2Pe 1 | XteSC | STEP | Ne kayapu, telepe pepsene. Asuratda, ne Simon Peterusdi seksene. Yesus Kristus lyepneudi, ne dipru talepneupa, er pelpu donune. Tonda, Yesusdi, ‘Ne upu dopra peterep embenkamra cadi, Rasul ngebo kunkamre’ tenen, wepra deipneue. Allah kange deipseudi, nun tep er upu cap, nun teka tenena keca cap, kareamseupa, dopra taleamupunge pio telep kuretopu, sun peda utopu kupseupa, teka tenepra ne pepman keca talepra kurume. Nun Lyemna Deiyo Ngebo Yesus Kristusda, tek sisi Allah kurure. Er mali kuna pio gum kuredi, dumsisipu kurya deiki di sun cap, nun yuma cap tep, teka tenena deiyo keca kareamseupa dopropmupudi, konum teka tenepra kunupe. Sun yuma tep asurat seksene.

2 Peter 1

Peterusdi, ‘Telepe’ pena tep, pepu upu

1 Ne kayapu, telepe pepsene. Asuratda, ne Simon Peterusdi seksene. Yesus Kristus lyepneudi, ne dipru talepneupa, er pelpu donune. Tonda, Yesusdi, ‘Ne upu dopra peterep embenkamra cadi, Rasul ngebo kunkamre’ tenen, wepra deipneue. Allah kange deipseudi, nun tep er upu cap, nun teka tenena keca cap, kareamseupa, dopra taleamupunge pio telep kuretopu, sun peda utopu kupseupa, teka tenepra ne pepman keca talepra kurume. Nun Lyemna Deiyo Ngebo ^{▼▼Lyemna Deiyo Ngebo – Alkitab neitamaida, Lyemna Deiyo Ngebo sengnungada, ton taru Allah tenena tep sengnunge. Ton taruda, Yesus tenena tep sengnunge, dinin deiyoda, Yesus er depseua deiki di Allahdi lyemserure. Paulusdi Yesus tep aupu pepu. Lap pena nomor 17 dirume.} Yesus Kristusda, tek sisi Allah kurure. Er mali kuna pio gum kuredi, dumsisipu kurya deiki di sun cap, nun yuma cap tep, teka tenena deiyo keca kareamseupa dopropmupudi, konum teka tenepra kunupe. Sun yuma tep asurat seksene. 2 Sun yumada, Allah cap, nun Deiyo Ngebo Yesus cap, konum kael kepruma cadi, ‘Yesus cap, Allah cap, sun cap, dipru dukdongoprap kuruma deiki di, teleppu kunkamrum’ tenen, nedi sun tep Allah morosenune. Ada, Allahdi bicau tenepseredi, er pe kange dipapu melipra kareserur pel dona deiyo keca cap, uda Allah cap kikimanpu telep kupra kumumdi, telep kange doupra kuna tep kareserur keca cap, ‘Weik tapakra kupbankamser’ tenen, Allah morosenune.

Allah wepra deipseudi, ‘Ukunkameng’ tenen, upuserur keca tep, “Talepra kunkamrume,” pepu upu

3 Allah er ila puto deiki di, nun yuma tep, ‘Anesalada, bol koptapra gam pio kunkamenge nge cap, tonda, ne Allah kunetopu, dumsisipu kunkamenge’ tenen, putankamser keca yumada, konum kareamseue. Ada, dumsisipu kuna deiyo keca kareamseua yumada, er cap dipru dukdongopra kikiman kupedi, er kure keca yuma kael kemnupa deiki di, konum kareamseue. Tonda, ange yuma tupa kareserure. Allahdi nun yuma tep, upupseuada, ‘Anesalada, ne nyapu kunkamenge,’ teneamseudi, er ila mambule kurya cap, er pio telep-telep kurya cap, dirine weik kurya cap deiki di, anuamseudi wepra deiamseue. 4 Allah ila mambul kuredi, pio telep-telep kupra kurya deiki di, “Ila mambul pel donkamsene,” pepra, pio telep pedina upu konum pediramseue.

Aupu kareamseuada, mesum tep gume. Tonda, Allahdi, “Ukunkamsene, ange ton ukunkamsene,” pepra pedisere upu deiki di, nun yumada, ‘Nunda Allah pio dumsisipu kuretopu kunkamepe’ tenen, ange yuma kareamseua deiki di kunupe. Tonda, adeiyo ton akwapmare. Ada, sun yuk nesala, Kristus tep teka men tenenung nesaladi, ‘Mali kun kecapu kunkamepe’ tenen, putarepa tenenunge. Ukununga deiki di, tek sisi sun kange dipru, pio mali-mali kuprepa, malipu tupa kudidanunge. ‘Anesalada, pio mali kununga utopu, ne nyapu ton men kunkameng’ tenen, Allahdi nun tep, er telep pedina upu yuma, kareamseua deiki di, er telep kuretopu, nun peda telep kupbankamtepe.

5 Uda Allahdi, ‘Sun dumsisipu kunkameng’ tenen, er pio telep pedina upu konum kareamseua tep nengeda, sundi pio pe deiprumudi, moupra kunkamrum kecada nukusene. Sundi Allah tep teka konum teneamrum dinin, yuk nesala tep bicau tenerumudi, telep kupra makunkamrume. Ukupmum dingeda, ton pio dumsisi kunada, ton cap tapangkamrume. Dumsisi kun keca akwapseryopda, kwirye kun bisi kuna tep, ila kael kemna deiyo keca ton tapangkamrume.

6 Ila di kael kemna deiyo keca konum akwapseryopda, sun nong cap, sun kun keca cap, ‘Mali kupnup’ tenen, pio kalekdamumdi, mali kun keca kwamrurai yumada, memdonkamrume. Sun pedi sun kurumu keca tep kalekdamumdi, mepdana kun keca konum akwapseryopda, ikin keca akapserya peda, tamna gum di, pel pio palepra dona tep, kuna deiyo keca ton tapangkamrume.

Tamna gum di, pel pio palepra dona tep kun keca, konum akwapseryopda, Allah dumsisipu kuretopu, pio telep mengne kun keca ton tapangkamrume. 7 Allah kuretopu mengne kun keca konum akwapseryopda, yuk teka tenena neng tep, bicau tenedana cap, melimdana cap, bouna di kuna deiyo keca ton tapangkamrume. Yuk teka tenena neng tep, bicau tenepra, bouna di kuna deiyo keca konum akwapseryopda, yuk nesala yuma tep, bicau tenepra makudana deiyo keca ton tapangkamrume.

8 Akeca-keca yuma konum kupseredi, tapakra weik ton kupbaryopda, apepsen keca yuma kuserya deiki di, sun cap, nun Deiyo Ngebo Yesus Kristus cap, dipru dukdongopra kumumnya cap, Yesus tep kael kemkamrumnya capda, tali dempu men kunkamrume. Ukupmantoda, telep co, er du weika di, moupseredi nong weik kunkamsere. Atep, Yesus tep kael kemkamrumnya capda, weikanun ton tapakbankamrure.

9 Dinino, apepmasen keca yuma, men kunge nesalada, sunda asuru kunukrepa, karenai kwapmar keca men epmanto nesala utopu, tonda asuru pun nesala utopu kununge. Ato ngeboda, ‘Allahdi ne mali kuramsi keca gum kupra deipneudi kaukepneu’ tenen, akeca konum luproua tep, apepmasen kecada, ‘Mambule’ tenepra men kurure.

10 Ange tep nengeda, ne kayapu, apepmasen keca talepra men kure ngebodi kuretopu, men kunkamrume. Sunda, Allahdi ‘Anesala ne nyapu kunkamenge’ tenen, weamseudi upupseuada, ‘Tek sisi apu kunkamepe’ tenen, pio pe deipra, Allah er pelpu donkamrume. 11 Ada tali tep gume. Ukuramum dingeda, pio mali kuna gum di, tek sisi Allah men tamkamrume. Tonda, sirya taru nun Deiyo Ngebo Yesus Kristus, nun Lyemna Deiyo Ngebodi, nesala weika di lyepra dipru taleseredi, akeca-keca yuma taleryankamraida, sun ton wengkamrume. Nun Deiyo Ngebo Yesusda, nun tep kange deipseredi, “Telepe ne damay wengyankurume,” pepseryopda, er damaipu wekra, apio teleppu kunkamrume.

Peterusdi, ‘Aneng tupa tenenkameng’ tenen, pepu upu

12 Uda, ne kayapu, ukupu pepmasen keca yumada, sun konum kael keamrume. Tonda, konum peteremamsei upu gekeramrumdi, aupupu talepra dimpepra kumumdi, dombanapu kurume. Dinino, ‘Kange di ton cap tenenkamrum’ tenen, nedi tupa-tupa aupupu, tupa penkamsene. 13 Ne kangeda, ne gam kune taru neitamai yumada, aupu kange di ton cap penkamsena deiki di, ‘Teka tenepra puto di pel donkamrum’ tenen, penkamsene. Angeda, telepe pua.

14 Angeda tali tep men pepsene. Deiyoda ake. Nun Deiyo Ngebo Yesus Kristusdi konum katuai lap peipneupa, kael keamsi. Yambulanun ton kunmanyanen depkamne ja. Atep, arup pepmasen upuda, tupa-tupa kange di penkamsene. 15 Angepu gum dinin, ‘Ne konum depnyopda, amenda taru yuma, sundi apepmasen upu tupa tenepra kunkamrum’ tenen, pio piripetepnedi, sun melimna tep puto di pel donkamne.

“Yesus er puto weik kupupa, nun pe asuru di epmupu,” pepu upu

16 Nundi, sun tep, “Nun Deiyo Ngebo Yesus Kristusda, ila puto ngebo kuredi, amenda taruda, tuai mutu tamupra yankamre,” pepra peteremamsepu ngeda, tali nesala sun kange dipapu tenepra, tali-tali upu nemdisengetopu, men peteremamsepu. Angeda gum dinin, nun pedipapu, Yesus Kristus puto weik kuramnga cap, pio telep mambul pel doramnga capda, nun pe asuru di diramupka tep, aupu jenek kupra peteremamsepu.

17 Nun pe asuru di epmupu keca cap, amul di gekepmupu keca cap pepkusene. Ada, nun nai Allahdi, Yesus tep, “Angeboda, ne Mi Sisa kurure. Er tep ne bicau tenenedi, er kure keca yuma tep, ne kange pio derinerure,” pepka deiki di, Allahdi Yesus tep, gispal dopudi, er tep ila mambul si karepu. Allahda, pio telep ngebo, ila mambul ngebo kuredi, im deiki di aupu peipupa, nun pe amuldi gekepmupke. 18 Nun cap, Yesus cap, ila mambul, pio telep mutu dup bena kikiman kunmapu taruda, Allah im deiki di, aupu peipupa, nun pe amul di gekepmupke.

19 Ange tep nengeda, Allahdi amenda kupkamu keca lap peiamupa, er upu gekepra lap perami neng, nabi ^{▼▼Nabi, Allah er upu lap pena nengda, Allahdi, ‘Nimi gekepkameng’ tenen, erdi wepra deiamu neng tep, amenda kupkamu keca cap, ‘Tuai nesala gekepkameng’ tenen, er upu lap pepu nge cap, Allahdi lap pepu pangeda, anengdi, yuk nesala yuma tep lap perbarami. Anengda, nabi neng penupe. Tonda, nabi neng, sun lap pena upuda, nomor 25 dirume.} nengdi, ‘Nimi Lyemna Deiyo Ngebo amenda taru yankamsere,’ pepra, sekra deiami upu, ukutaruda, nundi, ‘E, aupuda, pio tek sisi upupu kurure,’ tenenupe. Ukupmanto ngeda, aupuda, nimidi kunungnai embankunge taru, weica upmengepa, dirine kuprepa, moupra dingedi, embaramengtopu, kuserure. Allah er upu lap perami nengdi sengami upuda, pio tek sisi upu kurura cadi, dirine utopu kuserura tep, sundi aupu moupra gekenkamrume.

Allah tep mumupra kapul men kael kepmum taru neitamai cap, uda Yesus Kristus tuai mutu, tamupra kapul men yare taru neitamai cap, peteremna nengdi, sun nabi nengdi sengami upu nukra pepmengopda, sunda ange pio moupra gekenkamrume. Ukupmantoda, bereng yan taru kepkamara tep, tulek bisi yaramre taru cap, Ululkor tengyakaramre taru cap, dirine kuprepa, ‘Ukutaru akeca-keca yuma katuai dinkupe,’ tenerameptopu, sun nabi nengdi sengami upu moupra gekepmepyopda, ton cap tapakra, telep kupra kael kemkamepe.

20 Dinino, menmenada ila mambul upu ton pepsenepa, moupra kael kepkamrume. Ada, ware upu do yuma, Allah er upu lap perami nengdi, sun upu sengamidi, Allah er buku neitamai deiami upu yumada, anabi neng sun pe kange dipapu, ‘Angepu sengkamepe, aupuda, er nong neitamai deiyo ngeda ake’ tenen, men sengami. 21 Angeda pio gume. Allah er upu lap perami neng, sun nabi nengdi sengami upu yumada, tali dakurami nengdi, ‘Aupuda mambule, aupuda sekso,’ peramia deiki di men sengami. Ange gum dinino, Allah er Lek Sambaladi nabi neng sun dipru neitamai di, ‘Ange sengkurume,’ pepra, upu pepra, pel doramnga deiki di, Allah er upu lap perami nengdi, aupupu sengami. Ada, Allah er Lek Sambaladi aneng tep, er puto kareamnga deiki di, apel dorami. Ange yumada Allah er dia!