2 Kings 7

1Apepupa, Elisadi, aRaja ngebo tep pepu. “Allah er si Yahwehdi pepkere upuda, ukutaru pepkukene. Ada ake, nun Samaria mutu neitamaida, ambutumida akunmapa utopu keteng komunida, jen keca roti kwaneng deiyonge, er sida gandum taikmange nge telep ngeda, 7.3 liter gwepmengedi, er kunumnada uang perak meteka dipu 11 gram deiki di kunupkamange. Ange utopu, yuk jen keca deiyo ngeda, er si jelai, 15 liter gwepmenge ngeda, er kunumnada uang perak meteka dipu 11 gram deiki di kunupkamange. Men di kunumna weika di kunumenge dinin, ambutumi di gonga kepra, co bo meteka dipu kunupkamape. Ada nun mutu Samaria neitamai di ukupkamape pepne,” pepu.

2Upepupa, nimi deiyo ngebo Raja Israel, er melimna ngebodi Allah er pel don ngebo Elisa tep tamupra pepu. “Ukupkamasere peprem dinin, ada pio mok pepreme, ange men kuptue. Allah er si Yahweh, im deiki di akeca-keca yuma dokotepsetua peda, kan pepmarem ngeda, men kupmanto,” pepu. Upepupa Elisadi tamupra pepu. “Tek sisi kan pe asuru di epkamareme. Dinin ajenda, kan ton tenpu peda pio men jenkamreme,” pepu.

Allahdi akeca-keca yuma, sun Israel neng tep, karepu upu

3Ataru neitamaida, kot susu taleamu neng dumbari akati ongopgenepra wiami beilya buplan damai wengamidi, sun pe nengpu tenpu ngebodi, ton ngebo tep, “Ware keca deiyo tep nunda acapu bukamepyane depkamep do?” pedanmai. 4“Ange tep nengeda, ‘Nimi kungaipu benkupa,’ peptepe dinin, sun peda jen putarure. Atep bepeya peda abena depna pua. Tonda acapu kupeya peda depna pua. Atep nengeda, nun ukutaruda Aram mutu jen talena neng opkal ati ke tep dopra yankungaipu benkupe. Tali bena bukmepepa, tomopsengopda telepe pua. Ukupmepepane, sun tapkuseng do? Popkuseng do? Ukupkamsengepu,” pepra pepdanmai.

5Sun anengda, keteng orwengbenkou tarupu, Aram mutu neng keana tep dodin ati dopra deiprapidi, dakuramyai bei dinin, adipapu atenda ati men weki. Ati bura tarapu bena wekra dinmai taruda, nimi ton tenpu pe, tenda ati bo ton pio men kunmai. 6Nimi men kunmaiya deiyoda, ake. Allah er si Yahwehdi Aram mutu neng tep, kange wang-wang pena deiyo keca karepka deiki di, ila lelim gekepidi, sun kware weik kupu.

Ada, Allahdi karepu lelimda, kuda kereta baramredi lelim peramre utopunge cap, kuda bisam bangepa lelim perur utopunge cap, tonda jen talena neng weika di lelim pepbaramengtopu pepupa, gekepi. Sun ange lelim gekepidi, sun pe nengpu asipdaidi pepi. “Gume angeda Israel neng sun ila nimi deiyo ngebo Rajadi, yuk mutu neng, sun Het mutu talerur ngebo cap, Mesir mutu talerur ngebo cap tep, nun pona tep kunumna keca konum karepmaua tep, anengdi nun tep konum poryasenge,” pepdanmaidi, sun kware weik kupu.

7Upeprapidi kware weik kupupa, sun alukunda dipapu kurapra bei. Ukupya tep, sun ke taru tep kurami opkal bol ati cap, kuda cap, keledai bisam cap, ‘Nun popsenung’ tenen, akeca yuma tapra bendopi. 8Aram mutu nengda konum bendopmaiya cadi, sun kot susu taleamu nengda, Aram mutu neng kurami ke opkal ati dam badongona kepman, sun bena wekmaipa, sun jerami keca yumada tapra benmaidi, pio tenpu keca peda ton men dubenmaiya tep, tupa akuapmaupa, lupra jen keca cap, me cap bena jepi. Jepropi dingeda kunumna weik keca er si emas cap, perak cap, tonda opkal deyanaminge yuma doprapidi, yukai bena inipra deipi. Ange utopu ukudi tamupra ton ati bena wekidi, akeca yuma dopra, bura bena inipmaiya utopu kupi.

9Ukupi dingeda, ton ngebodi er kayapu neng tep pepu. “Gume ne kayapu, nun akunmapada telep gume. Akeca-keca yuma akapmarada, pio telepe. Nun pe mutu neng ton peptepepa gekeptengopda, telep kuptepe dinin, nun dipapu ange yuma dopra inipmap ngeda, mali tenepne. Nunda dimpepra mapmapepane berekyopda, nun wenemna tep ikin keca nun doropnupe. Atep nengeda, nun nimi deiyo ngebo damaipu perbenkupe,” pepu. Upepupa sun yumadi, ‘Telepe,’ tenepi.

10Utenepya tep, sun akot susu jeramu neng tamupra, nimi deiyo ngebo kuramngai, ati dana-dana tara wiamidi gel beilya buplan dam kalengne neng tep, “Nunda Aram mutu neng ke opkal ati dopra kunge mutu benmap dinin, nimi ton tenpu peda akati men kunmange. Tonda nimi upu peda ton men gekepmape. Atapmang kecada kuda cap, keledai bisam cap, gerekmaiyaipu tupa akupmare. Tonda ati domi ngepu ton akapmare,” pepra sun akalengna neng damai pepi. 11Upepipa, adipapu sun beilya kalengne neng ila di upu peipipa, yuk neng gekepidi, amutu deiyo ngebo, Raja Israel er damai bena pepipa, gekepu.

12Alukunda pua cadi, nimi deiyo ngeboda mapmaua bukudi, er amutara pel dona deiyo neng tep pepu. “Sun Aram mutu neng kunge kecada ne kaele, atep sun tenepmang ngeda pepkusene. Nun jen keca putaser ngeda ikin weik cadi, sun Aram tara nengda sun kaele, atep bura tara bento kuptapra, bena utopu kuptapra inipra dinmasenge. Ukupmasengepane, nun ton akati dam tapra bura tara sun tapmangu jen keca kirbana tep embape pangeda, anengdi, nun tomopkamasenge. Sun Aram mutu nengdi, ‘Samaria kunge nesala tomopkamape. Tomopra ateng koupmepyopda, sun nimi ati-ati yuma wekra bisbisa kapkamepe’ tenen, warekra inipmasenga,” pepu.

13Upepu pangeda, er jen talena deiyo ngebo tenpu di, “Ange tep nengeda, kandi peipmempa, nimidi kuda bisam tupa akati dam kunga kan-kan di, pamu bari ton akure ngeda doproipmengepa, sun Aram mutu neng kunmanguai dirbenkunge. Nun yumada utopu kunupada ikin weik kunupe. Jen putapseupa dedonupa cadi, sun aneng peda Aram mutu nengdi popmengopda, depnapu kupkamenge. Nun peda depkamep ja,” pepra deiyo ngebo tep pepu.

14Upepupa, Raja ngebodi gekepka cadi, sundi kereta kuda bisam butene cap, akeca gipra dubenkamreia tep kuda bisam butene cap, dopra keteneipipa, nimi deiyo ngebodi akeca talepra bankurei neng tep upepu. “Sunda Aram mutu neng kuramyai dirbenkurume. Dirbemumdi, aneng kupmangu ngeda epmumdi, yana lap peryankamserume,” pepudi, aneng tep wepra deipupa, berei.

15Awepra deipu nengda adipapu berei. Sun Aram mutu neng benmai bisipu, sun dirbenmarei neng ton tapakra dombenmareiya, Yordan mekin bereidi, sun Aram mutu neng benmai bisi dipetepreiyada, sun Aram mutu neng douami keca cap, opkal gwepropa cappu, tali tapbenmai ngeda eprei. Ada sun Aram mutu nengda kware weik kupupa, betapra tenena gum di, kange wang-wang pepka tep, bisi sepdara benmai taru tali tapbenmai ngeda eprei. Akeca yuma ukupupa epreidi, apepmaupa dirbenmarei neng tamupra yareidi, sun deiyo ngebo damai lap peprei. “Ange ton ukupmangpa, epmaneme,” pepra yan peprei.

16Samaria mutu kurami nesala yuma, aupu gekepidi adipapu Aram mutu jen talena neng tali tapbenmai keca yala-yala yuma benapidi, kunumna weik keca dopropi. Ukupya tep nengeda, ataru di gonga kepra, Allah er si Yahwehdi, ‘Ukupkamre,’ peputopu kupi. Ada, jen keca er si gandum taikmange nge telep ngeda, 7.3 liter gwepmenge ngeda, er kunumnada uang perak meteka dipu 11 gram deiki di kunumami. Ange utopu, yuk jen keca deiyo ngeda, er si jelai, 15 liter gwepmenge ngeda, er kunumnada uang perak meteka dipu 11 gram deiki di kunupmai. Men di akeca kunumna weika dipu kunupi dinin, atumi di gonga kepra meteka dipu kunupi. Ange yumada, Allah er si Yahwehdi, “Ambutumi ukupkamsere,” pepra deiputopu, kunupi.

17“Uda ataruda Samaria mutu kuramu ila deiyo ngebo, Israel neng sun Rajada, er amutara pel meliamu ngebo tep, akati dana-dana ongopgenepi lyom gel beilya buplan dam kalengkamrume,” pepra konum wepra deipka cadi, angebodi abeilya buplan dam kalengmaue. Kalengmaupane, amutu nesala yumadi, ‘Aram mutu nengdi tapmai keca nun ton dorbenkupe,’ tenen, sepdara bura benmai taruda, akalengna deiyo ngebo yaniptapipa, adipapu depu.

Angebo depu ngeda, ada Raja ngebo Elisa ati yau taru, Elisadi Raja er melimna ngebo tep peputopu kupu. Ada, “Kanda ambutumi amutu jen kecada uang meteka dipu kunupkamang dinin, kan asuru di epkamarem dinin, kandi men jenkamarume,” pepu. Angeda, Allah er pel doramu ngebo Elisadi peipmautopu konum yanipipa angebo depka tep, ajen keca meteka peda men jepu.

18Ange utopu, Allah er pel dona ngebo nabi Elisadi, Samaria mutu nimi deiyo ngebo tep pepmautopu konum kupi. Ada, “Ambutumida akunmapa utopu keteng komunida, Samaria mutu ila gel beilya buplan dam, nimidi jen keca kunupkameng dinin, co bo meteka dipu kunupkamenge. Jen keca er si gandum taikmange nge telep ngeda, 7.3 liter gwepmenge ngeda, er kunumnada uang perak meteka dipu 11 gram deiki di kunupkamange. Ange utopu, yuk jen keca deiyo ngeda, er si jelai, 15 liter gwepmenge ngeda, er kunumnada uang perak meteka dipu 11 gram deiki di kunupkamange. Men di kunumna weika di kunumamepu dinin, ambutumi di gonga kepra meteka dipu kunupkamape,” peputopu kupi.

19Tonda, ataru Samaria mutu taleamu nimi deiyo ngebo, er amutara melimne ngebodi Allah er pel don ngebo Elisa tep pepmaua ngeda ake, “Ukupkamasere, peprem dinin, ange men kuptue. Allah er si Yahweh im deiki di akeca-keca yuma dokotepsetua peda, kan pepmarem ngeda, men kupmanto,” pepmau. Upepmaupa, Elisadi tamupra angebo tep pepu. “Tek sisi kan pe asuru di epkamareme. Dinin, ajenda, kan ton tenpu pe ton men jepkamareme,” pepmautopu kupu.

20Ada, amutu kurami nengdi, ‘Aram mutu nesala tapmainge dopropkupe’ tenen, sepdara banmai taruda, angebo er nong deiki yanipipa adipapu depu. Atep nengeda, Elisadi, ‘Ukupkamre,’ peputopu kupu.