2Sa 1 | XteSC | STEP | Saul konum depu pangeda, Dauddi Amalek mutu neng popbisipudi, tamupra Ziklak mutu damai yana komuni butene mapmau.

2 Samuel 1

Saul depmaupa Daud tep pepi upu

1 Saul konum depu pangeda, Dauddi Amalek mutu neng popbisipudi, tamupra Ziklak mutu damai yana komuni butene mapmau. 2 Komuni butene konum mapu pangeda, ue weneri tumida, Saul er tara ngebo jen ngebo tenpu, kange mun kange doupmaua cadi, er opkal gwelepropudi, er giso deiki buta sikke bapra deipmaudi, Daud damai yaudi gutam tu dipra Daud tep gispal dopu. 3 Ukupu pangeda Dauddi angebo tep asipetepu. “Kanda dan mutu di yarem do?” pepu. Angebodi tamupra pepu. “Neda Israel jen talena neng kan-kan di, bura saknedi yane,” pepu.

4 Upepu pangeda, Dauddi angebo tep asipetepudi pepu. “Ware keca kupupa bura saka yamum do? Ton nukmempa, ne kael kepkune,” pepu. Upepupa, angebodi upepu. “Saul er tara jen neng yuma bura saka bendopmang dinin, amutu kunmai neng, sun popmasei nengdi, ton neng weika di popmangpa, saka depmangue. Angepu gum dinin, Saul cap, er mi Yonatan cap, sun butene ton popmangpa depmarenge,” pepu.

5 Upepu pangeda, Dauddi er damai upu duyanmau ngebo tep, asipetepu. “Kandi ware kuprap kael kepmaremdi, ‘Saul er mi Yonatan cap, popmangpa depmarenge,’ peprem do?” pepu. 6 Aupu duyanmau kaber ngebodi Daud tep pepu. “Ne tek sisi Gilboa mutu deiki kunmanudi dinmanupa, sun Filistin mutu jen nengdi, ‘Saul popkup’ tenen, kereta bisam bali deiki bukra sepdaro yanmangupa, Saulda men sepdara benmanto kupmaudi, er nimi pon maca takke lupunge talepra tekmaupa epmanue.

7 Sun Filistin nengdi, ‘Saul popkup’ tenen, dombaipa baupane, er damai yaipa, Saul tamupra dinmanka, ne epneudi upupneupa, besidi upepsi, ‘Naio ware kupra melipketene do?’ pepsi. 8 Upepsipa erdi tamupra asipneu, ‘Kanda ware mutu ngebo do?’ Pepneu. Upepneupa nedi tamupra upepsi, ‘Neda Amalek mutu ngebo,’ pepsi.

9 Upepsi pangeda, erdi tamupra pepneu, ‘Neda konum popmanengpa depmanto kupmana tep, deptene tenepne. Dinin isin tupa kapmanera cadi, kandi ne damai tekmemdi, popnememdi isin gum kupra deipneo,’ Sauldi upepneu,” pepra akaber ngebodi Daud tep pepu. 10 Upepudi aupu ton tapakra pepu. “Sauldi upepneupa, konum kael kepsi. Sundi Saul konum popmangupa, tuai saku taruda depmanto konum kupmaua tep, ‘Tupa men buktue’ tenen, kael kepsa tep, er damai yasidi popra tapsi. Atep popmandi, sun Raja neng kenengameng keca, er giso deiki deiamu keca er sida mahkota cap, buru deiki deiamu keca er sida gelang capda, akeca dopra ne nai, kan damai duyanmakene,” akaber ngebodi Daud tep upepu.

11 Upepupa gekepu dingeda, Daud cap, er kikiman kunmai neng cap yuma, Saul popmainge tep bicau kupupa, ikin kange doupmaiya tep, sun opkal gweleptapidi engepi. 12 Mali kange doupra engepi dingeda, Saul cap, er mi Yonatan cap, tonda Israel mutu neng dinin, Allah er si Yahweh ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.}, er Isai tara jen neng cap, tonda Israel mutu kurami nesala yuma cap tep, ‘Uo, Filistin nengdi, nun kayapu Israel neng weik, nimi pon keca parang ya di popra gawal dakmangpa, weika di depmangue’ tenen, Daud cap, er nyapu cap, jen jena gum di, engenmaidi dinmaipane atumida keteng daku.

13 Ange konum kupmaipane, Dauddi tamupra aupu duyanmau kaber ngebo tep asipetepu. “Kanda dan mutu ngebo do?” pepu. Akaber ngebodi Daud tep tamupra pepu. “Israel yala nengdi men deipnei dinin, ukutaruda, Israel nesala tara neitamai kunune. Dinino, neda Israel yala sisa ngebo gume. Neda yuk mutu tali-tali kupembanun ngebo, Amalek mutu nengdi deipneipa, Amalek yala ngebo kunune,” pepu. 14 Upepu pangeda, Dauddi akaber ngebo tep pepu, “Kan buru di erepra, Allahdi, ‘Ne mawa nesala Israel neng talenkamre’ tenen, men di weiamu ngebo Saul popra tapmum ngeda, warya tep do? Kanda kwar gum dipapu tali lupra Saul popmum do?” pepu.

15 Upepu dingeda, Daud er nyapu tenpu ngebo tep pepu. “Yamemdi, Amalek mutu kaber ngeboda ya sektapo,” pepupa angebodi ya sekupa depu. 16 Daud er jen talen ngebodi akaber ngebo poptapunge deiyoda, Dauddi Amalek mutu ngebo tep pepu. “Angeda kan pe poamum ngebo yapi di kunupdareme. Ange tep nengeda, kan pe sipyal di peiamume. Ada, ‘Allahdi weiamu ngebo Saul poptapmanue,’ peiamuma deiki, popkukep dinin, tek sisi kan pepu popdareme. Saul popmuma tep, kan pe yapida kan giso deikipu kupkere,” Dauddi pepu.

Saul cap, Yonatan cap, depreipa Dauddi engepudi pepu upu

17 Daud engena deiki di Saul cap, Yonatan cap tep, tenepudi mut penmau. 18 Daud amut penmau taru dingeda, yuk neng yuma tep upepu. “Apepkusen mutda, ne nyapu cap, Yehuda yala neng yuma cap, gekepra kael kepkamenge. Sun deipgerekdani yuma peterepmumpa, gekepmengedi kael kepkamenge,” pepu. Amutda Allah teka tenena neng sun buku neitamai sekeipi. Abuku sida, Yasar buku penunge. Amutu upuda ake.

19 “Uo, Israel mutu neng sun pe ila mambul ngebo cap, sun jen neng cap mutu dupai dabenpoptapipa depudi, tupa akurure. Uo, ila puto weik neng kurami dinin, bicaue. Mar deiyo nengdi yuma popipa depmange,” pepu. 20 “Aupuda, Gad mutu nesala cap, Askelon mutu kunge nesala yuma cap tep, men perbenkamrume. Pepmumpa gekepmengopda, sun kange deipnung tenena tepa. Ada, sun den bam bol men sengmenge neng Filistin neng yuma cap, sun ner nyapu cap, kange deipnung tenena,” pepu.

21 Aupu ton pepu. “Uo, ne kayapu Gilboa mutu dam kumun nesala tep pepkusene. ‘Mo cap, mo puru cap, sun damai pio men sangkamre’ tenen, moropne. Tonda, ‘Mo men saktudi sun wai dam mali kuptupa, tapmumpa tu yuma kalkal pepkamrure. Nimi kipra jerameng keca pio men kupkamre’ tenen, moropne. Ange pepsen upu deiyoda, ‘Sun mutu neitamaida, ila puto ngebo, Saul, er kelapye konum mali kuptapi. Tonda, Saul er kelapye tep, kange di ton cap bisam meta dopra men gisikamenge. Akeca peda konum singipipa sisilya kupu’ tenen, pepsena cadi, tamupra men telep kupra deiptenge.”

22 “Yonatanda kika deipra mar dubeudi, ila puto neng ton poptapu. Ange utopu, Saul er nimi pon keca, parang ya di doupra, nimi kum weika di, sektapupa depi atep, er parang ya peda, mesumpu men dubenmaua cadi tali men doupra yau. Erdi ton nimi popu. Atep, Saul cap, er mi Yonatan capdi, nimi weik poptaprei.” Dauddi upepra mut deiki di pepu.

23 “Saul cap, Yonatan capda, telep neng kuramreidi, nimi tenepmantopu kuramreidi, yuk neng tep meliamreipa, yuk nesala yumadi sun tep bicau tenepra, kange derirami. Kange derirami neng cadi, sun kunai peda tenpuaipu kuramreiyanen, dena peda tenpuaipu deprei. Seng-seng pena mada menmena lakra baramengada yambul dinin, sun abutene nengda, sepdara baramreiyada pio menmena baramarei. Tonda singa pus perameng kecada, er puto yambul dinin, sun abutene nengda, sun putoda pio weike.”

24 “Uo Israel mutu ner nyapu yumada, Saul tep engepkurume. Deiyo ada, Sauldi sun tep kain kamo pio telepnge cap, binge cap kunuprapseudi getedirameng utopu kuamseu. Tonda sun opkal deiki kunumna weik keca, emas gat keca kudirameng utopu kareramseu ngebo, Saul adano. Ukuramu dinin, konum depka tep engenkamrume.” Dauddi upepra mut deiki di pepu.

25 “Uo, sun ila puto neng peda, mar di popipa konum depmange. Podaramya deiki di, mar deiyo neng yuma popra gawal dai. Ukuramya deiki di, sun mutu dup deiki, Yonatan peda popipa depu. 26 Atep, ne kabo Yonatano, kan tep tenemankendi, kange mun kupnere. Kandi ne tep ila di bicau teneramnemum utopu, nedi kan tep, ila di bicau teneramkesi. Ada sun weitap silippu kange deridarameng utopu kupkesi. Nimidi nerapu tep ila di kange derirameng dinin, angeda yambule, neda ila di kange deriramkesi. 27 Uo, sun ila puto neng peda, mar di popipa konum saka depmange. Ataruda nimi podana deiyo nengdi talepmengedi nimi poramenga deiyo keca peda yuma gum kupkure.” Dauddi upepra mut deiki di pepu.