2Sa 10 | XteSC | STEP | Ware kupra taru konum kupu pangeda, Amon mutu neitamai kurami nesala tep, nimi deiyo ngebo kepra, Raja kuramu ngeboda, Nahas depu. Ada, erdi deiamu ngebo depu. Ada erdi deiamu ngebo, Amon nesala kurami tara neitamai talepra kuna tep, aRaja ngebo konum depu pangeda, er mi Hanundi er nai punupra, nimi deiyo ngebo Raja kepu.

2 Samuel 10

Dauddi Amon yala neng, ada sun Siria tara neitamai kurami neng ton, popbisipu upu

1 Ware kupra taru konum kupu pangeda, Amon mutu neitamai kurami nesala tep, nimi deiyo ngebo kepra, Raja kuramu ngeboda, Nahas depu. Ada, erdi deiamu ngebo depu. Ada erdi deiamu ngebo, Amon nesala kurami tara neitamai talepra kuna tep, aRaja ngebo konum depu pangeda, er mi Hanundi er nai punupra, nimi deiyo ngebo Raja kepu. 2 Ukupkopda, Raja Dauddi upepu, “Nahas erda, ne kabo sisa kuramnga cadi, men taruda, nun pio telep kupra kikiman dukdongopra kuramnumu ngebo. Atep, ukutaruda, ne adipapu Nahas er mi Raja Hanunda, ‘Ne kabo sisa,’ tenen, er tep teleppu tenenkamne ja. Er nai cap, ne cap telep kuramnemutopu, ne cap, Hanun cap, pio telep kupra kikiman dukdongopra kunkamnem ja,” pepu. Upepu dingeda, Raja Dauddi nimi ton wepra deipupa, Hanun er nai bo Nahas, Amon mutu taleamnganen, depmaupa peipmai taru, er dipru kwadina tep, melimna neng ton doroipupa, Amon yala nesala kurami mutu neitamai dinin, Raja Hanun damai bei.

3 Dauddi wepra deipmau neng, konum Amon mutu neitamai bei pangeda, amutu neitamai talepra kurami nimi deiyo-deiyo neng yumadi, Raja Hanun tep upepi, “Uo, nun deiyo ngebo Raja Hanun, kanda Raja Daud erdi wepra deipmardi dokotepmaserpa, dipru kwadimna upu yana pepmaseng neng tep nengeda, tali tep men yanmange. Nun deiyo ngebo kandi, ‘E, telepe, ne nai bo Nahas depmara tep, gispal dopra melimyanmaneng ja,’ tenena pio gume. Tek sisi ngeda, Raja Daud er nyapu wepra deipmarpa, nun damai yanmangada, ‘Amon yala nesala sun mutu neitamaida, ware kupra kunung do?’ tenen, miryanmasenge. Ange yuma konum epra kael kepmengedi, nimi deiyo ngebo Raja Daud damai bena lap pepmengepa, kael kepyopda, nun ila ati arum cap, amutu cap yana, poptapsengedi, nun keca yuma dalupra dopropkamsera tep, kamo diryanmasenge,” pepi.

4 Upepipa, nimi deiyo ngebo Raja Hanundi, ‘Teka,’ tenepka tep, Daud wepra deipmaupa, yanmai neng yumada tomopu. Aneng yuma tomoprapudi, ‘Pio ali weik kunkameng’ tenen, sun bana potong dana tara ngeda, toupra tapu. Tonda, sun kenekami opkal der damai di dipra utara yumada, sekra tapu. Ukupka cadi, sun bukke katuaipu kupupa, ali weik kunmai. Ukupu dingeda, aneng yuma tep, “Ukutaruda benkurume,” pepupa, ila di ali kupupa, sun pe mutu tamupra bei.

5 Dinino, sun aneng, tamupra sun pe mutu banada, sun ali weik kupupa bisi banmai taru, nimidi Raja Daud tep, ange yuma lap pepipa, gekepu. Ada, aupu sun deiyo ngebo Raja Daud damai konum bena lap pepmaipa, gekepmau cadi, sun deiyo ngebo Raja Dauddi, sun abisi yakanmai neng tep nengeda, ‘Bisi neitamaipu antapkupe’ tenen, bisi neitamai beudi, sun cap antapdaiopda, “Sunda adipapu nun mutu tamupra yakana gume. Atamna kure ati arum, Yerikho mutu acapu keana tep kuramumpanen, sun bana potongda, tamupra papserepapu tamupra yankamrume,” pepra deipupa gekepidi, Daud peipmautopu kupi.

6 Ange yuma konum kupu pangeda, ataru neitamaipu, sun Amon yala nesaladi Utenepi. ‘Gume, ange kupmapada, Raja Daud epredi, nun tep yu kupkamre. Nun tep yu kuprepa, nun tep tenepseredi, poryankamsere,’ tenepidi, kwar kupu. Utenepya tep nengeda, sun Amon yala neng dipapu, Sirya ^{▼▼Siria – Amutu si tep ngeda ton nengdi, ‘Sirya’ penunge. Ton nengdi, ‘Aram’ penunge. Dinino, sun butene pengedi, buku neitamai ton si butene sengnung dinino, amutu nesalada, tenpu yala nengpu kurami.} mutu cap, tonda Zoba mutu cap, kurami jen talen neng denge pio weik, dua puluh ribu (20.000) neng kunupi. Ada, Bet-Rehob mutu kurami jen neng cap, Zoba mutu neng cap tep, “Sundi nun podan neng mar porbenkamepa tep, yana melipkuserume,” pepra, nimi bul kemne co bo karepipa dopropi. Tonda utopu, Maaka mutu nimi deiyo kepra kuramudi, amutu taleamu ngebo sun Raja tep kunumna keca karepipa, erdi, er mutu kurami jen talena neng, seribu (1.000) neng ton karepu. Tonda, Tob mutu neitamai kurami nesala kankan di, dua belas ribu (12.000) jen neng ton kunupra dopropi.

7 Ukupi pangeda, yuk nengdi yana, Raja Daud tep lap pepipa, aupu konum gekepu dingeda, Raja Dauddi Yoab cap, er jen talena neng yuma cap tep peipupa, sun adipapu ‘Mar porbenkup’ tenen, mar podanai tep kentenepra bei.

8 Ukupi pangeda, sun Amon mutu kurami nesala peda, sun nepra tengna tep, sun ila ati arum doramya damai, amutu deiyoida, Raba mutu ila ati arum doramya bisi buplan wengdongoramya, aca damai bena, nepra tekidi lepsisingmai. Raba mutu jen nengdi ukurami dinin, sun Siria mutu neng cap, Tob mutu neng cap, tonda Maakha mutu neitamai di yai jen neng cap, sun yumada, Raba ila ati arum damai gum dinin, mutu katawai yana, nepra tekidi lepsisingmai. 9 Ukunmaipa, Yoabdi dinmaupa, er urasin damai tara pe, er amnyo tara peda, er podan neng dipapu, yana kalekrapidi, ongopdongopmaipa epu. Epkopda, Yoabdi sun Israel jen talen neng neitamai di, mar podana pio telep kupra kael keami neng ton wepra deipudi, Sirya mutu jen neng, sun urasin deipmaiya damai tarapu, ketenepra tekidi, ‘Ukupkupe-ukupkupe,’ pepra upu talepi.

10 Tonda, Yoabdi Israel yala jen talen neng weik tarada, bokrapudi, ‘Ne weit bodi aneng talepra, Ukupkupe,’ pepra, ‘Upu peipkamre’ tenen, er weit bo Abisai tara ton, jen neng denge weik karepu. Ukupupa, Abisai er gonga kemnada, Amon mutu jen talena neng, sun urasin keipmai tarapu, ketenepra tekidi, ‘Ukupkupe-ukupkupe,’ pepra upu sisingmai. 11 Yoabdi aneng bokra yuk-yuk deipu dingeda, Yoabdi er weit bo Abisai tep upepu, “Ukupmanto, nedi sun Siria mutu jen talen neng tep, men kupmanto kupnedi, puto boun kupnere pangeda, epnemem dingeda, kan adipapu ne tara yana melipkamnerume. Tonda ange utopu, ukupmanto, ne weit bo kan peda, Amon yala jen talen neng bisbisa kamna tep, men kupmanto kupmemdi, puto boun kupkere pangeda, ne epkenedi, kan damai yana melipkamakene,” pepu.

12 Ukupkamnem taruda, kan cap ne cap kange moupra puto kepnemedi, kware tenena gum dipapu, dim pepra kunkamaneme. Nun yala nesala yuma cap, tonda nun nai bo Allah er mawa tep kareamseu ati arum cap, amutu tu cap yumada, ‘Gum kupserur’ tenena tep, balila deipra puto di kunkamape. Tonda, nun nai Allah Yahweh tep moronkamaneme. Ada, Allahdi, ‘Angeda kupkamne’ tenen, ne mawa nengdi ‘Ukupkamenge,’ teneretopu, angepu kupkamser ja’ tenen, Allah tep moronkamnume.” Yoabdi Abisha tep pepu.

13 Upepuopda, Yoab cap, er jen talen neng cap, sundi, Siria mutu jen talen neng, sun kun damai bena, warekra podanapu kunmai. Ukupipa, sun Siria mutu jen talen neng yumada, ‘Uo sundi nun popsengedi gawal dakamseng’ tenen, kware weik kupupa, bura saka sepra yukai bendopi. 14 Atarupu, sun Amon mutu jen talena neng peda, ange dinmaipa, Siria mutu jen talena nengda, bura saka sepra banmaiya epi. Epyopda, sun Amon mutu jen neng peda, ‘Uo, Abisai cap, er jen neng capdi, nun popsengedi gawal dakuseng’ tenen, er damai di bura saka sepdaro bendopi. Ada, tamupra sun ila ati arum dorami mutu neitamai dipapu tamupra bei. Uda, ange yuma konum kupkopda, Yoab cap, Abisha capdi, sun Siria mutu neng cap, Amon mutu jen neng cap bena popyopda, Yoab erda, amutu taprapudi, kange di tamupra Yerusalem mutupu beu.

15 Dinino, sun Siria mutu nengda, Israel yala nesaladi poptapi ngeda, konum moupra kael kepi. Atep nengeda, Siria mutu kurami jen neng yuma tep, “Anengo, sun yuma tamupra bulupkurume,” pepra kongpepi. 16 Tonda, nimi deiyo ngebo Raja Hadadezerdi, nimi ton wepra deipudi, “Siria mutu dinin, keteng yakan tara, ila di embaramu me, Efrat me dam tara orkurami neng tep, ‘Sunda ne damai yankurume,’ pepra, mororbenkurume,” pepu. Ukupra, upu peipupa, aupu lap perbana neng gekepidi, lap perbeipa, ortara nengdi gekepi. Gekepi dingeda, Raja Hadadezer er jen talena neng, sun ila deiyo ngebo, er si Sobak, ada Zoba mutu kuramu ngebo, erdi gonga kepupa, sun ortara jen talena neng yuma Helam mutupu tamupra yai.

17 Ataru peda, nimi ton ange epidi, lap perbeipa, nimi deiyo ngebo Raja Dauddi, aupu konum gekepu. Gekepu dingeda, er jen talena neng, Israel mutu neitamai kurami neng yuma tep, ‘Ukutaru bulupkurume,’ pepra deipupa, sun adipapu er damai yaidi, sun yuma Yordan me goupra, ortara benmaiyanen, Helam mutu bei. Abei mutuda, sun Siria mutu jen neng peda, amutupu bulupra yai dingeda, ‘Raja Daud er jen neng cap popdankamap’ tenen, sun nepra ketenepra tekmaidi ketenemaidi, sun yuma aneng cap, Daud tara neng capdi, podanapu kunmai.

18 Podanmaiyanen, Daud er tara jen nengdi, puto weika di sun Siria tara neng tep popmai pangeda, sun Siria yala nesala cap, sun jen talena neng capdi, ‘Uo popbisipsengedi, gawal dakusenge’ tenen, kware kupupa, bura saka yukai sepdara bendopi. Daud er jen nengdi, sun Siria tara neng dombeidi, bena popbisipidi, Daud cap, er jen neng cap sundi, Siria mutu jen talena neng weika di popi. Ada, sun jen neng dinin, kuda bisam dopra, tapu gerekdongopra gipropnepa, tu deiki emban keca, er si kereta perang, ^{▼▼kereta perang – Akeca gambar dina tep, Yosua 11:4 dinkurume.} akeca deiki tekra mar porban nengda, tujuh ratus (700) neng popi. Tonda, sun kuda bali deiki bukra emban jen neng ton empat puluh ribu (40.000) neng popi. Aponmayai dipapu, sun jen talena ila deiyo ngebo, er si Sobak peda, mare di yarepra popipa, meneng podanmaiyai dipapu depu.

19 Uda, ange yuma konum kupupa, atara nengdi dirami pangeda, ataruda Raja Hadadezerdi, kunumna keca kareamupa, sun dana-dana tara ila nimi deiyo neng kepra taleami dinin, Hadadezer er amutara keproidi, er melimna tep mar poryanmai nimi deiyo neng yumada, ‘Uo, Israel yala nesala sun jen neng dipapu, nunda konum popbisipmasenge’ tenen, epidi kael kepi.

Atep nengeda, sun adeiyo-deiyo neng yuma yaidi, Israel yala nesala tep, pepi. “Gume, sun dipapu konum bisbisa kapmaseruma cadi, sundipu talepsemumpa, nun cap, sun cap antapra, kange deipra teleppu kikiman kunkamepe. Nunda, sun amutara kupedi, sun pel melimna nengpu kunkamepe,” pepra, yana moropidi, pedina upu deiki di peipi. Upepya tep, sun Siria mutu neitamai kurami nesala yumada, Israel nesala dipapu talepi. Talepya tep nengeda, Siria mutu kurami jen talena nengdi, kware kupupa, sun Amon mutu nesaladi, ‘Israel tara neng mar porbana tep, sun ton yana melipseso,’ pepra, mororamya peda, men gekepidi, sun Amon yala neng tep, ton cap men melimami.