge cap, tonda gat keca tembaga di betamami meja utopu keca dopra dubei. Tonda ila pala keca betamidi, me mokon gwepra dingdongoraminge cap, ^{▼▼me mau – Aila pala kecada, betapra deipidi, sun Allah si eremna ati pumbon pel dona deiyo nengdi, me gwepra akeca pumbon dingdongorami. Ameda, Allah karena pel don taruda, me kuna utopu, akati pumbon keca telep kweimdina tep, ame mau pumbon di, me gwepra akati keca me kupra deiamidi pel dorami. Angeda, Allahdi, “Ukunkamrume,” peramutopu kurami. Tonda 1 Raja pasal 7 neitamai ton aupu akwapmare.} akeca betamaminge cap peda dopra dubei. Akeca yuma uruptapra dopropidi, gat keca tembaga ngeda dopra, sun Babel nengdi, sun pe mutu Babel mutupu tamupra dubei.

14 Ukupi taru dipu, sun Babel mutu jen nengdi Yerusalem mutu Allah si eremna ati bo deiami keca yuma upula dopropi. Ada, gamne panci cap, me gwedon keca cap, sikop cap, weica minyak me pumbon uku jeramre keca sengna tep gunting cap, tonda nintong telep keca derina piring cap, tonda Allah er si eremna ati pumbon pel dona tep, tembaga gat keca di betamamidi akati bo deiami keca yala-yala yuma dopropidi sun pe mutu Babel mutu dubei.

15 Tonda ange peda utopu, Babel mutu ila nimi deiyo ngebo, er kalengna tep jen talena deiyo ngebodi, er sida Nebusaradan kuramu. Angebodi Allah er si eremna ati pumbon neitamai deiami keca, kunumna weik keca er si emas cap, perak cap di, betamaminge ton dopropu. Ada, ‘Allah moropkup’ tenen, nintong telep keca deiamidi, uku sengami gat keca dopropu. Tonda gam keca popnedi, yapi dopra likeiami me mau cap, akeca yuma dopropu. Akeca yumada, kunumna weik keca, emas cap, perak cap di, betamami keca yuma ajen talena deiyo ngebodi dopropudi, Babel mutu dubeu.

16 Pumun taru Raja Salomodi, Allah er si eremna ati dona tep, ayumnya butene ngeda, gat keca er si tembaga deiki di domunge cap, tonda tembaga di domudi akati pumbon deiamu meja utopu keca cap, tonda me kuna cap, telep kweimdina cap tep, ila pala me mau douamunge cap, ange yumada, ajen talena deiyo ngebodi upula dopropu. Akeca yumada, tembaga di domi ngeda ikin weik cadi, er ikinda erepra men nukmanto kupu. Pio weike kupu.

17 Uda Raja Salomodi peipupa, abutene ayumnya co yuk-yuk deipdongopra dopi ngeda, sun lyomda delapan meter cap ton metekanun ton kuprei. Abutene gat ayumnya co dinin, deiki tara giso dupaida, er lyomda 1.3 meter kamo. Akeca urasin deikida, amutu pio telep co du er si delima, aco du urasin utopu gambar petupra deiami. Tonda rantai tapu urasin utopu keca ton petupra deiami. Ortara gat ayumnya co peda, er giso dupaida akeca utopu co du delima urasin utopu petupra deipi. Akeca petupra deiami ngeda, ada ‘Akati urasin telep kupkamre’ tenen, telep kupra domi.

Babel mutu nengdi, Yehuda yala nesala ateng kouprapidi, Babel mutu doupra dubei upu

18 Nebusaradandi Yehuda yala neng, ila mambul neng weika di ateng kouprapudi, er deiyo ngebo Raja Babel damai dubei. Er damai dubei nengda ake. Tenpu ngeboda, Allah er si eremna ati pumbon pel dona tep, deiyo neng, sun ila deiyo ngebo, er si imam Seraya tomopra dubeu. Tonda, er amutara ngebo dinin, yambul dutara imam pel doramu ngebo, er si imam Zefanya cap dubeu. Tonda Allah er si eremna ati buplan damai talepra kalengna deiyo neng weneri cap dubeu. Aneng yuma, talepra ateng kouprapudi Babel mutu dubeu.

19 Tonda, Yerusalem ati arum neitamai tupa kurami neng kan-kan di, yana tomopra ateng koupra dubei nengda ake. Tenpu ngeboda Yehuda yala jen neng, sun deiyo ngebo cap, tonda Yehuda nesala sun ila nimi deiyo ngebo, er amutara dinin, upu bongna cap, upu lap pepra melipra pena deiyo neng pamu bari cap, tomopra dubeu. Anengda, Raja ngebo tep, ‘Ukupra kunada, telepe. Ukuptepe ngeda, ake,’ pepra er upu melimna neng kurami.

Tonda, Yehuda tara nimi deiyo ngebo, er mambul keca sengna cap, amutu nimi si sengna cap, asengna deiyo ngebo, Sekretaris Negara ton tomopra dubeu. Angebo er pel doramu ngeda, ‘Ikin pel dipmepepa, nimidi pel donkamseng’ tenerami taruda, angebodi, animi wepra sun si sengamu. Sun Babel mutu jen nengdi, angebo cap, er amutara pel melipra dorami neng enam puluh neng cap tomoprapidi, ateng koupra Babel mutu dubei. Anengda Yerusalem mutu neitamai tupa kuramipa, tomopra Babel mutu dubei.

20 Aneng yumada, Babel mutu jen talena deiyo ngebo, er si Nebusaradandi peipu pangeda, er jen nengdi sun Yehuda neng tomoprapidi ateng koupdarapidi, Babel, mutu ila nimi deiyo ngebo, Raja Nebukadnezar damai dubei. Raja Nebukadnezarda Ribla mutu kuramngai, sun Yehuda yala neng tomopra derirbei. 21 Ukupi pangeda, Babel mutu ila nimi deiyo ngebodi peipupa, Hamat tara neitamai dinin, mutu si Ribla mutupu, sun Yehuda yala neng yuma poptapi.

Ange tep nengeda, sun Babel mutu nengdi, Yehuda yala nesala popbisipidi, Yehuda yala nesala kurami mutu neitamai di ateng kouprapidi, doupra Babel mutu, bena deiptapi. Ataru di gonga kepra doryankamu taru neitamaida, Yehuda yala nesala sun pe mutu tamupra men benmanto kuramya tep, sun Babel mutu nengdi, ikin keca weik sun nong deiki deriramipa, sun amutara kurami.

Babel mutu nengdi, nimi si Gedalya tep, ‘Yehuda yala nesala sun deiyo ngebo Gubenur kunkamre’ tenen, erepra deipi upu

22 Babel mutu jen talena deiyo nengdi, Yehuda yala nesala, sun deiyo-deiyo neng konum ateng koupra Babel mutu dubei pangeda, Babel mutu ila nimi deiyo ngebo Raja Nebukadnezardi utenepu. ‘Yehuda yala ngebo, er si Gedalyada, Yerusalem mutu neitamai tapkamne nengda, Yehuda yala nesala, sun nimi deiyo ngebo Gubernur kunkamre’ tenen, erepra deipu. Gedalya er nai boda Ahikam. Ahikam er nai boda Safan.

23 Uda, Babel ila deiyo ngebodi, ‘Gubenur kunkamre’ tenen, Gedalya erepra deipu pangeda, yuk nengdi lap peramipa, Yehuda yala jen talen neng, sun ila deiyo neng cap, sun amutu tali jen talen neng cap yuma gekepi. Gekepi dingeda, Gedalya Mispa mutu kunmauai bei. Sun bei nengda, Netanya er mi Ismael cap, Karea, er mi Yohanan cap, tonda Netofa mutu ngebo Tanhumet er mi Seraya cap, Maka mutu ngebo er mi Yazanya cap, sun yuma Gedalya damai bei. Sun bei taruda, sun amutara tali jen talen neng ton melipra bei. Sun yumada, Gedalya damai bei.

24 Bei pangeda, Gedalyadi ajen talena deiyo neng cap, sun melimna neng cap tep pepu. “Sun mutuda Babel mutu ila deiyo nengda, nun Yehuda tara talenkamseng dinin, sun kware dangna gume. Amutu neitamaida, sun yuma tali dimpepra kunkamrume. Babel mutu ila nimi deiyo ngebo Raja Nebukadnezardi, ikin pel dipseredi karenkamsernge yumada, tali kange doupra pel doamrumudi, er pel bouna dipu doprumu pangeda, amenda taru akeca-keca yuma teleppu kunkamsere. Angeda apepmasentopu, tek sisi kupkamsere, pepsene,” Gedalyada puto di aupu pepra deipu.

25 Upepu dinin, Babel mutu talena tep, ila nimi deiyo ngebo, er si Nebukadnezardi amutu taleramupane, keteng tamun sembilan belasnge konum kupu pangeda, tonda ware yoneitam war neitamai di, Raja ngebo er tara ngebo er si Elisama, erdi deiamu mi Netanya, angebo erdi deipu mi Ismael cap, er melimna neng denge takol bari neng cap yuma, Gedalya damai bei. Sun yuma Gedalya damai bei dingeda, Gedalya poptapi. Gubenur Gedalya popi taruda, Gedalya cap Mispa mutu kikiman kurami Yehuda yala neng cap, tonda er cap kikiman kurami Babel mutu neng cap poptapi.

26 Ukupi pangeda, sun Yehuda yala nesala, amutu tupa kurami nesala yumada, kware weik kupupa, adipapu, amutu tapra Mesir mutu sepdaro bendopi. Ada Yehuda yala nesala isomka mambul neng pe, tali kankan kunge nesala, mambul gum nesala peda, tonda Yehuda tara kurami nesala sun jen talena deiyo neng yuma peda, ‘Babel mutu jen talen nengdi nun yuma yana popsenung’ tenen, kware kupupa, adipapu Yerusalem mutu tapra, sun yuma bura sakapidi, sepdaro Mesir mutu bei.

Babel mutu ila nimi deiyo ngebodi, Yehuda yala nesala sun deiyo ngebo Yoyakin, wenemna ati deiamyai di loptapu upu

27 Uda Babel mutu nengdi, Yehuda tara nesala popbisipidi, sun ila nimi deiyo ngebo er si Yoyachin cap, tupa gam kurami neng cap dopra, ateng kouprapidi, Babel mutu dubeidi, acapu deiamipane, ataru di dipra keteng tamun 37 tahun konum kupu pangeda, Babel mutu ila deiyo ngebodi, Yehuda mutu taleamu deiyo ngebo Yoyakin loptapu. Ada, amul war neitamai dinin, tanggal 27 deiki di Raja Yoyachin loptapupa, amutu wenemna ati deiamya neitamai di, akati tapra bura beu. Ataruda, Babel mutu ila nimi deiyo ngebo, er si Raja Ewil-Merodakdi gonga kepra, Babel ila nimi deiyo ngebo kupudi amutu taleamu. Babel mutu ila nimi deiyo ngebo gonga keamu taru di, bicau tenepudi, Yoyakin loptapu.

28 Babel mutu ila nimi deiyo ngebo, er si Ewil-Merodakdi, Yehuda yala nesala sun Raja Yoyakin tep, bicau tenepudi, telep upu peramu. Ukuramu taruda, yuk Raja neng ton, sun cap Babel mutu neitamai kurami dinin, aRaja ngebodi, sun yuk Raja neng yuma tep nengeda, ‘Sunda yambul mambul pua,’ teneramu. Dinino, Raja Babel, er si Ewil-Merodakdi, Yoyachin tep, ‘Erda mambul weik ngebo,’ teneramnga tep, telep bungna keca karepu. Ukupu dingeda, er Babel tara nesala yuma tep nengeda, upepu. “Angebo Yoyachin tep nengeda, ila di gispal donkamrume. Yuk mutu deiyo-deiyo neng, nun mutu neitamai dakunung dinin, sun tep nengeda, yambula dipu gispal donkamrume,” pepra deipu.

29 Aupu konum pepu pangeda, Raja Yoyakin er wenemna ati kuramu taru kenengamu opkal, pio mali kwamu ngeda, kwiriptaprapudi, ukupunge keneku dingeda, Babel mutu ila nimi deiyo ngebo, Raja Ewil-Merodak damai yana, kikiman jen jepra pio kuramrei. 30 Ukuramreiyanen, Babel mutu ila nimi deiyo ngebodi, Yoyakin tep, tumi-tumi yuma, er putapne keca kunumna tep, co bo kareramupa, kunumbaramudi teleppu kuramnganen, amenda taru depu.