2Pe 2 | XteSC | STEP | Allah er upu lap perami nengda, tali nengdi, “Aupu sekso,” peramya deiki di men sengami dinino, sun kan-kan neitamai di mok upu lap perami neng ton tekra peramitopu, sun ukutaru kurumu nesala neitamai peda, mok upu peteremna neng tek sisi tekra kunkamenge. Anengdi, mali kudiserur upu inipra peteremkamsenge. Sundi, “Gume, Yesus Kristusda, tali ngebopu kurure,” pepra, nun Ila Deiyo Ngebo, akeca-keca yuma talepra deiki tara puto weik ngebo, Yesus tep, tapmengedi er tep yanipkamenge. Aupuda, pio mali upu kupmarea peda, aupu tupa penkamenge. Yesusdi, ‘Anesala peda, sun yo punupnedi lyepkamne’ tenen, kunupu dinin, anengdi Yesus tapra, amali upu pepmengopda, aupu pepmenga deiki di, Allahdi sun tep menmena wenepredi poptapkamre. Allahdi sun tep popkamre ngeda, deiyo sun pua.

2 Peter 2

Allahdi mok upu peteremna neng wenepra popkamra tep, pepu upu

1 Allah er upu lap perami nengda, tali nengdi, “Aupu sekso,” peramya deiki di men sengami dinino, sun kan-kan neitamai di mok upu lap perami neng ton tekra peramitopu, sun ukutaru kurumu nesala neitamai peda, mok upu peteremna neng tek sisi tekra kunkamenge. Anengdi, mali kudiserur upu inipra peteremkamsenge. Sundi, “Gume, Yesus Kristusda, tali ngebopu kurure,” pepra, nun Ila Deiyo Ngebo, akeca-keca yuma talepra deiki tara puto weik ngebo, Yesus tep, tapmengedi er tep yanipkamenge. Aupuda, pio mali upu kupmarea peda, aupu tupa penkamenge. Yesusdi, ‘Anesala peda, sun yo punupnedi lyepkamne’ tenen, kunupu dinin, anengdi Yesus tapra, amali upu pepmengopda, aupu pepmenga deiki di, Allahdi sun tep menmena wenepredi poptapkamre. Allahdi sun tep popkamre ngeda, deiyo sun pua.

2 Tonda, Allah teka tenena neng, sun kan-kan dinin, ton nengda, amok upu peteremna neng, pio mali-mali kuramenge keca, yuk neng epmengedi, ‘E, sundi kurameng topu, nun peda angepu kupkupe,’ tenepra, pio mali kunkamenge. Mali-mali kupmengopda, yuk nesala ton epmengedi, Yesus er tek sisi bisi tep upenkamenge. “Gume. Anengda, mali-mali kununga tep, sundi Yesus tep penge upuda, tali upu pua,” pepmengedi, mali upu pepra, teka tenena nesala yuma, nun nong deiki ikin keca dopra deipsengedi, malye upu weik penkamsenge.

3 Amok upu peteremna nengdi, ‘Akeca-keca yuma weik ton cap doproptepe’ tenen, bung keca ila putare nesala kununga cadi, sun pe kange di tenenge keca tali upupu peteremsenga deiki di, ‘Nun upu gekesenung neng, sun bung keca weik doronkamep’ tenen, mok upu peptapra, sun keca upula doronkamsenge. Pumun taruda, Allahdi, ‘Amok peteremna nengda, wenepnedi poptapkamne,’ tenemudi konum ketenemamnga cadi, angeda kaukepredi men yapronkamre. Tek sisi amenda taru, er tenemu taru konum yaryopda, anesala wenepredi poptapkamre ja.

4 “Allahdi ange men yapronkamre,” pepmasenada, mesum tep men pepsene. Aupu moupra gekepso. Allah er im deiki pel don neng, malaikat kurami dinin, mali-mali kupinge peda, men kaukepu. Amali kupi malaikat yuma ateng kouprapudi, uku jen ban neitamai dinin, pio kunungnaipu dongopu. Dongopkada, ‘Sunda akunungnai pumbonpu dakuramengepane, sirya gawal dangne taruda, nedi sun yuma tep, wenepra poptapkamne’ tenen, dongopu. 5 Tonda, menop taru kurami nesala, pio mali-mali kupra kuramidi, Allah tep tamamipanen, Allahdi peipupa, ila mo pio cemamupane, amutu-mutu yumada, ila mokon welepudi jepropu. Jepropupa, sun mali-mali kurami nesala yuma depi dinin, Allahdi ban bari nesalapu lyepropu. Erdi lyepu nesala kan-kan di, tenpu telep ngebo, pio dumsisi kun keca lap pepra peteremamu ngebo, er sida Nuh lyepropupa, gam tupa kuramu. Dinino, sun mali weik kurami nesala yumada popra sikke buktapu.

6 Tonda, menop taru, tenpu mutu nesaladi, sun ila ati arum butene domidi, si siperami mutu, Sodom mutu cap, Gomora mutu cap akwamu. Amutu butene neitamai kurami nesalada, pio mali weik kuramya cadi, Allahdi peipupa, im deiki di uku sakudi, amutu yuma jepropupa, sikkepu buku. Amutu yuma yawa poptapra popka deiyoda, ada sun wenemna cap, tonda yuk neng peten kemdina cap tep popra gawal daku.

Ada, Allahdi, ‘Sodom mutu nesala cap, Gomora mutu nesala cap wenepra popnyopda, adeiki di, sunda peten kemdin keca utopu keipne pangeda, yuk mutu mali kun nesala kael kepkameng’ tenen, Allahdi aneng popke. Tonda, Allah teka men tenengedi, pio mali kunge nesalada, ange tenepmengedi, kael kepkamenge, tenepu. Ada, tuai mutu kunge nesala yumada, ‘Allahdi mali kun nesalada, tek sisi wenepra poptapkamre, tenepra kael kepkameng’ tenen, pumun taru kurami nesala popke.

7 – 8 Tonda, Sodom mutu cap, Gomora mutu cap, kurami nesala yuma poptapu dinin, amutu neitamaida, tenpu dumsisi kuramu ngebo, er sida Lot, lyepra dopropu. Lotda, dipru dumsisi ngebo kuramnga cadi, apio mali nesala kan-kan kuramupane, tumi-tumi yuma, sundi Allah er upu yaniptapidi, pio mali kurami keca diramudi, sun mali perami upu gekeramnga tep, er kange mun kange doupra kuramu. Ada anesaladi telep kun keca yuma yaniptapra, pio mali-mali kuramia tep, Lotda kange mun kange doupra, dipru neitam engenapu kuramupa, Allahdi Lot lyepu.

9 Uda, arup apepmasen keca yumada, Allah ange yuma kupka deiki di, butene keca katuai kupmaserpa, teka tenepra kaele keptume. Tenpu ngeda ake. Dumsisi kun neng kange mun keca cap, dipru kurpeten keca cap, kupsere taru neitamai, ikin kange doupmengopda, Allahdi anesala, sun lyemna tep ngeda men lumdongorure, angeda er kaele. Butene ngeda, er tep teka men tenengedi, pio mali-mali weik kunge nesalada, Allahdi sun tep, ataru neitamai peda yambula di wenemrur dinin, sirya gawal dangne taru, mali kunge nesala bokra poptapkamre taru tep nengeda, ‘Sirya taru di pio yawa poptapkamne’ tupa tenerure. Ange peda, pio men lumdongorure. Dinin, ukutaruda, keana taru tep, aneng sun ila wenemna keca mawa derinada, er kaele.

10 Nimidi sun mambul keca dopra mawa deriramengtopu, Allahdi, pio ila wenemna kecada, keana taru tep, mawa derirur dinin, ‘Amenda pio poptapkamne’ tenen, pio ila di mali tenenung nesala tep ngeda, pepkusene. Ada, sun nong putare keca, malingepu tenepra, dipru neitamai cap, nong deiki cap, pio mali kun kecapu kununge. Ukupra kungedi, sun deiki tara kunga deiyo nengdi penge upu yuma tep, ‘Sundi pesenge upu, nun songe,’ tenepra yanitamnunge. Anesalada, pio balila deipra, sun kange dipru ila di eremdanunga cadi, sun kwar-kwar kuna gum di, Allah er im deiki pel donge neng, malaikat cap, uda yuk nimi deiyo neng utopu, im deiki kunge nesala cap tep, tali lupra sun nong deiki mali upu pepra derinunge.

11 Amok upu peteremna nengdi ila mambul kun keca yuma tep, tali lupra mali upu pepra derinung dinin, im deiki pel don neng malaikatda, ange utopu men kununge. Sunda, puto pio weik kunung dinino, Allah er damai kungedi, “Amali kun nesalada, sun mali kuramenge kecada ake-ake,” pepra, lap penge taru di, sun malaikatdi amali kun nesala tep, tali lupra mali upu sun nong deiki men derinunge. Sun malaikatda, ange men kunung dinin, sun tuai mutu pio mali kunge nesaladi, yuk mambul neng tep, tali lupra mali upu penunga cadi, sunda pio yuke.

12 Uda, sunda, tali tuai gam kure keca yumada, kange douna gum di, tali lupra kuramenga utopu, amok upu peteremna neng peda, ange utopu ukununge. Sunda, mambul keca dinin, moupra men tenengedi, pio men kael keaminge keca tep, “Akecada tali keca pua,” pepra, mali upupu derinunge. Ukununga tep nengeda, nimidi tali tuai gam kure keca, tomopmengedi, kange douna gum keca tali lupra popra jeramengtopu, Allahdi amok upu peteremna nesala yuma tep, bicau tenena gum di, aneng tep tali lupra poptapredi, gawal dakamre. Anesalada, Allah yaniptapra, pio mali-mali kununga tep nengeda, Allahdi sun tep popra, sikki buktapkamre ja.

13 Sundi yuk neng tep mali kudiraminge kunumna tep nengeda, Allahdi aneng tep, kwang dakredi, ila di wenepra poptapkamre. Sun anengda, sun kange derinung kecada, pepkusene. Ada sundi, ‘Nun putaserepa mali kunkamep kecada, keteng komuni neitamai peda, inimna gum di, tali lupra kuna telepe pua,’ tenepra kununge. Tonda, ukupmantoda, lek kurun opkal akapmar dinin, mali keca bapredi dereng kuramretopu, sun mok upu peteremna nesaladi, mali kudisenunge. Ada, sun cap kalemna keca kikiman jerumu taruda, amali neng sun nong putare keca, mali kun kecapu tenepmengedi, pingping kange deipmengedi, tali kununge. Dinino, sundi mali kungepa, sun teka tenerum nengdi kikiman kalepra jerum ngeda, anengdi mali kudisenunga tep pepsene.

14 Sun mok upu peteremna nengdi, yuk neng nerapu epmengedi, ‘Uo, anerapuda, dalupra nyaktepe’ tenen, putarepa pio tenenapu kununge. Mali kuna pio tupa-tupa kungedi, sun kange tenimtonapu tupa kunge nesalada, ‘Nun tara keprosetenge’ tenen, sun penge upu deiki di, benbenepra kepmengedi, yuk neng sun dipru gidonunge. Amok upu penge nengda, ‘Yuk nesala sun keca weika di dalupra doproptepe’ tenena kecada, ila di kael keami. Aneng utopu kunge nesala yumada, Allahdi tek sisi wenepra poptapkamre.

15 Anesalada, dumsisi kun bisi tapra, yuk mali-mali kun bisi konum embanunge. Ukunungada, menop taru kuramu ngebo, er si Beor, er mi Bileamdi, ^{▼▼Bileam – Bileam cap, er nai Bero cap, kael kemna tep Bilangan pasal 22-24 dinkurume.} mali kuramutopu kununge. Bileamdi, ‘Mali pel dopnepa, co bo weik karepnetenge’ tenen, putapupa mali pel doputopu kununge. 16 Bileamda, ‘Co bo weik karepnetenge’ tenen, putapu dinino, mok upu peptapra, mali pel dopka tep, Allahdi Bileam wenepra upu seku. Allahdi Bileam tep wenepu ngeda, pepkusene. Ada, tali keledai bisamda, nimi upu men pepmanto keca dinin, Allah er puto karepupa, akeledai bisamdi nabi Bileam mali kupunge tep, nimi upu deiki di wenepudi, upu seku. Ada, Allah meliamua deiki di, akeledai bisamdi nimi upu peramenga utopu upu deiki di pepupa, nabi Bileam tep wenepupa, Bileamdi, ‘Ukupkamane,’ tenepu ngeda, tapu.

17 Uda, amok upu peteremna neng tep, ukupmanto upu ton pepkusene. Ada, me bungna akwamnga tep, ‘Jepkup’ tenen, nimidi dirbengepa, me cedoramrepa, me gwepra men jepmanto kununga utopu, amok upu penge neng ton ukununge. Tonda, mo cepkura tep, doua deiprepa, ‘Mo yankure,’ tenepmepepanen, kumanya puto di pu pepra bendoprepa, dou maramrepa mo men cemrurtopu, sun mok upu penge nengda, ange utopu kununge. Amok upu penge nengdi, tali upu peptapmengepane, sun penge keca yumada, nong pio men kurur keca tep, arup pepmasen keca utopu kununge. Ukununga cadi, Allahdi ‘Amali neng wenepra, malyai dongopkamne’ tenen, pio kunungnai konum keteneipu.

18 Allahdi aneng dopra, pio kunungnai dongopkamrada, mesum tep gume. Ada, amok upu pen nesaladi, “Nunda ila mambul keca kupkamepe,” pepra, pio tali-tali upu, nong men kupkamre upu pertamengedi, sun kange erepra gemenunga tepa.

Tonda, tali tuai nesala yumada, dipru neitamai mali keca kapseua cadi, yuk nesala mali kun keca putarepa, tenenge keca tep nengeda, amok nengdi, upenunge. “Gume. Ukunada, telepe pua,” penunge. Upepmenga deiki di, yuk neng sun dipru gidonunge. Sundi dipru gidonung nesalada, ukupu gonga kepra, teka tenepmang dinin, sun teka tenena cap, dipru cap kapul men wisipu neng tep pepne. Anengdi, sun mali neng kuramenge keca tapra, ‘Dumsisipu kunkamepe’ tenen, ukupu gonga kepmang dinin, dipru wisina gum nesala tep pepne.

19 Sun mok upu peteremna nengdi, sun upu gekenung nesala tep upenunge. “Gume, yuk peteremna nengdi nun yuma tep, ‘Ukuna gume,’ penge upuda, tenena gum di, tali kange doupra, nun tenepe kecapu, tali lupra kunkamepe. Yuk neng yumadi nun upu men seksetenge,” penunge. “Nun kange dipapu tenenup keca yumada, tali lupra kunkamepe,” penung dinino, tek sisi ngeda, pepkusene. Ada ware keca do yuma, nun kange dipru bisipseredi, nun kange dipru talesere keca yala-yala yumada, nun deiyo ngebo utopu kuserure. Ange tep nengeda, amok upu pennge neng peda utopu, pio mali kun keca di, sun kange dipru konum bisipka cadi, sun kange dipru mali keca dipu konum talerure.

20 Sun mok upu pen nengda, nun Deiyo Ngebo Yesus Kristus, nun Lyemna Ngebo kael kepya deiki di, teka tenena gum nesala mali kunge keca tamami dinino, kange di ton cap akecapu talepra kunmangepane, akeca di sun kange dipru kange di ton cap koupdongopredi, bisiprepa pio mali-mali kunge. Uda, teka kapul men tenepi taruda, yambul mali kurami dinino, ukutaruda pio ila mali-mali kununge. 21 Sun mok upu peteremna nengdi, dumsisi kun keca yuma men kael keamtenge teptoda, “Sundi mali kunungada, yambul malipu,” peptepe dinin, Allahdi, “Ukunkamrume, angeda pio men kunkamrume,” peipupa, yuk nengdi sun tep peteremamipa, dumsisi kun keca konum kael keami dinin, kange di ton cap sun konum gekerami keca yuma yanitamnunga cadi, ukutaruda pio mali weik kununge. Menop taruda, yambul mali kurami dinin, ukutaruda, ila mali-mali weik kununge.

22 Ange tep nengeda, nun domon upu deiki penup upu kuretopu, sun anesalada tek sisi kununge. Adomon upuda ake.
Kamdi dukna duktapra, yukai benapre dinin, kange di tamupra yaredi, er duktapmare duknapu, kange di jerure.
Tonda, bisam perye dapra me bengakre dinin, kange di tamupra perye daryakaramretopu kununge.
Ange utopu, anengdi sun mali kun keca tamami dinin, kange di ton cap akecapu talepra kununga tep pepsene.