2Ki 3 | XteSC | STEP | Nimi deiyo ngebo Raja Yosafatdi, Yehuda mutu neitamai yuma talepra kuramnganen, Keteng tamun delapan belas (18) tahun kupu. Keteng tamun delapan belas tahun neitamaida, Ahab er mi Yoramda, Israel yala nesala kurami tara, sun ila nimi deiyo ngebo Raja ngebo kepra talepra kuramudi, sun ila ati arum, amutu deiyoi, Samaria mutu, keteng tamun denge pio weik dua belas (12) keteng tamun neitamai di upu peramu.

2 Kings 3

Israel neng cap, Moab yala neng cap, mar podaraminge tep, seki upu

1 Nimi deiyo ngebo Raja Yosafatdi, Yehuda mutu neitamai yuma talepra kuramnganen, Keteng tamun delapan belas (18) tahun kupu. Keteng tamun delapan belas tahun neitamaida, Ahab er mi Yoramda, Israel yala nesala kurami tara, sun ila nimi deiyo ngebo Raja ngebo kepra talepra kuramudi, sun ila ati arum, amutu deiyoi, Samaria mutu, keteng tamun denge pio weik dua belas (12) keteng tamun neitamai di upu peramu. 2 Nimi deiyo ngebo Raja Yoramda, Allah Yahwehdi, ‘Angeda pio malinge,’ teneramu kecapu talepra kuramu. Yoramda, Allah er damai di, pio mali weik pel doramudi kuramu. Dinino, Yoram er nin Izebel cap, er nai Ahab cap, sundi pio mali weik kurami utopu men kuramu. Yoram er nai bodi, isok Bahal, er si eremna tep, ketenepra ikamu lyom gel, er si patungda, nimi deiyo ngebo Raja Yoramdi angeda uruptapu.

3 Angeda ukupu dinin, nimi deiyo ngebo Raja Nebat, er mi Raja Yerobeamdi, mali pio weik kuramu ngeda, er Raja Yoram peda utopu, ange yuma kupbaramupa, sun Israel yala nesala peda epidi, ‘Nun Raja akunmartopu, nun peda angepu talepra kunkamepe,’ teneramidi, mali weik kurami. Tonda akuraminge yuma peda, pio men tapmanto kurami. 4 Uda, Moab mutu taleamu nimi deiyo ngebo Raja Mesada, domba bisam peina ngebo kuramu. Atep nengeda, sun Israel yala nesaladi Israel nimi deiyo ngebo taleamu tu tep, kunumna keca ton kareramu. Ada, pajak kemami ngeda, aketeng tamun, aketeng tamun yumada, domba bisam mi seratus ribu (100.000) domba bisam mi cap, tonda jem domba bisam nong nepunge cap, potong pulpul ngepu seratus ribu (100.000) wepra kareamupa, er tara nengdi, Israel mutu neitamai duyakaramidi, karerami.

5 Ange pio ukupra kupbaramu dinino, Israel mutu ila nimi deiyo ngebo Raja Ahab konum depu pangeda, Moab mutu taleramu ngebo, Raja Mesadi, Israel tara talepra kuramu ngebo Raja Yoram tep, bouna di amu kepra, men kuramu.’ Angebo er upu ton men gekenkamne,’ teneramudi, balila pio weik kuramu. 6 Ange tep nengeda, Israel tara nimi deiyo ngebo Raja Yoram adipapu menmena Samaria mutu neitamaida taprapudi, ‘Moab mutu benkun’ tenen, bisi banmau. Tonda ukupu dingeda, er kayapu neng sun kikiman jen talena neng cap, weika di ton ketenepra deipudi, sun kikiman bei.

7 Ange yuma konum kupu dingeda, nimi deiyo ngebo Raja Yoramdi, lap pena upu tep, Yehuda mutu taleamu ila nimi deiyo ngebo, Raja Yosafat tep pepu. “Moab mutu ila deiyo ngebo Rajadi, ne tep, ‘Angebo er upu ton men gekenkamne,’ teneredi, ne upu yanitamnerure. Atep, kanda ne melipnemempa, ne nimi deiyo ngebo, Raja Moab porbenkunem do, ne pe yuk porbenkun do?” pepu. Upepupa, Yehuda mutu talepra nimi deiyo ngebo kepra kuramu ngebo, Raja Yosafatdi tamupra pepu. “Ne cap, ne jen talen neng cap, kan cap, kan tara jen talena neng cap, tonpa kunupe. Atep, nun kikiman mar podarbana tep, bukra ban keca kuda bisam cap, ne jen talena neng cap yumada, kan nge utopu kurura cadi, kikimanpu mar porbenkupe. Kan Yoram tep melipkamakepe,” pepu.

8 Tonda, aupu ton dukdongopra pepu. “Amelipkepepa, sun benkamrum bisida, dan tara bisi benkamep do? Tonda, dan tara bisi di bepedi, Moab mutu nesala porbenkamap do?” pepra, Raja Yosafatdi asipetepu. Upepupa, Raja Yoramdi tamupra pepu, “Nun adipapu katawai mutu Edom tara di kepronkamape. Amutu neitamaida, nimi gumai cadi, amutu di Moab mutu nesala tep, porbenkupe,” pepu.

9 Upepu dingeda, adipapu Israel tara taleamu ngebo, Raja Yoram gonga kepudi, er kap Raja Yosafat cap, ada Yehuda tara taleamu ngebo cap, tonda Edom mutu neitamai taleamu ila nimi deiyo ngebo Raja Edom cap, adipapu wisipra bei. Ue ngangtan bari tumi deiki di bisi barami taruda, ila pala mutuda, katuai mutu neitamai embarami. Ada, ‘Yuk neng epsengedi, lap pepsenung’ tenen, inipra barami. Dinino, sun me gwepra kiami me yumada, gawal dakropi. Ukupipa, sun jen talen neng cap, sun bung keca kipra emban kuda bisam yuma capda, me pio men jepmanto kupidi, me putana weik kupupa, mambul kange doupi. 10 Ukupra baramidi, Israel mutu taleamu ngebo, nimi deiyo ngebo Raja Yoramdi pepu. “Uo, nun konum depmanto kupmepe!” pepu. “Ukutaruda ware kuptepe do? Allah Yahwehdi, ‘Moab mutu nengdi, aRaja weneri popbisipkameng’ tenen, konum nun nimi deiyo neng, weneri tep, melipra aceipu duyanmaserpa, Moab mutu talerur nimi deiyo ngebo Raja cap, er tara neng cap tep, konum karepmaserpa, sundi popbisipkamasenge,” pepu.

11 Upepu dinino, Yehuda mutu taleramu nimi deiyo ngebo, Raja Yosafatdi asipetepu. “Amutu neitamai, nun tonpa banmap neng neitamaida, Allah Yahwehdi peprepa, er upu lap peramre nabi ngebo ton men kurur do? Nundi, angebo tep asipetepmepepa, er anabi ngebodi, Allah tep asipeteptupa, Allahdi, nun tep, ‘Ukupkamrume,’ pepra lap peipsetue. Atep, nabi ngebo ton akurur do?” pepra asipetepu. Asipu pangeda, nimi tenpu ngebo, Raja Yoram Israel talepra kuramnga neitamai, kuramu jen talena deiyo ngebo tenpudi tamupra pepu. “Gume, amutu neitamaida, nimi si Safat er mi Elisada, nun kikiman banup adano! Pumun taruda, angebo nabi Elia tep pio melimamu. Angebo tenpu Elisa akurure,” pepu.

12 Upepupa, Raja Yosafatdi pepu. “Teka! Allah Yahwehdi angebo tep upu peiprepa, angebodi, nun tep upu lap pepsetue. Angebo Elisa, er deiki di upu pena telepe,” pepu. Upepupa, sun animi deiyo neng Raja weneri nengda, ‘Elisadi, ware upu peipkuser do?’ tenen, er damaipu bei. 13 “Beipa, Elisadi sun aneng weneri tep wenepra pepu. “Sunda ne damai ware deiyo tep melimna upu mororyanmanerum do? Sun nai yapu cap, sun nin yapu capdi talerami nabi-nabi neng, sunda Allah tep teka men tenenung neng, sun damaipu asimbenkurume!” pepra, Elisadi Isarel nimi deiyo ngebo Raja Yoram tep pepu. Upepupa, tamupra Raja Yoramdi pepu. “Uo, angeda pena pio meme. Deiyoda, Allah Yahwehdi konum teneamutopu, melimaserdi nun weneri deiyo neng yumada, Moab mutu damai konum duyanmasere. Dinino, nun kange mun kupsere ngeda, ukutaruda, Allah Yahwehdi, ‘Moab mutu taleramre ngebo, Raja Moabdi, ayanmangu Israel tara weneri Raja neng cap, sun jen talena neng cap tep, popbisipkamre,’ konum tenenmasere,” pepu.

14 Elisadi tamupra pepu, “Allah Yahwehda, akeca-keca deiki tara kuredi, er pio puto weik kurure. Erda im deiki kungedi jen talena malaikat yumada talerure. ^{▼▼malaikat – Yuk Alkitab neitamaida, Indonesia upu deiki di, ‘Tuhan Semesta Alam yang hidup’ sengnunge. Dinino, Ibrani upu deiki di, ‘Yahweh Sebaot’ seki. Ange deiyoda, ‘Im deiki jen talena malaikat yumada, sun ila deiyo ngeboda, Yahweh kurure,’ tenena tep, ‘Yahweh Sebaot,’ penunge. Atep nengeda, ‘Aupu deiyo ton kael kepkurum’ tenen, katuai di sekmupke.} Neda er pelpu donune. Allah Yahweh erda tek sisi gam kurura cadi, ne tek sisi pepsene. Nedi sun weneri Raja neng tep, ‘Dakwapye, pio men melipkamsene. Sun cap, ne cap, upu men talepdatepye,’ pepra, adipapu tali lupra tapsetene. Dinino, ne kap Yehuda mutu taleramre ngebo, Raja Yosafat tep, ‘Erda pio telep, mambul ngebo,’ tenenune. Angebo tep, ‘Telepe,’ teneramsi ngebo cadi, er gispal dona tep nengeda, ne kayapu neng, sundi penmarum upu yumada gekenmasene. 15 Atep nengeda, ukutaruda mut pen keca, er si kecapi, musik ila kael keamu ngebo doupra yankurume. Doupra yamumpa, angebo er mut pen keca kecapi penkamre taruda, Allah Yahwehdi pepnetue,” pepu. Upepupa, mut pen keca, er si kecapi duyana deipnepa, akeca pel donmau taruda, Allah Yahweh er puto weik karepupa, Elisa er kange dipru neitamai wekudi, puto karepu.

16 Allah er puto Elisa er kange dipru neitamai wekra dinikua deiki di, ataruda Elisadi pepu. “Allah Yahweh erdi peipser upuda ake. Amutuda, dana-dana tara ila mutu akapu dinin, daneitamai ila pala ban mutu neitamai yumada, pumun dadi pio me gum mutu kuramu dinin, ukutaruda, menmena di ila mokon welepredi, abukamre ja. 17 Sundi dinmamumpa, ‘Mo cemkamre do?’ tenerumtopu, ila kumanya ton pung men pepkamre. Tonda, mo ton men cemkamre. Dinino, amutu neitamai yumada, ila me mokon ton welepredi bukamre ja. Me mokon pio weika di yamupra kareprepa, aban mutu pumbonpu embankamre. Ukunkamre taruda, sun cap, sundi peirumu gam keca cap, sun bung keca kipra dosemna keca cap, sun nyapsilip cap, ayumada sun me pio weika di jepmengepa boupkamserure,” Elisadi pepu.

18 Uda, Elisadi upu ton cap dukdongopra pepu. ‘Dinino, ton aban mutu neitamaida, ila me mokon konum welepredi, konum bukyopda, ‘Uo, angeda pio mambul pel,’ men tenenkamrume. Angeda, Allah Yahweh er tep nengeda, apelda tek sisi metekngepu. Amokon deipkamserada, kanam dipapu karepkamasere. Angeda tali tep men pepsene. Allah Yahwehdi sun melimna tep, pio mambul pelpu donkamsere. Ada, erdi puto karepserepa, sun Moab mutu jen talena neng yuma tep nengeda, adipapu popbisipkamrume,” pepu. 19 Tonda, sundi Moab mutu neitamai kungedi, ila lyom gel beilya deipra wipi ngeda, amutu kunge nesala cap, ila mambul ati-ati arum, pio telep kupra dominge yuma capda, pio uruptaprumudi, gum kupra deipkamrume. Tonda, amutu neitamai paredi, co du mourur co yala-yala yuma capda, kwepra gawal dakamrume. Utopu, amutu neitamai jenge me bungna yuma peda, adipapu dekdongopkamrume. Tonda, sun wa pepra kounge kecada, pio telep kupra pangredi, bongorur keca yumada, pio telep wa tu neitamai bongorura cadi, awa tu yuma peda, gel dopra dopmumupa, adipapu awa tu mali kupra deipkamrume.” Allah Yahwehdi, aupu yuma lap peipupa, nabi Elisadi aupu gekepudi, lap peipu.

20 Aupu peipmautopu, sun yuma mapmaiya bereku pangeda, ambutumi ipna bereng yan tarada, Allah Karena tep, gam keca popnedi, uku dongorami ketengpu, atarapu mutu si Edom tara di, me bungna gonga kepra embenmaudi, ila me menmena yakanmaupa, aban mutu neitamai yuma, mokon weik deipupa, me weleprapudi diniku. 21 Ataruda, yuk nengdi, “Nimi deiyo neng sun weneri Raja cap, sun jen talena neng cap yangedi, Moab mutu nesala tep, konum popkamange,” pepipa, Moab mutu neitamai kurami anesala yuma konum gekepi dingeda, amutu nesala yuma, wisi neng pe, kaber neng peda, parang ya di, podan neng tep porbanmanto neng yuma, sun adipapu sun parang ya cap, sun jen cap doupra, erepnapu kupi. Ukupi dingeda, ‘Nun mutu podana nesala yana popsenunga cadi, nun mutu kalengkamep’ tenen, anesala yuma bulupra, Moab yala nesala cap, Israel yala nesala cap, bisi wilimdona pirmanai bena weki.

22 Ukupi dinin, alukunda mapmaiya, ipna bereku pangeda, adipapu keteng tengyaudi, aila me mokon bol deikida yapi bi utopu katuai kupu. Ukupka tep nengeda, sun Moab yala nesala epidi utenepi. ‘Uo, amokonda neitamaida, konum yapi kupmare,’ tenepi. 23 Akupmau ngeda, sun Moab yala nesala yumadi, akonum epi dingeda, ngolokdi pepi. “Uo, ada nimi yapi adano!” pepi. “Teka, ada sun nimi deiyo weneri Raja neng sun jen talen nengdi, sun yuk Raja jen talena neng tep, popdanmangupa, yapipu embanmaua, ame neitamaipu tupa akapmar adano! Atep nunda bepedi, sun depmangupa tapmai bung keca cap, sun buru di doupmainge cap yumada, upula bena dopropkupe,” pepi.

24 Untenepi dinino, sun Moab yala nesala konum sun Israel yala nesaladi, ati dopra kurami mutu konum damai yaidi, akati wengyai pangeda, sun Israel yala nesala, sun jen talena neng beidi, Moab yala nesala ayakanmaiya yumada, tamupra kariki. Tonda, Israel yala nesala, sun jen talen nengda, pio tupa Moab yala nesala tep dombanapu kunmaiyanen, Moab neng kware kupupa, sepdaro bisi banmaiyanen, sun pe mutu tamupra bei dinin, sun Israel jen talena nengdi, tupa dombanapu kunmaidi popbanmaiyanen, akati-akati arum yumada urupra gawal daki.

25 Tonda, sun Moab nesala kurami ati arum yumada, sun Israel yala neng cap, Yehuda yala neng capdi, Moab mutu neitamai yuma bung bongopra depi. Ukunmai tarupu, sun wa pepra kouamipa, pio telep di pakamudi, bo telep douramu wai dam yumada, gel di dopra dopbanmaidi, abisipu banmai. Ukupbanmaipa, awaidam yumada, gel dipapu dinikudi, lelipdongopupa, awaidam urasin pio katuai men kupu. Sun Israel neng peda, me bungna yuma welepyakaramunge yumada, gel cap, tu cap di, abon yuma dekdongopnapu kupi. Tonda, amutu neitamai tekamudi co du mouramu co yuma peda, kweptapnapu kupi. Amutu-amutu yuma utopu, ukupra kupbaramipa, sirikda, tupa akupu mutu tenpu ngeda, mutu si Kir-Hareset mutupu, Moab mutu neitamai sisapu ton akupu. Dinino, Israel nesala peda, amutu neitamai ongopdongopra warekidi, gel dopra amutu gel dekra dona tep keca deiki di gel dopra donmaiada, nimida pio weika di ponmai.

26 Ange yuma konum kupra sengpepi pangeda, nimi deiyo ngebo Raja Moabdi dipterepupa, er tara jen talena neng, weika di konum popra gawal dangmaipa, erda pio kange mun kupu. Raja Moabda, er kange pio mun kupu pangeda, er jen talena neng pio weik tujuh ratus (700) neng, jen doupra nimi pona pio kael nengpu doupra, Edom mutu taleamu nimi deiyo ngebo Raja, kuramu mutu damai, ‘Aceipu nimi popmepedi, abisipu sepra betepedi, lyepdatepye,’ tenepudi abisipu bena piripterepi dinin, sun podan neng kalekmaiya tep, men benmanto kupipa, tapnapu kupi.

27 Atep nengeda, nimi deiyo ngebo Raja Moabdi, er mi menmena ngebo tenpu tep, ada ‘Ne yo pununa tep, Moab mutu ila nimi deiyo ngebo Raja keipkamre,’ teneramu ngebo, er mipu dopropu. Ami dopropu dingeda, Raja Moab ngebodi, ‘Ne mi popnedi, Allah tep karepnyopda, ne podan neng yaprongedi, tapnetenge,’ tenepudi, mutu si Kir-Hareset mutu, ongopgenepra, deiami ila gat gel di deipra wiami beilya (tembok) deiki di, ami poprapudi, uku dongopu. Ada, er mutu isok tep karepu. Ukuramnga tep nengeda, sun Israel yala nesala yumada, ‘Uo angeda pio mali cadi, angeda men yapmatue’ tenen, pio kware weik kuramu. Ukuramya tep, sun adipapu taprapidi, amutu di tamupra sun pe mutu Israel tarapu bendopi.