2Ki 9 | XteSC | STEP | Ataruda, nabi Elisadi, er amutara kurami nabi-nabi neng akuramya neitamai di, tenpu ngebo erdi moupra peteremamu ngebo tenpu tep pepu. Kanda Gilead mutu neitamai dinin, ati arum sida, Ramot mutu benkamruma tep, keteneipkurume. Tonda, akarepkene yambul me mauda, minyak zaitun me mokon gwepra deipmanu ngeda, ange doupmemdi benkamarume.

2 Kings 9

Israel nesala, sun deiyo ngebo Raja kemna tep, Yehu wepra deipi upu

1 Ataruda, nabi Elisadi, er amutara kurami nabi-nabi neng akuramya neitamai di, tenpu ngebo erdi moupra peteremamu ngebo tenpu tep pepu.

Kanda Gilead mutu neitamai dinin, ati arum sida, Ramot mutu benkamruma tep, keteneipkurume. Tonda, akarepkene yambul me mauda, minyak zaitun me mokon gwepra deipmanu ngeda, ange doupmemdi benkamarume. 2 Kan konum amutu, Ramot-Gilead mutu neitamai bemem dingeda, nimi tenpu er si Nimshidi deiamu ngebo Yosafat, angebodi deiamu mi, er si Yehu tep, epembankamarume. Yehu tep napmem dingeda, er kayapu neng acapu tapmemdi, sundi men eptengaipu, Yehu er doupra yuk ati pumbon, kan cap doupra wekurume.

3 Ange ukupmum dingeda, aminyak zaitun me mokon kipmamum me, mau tenpu doupmamumnya di, Yehu er giso deiki dikra deipkurume. Ukupmum taru di, aupu pepkurume. Allah Yahwehdi peipu ngeda ake. “Aminyak me dikeipkena deiki, Allahdi ‘Israel tara kunge nesala talepra, kunkamre nimi deiyo ngebo Raja kepra deipkene,’ pepra, wepra deipkere. Ange yuma konum kupmumnyoda, adipapu buplan pakrapmumdi, aceida tapra pio menmena sepdaro bendopkurume. Ada, ‘Amutu nengdi ne poptapnenung’ tenen, sepra bendopkurume,” pepu. 4 Nabi Elisadi, ange tep peipupa, gekepu dingeda, er akaber nabi ngebo adipapu sepra Gilead mutu dinin, ati arum sida, Ramot mutu beu.

5 Akaber ngebodi, Ramot mutu weku taruda, Yehu cap, er jen talen neng, sun deiyo-deiyo neng yuma cap, bulupra wekmaiyai bena antapudi, upu talepi. Anabi ngebodi aneng yuma epu dingeda, aupu pepu. “Ne deiyo ngebo, nedi kan tep upu doupra yane,” pepu. Upepupa, Yehudi tamupra pepu, “Nunda nimi yambul weika di aca wekmapa cadi, nun damaida ware ngebo tep pepkurem do?” pepra asipetepu. Asipetepupa, akaber ngebodi, “Gume, ne deiyo ngebo, kan tepa,” pepra, er akaber nabi ngebodi pepu.

6 Upepka tep nengeda, Yehudi er kayapu neng acapu taprapudi, er cap, anabi kaber ngebo cap, sun kikiman wisipra akati pumbon wekrei. Ukuprei taruda, akaber ngebodi, aminyak zaitun me mokon douprapudi, Yehu er giso deiki dikra deipudi upepu, “Akupmakena deiki di, Allah Yahwehdi, Israel tara kunge nesala talepra, kure deiyo ngebo kemna tep, ukuda wepra deipkere. Sun Israel tara kunge nesalada, Allah Yahweh, er mawa nesala, er nyapu sisa kununge. Kanda, anesala yuma talepra kunkamrema tep, sun deiyo ngebo Rajada, kanpu kunkamrume. 7 Ukunkamruma tep, Yehu kanda, kan deiyo ngebo Raja Ahab, erdi deipupa, dadeipdanen yakarami nesala, Ahab er nyapsilip yumada, poptapmemdi, gum kupra deipkamreme. Ukupkamremnya deiki di, ne Allahdi, ila deiyo ner, Izebeldi ne pel dona neng pomneu ngeda, kwangdangkamne. Ada, ne nyapu sun nabi-nabi neng cap, ne upu lap pena deiyo neng cap, ne upu peteremna neng capda, Izebeldi peipupa, yu nengdi portamami. Atep ikin keca weik angebo deikipu deipne.

8 Tonda, ayala nesala meteka dipu, ‘Popkun,’ tenena meme. Raja Ahab er nyapsilip yumada poptapmemdi, gawal dakamrume. Ada, nimi deiyo ngebo Raja Ahab cap, er nyapsilip capdi deringe neng yuma capda, popmempa depnapu kupkamenge. Ukupkamremnya deiki di, ne Allah Yahwehdi, Ahab er yala neng yuma, sun nimi du neng cap, sal nyapu cap, wisi neng cap, kaber neng cap, sun pe kange deiki dipu pel donge neng cap, ‘Menenga keca dorona gum di, nun ikin pel dipmepepa, sundi tali donkamseng’ tenen, co bo deiki di kunumamipa tali pel donge neng cap, aneng-aneng yumada, poptapmemdi, gawal dakamemnya deiki di, nedi aneng gum kupra deipkamne. 9 Ne Allah Yahwehdi, Nebat er mi Yerobeam cap, er nyapsilip yuma cap, poptapra gum kupra deipsitopu, ukutaruda, Ahab erdi deiamu nyapu yuma, Yereobeam er nyapsilip cap, tonda, Ahija er mi Beasa, er nyapsilip cap yumada, nedi gum kupra deipkamne. 10 Nimi deiyo ngebo Ahab, er ner Izebelda, depyopda, nimidi er nong doupra, men peipkamenge. Aner deprepa, Yizreel penge mutu dinin, awa tu kwamu mutu neitamaida, tali embaramre kamdi, er nong cap, er yapi cap jepropkamenge. Atep nengeda, Izebelda, er nong men peirbenkamenge,” pepu. Akaber nabi ngeboda, Allah Yahwehdi peimu upu konum pepra seng pepu dingeda, ‘Akati nengdi popnenung’ tenen, adipapu akati taprapudi, bura tara gupra yaudi, adipapu sepra beu.

11 Akaber ngebo konum sepra beu pangeda, Yehu adipapu tamupra, er kayapu neng sun Raja Yoram er jen talena deiyo neng damai tamupra beu dingeda, sun awekmai neng dinin, tenpu ngebodi asipetepu. “Arup yanmau ngebo, mutana utopu ngebodi, ware upu ton pepmaker do? Deiyo warya tep, amutana ngeboda, kan damai yana peipmaker do? Kanda telep kurum do, gum do?” pepra asipetepu. Upepra asipetepupa, Yehu erdi tamupra pepu. “Gume, dakwapye. Sun konum kael keamrume. Ato mutana nengda, deiyo men kwapmarepapu, tali-tali upupu pertamnunge,” pepra Yehudi lap pepu.

12 Upepupa, sun jen talena deiyo nengdi upepi. “Gume, nun kangeda, kandi yuk upu ton men pepmaseremdi, inimemdi, mawa di pepmareme. Uku dipapu tek sisi ngepu pepkuserume!” pepi. Upepipa, Yehudi tamupra pepu. “Gume, akaber nabi ngebodi, ne tep upepmaneu. ‘Allah Yahwehdi, kan tep, ‘Israel nesala talepmemdi, sun ila nimi deiyo ngebo Raja kunkamrem’ tenen, konum wepra deipkere,’ pepra lap peipmanue,” pepu. 13 Upepupa, anengdi gekepi dingeda, adipapu Yehu er kayapu neng, sun kenekami lyom opkalda, er si juba kuriprapidi, Yehu er din damai apiyo co moromngai apu deipra tapi. Ukupi dingeda, sun adipapu lelim pena keca, jem domba bisam er giso takke di keteneiami ngeda, er si terompet, doprapidi pung penmaidi, ila upu deiki di, “Yehu erda, nun Israel tara tep, ila nimi deiyo ngebo Raja konum kupmasere!” penmai.

Yoram Israel mutu nimi deiyo ngebo kuramnga popi upu

14 Ange tep nengeda, nimi si Nimshi, erdi deiamu ngebo Yosafat, erdi deiamu mi Yehu, erdi Israel tara taleamu deiyo ngebo Raja Yoram tep, ‘Er upu men gekenkamepa cadi, er tep bisbisa kapkamepe’ tenen, Yehu gonga kepudi, er cap, er kayapu neng capdi, ‘Raja Yoram porbenkamep,’ pepra, upu talepidi piripetepi. (Uda, ataru neitamaida, Israel tara nimi deiyo ngebo Raja Yoramda, Yizreel mutu dinin, mutu si Ramot-Gilead neitamai kuramudi, er cap er jen talena neng cap, Siria mutu nimi deiyo ngebo Raja Hazael cap, er jen talena neng cap tep, mar podanmai. Ada, Raja Hazaeldi, ‘Raja Israel Yoram talerur nesalada, popbisipkamne’ tenen, kalengmaidi piripetepya tepa.

15 Sun aneng yuma mar podanmai taru dipapu, Raja Yoramda, mar popmaipa, er nong dila weik kupka tep, erda Yizreel mutu kwetena tep bena kunmau. Ange tep nengeda, Yehudi, er kayapu neng kikiman kunmai neng tep pepu. “Sundi ne tep, ‘Erda nun nimi deiyo ngebo Raja tekamre,’ tenepnemum dingeda, nimi tenpu ngebo peda, Gilead mutu neitamai dinin, ati arum sida, Ramot mutu neitamai di, tenpu ngebo ton amutu tapra, yukai men betenge. ‘Sun benung’ tenen, sundi amutu kalengnapu kunkamrume. Tonda, ‘Amutu nengdi kael kepkameng’ tenen, sundi Yizreel mutu neng kunungai, lap perbenkurume,” pepu.

16 Aupu yuma konum pepra seng pepu dingeda, Yehu adipapu mar porbanai bukra ban keca kereta kuda bisam deiki bukrapudi, ‘Raja Yoram epkamne’ tenen, Yizreel mutu beu. Ataruda, nimi deiyo ngebo Raja Yoramda, er susu dila yumada, telep kupra kapul men kaekamo. Ikin tupa kunmaua cadi, er ason deiki mapmautopu kunmau. Atarupuda, Yehuda tara neitamai yuma taleamu ila nimi deiyo ngebo, Raja Ahazia peda, er kabo Yoram er pu jeramngai dirbenmau taru di amutupu kunmau. 17 Ataruda, ila ati arum Yizreel mutu doramyai dinin, ila lyom beilya ongopgenepra wiaminge deiki tara di, kalengami nengdi dinmaipa, Yehu cap, tonda er tara neng cap, yakanmaipa epi. Epi dingeda, akalengna nengdi, Raja Yoram tep upepi, “Jen talena neng nimi gung tenpu ton, ortara di atara yakanmange!” pepi. Upepipa, nimi deiyo ngebo Raja Yoramdi tamupra pepu, “Nimi tenpu ngebo ton pepmumpa, kuda bisam deiki bukrapredi, sepdaro ayakanmang neng, antamna tep benkurure. Ukupredi asipkurure. ‘Sunda kange telep deiki dipapu yakanmarum do, nun podana tep yakanmarum do?’ pepra asipkurure,” pepra, Raja Yoramdi pepu.

18 ‘Ukupkurume,’ pepka tep, ajen ngebo tenpu, adipapu kuda bisam deiki weleprapudi, Yehu damai bena antapu. Ajen ngebo beu dingeda, Yehu tep upepu, “Ne deiyo ngebo Raja, kan Yehu yakanmarem ngeda, kange telep deiki dipapu yakanmarem do? Ne deiyo ngebo, er kael kemna tep yane,” pepu. Upepupa, Yehudi tamupra pepu, “Kange telep douna cap, telep kupra kikiman kuna cap ngeda, kanda men kael kepmuma cadi, kan cap, ne cap, kikiman upu pedana pio gume. Ne amnyo tara bemempa, benkupe,” Yehudi upepu.

Sun antapdarei taruda, Yezreel mutu ati arum kalengamu jen talen ngebodi dinmaupanen, Raja Yoramdi wepra deipmau jen ngebo cap, agung tenpu cap yuma yakanmainen yai. Dinino, upu asipbenmau ngeboda, er yuk tamupra men yau. Men yaua tep, kalengna ngebodi, Raja Yoram tep, ila upu deiki di pepu. “Naio, kandi doproipmaum ngeboda, tamupra men yakanmare,” pepu. 19 Upepmaupa, menmena benmau ngebo tamupra men yau pangeda, Raja Yoramdi kange di ton cap, yuk ngebo ue butenenge, kuda bisam deiki di dokotepu. Dokotepu jen ngebodi Yehu tep asipetepu. “Ne deiyo ngebo Raja asipetepker ngeda, kan Yehu yakanmaremada, kange telep deiki dipapu yakanmarem do? Ne deiyo ngebo er kael kemna tep yane,” pepu. Upepupa, Yehudi arup pepmautopu kange di ton cap tamupra pepu, “Kange telep douna cap, telep kupra kikiman kuna cap ngeda, kanda men kael kepmuma cadi, kan cap, ne cap, kikiman upu pedana pio gume. Ne amnyo tara bemempa, benkupe,” pepu.

20 Sun antapdarei taruda, Yezreel mutu ati arum domyai kalengamu jen talen ngebodi dinmaudi, er deiyo ngebo Raja Yoram tep ila upu deiki di pepu. “Naio, kandi ue butene doproipmaum ngebo cap, ayakanmang neng damai benmaua, antapdanmang dinin, kandi doproipmaum ngeboda, tamupra men yakanmare,” pepu. Dinino, ne kangeda, ayakanmang gungda, sun deiyo ngebo, Nimshi deiamu mi, Yehu akurure tenepne. Angeda tali men pepkene. Er angebodi kereta kuda doupra banmaudi kunmau ngeda, pio menmena yakanmara cadi, mutana neng barameng utopu kunmare. Atep, ne kangeda, Yehu er bukmardi, yakanmare tenepne,” pepu.

21 Upepu pangeda, nimi deiyo ngebo Raja Yoramdi, aupu yuma konum gekepu dingeda, pepu. “Ne bukra tu deiki bana tep, keca kereta kuda ngeda, menmena di keteneipkunerume.” Upepu pangeda, adipapu kereta kuda bisam er bana tep, keteneipipa, dopropudi, erda Raja Israel nesala sun deiyo ngebo Yoram cap, er kap Yehuda mutu nesala sun deiyo ngebo Raja Ahazia cap, ‘Yehu antapkamnem’ tenen, sun kereta bisamda, yuk-yuk doupra berei. Bereidi, Yehu cap antapmaiyada ake. Ada, nimi si Nabotdi, Yizreel mutu neitamai, pumun taru dadi erdi peamu wai dam antapdai.

22 Antapdai dingeda, Raja Yoramdi Yehu tep asipetepu, “Kanda, ‘Telep kupra kikiman kunkamp’ tenen, kange pio telep deiki di yakanmarem do, gum do?” Upepupa, Yehudi tamupra pepu, “Neda ware keca deiyo tep, amutu neitamai di, ne kange telep deiki di yatene do? Deiyoda, amutu neitamai dana-dana tara yuma, Yoram kan nin sisa, Izebeldi gonga keamupa, amutu neitamai kunge nesaladi, asuru kwa nengdi don pel cap, tali keca isok si eremna pel don neng cap, tupa talepra doramnunga cadi, neda ware kupra telep kange deipra yatene do? Gume, angeda men kupmanto,” pepu.

23 Upepu pangeda, Raja Yoram gekepudi, ‘Uo, angeda bamure,’ tenepudi, er ngokra bisi embana tep keca, er si kereta kuda tamuptopudi, sepra banmaudi ila di ngolongmaudi, upu penmau. “Raja Ahazia kanda gekepneo! Angebo Yehudi, ne tep tali mok upu mawa di penmanere. Angebodi, ‘Raja Yoram popnedi bisbisa kapkamne ja,’ tenenmardi yakanmar adano,” pepra, ila upu deiki di, Raja Ahazia tep pepudi, sepra banmau. 24 Ukupra sepra banmau dinin, Yehu adipapu er lyom jen doupmardi, mar dopra mar gumgumda, jen tapu dipudi, ila puto di gipropu. Ukupu dingeda, Yehudi dopu marda banmauanen, Raja Yoram er morokyo damai amnyo tara bena bisik pepu. Ukupudi, Yoram er dipru neitamaipu bena beku. Er dipru neitamai bena beku cadi, Yoram adipapu er bungne keca kereta kuda deiki bukmauada, adipapu sakudi depu.

25 – 26 Ange ukupu pangeda, Yehudi er amutara jen talena neng, sun deiyo ngebo tenpu, er si Bidkar tep pepu, “Kanda Yoram er gemnada, Nabotdi wa tu kunuamudi taleamu mutu, awai dampu dokotepkurume,” pepu. Upepu dingeda, aupu ton dukdongopra pepu. “Kanda tupa tenepmum do? Nun kikiman kuda bisam deiki welepnumudi, Yoram er nai Raja Ahab cap kikiman bepu taruda, nun nai Allah Yahwehdi, angebo Raja Yoram tep, aupu peipu. Ataruda, Allah Yahwehdi Ahab tep, amenda kupkamu keca tep peipu, ‘Ne Allah Yahwehdi konum kael kepsi. Ada ambutumi kandi Nabot cap, er nyapu cap yumada, kandi konum popmaumpa, ne epmakenue. Atep, amenda taru wenepkamken ja. Awai dam di ikin keca deipkamkene,” peipu. Allahdi angebo tep peiamnga cadi, ukutaruda nong konum kupmare. Ange tep nengeda, Allah Yahwehdi peiamutopu, kandi Raja Yoram er nong dopra, Nabotdi kunuamu wa tu neitamaipu, dokoteptapkurume,” pepu. Upepupa, Yehu er melimna ngebo Bidkardi, Yehu peipmautopu kupu.

Yehuda mutu neitamai talepra kuramu ngebo, Raja Ahazia popi upu

27 Atarupuda, Yudea tara taleamu ngebo, Raja Ahaziadi dinmaupa, konum kupupa, epra kael kepu. Akupunge epudi er adipapu er kereta damai bena wekrapudi, sepra Bet-Hagan mutu tara beu. Beu dinin, Yehudi nimi deiyo ngebo Raja Ahazia tep, pio domyakanmaudi, er melimna jen talen neng tep pepu, “Nimi deiyo ngebo Raja Ahazia peda, mar poipkurume,” pepu. Atep, Yehu er jen talena nengdi, Raja Ahaziada, sun dounmai mar di popi. Er popyaida, urup tara di, mutu si Gur mutu welerbanai di, amutu sida, Ibleam damai popi. Uda, Ibleam mutu damai di mar dopipa, mar bena beku dinin, adipapu men depu. Men depka cadi, Raja Ahazia er kereta pumbon di sepdaro mutu si, Megido mutu damai beu. Amutu beu dingeda, adipapu amutu bena depu.

28 Megido mutu bena depu pangeda, Ahazia er melimna nengdi er gemna doupra, Yerusalem mutupu tamupra dubei. Doupra yai dingeda, Raja Daud kuramu mutu neitamai, akati arum ila kota Yerusalem mutu neitamaipu bena peipi. Ada, nimi deiyo ngebo Raja Ahazia, er co puna neng paliramyaipu, er nong ton duyana acapu palipi. 29 Pumun taruda, Raja Ahazia, Yehuda mutu talepra nimi deiyo ngebo Raja kemna tep, gonga keamudi, tekamau taruda, Ahab er mi, Raja Yoram Israel yala nesala kurami mutu neitamai taleramudi, upu peramnganen, keteng tamun denge weik sebelas (11) tahun konum kupupa, aneitamai di, Ahaziadi gonga keprapudi Yehuda mutu neitamai taleamudi upu peramu.

Nimi deiyo ner Izebel popi upu

30 Uda, Yehu konum Yizreel damai beu pangeda, ila deiyo ner, er si Izebeldi, akupunge yuma konum gekepudi, ‘Angebo kange deipkamner’ tenen, er potong cap, urasin cap, er asuru dipunya telep kuna cap tep, ‘Ne urasin yuma telep kupkamner’ tenen, nerapudi sun urasin deiki lingna keca, er urasin deiki liku. Ange yuma ukupmaudi, nimi deiyo ngebo kuramu ati dinin, alau tara ati, jendela bon di, buka dinmau. 31 Ukupu dingeda, dakunmauanen, Yehu adipapu yakanmauanen, ila nimi deiyo ngebo, er ila telep ati bisi buplan damai wengdongou taruda, Izebeldi pepu, “Uo, Kan ayakanmaremada, kan dipru telep tenepmaremdi, ‘Telep kupra kikiman kutepe’ tenen, yakanmarem do? Deiyoda, ne kangeda, kanda nimi tenpu er si Zimri ^{▼▼Zimri – Angeboda, erdi mali kupu ngeda, 1 Raja-Raja pasal 16:9-10 neitamai di, eprumudi kael kepkurume.}, er deiyo ngebo poptapu utopu kurume tenepkene!” pepu.

32 Izebeldi upepupa, Yehu adipapu er giso erepra akati jendela itara dipetepudi, Izebel epudi upepu, “Amutu neitamaida, ware ngebodi ne tara kepropredi melipkuner do?” pepu. Upepupa, akati wekmangu neng, butene nengto, weneri nengto, anengdi, ajendela bon bisi di Yehu epi. Agekepmai nengda, ila nimi deiyo ngebo, er ati pumbon pel dona neng kurami. 33 Yehudi aneng akati pumbon kupmaipa, epu dingeda, upepu, “Izebelda, adipapu doprapmumdi, itara di, tuai tara dokotepkurume!” pepu. Upepupa, Izebel adipapu dopra tuai tara dokotepi. Ukupipa, Izebel er nong tuai deiki saku taruda, er yapida, puto di pelelek pepu dingeda, akati bura tara dela damai cap, Yehu er kuda bisam deiki cap yuma bepu. Tonda, Izebel er gemnada, Yehu er kuda bali deiki bukmaua di, akuda bisamdi er gemna yanipu.

34 Ukupu dingeda, Yehu adipapu ila nimi deiyo ngebo ati pumbon wekudi, jen cap, me cap jenmau. Ajenmau taru dipapu, Yehudi akati dam pel melipra don neng tep pepu, “Aner Izebelda, pio mali weik kuramnga cadi, Allahdi konum wipke. Dinino, er anerda nimi deiyo ngebo Raja, erdi deiamu ner mi cadi, er gemnada doupra berumudi, tu palipra peipkurume,” pepu. 35 Yehudi, “Ukupkurume,” pepra deipu dinino, akati neitamai melipra pel dona tep pegawai neng yumadi, aner er gemna doupra, yana peina tep dorbei taruda, sundi Izebel er gemna yuma acapu men kupmaua tep, men epi. Izebel er giso cap, er yan yo cap, buru yo cappu kupupa angepu epi.

36 Ange konum epi dingeda, tamupra Yehu bukmaua damai yana lap peryai. Ukupipa, erdi pepu. “Gume, angeda Allah Yahwehdi er pel dona ngebo, Tisbe mutu nengdi deiami ngebo, nabi Elia deiki di, konum peiamutopu, konum kupmare. Angeda, akupmar adano pepu. Ada, Allah Yahwehdi amenda kupkamu keca peiamu ngeda, ake.

‘Yisreel mutu neitamai kunung kamdi, ila deiyo ner, er si Izebel er galemnada depmaryada, jepkamenge. 37 Tonda, Izebel er gemna yambula di akwapu ngeda, Yizreel mutu neitamai nimidi, wa pepra kounung keca, er telep kupra bongona tep, akati arum tapra, bura tara donongamengai, dana-dana tara dokotepmangepa, yuk nengdi, ‘Izebel er gemnada dan do?’ tenen, epeteptenge dinin, nimi tenpu ngebo peda, men epkamenge. Sundi, ‘E, ada Izebel er pein damaida ace’ tenen, men kael kemkamenge,’ Allah Yahwehdi, aner tep upeiamutopu konum kupmare,” Yehudi pepu.