2 Kings 6

Kapak ya lukra me doapuane, tamupra welepudi, mokon deiki yana kupu upu

1Tenpu tumi ton, Allah upu lap pena deiyo nengdi sun kabo nabi Elisa tep pepi. “Naio, kan ati boda metek cadi, akati dampu buka, upu sisingnupaida, nun dinipmepe. 2Atep nengeda, kandi telepe peipsetumdi, nun tep ‘Yordan mekinpu ati dorbeso,’ pepsetumpa, bena ati doptepe,” pepra moropipa, “Telepe dabena dopso,” pepu. 3Upepupa, tenpu ngebodi, “Apepserem ngeda, telepe atep, ne moropkene. Nunda kan amutara kunupe. Atep, nun putapser ngeda, kan peda nun tonpa benkupe,” pepra moropupa, “Telepe nun yuma benkupe,” pepra Elisadi pepu. 4Elisa peda sun tonpa Yordan mekinpu beidi, ati dopkamyai tep co bena kwemai.

5Bena co kwemai taruda, kapak ya lukda pepra me dopupa, “Uo, nun kapak ya me dopsere. Naio, ada sun ya, nun ke douamupa,” pepra mali pepi. 6Allah er pel dona ngebo Elisadi, “Akapakda dan cei sakmardi dourbenmar do?” pepra asipetepupa, “Aca sakmarpa me doupmare,” pepu. Upepupa, Elisadi metek co teru dopra akapak ya sakmauai dokotepupa, me bo sakmau kapak ya ka tamupra welepudi mokon deiki yan kupmau. 7Akapak ya mokon deiki yan katuai kupupa, Elisadi angebo tep, “Dopropo,” pepupa dopropu.

Elisadi Aram mutu neng tep, bisbisa kapu upu

8Aram mutu taleamu ngebo, sun ila nimi deiyo ngebo Raja cap, er nyapu jen talena neng cap, sun yuma Israel neng pona tep, bena ati dopkamayai tep, “Ne tenepmasi mutu bena, acapu nun keana dodin tenda ati deipkamepe,” pepra, upu talepmai. Upu talepmaiya deiki di, erdi, “Uda tek sisi, amutu bena, keana dodin tenda ati dopra deipkamepe,” pepu.

9Upepupa, Aram mutu nengdi akati deipkoi dinino, Allah er pel lap pena deiyo ngebo, nabi Elisadi, aupu talepmai ngeda kael kepudi, Israel neng sun deiyo ngebo Raja tep, “Aram mutu nengda, ‘Opkal dodin ati dopkamengaida, aca,’ tenepmanga cadi, kan kael kepmemdi, kalekdamumdi, sun Aram mutu neng kunkamenga damaida, bana pio gume. Kan nyapu doupra, yuk bisi benkurume,” pepra, upu doproipupa, Israel nesala sun Raja ngebo gekepu. 10Ataru-ataru yumada, nabi Elisadi, ange utopu peramnga tep nengeda, tupa-tupa Israel neng, sun ila nimi deiyo ngebo Raja pio moupra kalengna cap, dina cap kunmaupa, er nyapu tep “Moupra ketenemnapu kunkamarume. Amutu tupa dinkamrume,” pepra upu mounmau. Ukuramya cadi, sun Aram mutu nengdi, sun Israel neng tep men popmanto kurami.

11Israel nengda kael kemnapu kuramipa, Aram mutu neng sun deiyo ngebo tulum weik kupudi er nyapu, sun jen deiyo neng tep bupra deipudi, “Sun ton kael keprum do? Ware ngebodi ton, Israel nesala sun makuna tep, sun tara konum gopra bendopudi, nun penmape nge gekepra Israel neng damai perbarur do?” pepra asipu. 12Upepupa, sun awekmai deiyo neng kankan, tenpu ngebodi, “Gume nai, angeda nun kan amutara kunup nengdi gume. Dinino, Elisada, Allah er upu lap pena deiyo ngebo kurura cadi, akeca yuma kael kepmanto ngebodi, Israel mutu akuredi, kan inipra ati bodi penmamem upu peda, gekepra sun Israel ila nimi deiyo ngebo damai perbarure,” pepu.

13Aram mutu Raja ngebo ange gekepudi, “Bena dirbeso. Tonda, ‘Elisada dan cei kunmar do?’ sundi asimtererbeso. Elisa akunmare pepsengepa gekeprumnyopda, sun eprumudi, ne yan pepnemumpa, nimi dipnepa, angeboda tomopkamenge,” pepu. Upepupa, er jen nengdi dirbei pangeda, amenda taru, yuk nengdi, “Gume Elisada Dotan mutu akunmare,” pepipa, Aram mutu nengdi gekepi.

14Upepipa Aram Raja ngebodi, ‘Ukupso,’ peipu pangeda, er jen neng weika di, sun kuda bisam gipra tu deiki embarami keca weik cap, sun kuda bisam talepra barami jen neng cap, yuk jen neng cap, weika di ketenepidi, lukunda bei. Beidi, Elisa kuramu mutu nimi ati dana-dana tara yuma ongopgenepra bena wareki. 15Bena warekmai taruda, Elisa er melimne ngebo ipna sisa di, menmena bukra, bura tara beudi dinmaupa, sun jen neng cap, kuda bisam cap pio weika di akati yuma bura tara ongopgenepra warekmaipa epu. Angebodi tamupra Elisa damai yaudi, “Uo naio, tumida kange mune. Nun ware kupkup do?” pepu.

16Upepupa, Elisa Allah er upu lap pena deiyo ngebodi, er melimna ngebo tep pepu. “Kan kwardana gume. Sunda nimi weike tenepmarem dinin, ne tek sisa pepkene. Kanda kapul men epmanto kunmarem dinin, nun damaida nimi pio weika di akunmange. Sun Aram mutu neng tarada, nimi yambulanun pua. Nun cap kikiman kunmang nengeda, pio weike,” pepu.

17Upepu dingeda, Elisadi Allah tep moropu. “Ne nai Allah, kan si Yahweh. Kandi angebo er asuru laipmempa, kandi keteneipmaserem ngeda epkure,” pepra moropu. Moropu pangeda, Allah gekepudi, amelimna ngebo asuru laipupa, amutu deiki dinin, daneitamaida, dana-dana tara kunmainge yuma, kuda bisam weik cap, kuda bisam gipra tu deiki embaramre keca er dirineda, uku bu utopu jenmaunge cap, ange yuma pio weika di kupmaupa epu.

18Ukupmaupa, sun Aram mutu nengdi ‘Elisa tomopkup’ tenen, er damai yakanmai taruda, Elisadi Allah er si Yahweh tep moropu. “Anengda kandi asuru pun keca karepkurume,” pepra Allah moropupa, Allah gekepudi, Elisa moropmautopu, sun aneng yuma asuru pun keca karepupa, men epmanto kupi. 19Sun Aram mutu jen nengda, men epmanto kunmaiya tep, Elisadi pepu, “Sun tenepmarum mutuda amutu guma. Tonda sun tenepmarum bisida, abisi men benkurume. Atep nengeda, ne melipsenedi, sundi, ‘Abenkamepe,’ tenepmarum ngebo damai doupra benkusene,” pepu. Upepu dinin, ataruda Samaria mutupu doupra beu.

20Aneng konum Samari mutu bena tapudi Allah tep moropu. “Ne nai Allah, kan si Yahweh, ukuda aneng asuru lalipmempa, epkunge,” pepra, Allah moropupa, sun asuru konum laipu pangeda, anengdi epra kael kepi. ‘Uo, nunda Samaria mutu neitamai konum yanmape,’ tenepidi, kael kepra mali pepi. 21Uda Samaria mutuda Israel nesala sun ila nimi deiyo ngebo kuramngai cadi, sun Aram mutu neng konum epra kael kepipa, Israel neng Raja, ada sun deiyo ngebodi Elisa tep pepu, “Naio, anengda tali lupra popra gawal dakun do?” pepra asipu.

22Asipupa, Elisadi, “Gume nai, podanmange taru, sun jen nengdi sun parang ya cap, mar cap di, podan neng konum tomopmenge dingeda, tali lupra men poramnunge. Kan kaele, angeda mali tenenupe. Atep nengeda, anengda sundi me cap jen keca cappu ketenepra karepmumpa, jepmenge pangeda, kandi peipmempa, sundi tamupra sun pe deiyo ngebo koripu benkunge,” pepu.

23Upeputopu, Israel nesala sun Raja ngebodi peipmaupa, sun Aram mutu neng tep jen kecapu weika di ketenepra karepidi, kailya kalepra yan karepi. Ukupipa jepropi pangeda, Raja Israel ngebodi, ‘Dabeso,’ peipupa, aneng tamupra sun deiyo ngebo koripu bei. Ukupmaiya tep nengeda, ataru di gonga kepra ke taru tep, sun Aram mutu neng kange di Israel neng kan-kan men poryakarami. Tali dimpeprappu kurami.

Samaria mutu neitamai, jen putaramupa ikin weik kuramnga tep upu

24Tali dimpeprap dakuramipane, amenda taruda Aram mutu deiyo ngebo Raja er sida Benhadad, angebodi er jen talena neng yuma bupra deipu dingeda, Israel nesala sun Raja kuramngai, Samaria mutu bena warengbei. Sundi amutu dana-dana tara yuma ongopgenep dongopmaiya cadi, sun Samaria mutu nengdi bura tara men benmanto kurami.

25Samaria mutu bena warengami taruda pio war weik kuramya tep, amutu kange mun weik kuramu. Ukuramu taruda, jen pio ila di putaramu. Ukupupa, keledai bisam popnepa galepra kunumna tep nengeda, abisam giso tenpuda, kunumna weik keca er si uang perak 1 kilo deiki di kunumami. Tonda yal ma dei bupra kunumna tep nengeda, uang perak setengah kilo ketenepra karerami. Ada yal ma dei, tenpu kilo dopropidi, neitamai di bokra dumbari deipi pangeda, setengah kilo uang perak deiki di kunumami. Atep nengeda, akeca-keca yumada gum kuramnga cadi, akapu keca yala-yala yumada pio ila kunumna weik deiki di kunumami. Atep kange mun weik kuramu.

26Ataru neitamai dinin, tenpu tumi ton Israel neng sun deiyo ngebo, amutu ongopgenepra wiami lyom gel beilya deiki embaupa, ner tenpu di moropu. “Uo, naio, kanda ne Raja kuruma cadi, ne melipneo,” pepra moropu. 27Moropupa, Israel neng sun deiyo ngebodi tamupra pepu. “Melipmanto ngeboda, Allah er si Yahweh dipapu melipketue. Erdi men melipkeryopda, neda ware kuptenya deiki di, melipketene do? Gandum bongopmengai di, jepmantonge kuptupa, ange bupra karepketene do? Anggur du taikmengedi, purupmengai di me kuptupa gwepra karepketene do? Akeca-keca pio guma tep, ware kuptene do?” pepu.

28Upepudi, aupu ton asipetepu. “Kanda ware keca putanmakerpa do?” pepra asipu. Asipupa, anerdi tamupra pepu, “Gume naio, yuk ner tenpu di upepneu. ‘Kan mida ne karepnemempa, atumida nun tonpa ami popra jepkamaneme. Ukupnemedi, ambutumida, ne mi ton popra jepkamaneme,’ pepra, anerdi upepmanere. 29Upepneupa, ne mi popra jepmanemu dinin, ton tumida nedi ‘Ukuda kan mi popra jepkuneme,’ pepsipa er mida dopra inipmaue,” pepu. Anerdi pepupa, Israel mutu nimi deiyo ngebo Rajadi gekepu.

30Aupu nimi deiyo ngebo gekepu dingeda, pio mambul kange doupudi, bicau kupupa, er kemamu opkal kwiripra gweleptapudi, alyom gel beilya deiki banmau taruda, er tara nengdi epmai. Epmaiyada, erda Raja ngebo dinin, er gwelepmau opkal iriamu tara kenekmau ngeda, nimi depmengepa engerameng taru tep, mali opkal kenengamenge ngeda kepdongopmauada, anesala yumadi epidi, ‘Uo, angeda mambule,’ tenepi.

31Raja ngebo, mali kange doupudi animi deiyo ngebo tulum weik kupupa aupu pepu. “Ne mutu nesala pio kange mun kununga cadi, atep ngeda atumi dipapu, nedi peipnepa, Safat er mi Elisa tep kum sektapmengepa er giso sakamre. Ange men kupyopda, ne putapner ngeda, Allahdi neda ila di wenepkamnere. Deiyoda, Allahdi ajen putana taru kareramseu dinin, Elisada, Allah er upu lap pena deiyo ngebo kurur dinin, ‘Allahdi nun jen putanada, gum kupra deipkamser’ tenen, kapul men moropseu. Atep Elisa popkamne ja,” pepu.

32Ataruda, Elisa er atipu kunmaupa, wisi-wisi neng Israel deiyo neng ton bupra er ati upu talenmai. Ukunmaipa, Elisa er pona tep Raja ngebodi tenpu ngebo ton wepra deipupa, er ati dam kalengyau dinin, amutu kapul men yanmar taruda, Elisadi pepu. “Sun konum kael kepmarum do? Ila deiyo ngebo Rajada nimi tali portamna ngebo kurura cadi, ne pona tep, ‘Er kum sekmengedi, er giso sektapkung’ tenen, nimi doproiprepa, yakanmang ngeda sun ton men dirum do?” pepra, Elisadi awisi neng, sun deiyo neng tep lape pepu.

Upepudi aupu ton pepu. “Atep ngeda sundi moupra kale kepmumya di, ne pona tep yanmare ngebo akati ‘Yan wekronkun’ tenen, buplan dam yare pangeda, sundi buplan pangdina gume, puto di talenkamrume. Tonda, ne kangeda, ayanmare ngebo dinin, er amnyo tarada, er ila deiyo ngebo berbera yankamar ja. Er yanmar lelim konum gekepne,” pepu.

33Elisadi aupu tupa penmau taruda, Israel deiyo ngebodi doproipmau ngebo Elisa damai yaue. Tonda aRaja ngebo peda yau. ▼

▼Aupu dina tep 2 Raja-Raja pasal 7:1 dinkurume.

Israel neng sun ila nimi deiyo Raja ngebodi upepu. “Ne kangeda, jen gum kupupa jen putana tep, ila kange mun kuser ngeda, Allah er si Yahwehdi dokotepseua cadi, pio ikine kuserure. Atep nengeda, konuma, ware keca deiyo tep, ‘Allah er si Yahwehdi makupra lyepropkamser do?’ tenen, tupa dinapu kunkamne do?” pepu.