2Pe 3 | XteSC | STEP | Ne kayapu, bicau tenesenedi, sun tep ne kange derinerure. Pumun di tenpu surat ton seksisi dinin, ukutaruda, asurat butene ngeda seksene. Abutene sekeipsen suratda, asurat perumnya deiki di, dumsisi kael keamrum kecada, ‘Kange di ton cap, tupa moupra tenenkamrum’ tenen, asurat sekeipsene.

2 Peter 3

Yesus tamupra yankamre taru tep, pepu upu

1 Ne kayapu, bicau tenesenedi, sun tep ne kange derinerure. Pumun di tenpu surat ton seksisi dinin, ukutaruda, asurat butene ngeda seksene. Abutene sekeipsen suratda, asurat perumnya deiki di, dumsisi kael keamrum kecada, ‘Kange di ton cap, tupa moupra tenenkamrum’ tenen, asurat sekeipsene. 2 Ada, Allah er upu lap perami neng, sun nabi neng dumsisipu kuramidi, lap perami upu cap, uda, nun Deiyo Ngebo Yesus Kristus, nun Lyemna Deiyo Ngebodi peiamupa, ‘Ne upu dopra peterep embenkameng’ tenen, Rasul neng wepra deipseu nengdi peteremamsei upu cap, ‘Ayumada kange di ton cap moupra tenenkamrum’ tenen, asurat sekeipsene.

3 Uda, menmenada, ila mambul tenenkamrum upuda ake. Ada, sirya taru, Yesus tamupra yankamre taru damai konum kupyopda, Yesus er upu tep, nyek-nyek pepra nalemsenge neng yakankamenge. Nyek-nyek pesengedi, sun mali putare kecapu tenepra, tali lupra pio mali-mali weik kunkamenge. 4 Sundi nyek-nyek penkamseng upuda ake. Sundi, “Gume, Yesusdi, ‘Tuai mutu tamupra yankamne,’ pediramu upu dano? ‘Yankamne,’ pediramu dinino, kapul men yanmare. Nun nai yapu deami taru di dipra, dipdongopra daneitam taru yuma cap, ukutaru peda, akeca-keca yumada, menop di kuramutopu tupa kupbarure. Akeca-keca yuma ketekeipu taru di dipra, ukutaru peda yuma keca yuma utotopu kurure,” penkamenge.

5 Upepra nyek-nyek penkamsenge. ‘Aupuda, mok upu’ tenen, konum kael kemnung dinino, sundi, ‘Ange men tenipkupe’ tenen, tali lumdongonunge.

Sundi, ‘Aupuda men tenipkup’ tenen, lumdongonung kecada pepkusene. Ada, Allahdi, “Ukupkamre,” pepra, er upu peipka deiki di, im cap, im neitam kure keca yuma cap, ketekepra deipu. Tonda, tuai mutu cap, tuai mutu neitamai kure keca yuma capda, me dopra dopudi, mokon neitamai dadi, “Akeca-keca yuma dayo,” pepupa, ketekepra deipu. 6 Tonda, ange utopu, nimi pio mali weik kuramya tep, amendada Allahdi peipupa, mo ila di pio cemamupane, mokon ila di deipka deiki di, menop taru kuramu keca yuma cap, kurami nesala yuma capda, mokon di jepropupa gum kupu.

7 Allahdi aupu peipupa akeca kuputopu, Allah er upu pepka deiki di, ukutaru kure im cap, tuai cap, uda im cap, tuai cap neitamai kure keca yumada, mawa deipra kalengrura cadi, tupa akurure. Akeca-keca yumada, mawa deipra kalengamrepane, apio dakuramrepane, Allah tenepre taru di, er tep yaniptapra pio mali kun neng tep, upu bokredi wenepra poptaprepa, sun yuma gum kupra deipkamre. Ataru dipapu, ukutaru tuai mutu cap, im neitam kure keca yuma capda, Allah tenepre taru di, er upu peprepa, adipapu ila uku di akeca-keca yuma jepropkamre. Allahdi, ‘Ne tenepsi tarupu, akeca yuma gum kupra deipkamne,’ tenerura cadi, akecada ukutaru tep, tali mawa deipra kalengrure.

8 Ukupkamre dinino, ne kayapu amambul pepkusen upuda, lumdongona pio gume. Ada, Allah er kangeda, ‘Ue tenpu tumida, keteng tamun denge weik seribu (1.000) tahun utopu kurure,’ tenerure. Utopu, ‘Keteng tamun denge weik, 1.000 tahunda, ue tenpu tumi utopu kurure,’ tenerure. 9 Ange tep nengeda, “Yesus tuai mutu tamupra yankamre,” pediramu upu tep nengeda, ‘Allah sika dipu doryankamsere,’ men tenenkamrume. Yuk nengda, ‘Allahdi sika dipu pel dorure,’ tenengetopu men tenenkamrume. Ange gum dinin, Allahdi sun yuma tep, ‘Uo, anesala ban-ban yuma, sun mali kunge keca yuma taptengedi, amnyo karikra dumsisi bisipu bena kutenge teptoda, tenpu ngebo pe men deptue,’ teneserure. Ila di bicau teneserura tep, menmena wenemna gum di yamserure. Nun tep dipru bouna di teneseredi, ‘Amenda taru teka tenepkameng ja,’ tupa teneserura tep, akeca-keca yuma kapul men gum kupra deipu.

10 Ukurur dinino, Allahdi menop taru konum teneamu tumi konum kupyopda, nun mankau kange doupmepepapu, upula don neng inipra, dato-dato di yakaramengtopu, Yesus Kristus tamupra tuai mutu yankamre. Ataruda, Allahdi peiprepa, im neitamai kure keca yumada, adipapu dimpepra gum kuprepa, ila lelim pepkamre. Ukupre pangeda, tuai mutu cap, im cap, akure keca yuma deiyo kecada, uku bo di jeprepa, gawal dakamre. Ukupyopda, Allahdi tuai mutu cap, tuai mutu kure keca cap, nimidi ketkemnung keca yuma capda, gum kupra deipkamre.

11 Nedi aca di pepmasentopu, akeca-keca yumada, Allahdi yawa poptapra gum kupra deipkamre. Ange tep nengeda, sunda ware nesala utopu kupra kunkamrum do? Gume. Yesus tuai tamupra yankamra tep, ‘Allahdi wepra teneamu tumida, dan tumi yankamre do? Erdi yankamrada, ila putaserura cadi, menmena di yatue’ tenen, ketenepra dinapu kunkamrume.

12 Ukupra kunkamrum taru yumada, dumsisipu kunkamrume. Ada Allahdi, ‘Ukunkamenge’ tenen, er upu deiki peseretopu, mali kuna gum di, pio dumsisipu kupra kunkamrume. Tonda, ‘Atumida menmena yatue’ tenen, putaserepa, pio pe deipra, pel palepra donkamrume. Yesus tamupra yaryopda, im cap, im neitamai kure keca yuma cap, ila uku bu jepredi gawal dakamre. Ila uku bu jeredi, bupu weik kupyopda, akurya deiyo keca yumada telepropkamre. Gum kupra deipredi, sikki buktapkamre.

13 Apenmasentopu, ayumada ukupkamre dinino, Allahdi, “Im deiki ukupunge cap, im neitamai ukupunge cap, tuai ukupunge cap ketekeipkamsene,” pepra pedina upu deiki di peamseutopu, nundi, ‘Teka ukupkamser’ tenen, ketenepra dinapu kunupe. Im deiki ukupunge cap, tuai mutu ukupunge cap, ketekeipkamsera neitamaida, mali kuna gum di dumsisi kunge nesalapu, amutu kunkamenge. Yuk-yuk tenepra kunge nesala yumada, pio gume.

Asurat gawal dangna tep, pepu upu

14 Ange tep nengeda, ne kayapu, bicau tenesenune. Sunda ne weitap utopu nesala kurume. Uda, apepmasen keca yumada, ‘Allahdi ukunkamsere’ tenen, kange deiprumudi, ketenepra dinapu kunkuruma cadi, ‘Allah peseretopu, dumsisipu kunkamepe’ tenen, pio pe deipra piripetenkamrume. Ukunkamruma deiyoda ake. Ada, ‘Allahdi nesala yuma tep wenepra bokeipkamser taruda, dipeteseredi, “Anesalada, mali kun keca pio men kununge. Ukupmantoda, pio lek opkal, dereng keca pio men bepmarenge, teleppu kuretopu, sunda dumsisipu kungedi, ne cap dipru dukdongopra telep-telep kupra kikiman kunupe,” pepra deipkamser’ tenen, telep kupra kunkamrume.

15 Tonda, aupuda moupra tenimnapu kunkamrume. Ada, nun du bo Paulusda, Allahdi ila kael kemna deiyo keca karepka deiki di, Paulusdi sekeipseutopu, nun Deiyo Ngebo Yesus berbera wenemna gum di yamsere ada, tali tep gume. Erda, ‘Nesala ban-ban yuma neitamai di, nimi ton cap weik lyeptene’ tenen, putarepa, kaukemseredi, menmena men wenemserure.

16 Paulusdi Yesus tamupra yarepa, kupkamre keca upu tep, ila kael keamudi sekeipseutopu, er yuk surat sekeiamseunge neitamai peda, aupu tep ila kael keamudi sekeiamseue. Uda, nun kaele, asurat sekeipseunge neitamaida, nesala ikine dipapu moupra teneptenge upu kurure. Allah tek sisi men kael kepra walwalpu kungedi, kange dipru bongtonapu kunge nesalada, aikin upu dopra tamupmengedi, mok upu cap tapakropmengopda, mok upupu lap pepra peteremnunge. Ukununga utopu, Allah er upu yuknge peda tamupmengedi, mok upu tapakra pepmengedi peteremnunge. Ukupmenge pangeda, Allahdi anesala yuma wenepra poptapkamre.

17 Ange tep nengeda, ne kayapu bicau tenesenune. Sun mok upu peteremna nesaladi kunge kecada, sun konum kael kepmaruma cadi, ‘Aneng penge upu pio men gekenkamepe’ tenen, kange mouprapmumdi, kalengdankamrume. Allah yaniptapmenge nesala mali kungedi, mok upu peterepsengepa, mankau di lupra teka teneprumpa, ‘Yuk bisi dubesenunga’ tenena atep, sun kange moupso, pepsene. Sun mali kun nesaladi kunge keca cap, penge upu cap deiki di, mok keca mankau di kupra, teka tenepmumpa, yuk bisi dubesengopda, ‘Ukutaru konum teka teneprumdi, pio telep kupra kurum keca yumada taprum,’ tenena tep pepsene. Atep kange mouprumudi kalengdankamrume.

18 Yuk upu teka tenepra men kunkamrum dinino, nun Deiyo Ngeboda, nun Lyemna Ngebo Yesus Kristus kael kepra er cap dipru dukdongopra kurum keca cap, uda Yesus bicau teneseredi er kange dipapu melipra karesere keca cap, ‘Weik kupbankamser’ tenen, pio pe deipra pel donkamrume.

Uda, nun Lyemna Deiyo Ngebo Yesus Kristus tep, nun yumadi er si ila di eremepedi, ‘Erda ila mambul ngebo tenenkamep’ tenen, Allah moronune. Ada ‘Ukutaru pe, amenda doryankamre taru yuma peda, er sipu ila kunkamre’ tenen, Allah moronune.

Telepe, akonuma. Ne Peterusdi pepsene.

Acapu sekra deipsene.