2Sa 11 | XteSC | STEP | Keteng tamun ukupunge kepupa, wa perami warda, amutu-amutu yuma talepra kurami Raja neng cap, sun nyapu jen talen neng cap yuma buluprap, sun podan neng tep, porbarami dinin, ataruda Raja Daud er jen neng cap men porbeu. Raja Dauddi er jen talena deiyo ngebo Yoab tep pepu. “Ne amutara kungedi ne melimna neng cap, kan kayapu Israel jen neng yuma cap, sun damai bememdi pepmempa, Amon yala neng yuma porbenkamrume,” peipu. Upeipupa, porbeidi, Amon yala neng popra gawal daki dingeda, Raba mutu ati arum domi ngeda, bena warekra ongopgenepi. Ada, ‘Amutu neng yukai pio men betenge’ tenena tep kupi. Ukupi dinino, Daudpuda, sun cap kikiman men beu. Erda Yerusalem mutupu tali kunmau.

2 Samuel 11

Daud cap, tenpu ner er si Batsyeba cap tep upu

1 Keteng tamun ukupunge kepupa, wa perami warda, amutu-amutu yuma talepra kurami Raja neng cap, sun nyapu jen talen neng cap yuma buluprap, sun podan neng tep, porbarami dinin, ataruda Raja Daud er jen neng cap men porbeu. Raja Dauddi er jen talena deiyo ngebo Yoab tep pepu. “Ne amutara kungedi ne melimna neng cap, kan kayapu Israel jen neng yuma cap, sun damai bememdi pepmempa, Amon yala neng yuma porbenkamrume,” peipu. Upeipupa, porbeidi, Amon yala neng popra gawal daki dingeda, Raba mutu ati arum domi ngeda, bena warekra ongopgenepi. Ada, ‘Amutu neng yukai pio men betenge’ tenena tep kupi. Ukupi dinino, Daudpuda, sun cap kikiman men beu. Erda Yerusalem mutupu tali kunmau.

2 Er jen talen neng yukai tupa podanmai taruda, ue tenpu taru, Daud mapmaua bukrou dingeda, sintara ketengda er ati deikida, gat keca di banai kupra dominge deiki di embaudi dinmaupa, pio kamo telep ner tenpu, me gangmaupa epu. 3 Epu dingeda, aner tep kange deipka cadi, nimi yuk ngebo tep upepu. “Aner damai bememdi asipetepo,” pepu. Upepupa, angebodi tamupra pepu. “Gume anerda, er si Batsyeba. Ada, Eliam er ner mi, tonda tenpu ngebo er si Uria, er ner kurure. Uriada Het yala ngebo kurure,” pepu.

4 Upepupa Daud gekepudi, konum kael kepu dinino, Dauddi nimi yuk neng damai tep upu pepra deipudi, “Anerda, ne damai duyankunerume,” pepupa, doupra er damai duyai. Konum yau pangeda, atumi lukunda Daud cap mapmareia, bereku pangeda, Batsyeba tamupra er pe ati beu. (Uda, sun kapul mapmarei taruda, Batsyeba er yapi kupu ngeda, me gekupa konum telep kupu).

5 Sun butene mapmarei. Aner ka tamupra er pe ati beu dingeda, dabena kunmauanen, amenda warda aner konum mumun doupu dingeda, yuk neng damai pepra deipudi, “Ne konum mumun doupne. Atep, Daud damai perbenkurume,” pepupa, perbei. 6 Daud konum gekepu dingeda, er pel don neng tep, “Ne jen talena deiyo ngebo Yoab damai bena pepmumpa, erdi Uria peiprepa, Uria ne damai yankamare,” pepra deipu. Anengdi, Yoab damai bena pepipa, Yoabdi Uria tep, “Daud damai berume,” pepupa, Uriadi Daud damai beu.

7 Uria konum yau pangeda, Dauddi Uria tep asipetepu. “Yoabda telep kunmar do? Tonda, er nyapu sun jen nengda, telep kunung do? Sun yumada ware kupra yuk mutu neng tep, mar podanung do? Bisbisa kapmang do, gum do?” pepra asipetepu. 8 Upepu dingeda, Dauddi, ‘Uriada, er ati tamupra beryopda, er ner cap kikiman mapretenge’ tenen, Uria tep pepu. “Tamupra kan ati bememdi, yan me kupmemnyopda kan ati kunkurume,” pepu. Upepupa, Uriadi, Raja Daud er ila deiyo ngebo ati tapra bau taruda, Dauddi maton dan keca karepupa, er nyapudi doupra, Uria damai melipra dubei.

9 Dinino, Uriada, ‘Gume, ne kayapu yuma, yuk mutu kunmangadi, nun podan neng podanapu kunmanga tep, ne ati tali kuna tep men benkune,’ tenepu. Utenepka cadi, Daud er ila ati buplan dam acapu, Daud er ati pel don neng cap mapmaiya cadi, Uria cap aneng cap kikiman mapmai. Acapu mapmaiya tep, Uria er pe ati tamupra men beu.

10 Ukupra mapmaua, bereku taruda Daud er nyapudi, “Uriada er pe ati tamupra men benmaue,” pepi. Upepipa, ange gekepudi, Dauddi Uria tep asipetepu. “Kanda karen mutu di yanmarem do? Atep, warya tep kan ati tamupra men benmarem do?” 11 Upepupa, Uriadi Daud tep pepu. “Gume naio, Allahdi peiamu upu kipi co bekin, er sida Peti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Tonda, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu dopra, apeti pumbon dongopi. Tonda, akeca tep, ‘Pedina Upu Kin Bekin’ peptepe. Peti Perjanjian kael kemna tep, Keluaran 25:11 dinkurume.} cap, Israel nesala sun jen neng cap, tonda Yehuda yala nesala capda, yuk mutu nesala porbeia tep, bura tara tali keana dodina ati pum kunmange. Utopu tonda, nun jen talena deiyo ngebo Yoab cap, naio kan nyapu yuk jen talen neng cap, bura tara tali dodin tenda ati deipra manunge.

Atep nengeda, neda ware kupkutenga keca deiyo tep, tamupra ne telep ati betenedi, me cap, jen keca cap, jeptene do? Tonda ne ner cap kikiman mapteneme do? Ange kupnyopda, pio mali keca kuptene. Atep naio, ‘Angeda pio men kuptene,’ tenepmanua cadi, kan ati dampu mapmanue. Tonda, tek sisi pepkene. Kan tupa gam kumem taruda, ange utopu men kuptene,” Uriadi pepu.

12 Upepupa, Dauddi tamupra, Uria tep pepu. “Jen neng podana mutu kapul men benkureme. Tumida amapmamemnya di, ambutumipu nedi pepkenepa, amutu tapra nimi podanaipu tamupra benkamareme,” pepu. Upepupa, Uria Yerusalem mutupu mapmaua cadi, tenpu tumi ton amutupu mapmau. Dauddi pepmautopu kupu. 13 Ukupu taruda, Dauddi Uria tep, “Nati yankurume,” pepra upupupa, yau pangeda, sun tonpa jene jenmareiya, konum jeproprei dingeda, Dauddi Uria tep, kange yawaramna me weika di karepupa, jepudi Uria er kange yawarapu. Ukupu dinin, ataru peda, Uria er pe ati bana gum di, Daud er ati pel don neng cap, mapmai.

14 Mapmaiya berekupa, Dauddi Yoab tep surat sekrapudi, Uria karepudi upepu. “Asuratda, Yoab karepkurume,” pepupa, dubeu. 15 Asuratda, pona tep sengna sekra karepupa, Uriadi Yoab damai dubeu. Asurat neitamai seku ngeda, Raja Dauddi Yoab tep upepu. “Sun podana tep benkurum taruda, Uria mepra deipmempa, weika di podankamengai baryopda, er atapra sun mepra yukai bendopkamrume. Bemumpa, Uria er yuk kuprepa, yuk mutu podan nengdi Uria tep, tali lupra popkamenge,” pepu. Ada Raja Dauddi, ‘Uria poptapkameng’ tenen, aupu pepra sekmau.

16 Uda, Dauddi upepra sekua cadi, Yoabdi Raba mutu bena wareku taruda, ‘Ne podan neng ila puto neng weike kunmangaida, Uria berepa tali lupra popkunge’ tenen, dokotepupa, beu. 17 Beu pangeda, Raba mutu nengdi jen dopra yaipa, Yoab cap, er nyapu cap podanmaiya, Daud er jen talen neng ton yambula di popi. Tonda, Het yala ngebo Uria peda, Raba mutu nengdi popipa depu. 18 Konum podanmaiya seng pepi dingeda, Yoabdi, ‘Nun podanmapnge yumada, Raja Daud gekepkur’ tenen, Daud damai bana tep nimi doproipudi upu peipu.

19 “Nun podanmapai di kupmapunge tep, Raja Daud damai lap perbenkurume. 20 Ne tenepmanada, kandi akeca konum lap pepmempa, Daud gekepkeredi, yu kupkamare, tenepne. Yu kupre dingeda, asipetepkamaker ngeda ake. ‘Ware deiyo tep, Raba mutu ati domyai meneng damai benmarum do? Sun ati dana-dana ila gel beilya wipra wiaminge deiki di, mar peprapmengedi, dopra men popsetenge’ tenen, walwal di benmarum do?”

21 “Tonda, menop taru kupi ngeda, men gekeprum do? Konum luproprum do? Ada, Yerub-Beset er mi Abimelek popu ngeda, tupa men tenipmarum do? Ataruda, nimi deiyo ngebo Abimelek, akati sida Tebes mutu, amutu wiami gel beilya damai beupa, tenpu nerdi abeilya deiki ila gel dokotepupa, Abimelek popu. Ada sun gandum taingne gel dopra dokotepupa, Abimelek nong deiki saka poptapupa, Tebes mutu depu.

Atep, sunda ware keca deiyo tep, Raba mutu lyom gel beilya wiamya damai benmarum do? Sunda walwal di benmarum do,” pepra asipetepkamakere. “Asipkere pangeda, upepkamarume. ‘Kan amutara melimna ngebo Uria, Het yala ngebo ton, konum popmangpa, depmare,’ pepkamarume.” Yoabdi aupu yuma pepra deipupa, er aupu kai perbenkou ngebo gekepu.

22 Upepra deipu pangeda, Yoab er melimna ngebo tenpu adipapu aupu yuma doupra, Daud damai perbeu. Ada, Yoabdi peipmemeutopu lap pena pepu. 23 Aupu kai perbenmau ngebodi Daud damai bena pepu. “Amutu nengda puto weik neng cadi, puto di popmasengpa, sun ati tapra bura tara katuai mutu di yana dombenmasengpane, kange di tamupra puto dipu popmappane, sun pe ati damai sepdara banmai. Banmaipa nundi domyapudi, sun pe ati bisi buplan damaipu yantapmape. Ada gel beilya ongopgenepra wiamya damai yanmapu.

24 Sun ati dam dinin, gel beilya damai kunmapu taruda, Raba mutu mar podan nengdi, lyom beilya alau tara di tekra ponmasei taruda, kan jen talen neng ton popi. Tonda, ukupsei dingeda, kan melimna ngebo, Het yala ngebo, er si Uria peda jen di popipa depu.” Yoab dokotepu ngebodi, Raja Daud tep yana lap pepu.

25 Yoabdi peipmau upu, kai perbenmau ngebo tep Dauddi peipu. “Yoab er kange mun kange doupmare ngeda, ‘Telep kupkamar do?’ tenen, apeipkuken upuda, Yoab damai tep tamupra perbenkurume. Yoab korida bena upepkamarume. ‘Kao, Raba mutu nengdi akupmangunge tep, Yoab kan kwardana gume. Tonda, podanaida telep neng pe, tali neng peda, portamnunge. Nimi ukupra poramnung keca cadi, ange tep nengeda, kange mun kange douna gume. Ange gum dinin, kan adipapu puto doupramumdi, puto dipu Raba mutu ati arum pe, amutu nesala peda popra gawal dakurume,’ pepra, peipkurume,” Dauddi aupu pepra deipupa, Yoabdi dokotepu ngebo gekepudi, tamupra lap perbeu.

26 Uda, aupu konum bena lap peipu pangeda, yuk nengdi, Uria popmaipa depmaunge tep, er ner Batsyeba bena lap pepipa, gekepudi, bicau kupupa, engepu. 27 Angebo depmaunge tep, mambul kange doupra engenmainge cap, ayuma kuramya konum kupu pangeda, Dauddi er nyapu tep peipupa, sundi Batsyeba doupra er damai duyai. Duyai pangeda, Dauddi Batsyeba dopupa, kuramreiyanen, sal mi deiprei dinin, Allah er si Yahwehdi Daud akupunge yuma tep nengeda, ‘Raja Daudda, ila mali keca konum kupmare,’ tenepu.