2 Kings 5

Naman nong bol deiki, sengna suse utopu suse jeramupa, nabi Elisadi kwetepu upu

1Mutu si Aram mutu taleamu ngebo, ila nimi deiyo ngebo Rajada, er jen talena neng sun deiyo ngebo kemna tep, Naman wepra deiamu. Uda, Allah er si Yahwehdi angebo Naman deiki puto karepupa, erdi Aram mutu jen talena neng taleamupane, Aram mutu neng sun podan neng yuma bisbisa kamami. Ukuramya tep, amutu Raja ngebodi, Naman tep ila kange deiamudi, bicau teneramu. Amutu neng yumadi, er tep, ‘Erda mambul ngebo,’ tenerami. Namanda puto weik kuramudi kware gum dipapu sun podan neng tep kika deipra porbaramu. Ukuramu dinin, angeboda kot susu taleamupa, er nong deiki jeramu.

2Uda ataru neitamaida, Aram mutu jen talen nengdi, yuk mutu neng porbarami taruda, Israel mutu neitamai kaber ner tenpu tomopidi, doupra sun mutu tamupra duyaipa, amutu kuramu. Akaber nerda, Naman domu ner, er pel melimna ner kuramu. 3Akaber nerdi Naman er domu ner tep uperamu. “Ne ka nero, ne deiyo ngebo dinin, kan nenge kot susu jere pu tep nengeda, Samaria mutu neitamai kure ngebo, Allah er upu lap pena deiyo ngebodi kwetepmemetue. Angebo er damai dubetengepa, kan nenge Naman kwetepra deiptue, tenepne,” pepu.

4Israel kaber nerdi Naman er nong bol deiki jeramu pu kwetena tep pepmau ngeda, konum gekepudi, er deiyo ngebo Raja Aram tep bena pepu. 5Bena pepupa, Aram mutu taleamu Raja ngebodi, “Angeda telepe. Er damai benkurume. Nedi Israel nesala sun deiyo ngebo, sun Raja damai surat sekeipkamane,” pepu. Upepupa, Namandi Elisa damai benkoua tep, er karepkamau kunumna weik keca keteneipu ngeda, tiga ratus empat puluh (340) kilo perak cap, tujuh puluh (70) kilo emas cap, opkal kamo telepnge, 10 lembar cap yuma doupra beu.

6Tonda, Aram mutu taleamnga deiyo ngebodi, sun Israel neng sun deiyo ngebo tep surat seku. Asurat neitamai di pepu. “Asekne ngeda, kan kael kepkurume. Ne jen talena neng, sun deiyo ngebo Naman, kan damai dokotepkene. Deiyoda, ‘Er kot susu jere ngeda kael kepmemdi kwetepra deipkurume,’ tenena tep moropkene,” pepra seku. Sekra karepupa, Namandi Israel mutu ila ngebo damai debeudi karepupa epu.

7Asekmau ngeda, Israel neng sun deiyo ngebodi konum nuku dingeda, “Uo, ne mambul kupnere. Neda Allah puto ngebo utopu ngebo kununa tep, asurat sekra dokotepmaner do? Neda Allah utopu ngebo gum cadi, depmatunge cap, pu jenmatunge capda, pio men gam bokeiptene. ‘Angebo Naman er kot suse kwetepkamre’ tenepmanerdi, ne damai dokotepmanerada, men kweteptene pangeda, tulum kuprepa poryankamnere, tenepne. Ne kangeda, erdi tenepmanerada, ‘Angebo popbisipkamne,’ tenepmanerdi, tulum kupra deipkamnere, tenepne,” pepu. Upepu dingeda, mambul kange doupudi, er kemamu opkal yu kupupa kwiripra gweleptapu.

8Ukupupa, yuk nengdi, “Israel neng sun deiyo ngebo kange mun kange doupudi, er opkal gweleptapu,” pepra lap perbei pangeda, Allah er pel don ngebo Elisadi gekepu. Konum gekepudi upu pepra deipudi, surat sekra dokotepu. Erdi seku ngeda ake. “Ware keca deiyo tep kan pe opkal gwelepmarem do? Pu jere ngebo, ne damai dokotepnemempa, kwetepne pangeda, angebodi, epra kael kepkamre. Ada, ‘Teka nun Israel neng kunup mutu neitamaida, Allah er upu lap pena deiyo ngebo, nabi ngeboda tek sisi akurure,’ tenen, kael kepkamre,” pepu.

9Atep nengeda, Naman adipapu kuda bisam gipra tu deiki embaramre keca, kereta kuda deiki bukra, bisi banmauanen, Elisa ati buplan damaipu yau. 10Yaudi, dinmaupane, Elisadi er melimne ngebo tep pepu. “Naman damai bememdi upepkurume, ‘Yordan mepu yoneitam bari bena gekurume. Ukupmempa kot susu jekere ngeda kaikropkamakere. Ukuprepa, pumun taru kipe kuramumtopu kunkamreme. Elisadi peipmakere,’ perbenkurume,” Elisadi er melimna ngebo tep pepu.

11“Ukupra bena lap pepupa, Naman ange gekepudi yu tenepu. ‘Gume, ne tenepmanuada, Elisada ne damai yatudi kot susu jenere ngeda, er buru ne nong deiki deipra er si eremre Allah Yahweh er si deiki di moropkamaneupa, adipapu kwetepkamnetue,’ tenepmanue,” pepra yu tenepu.

12Upepudi aupu ton dukdongopra pepu. “Damsyik mutu embaramre meda, Abana me cap, Parpar me capda, pio telep me. Nun yuma kaele, Israel mutu kapu meda pio mali me pua. Telep ngeda Damsyik mutu neitamai embare me pua. Atep nengeda, ne kangeda, Damsyik mutu neitamai embaramre me neitamai di me gekne pangeda, ne susu men kaiknetu do?” Upepu dingeda, ‘Pu gum dakamner ja’ tenen, tuluma di akati tapra yukai beu.

13Ukupra tulum kupupa beu dinin, Naman er melimne nengdi er damai beidi, “Nun nai, ukupmanto Allah er upu lap pena deiyo ngebo Elisadi, ila mambulnge ikin pel utopunge pepketupa, ange men kupkamrem do? Gume ila ikin nge peda pepmatupa, piripeteptume. Ange tep nengeda, erdi ‘Me gekmempa kan kot susu jekere ngeda gum dankamkere,’ pepra kanamngepu pepmakera tep, konuma, angeda me dakupo,” pepi.

14Upepipa, Naman gekepudi, Yordan mekin Elisa pepmautopu beudi, yoneitam bari deiki di me geku. Ukupupa, kot susu jeramunge yumada gum kupudi, bol telep kupu. Er nong bolda yambul nyapu nong bol utopu kupudi pio telep kupu.

15Ange konum kupu pangeda, er melimna neng cap, sun yuma tamupra Elisa damai yai. Namandi Elisa damai tekudi pepu. “Ataruda ne konum kael kepne. Ban-ban yuma neitamaida Allah yuk ngebo ton men kurure. Allahda, Israel mutu neitamaipu kurure. Er tenpua. Atep ngeda maton don keca nedi kan tep, kunumna gum dipapu talipu karepkukene,” Namandi pepu.

16Dinino, Elisadi pepu. “Gume ne kabo. Allah er si Yahweh tep er pelpu donune. Er tek sisi gam kuretopu, tek sisi upu pepkene. Aduyanmarem maton don kecada, tenpu peda ne ton men doropkukene. Allah gam ngebo si deiki di pepkene,” pepu. Upepupa, Namandi tamna gume, “Doropnapu kupkamareme,” pepra tupa-tupa penmau. Upenmaupane, Elisadi, “Gume ne kabo, pio tek sisi pepne. Men doropketene,” pepu.

17Upepupa, Namandi tamupra pepu. “Upeprem pangeda, neda kan amutara utopu ngebodi moropkene. Kandi karepnetumpa, amutu tu weika di palipra kin keca dongopnedi, ne keledai bisam butene, sun bali deiki deipnepa, ne mutu dubenkamne. Men taruda, yuk isok tep si eremamsidi, sun gispal dona tep gam keca popra uku dongoramsi dinin, ukuda ange yuma tapkamne. Ukutaru di dipra, oryankamre taru neitamaida, Allah er si Yahweh, er tepapu, si eremnedi, akeca yuma dopra er si gispal dona tep karenkamne. Tonda, gam keca popnedi, er gispal dona tep, uku dongonkamne ja. Isok si eremne ngeda, tapnedi ukutaruda, Allah er sipu erepbankamne,” pepu.

18Upepu dingeda aupu ton pepu. “Neda kan melimna ngebo utopu kunune. Arup pepmanada ukupkamne dinin, Allah er si Yahwehdi, ne mali kunkamne keca tenpunge tep, ‘Kaukepnetudi, men wenepkamner’ tenen, moropne. Ada, dortaruda ne deiyo ngebo Raja Aram melipnepa, Aram nesala isok si eremenge keca tep, er si Rimon, aisok si eremna ati erembenkure taruda, ne cap melipra benkamne. Ne deiyo ngebodi, ne buru talepredi, er isok Rimon gispal dona tep, giso genepdongopre taruda, ne capdi giso genepdongopkamne ngeda, mali dinin, ‘Allah moropnemempa, ne mali kunkamnenge kaukepnetudi, lyepropkamner’ tenen, pepkene,” Namandi Elisa tep pepu. 19Upepupa Elisadi, “Telepe atep nengeda, tali kange doupra dabenkurume,” pepupa, Naman adipapu beu.

20Bisi banmauanen, bisi neitamai sisa banmau pangeda, ataruda Elisa er melimne ngebo Gehazida, ‘Ware keca deiyo tep Elisada, Aram mutu ngebodi duyanmau kecada tapra doupra ber do? Er kanam dipapu benmara adano. Telep ngeda, ne deiyo ngebo Elisadi, Naman duyanmau keca weika di dopropmatue. Atep nengeda, akecada, ne pedi doroptene,’ tenepu. Tek sisi Allah gam kuretopu, ne tek sisi upu pepne. Amenda sepdara dombenedi, ‘Naman doupra banmar ngeda, dopra yankune,’ tenepra beu.

21Utenepka deiki, Gehazi adipapu amenda beupa, Naman damai yakanmau taruda, Naman adipapu epudi, er kuda bisam gipra tu deiki embaramu keca deiki tekmaupa gwereprapudi, Gehazi er damai yaupa, “Kanda ware keca tep yarem do? Sunda telep kurum do? Bamur tep yarem do?” pepra asipu. 22Gehazidi bena pepu. “Gume nunda telep cadi, bamur tep men yanman dinin, ne pel dona deiyo ngebo Elisadi, ‘Erbenkune,’ pepra ‘Moropkurume,’ pepnerpa yane.

Ada, Allah er upu lap pena deiyo neng, kaber neng butene, ukupu Efraim mutu dam di nun damai yarengpa, sun karena tep ne nai bodi, ‘Bena moropra yankurume,’ pepnerpa, yana pepkukene. Ada kunumna weik keca er si uang perak tiga puluh empat kilo (34) cap, urasin telep opkal butene, pio telepnge cap, sun ayanmarei neng tep, karepnetumpa, aneng tep bena karepkamne,” pepu.

23Gehazidi Naman tep upepupa, Namandi, “Telepe apepmaremtopu dorona telep pua,” pepu. Upepudi, kunumna weik keca uang perak, yuk-yuk dinin, 34 kilo bokra butene kepra kipupa, ange yumada 68 kilo kupu. Utopu ngeda, opkal pio telepnge butene kipu. Akeca-keca kin keca pumbon di dongopra, getepra kipdongoprapudi, er melimna neng butene wepra deipudi aneng tep karepupa, akeca yuma doupra mepra banmareipa, Gehazi amenda beu. Sun yuma bisi banmai.

24Bisi banmaiyane, Karmel mutu damai yai pangeda, Gehazidi, Naman er melimna neng butene wepra deipmau neng doupra banmainge doprapudi, er ati pumbon bena deipudi ati pumbon dongopu. Ati bo dongopudi, adipapu Gehazidi, ‘Sun dabereso,’ pepupa sun tamupra berei. 25Berei pangeda, Gehazi tamupra Elisa kwapmauai dinin, er urasin tara bena teku. Gehazidi Elisa damai bena tekupa, Elisadi, “Kao, kanda dan benmarem do?” pepra asipu. Asipupa, Gehazidi, “Gume naio, neda kan amutara pel donun ngeboda, ton men embandanmanue. Acapu kunmana,” pepra mok upu pepu.

26Upepu dinin, Elisadi tamupra Gehazi tep, “Kanda ne konum kael kepmakene. Naman damai bemumpa, er kuda bisamdi gipra embaramre keca deiki tekmaua gwerepra, kan damai yanmaupa upu sisikmarerum taruda, ne sambala cap kikiman benmareruma tep, ne konum epra kael kepkene. Ataru kandi er Naman tep kunumna weik keca, perak cap, opkal telepnge cap moropmumpa karepmakerada mali weik kupmarume.

Allah er puto deiki dipu angebo Naman kwetepka cadi, nun dipu akeca-keca yumada men doproptepe. Allah er puto deiki dipu Naman kwetepmaua cadi, ataruda nundi anggur wa cap, zaitun co du kounai cap, sapi bisam cap, domba bisam cap, kambing bisam cap, uda melimna neng cap, melimna nerapu capda, akeca-keca yuma men moroptepedi, men doproptepe. Ange kupmaruma tep nengeda, pio mali weik kupmarume.

27Atep nengeda, kan wenemna tep nengeda, Naman taleamu kot susuda, kan cap, kandi deiprempa, dadeipdanen bankameng neng yumada, sun nong deiki akot susu pio akapkamsere,” Eliadi pepu. Upepupa Gehazi kwerepkotepra bau taruda, adipapu kot susuda leng-leng peramre ngeda, er nong deiki pio palepupa beu.