2Ki 8 | XteSC | STEP | Tenpu tumi, Sunem mutu ner, er nyapu butene Elisadi konum gam bukra deiamu ner tep, Elisadi lap pepu. Elisadi aupu pepu, “Nino kanda adipapu kan talemem keca yuma keteneprapmemdi, kan kayapu neng yuma cap, pio yuk mutu bena kunkurume. Abemum mutupu nimi bodi tengyakan neng utopu bena kunkamrume. Deiyoda, Allah Yahwehdi jen putana deiyo keca, keteng tamun denge weik ngangtan bari deiki di deipredi, tamrepa, Israel mutu neitamai yumada, jen putanapu kupkamre. Atep kanda yukai benkurume,” Elisadi aner tep pepu.

2 Kings 8

Sunem mutu ner tamupra Israel mutu neitamaipu yau upu

1 Tenpu tumi, Sunem mutu ner, er nyapu butene Elisadi konum gam bukra deiamu ner tep, Elisadi lap pepu. Elisadi aupu pepu, “Nino kanda adipapu kan talemem keca yuma keteneprapmemdi, kan kayapu neng yuma cap, pio yuk mutu bena kunkurume. Abemum mutupu nimi bodi tengyakan neng utopu bena kunkamrume. Deiyoda, Allah Yahwehdi jen putana deiyo keca, keteng tamun denge weik ngangtan bari deiki di deipredi, tamrepa, Israel mutu neitamai yumada, jen putanapu kupkamre. Atep kanda yukai benkurume,” Elisadi aner tep pepu. 2 Anerda, Allah er pel dona ngebo Elisadi, ‘Ukupkurume,’ pepra lap peiputopu kupu. Ukupudi, sun Filistin neng, sun mutu nesala kuramya neitamai bena, amutupu keteng tamun ngantan bari deiki di kuramu.

3 Filistin nesala kuramiyai neitamai dakuramnganen, ange yuma keteng tamun yoneitam bari (7) deiki konum kupra, seng pepu pangeda, tamupra Israel mutu neitamaipu yau. Tamupra yau dingeda, er mi cap wisipra nimi deiyo ngebo Raja, er ati beredi, sun men di tamrei ati cap, sun mutu tu cap tep, “Tamupra nunpu karepseo,” pepra mororberei. 4 Anerdi amutu Raja ngebo tep, mororbeu taruda, Elisa er melimna ngebo, er si Gehazi, er cap amutu taleamu deiyo ngebo Raja cap, upu talepdarei. Animi deiyo Raja ngebodi, Gehazi tep upepu. “Kao, Allah er pel don ngebo Elisadi, ila kange mun keca kupupa, epra kael kepmum ngeda, ne damai ton nukra deipkunerume,” pepra moropu.

5 Upepra moropupa, Elisa er melimna ngebo Gehazidi, nungna gonga kepu ada, ataru konum kupu pangeda, Sunem mutu nerdi nimi deiyo ngebo, Raja damai tep, “Melipneo,” pepra mororyau. Gehazidi Elisadi aner er mi, depmau mi tamupra gam bukra deiamu upu yuma tep, gonga kepra nungmau. Ukupu dingeda, Gehazidi pepu, “Naio, kanda ne ila nimi deiyo ngebo Raja, pio tek sisi Elisadi tenpu ner, er mi tep nengeda, tek sisi gam bukra deipunge, anerda adano. Tonda, Elisadi tek sisi gam bukra deiamu mida, ayanmar ngebo adano,” pepu.

6 Upepu pangeda, nimi deiyo ngebo, Rajadi aner tep, “Kan mi kupu ngeda, nukurume,” pepu. Ange yuma konum nukra seng pepu pangeda, Rajadi er amutara melimna ngebo tep kong pepu. Upepupa, yauopda, Raja ngebodi pepu. “Aner er taleamu keca, gum kupu keca yumada, er pepu tamupra karepkurume. Ada er ati cap, er wa tu cap, er keca cap, er wa tu deiki paramu keca dopra kunumamipa, co bo weik dororamitopu, aco bo utopu ton, bulupra karepkurume. Ada, yuk mutu neitamai keteng tamun yoneitam bari (7) deiki di kuramu taru neitamai di, dopropmatu keca yumada, akeca yumada, tamupra karepkurume,” pepu.

Elisa cap, nimi deiyo ngebo Raja Benhadad cap, Siria mutu neitamai kuprei keca tep upu

7 Tenpu tumida, Elisa Damasyik mutu beu. Damasyik mutu ada, Siria mutu dinin, ila ati arum deiyoi kwamu. Ataruda, nimi deiyo ngebo Raja Benhadad, erda konum pu jenmau. Apu jenmaupa, er asonai mapmau taru, Rajadi gekenmaupa, “Allah er pel dona ngebo Elisada, Damasyik mutu yana kunmare,” pepipa gekepu. 8 Gekepu dingeda, animi deiyo ngebodi, er kap Hazael, er pel amutara melimna ngebo tep pepu. “Allah er pel dona ngebo, Elisa tep, er menenga kecada doupra karerbenkurume. Tonda, ukupmemdi, er tep moropmempa, er Allah Yahweh tep, ‘Raja er pu jere ngeda, dim pepkamre do, gum do?’ pepra, asipetepkamrure,” pepu. 9 ‘Elisadi Allah tep, amambul upu asipetepkamser’ tenen, Hazaeldi empat puluh unta bisam dopropu. Ada Damasyik mutu neitamai akuamu keca yuma cap, pio telep-telep keca cap, yuk keca yuma capda, akeca deiki di deipra duyakana tep, Hazaeldi doproipu.

Ukupudi Elisa damai beu. Konum beu dingeda, Hazaeldi pepu. “Naio, kan amutara kure ngeboda, nimi deiyo ngebo Raja Benadad, Siria mutu taleramre ngebodi, ne tep doproipmanera deiyoda, ake. Ada nedi kan tep, ‘Nun deiyo ngebo Raja Benhadad, er pu jere ngeda, dim peprepa, gam kunkamre do? Gum do?’ pepra, asipetepkamkene. Upepra, ‘Asipetepkamre’ tenen, erdi ne tep wepra deipmanera tep, kan nabi Elisa tep, asipetepkene,” pepu.

10 Upepu pangeda, Elisadi tamupra pepu. “Kanda tamupra, kan deiyo ngebo Raja Benhadad tep, aupu lap perberume. Ada, ‘Dyo, kan pu jekere ngeda, dim peprepa, kange di tamupra teleppu kunkamrume. Gam kunkamrume,’ pepra, lap perberume. Dinino, kan tep nengeda, pepne. Tek sisi Allah Yahwehdi pepra deipneu ngeda, ake. ‘ARaja Benhadad, erda tek sisi konum depkamre,’ peipneu,” Elisadi Hazael tep pepu. 11 Upepu dingeda, adipapu Elisa pio tupa Hazael er urasin damaipu dinmau. Dinapu kunmaupa, Hazael kware pio weik kupu. Ukupupa, Allah er pel dona ngebo, Elisada dato-dato di engenmau.

12 Elisa engenmaupa, Hazaeldi asipetepu. “Naio, deiyo ware keca deiyo tep, ne deiyo ngebo kanda engenmarem do?” pepra, Hazaeldi asipetepu. Upepupa, Elisadi tamupra pepu, “Deiyoda, kandi kupkamrum kecada, ne konum kaele. Ada amenda taru, kandi Israel yala nesala kunung mutu neitamai yumada, kandi yu keca sun damai deipkamreme. Kan Hazaeldi Israel nesala kunge mutu neitamaida, ‘Nun podana nengdi, wekra popsenung’ tenen, ila gel deipra, lyom beilya wipra, ongomgenepra domi ati arum peda, uruptapkamrume.

Ada akati-akati yuma dopipa, puto kupu tembok cap yumada, kandi uruptapmemdi, uku dongopkamreme. Tonda, kandi amutu neitamai kunung kaber neng yumada, parang ya di popkamreme. Ukupmemdi, Israel mutu nerapu, sun ukupu deipmengepa, moum tupa jenge nyapu yuma peda, popra sikke bungtamkamrume. Tonda, amutu nerapu, sun mundu ukupu douamenge nerapu peda, sun mundu yumada, sekra buteneptapmempa, depkamenge,” pepu.

13 Elisadi upepu pangeda, Hazaeldi tamupra pepu, “Dinino, neda pio mambul ngebo guma. Ne deiyo warya tep, ila kange mun pel yuma doptene do?” Upepupa, Elisadi tamupra pepu. Angeda, tali tep men pepkene. Deiyoda, Allah Yahwehdi, konum ne tep pepra deipmaner ngeda, kanda ila nimi deiyo ngebo Raja kepra tekmemdi, Siria ^{▼▼Siria – Amutu sida, ton Alkitab neitamaida, mutu si tep, ‘Siria’ sengnunge. Ton Alkitab buku neitamaida, amutu tenpu dinin, er si tep, ‘Aram mutu’ sengnunge. Amutuda tenpua.} mutu yuma talenkamreme. Allahdi upeipmanere.” Elisadi Hazael tep pepu.

14 Upepupa, Hazaeldi gekepu dingeda, erda konum adipapu tamupra, nimi deiyo ngebo Raja Benhadad er ati dam beu. Beupa, Rajadi asipetepu, “Elisadi pepmar upuda, ware upu peipmaker do?” pepra asipetepu. Asipetepupa, Hazaeldi, “Gume naio, erdi peipmaner upuda ake. ‘Ne deiyo ngebo Raja Benhadad er puda, gum kuprepa, kange di telep kupkamre ja,” pepra, peipmanere,” Hazaeldi pepu. 15 Upepu dinino, sun mapmareia, bereku pangeda, ambutumi deikida, Hazaeldi ason tongne keca, er si selimut tenpu dopropu. Ukupu dingeda, ason tongne keca selimut doprapudi, me pumbon dongopu. Ukupu dingeda, Hazaeldi ason dopra, er Raja aso deiki lelipdongopu. Ada, ‘Raja er isin dorona gum tep, er urasin deiki lelipdongopnepa, erda bouna di depkamre,’ tenepu. Ukupne dingeda, Hazaelda nimi deiyo ngebo, Siria mutu neitamai deiyo ngebo Benhadad yo pununa tep, tekudi Siria mutu yuma taleamu.

Yehoramda, Yehuda mutu nimi deiyo Raja ngebo kupu upu

16 Yosafat er mi Yehoramda, Yehuda mutu neitamai nimi deiyo ngebo Raja teku. Erdi gonga kepra teku taruda, Ahab er mi Yoram, nimi deiyo ngebo Raja kuramudi, Israel tara taleamudi, upu peramu. Yoramdi Israel tara taleamnganen, keteng tamun pamubari deiki di, Yehoramdi gonga kepra Yehuda tara taleamu. 17 Yehoram Raja kepra Israel tara talena tep, gonga kepu taruda, er nenada konum wisi deipu keteng tamun dengeda, tiga puluh dua (32) tahun kupu. Ukupu taru di dipra ortaru keteng tamun banbari, delapan tahun (8) deiki di, Yerusalem mutu neitamai talepra kuramudi, upu peramu. 18 Ukuramu dinino, nimi deiyo ngebo Yehoramda, Raja Yehuda mutu taleamu taru neitamai yumada, pio mali weik kuramu. Ada, menop taru Israel tara taleamu Raja ngebo Ahab cap, tonda yuk Israel mutu nimi deiyo neng Raja-Raja capdi, pio mali kecapu talepra kuramitopu, Yehoram peda, pio mali kecapu weik kuramu. Yehoramdi ukuramunge deiyoda, Raja Ahab er ner mi domudi, Allah Yahweh er kangeda, ‘Angeda pio mali,’ teneramungepu, talepra pio mali-mali weik kuramu.

19 Dinino, Allah Yahwehdi, ‘Yehuda tara kunge nesala yumada, wenepnedi gum kupra men deipkune,’ tenepu. Ange deiyoda, menop taru neitamai, Allahdi er kange deriramudi, er pel dona ngebo Raja Daud tep, upeipu. “Kandi deipmem nyapu cap, sundi deipmengepa, dadeipdanen bangedi, kunkameng neng neitamai di, nimi ton wepra deipnepa, Israel tara talenkamenge. Ada, Israel tara neitamai kunge nesala talenkamenga tep, kan nyapsilipdi, nimi deiyo neng Raja kepmengedi, pio tep Raja neng tengkamenge,” pepra, pedina upu deiki di pepra deiamu. Tonda, Allahdi, “Sun Daud yala nesala dinin, daneitamai di tengkameng Raja-Raja nengda, ila weica dirine weik kuramretopu, pio tep kunkamnunge,” pepu.

20 Yehuda tara taleamu ngebo, Raja Yehoram nimi deiyo ngebo Raja keamudi, upu di, “Ukupkurume,” peramu taruda, Edom mutu nengdi, ‘Gume, nunda Raja Yehudadi peramre upuda, men gekenkamepe. Er amutarapu men kunkamepe. Ange kuna gum di, er upu yanidongorami. Ukurami dingeda, ‘Angebo erepra deipmepepa, er dipapu nun ila deiyo ngebo Raja kuredi, talenkamsere’ tenen, sun pe kange deiki dipapu, sun amutu neitamai di, nimi deiyo ngebo ton wepra deipipa, er dipapu anesala talepra kuramu.

21 Ange tep nengeda, nimi deiyo ngebo, Raja Yehoramdi, ada Yehuda tara taleramu ngebodi, nimi porbana tep, bisi bukra emban keca, er si kereta kuda yuma keteneipudi, bukra Edom mutu neitamai dinin, ati arum si Zair mutu mar porbei. Zair mutu bukra bei pangeda, Edom tara jen talena nengdi, ‘Yehoram er jen talena neng popbisipkup’ tenen, aneng kunmaiyai, warekra ongopdongopi. Ukupi dinino, alukunda neitamaipu, nimi deiyo ngebo Raja Yehoram cap, er jen talena neng, sun deiyo-deiyo neng cap, adipapu nimi porbana taru bisi emban keca kereta kuda deiki bukrapidi, Edom mutu neitamai di poryanmai jen talen nengdi, warekra ongopdongopmaiyai di gupra bura saka beidi, kange di tamupra yanmaidi, Edom tara jen talena neng tep popbanmai. Ukupi taruda, Raja Yehoram er jen talena neng yuma, ‘Men porbenkup’ tenen, adipapu taprapidi, tamupra sepdara, sun pe mutu yuk-yuk sepdaro bei.

22 Ange ukupya tep nengeda, ataru di dipra, akunmap taru neitamai yumada, sun Edom mutu kunge nengda, ‘Yehuda tara taleramenge deiyo neng, sun amutara pio men kunkamepe. Sun deiyo nengdi penge upu peda, pio men gekenkamepe. Nun pe yukpu kunkamepe,’ tenengedi, Yehuda tara deiyo neng tamengedi, sun pe yuk nimi deiyo neng tekra kununge. Ataru peda, ange utopu, ati arum si Libna mutu neng sun peda, ‘Raja Yehuda, erdi upu penkamrenge yumada, nun peda gekena gum di, yaninapu kunkamepe,’ teneramidi, tupa utopu tenenunge. Ada, sun pe yukpu kununge. 23 Nimi deiyo ngebo Raja Yehoram erdi talepra kuramu taru di, yuk upu peramunge yuma cap, erdi pel doramunge capda, sun amutu nengdi sekra derirami buku neitamai seki. Abuku ^{▼▼buku – Abuku sida, Indonesia upu deiki di, ‘Sejara Kelakuan Semua Raja Yehuda penunge.} er sida, ‘Yehuda tara kurami nesala talepra ila nimi deiyo nengdi, pumun taru kuraminge,’ pepi.

24 Nimi deiyo ngebo Raja Yehoram konum depu pangeda, nimidi dopra, Daud mutu neitamai ila nimi deiyo neng depnepa, peirbarami mutupu perbei. Ada, Yehoram er co puna neng deramipa, sun tara nengdi, sun nong dopra peirbarami mutupu perbei. Konum peipi dingeda, Yehoram er mi Ahaziapu, er nai yo pununa tep, Yehuda mutu ila nimi deiyo ngebo Raja kuna tep, punupra tekudi upu peramu.

Ahazia Yehuda mutu nimi deiyo ngebo Raja teku upu

25 Yehoram er mi Ahaziadi, Yehuda tara neitamai, er nimi deiyo Raja kuna tep, teku. Ataru peda, Ahab er mi Yoram nimi deiyo ngebo kepudi, Israel mutu yuma talepra kuramu taru neitamai di, upu peramu keteng tamun denge pio weik, dua belas tahun (12) deiki di kuramupa, ataru dipapu Raja Ahaziadi Yehuda tara gonga kepra taleamu. 26 Ahazia er nena tep, keteng tamunda dua puluh dua tahun (22) konum kepu taruda, erdi gonga kepra, Israel tara talepu. Ukupudi, ati arum si, Yerusalem mutu neitamai di upu peramu. Upu peramu taruda, keteng tamun tenpu deikipu, upu peramudi kuramu. Ahazia er nin sida Atalya. Ada, nimi deiyo ngebo Raja Ahabdi deiamu mi, er si ton Omri. Tonda, er Omridi deiamu ner mi, Atalya kuramu. Omrida, Israel tara kurami nesala taleamudi, sun ila nimi deiyo ngebo Raja kuramu.

27 Uda, Raja Ahazia peda, menop taru nimi deiyo ngebo Raja Ahab cap, er nyapsilip capdi pio mali keca taleamidi, mali-mali weik kuramitopu, er Ahazia peda utopu, mali weik kuramu. Ada, Allah Yahweh er kangeda, ‘Angeda pio mali,’ teneramu ngeda, Raja Ahaziadi taleamudi, pio mali-mali weik kuramu. Tonda, menop taru Israel tara nesala taleamu Raja ngebo Ahab cap, tonda Ahab er nyapsilip capdi, pio mali keca talepra kuramitopu, Ahazia peda pio mali weik kuramu. Ahaziadi ukuramunge deiyoda, Raja Ahabdi deipupa, dadeipdanen yakarami nengdi deiami ner mi domnga cadi, atara nengdi mali kuramitopu er peda mali kuramu.

28 Nimi deiyo ngebo Raja Ahazia kapul men depu taruda, er cap, Raja Ahab er mi Raja Yoram, Israel tara taleamu ngebo cap, kikiman utotopu wisiprapreidi, sun Siria ^{▼▼Siria – Amutu si Siria ngeda, yuk Allah upu buku neitamai di, amutu si tep, ‘Haram’ sengnunge. Dinino, amutu tenpua.} tara kurami nesala, sun ila nimi deiyo ngebo, Raja Hazael tep melipdaidi, mar porbana tep bei. Mar porbana tep bei mutu sida, Ramot-Gilead mutu mar porbei. Nimi deiyo ngebo Raja Hazaelda, Siria tara taleamu deiyo ngebo kuramu. Podarban mutuda Ramot-Gileat mutu neitamai podaramidi, sun Siria tara jen talena nengdi, Raja Yoram tep popipa, suse dilada pio weik kupu. 29 Ukupu pangeda, adipapu Raja Yoramda, Siria mutu nengdi popmaipa, er dila kupmaunge, er kwetena tep nengeda, Ramot-Gilead mutu tapra, tamuprapudi Yizreel mutu beu. Ada, ‘Yizreel mutu bena dakuramnepanen, amenda taru ne dila kaikamner’ tenen, beu. Tonda, Raja Ahaziadi, ‘Raja Yoramda, er podan nengdi popipa, suse dila weik kupka tep, er dirbenkamne,’ tenepudi, ormutu Yizreel mutu di dirbeupa, sun adipapu antapdarei.